Apokalipsisi
1 I ambe jindeesti ambe enga tata Jesukristu mítetarpikia,* ka Tata Diosïsï íntskuti ini ambe para exeraani Tata Diosïiri jántspiriichani ambe enga no ióni jimbo úkuarhiaka. Tata Jesukristu axaspti imeeri ánjelini para aianguni Juanuni, enga jindeeka Tata Diosïiri* jántspiri, ambe enga arhikuekajka i ambe enga úkuarhiaka. 2 Ka Juanu uandantasti ambe enga Tata Diosï uandaka* ka ístu ambe enga tata Jesukristu uandantaka, jo, uandantasti ambe enga xáni exeka. 3 Tsípisïndi ima enga arhikuantajka máteruechani ambe enga sánderu orhepatini úkuarhiaka ka tsípisïndiksï imeecha engaksï kurhandijka ka engaksï ísï újka eska jimini na karakata jaka, jimboka axuterku jarhaskia inde jurhiatikua enga uaxastakata jaka.
4 Ji Juanu, karakuaxaka imani siete kúnguarhikuechani engaksï Asiaisï jaka:
Ji kómarhisïnga eska Tata Diosï “ima enga jaka ka enga japka ka enga jurhani jaka”, kánikuaksïni kóndentaaka* ka eskaksïni pínandikua íntskuaka, ka ístu ima siete espirituecha engaksï imeeri kʼéri uaxantskuarhu* orhepatini jaka, 5 ka ístu tata Jesukristu, Testigu enga Mintsinharhikueka, ima enga Orheta tsíntaka* ka enga Juramukuajka parhakpini anapu juramutiichani.
Ima engajtsïni xénchajka ka engajtsïni pʼímutantaka juchaari pekaduecheeri imeeri iurhiri jingoni 6 ka enga úka eskachi jucha juramutiipiringa ka eskachi saserdotiipiringa para imeeri Tata Diosï ka Taati. Eska kʼéri ambe arhinhaaka ka eska uinhapikua jatsiaka para méntkisï. Eska ísï úkuarhiaka.
7 ¡Exe je! Nubeecharhisï juuati ka iáminduechaksï exeati, asta imeecha jamberi engaksï lansa jimbo ataka; ka iámu parhakpini anapu ireteechaksï* uánheati imani jimbo xáni no sési pʼikuarherani. Jo, eska ísï úkuarhiaka.
8 “Ji jindeeska Alfa ka Omega,* ísï uandasïndi Tata Diosï Jeoba, ima enga jaka ka enga japka ka enga jurhani jaka, ima enga iámindu ambe újka úni”.
9 Ji Juanu, chaari erachiiska* ka ísï eska chá, jíjtuni no sési kánhasïnga* ka jíjtuni chánksïni jingoni pʼiuaka reinu ma ka májkueni tekaantasïnga eska chá jimbokani Jesúsiiri chúxapatiiska. Ji islarhu ma jarhaspka enga Patmosi arhinhajka jimbokani Tata Diosïiri ambe uandantasïnga ka jimbokani jurhimbikua ambe uandantasïnga Jesúsiiri ambe. 10 Espiritu santurini páspti Tateeri jurhiatikua jimbo ka kurhaaspka engareni nema tátsepanisï uinhachachini japka, ka ísï kurhaakuarhisïreendi komueska trompeta ma, 11 ka ísï uandasïreendi: “Kara sïrandarhu ma* ambe engari exeni jaka ka axakua ini siete kúnguarhikuechani: Éfesuni, Esmirnani, Pérgamuni, Tiatirani, Sardisini, Filadelfiani ka Laodiseani”.
12 Ji pʼirhikuarhespka parani exeni nérinisï uandajpani japi, ka engani pʼirhikuarhepka, siete kandela jatakuechani exeaspka engaksï orueriipka. 13 Ka kandela jatakuecharhu terujkani, ji exespka eska jima jarhaspka nema enga xáxepka komueska achamasïiri uájpa ma enga xukuparhakua ma jukarini japka ka enga jantsiriicharhu jamberi niárakuenga, ka kʼénhikuarhu jónguarhikua ma jukarixapti enga orueriipka. 14 Ka ístu, iámu uraptsïspti ka iámu tʼuputʼupuntsïspti komueska sununda* urapiti ka komueska iéstakua, ka imeeri éskuechaksï ísïispti komueska chpiri. 15 Imeeri jantsiriichaksï ísïispti komueska kobri enga sési ambarhekata jakaia ka enga meremerexeni jarhajka jornarhu, ka imeeri uandakua ísï kurhaakuarhisïreendi enajki kánikua itsï iurheni japi.* 16 Imeeri jájki jurhijkandani jimbo, siete jóskuechani kaaxapti, ka imeeri penchumikuarhu espada ma uéraxapti enga tsimapuru ateenga, kánikua ióskaspti ka sési uarhomukukata jarhaspti, ka imeeri kánharhikua ísïispti komueska jurhiata enga uinhamu tsándeni jarhajka. 17 Ka engani exepka, kuarhatsespka ka imeeri jantsiriicharhu niáreeraspka, ísï niraspka enajkini uarhipia.
Ka imarini pʼárhispti imeeri jájki jurhijkandani jimbo ka arhisptirini: “Asï ché. Ji jindeeska Ima enga Orheteeka ka Últimu, 18 ka enga irekani jaka. Uarhispkia, joperuni iásï irekaxakaia para méntkisï, ka ji kaaxaka uarhikuarhu anapu ka Tumbarhu* anapu iabeechani. 19 Ísï jimbo, kara ambe engari exeka, inde ambe enga iásï úkuarhini jaka ka ístu ambe enga ísï tátsekua úkuarhiaka enga na i ambe úkuarhiakia. 20 Inde siete jóskuecha engari tʼu exeaka juchiiti jájki jurhijkandani jimbo ka inde siete kandela jatakuecha engaksï orueriika, ambe máesti enga Tata Diosïiriika* ka ini ambeksïsï arhikuekajti: inde siete jóskuechaksï ánjeliichani arhikuekaasïndi engaksï siete kúnguarhikuecharhu jaka ka inde siete kandela jatakuechaksï siete kúnguarhikuechani arhikuekaasïndi.