Apokalipsisi
14 Jimajkani exespka Karichi sapichuni Sioni juátarhu anhandetini jarhani ka imani jingonksï jarhaspti 144 mili engaksï tsʼérukuarhu jukarini japka imeeri nombrini ka ístu Taati jémbeeri nombrini. 2 Kurhaaspka ambe ma auandarhu uératini; ísï kurhaakuarhispti enajki kánikua itsï iurheni japi* ka enajki uinhamu charanchipi. Ambe engani kurhaapka, ísï kurhaakuarhisïreendi eskaksï pireriicha engaksï arpa kústani jarhajka jiáni engaksï pireni jarhajka. 3 Imeechaksï pirexati kʼéri uaxantskuarhu* japarini ka tʼámu kerubiniichani japarini ka ístu orhejtsïkutiichani japarini, ka ísï kurhaakuarhisïreendi enajkiksï jimbanhi pirekua ma pireni jaki. No nema úsïndi jorhenguarhini indeni pirekuani, imeechajkuksïsï újti jorhenguarhini engaksï jindeeka 144 mili ka engaksï echerirhu piánhantaka. 4 Iichaksï imeesti engaksï no méni jámaka ísku jándikua ambe niátani uarhiitiicha jingoni, pímbinhasïistiksï. Íksï imeesti engaksï Karichi sapichuni nirani jaka chúxapani nani uéjkisï nirani. Parhakpinirhuksï piánhantasti komueska orheta frutu enga pʼikunhantajka para Tata Diosï ka para Karichi sapichu. 5 Nóksï méni niárasti chkuanderani; no ma ambeksï no sési exeminhasti.
6 Exeska máteru ánjelini enga auandarhisï* kárani japka. Ambakiti aianhperakua ambe kámaxapti engaksï jindeeka para méntkisï ka aianguapirindi imeechani engaksï echerirhu irekani jaka: iámindu kʼérati iretarhu anapuechani, kʼumanchikuarhu* anapuechani, imeechani engaksï táchani jásï idioma uandajka ka iretarhu anapuechani. 7 Ísï uandasïreendi uinhachaparini: “Chénharhi je* Tata Diosïni ka kʼéri ambe arhi je jimboka niáraskia jandora para ima jusgarpini. Ísï jimbo, kómarhi je imani enga úka auandani, echerini, marini ka enga iámu itsïni úka”.
8 Ísï tátsekua, jurhaspti máteru ánjeli, ini jingonksï tsimaniisptia ka uandasïreendi: “¡Kʼamajkunhastia! ¡Kʼéri Babilonia kʼamajkunhastia! Inde enga íntsaaka iámindu kʼérati ireteechani indeni binuni enga újka eskaksï ísku jándikua ambe únchaaka”.*
9 Máteru ánjeli chúngumaaspti, ini jingonksï tanimuesptia; uandasïreendi: “Enga nema kómarhiska no sési jásï animalini ka imeeri imajenini ka mínda jatsikunhani tsʼérukuarhu o jájkirhu, 10 ístu auati indeni binuni enga jindeeka Tata Diosïiri ikiatapu, binu kopa ma jimbo jatsiranhaati ka no ma ambe jingoni jeuetanhaati, inde kopa jindeesti imeeri ikiatapu, ka chpiri ka asufri jingoni no sési pʼikuastanhaati pímbinharhati ánjeliichani japarini ka ístu Karichi sapichuni japarini. 11 Sïraata no sési pʼikuastauati para méntkisï. Ka imeecha engaksï kómarhijka no sési jásï animalini ka imeeri imajenini ka ístu imeecha engaksï imeeri nombrini ísï jukaka komueska mínda ma, nóksï méni mintsikuarhiati nijtu chúrikua ka nijtu jurhiakua. 12 Jimboksïsï pímbinharhatiicha, imeecha engaksï újka ambe engaksï uandajka Tata Diosïiri mandamientuecha ka engaksï méntkisï mintsikajka Jesúsini,* jatsiti para tekaantani”.
13 Ka kurhaaspka nemani auandarhu uératini uandani: “Kara ini ambe: ‘Iásï para orhepatini, tsípiatiksï Tateeri chúxapatiicha engaksï niáraska uarhini; jo, ísï uandasïndi espiritu, eskaksï mintsikuarhiakia ka eskaksï nóteru uaakia indeni úkua ambe enga xáni kuatajkuajka, jimbokaksï pájtakuarhiska ambe engaksï xáni úkaʼ”.
14 Jimajkani exespka uraurasï* nube ma, ka jima uaxakatixapti nema enga xáxepka eska achamasïiri uájpa ma; ka korona ma jukajtsïspti orueri ka jósa ma kámaxapti jájkirhu enga uarhomukukata japka.
15 Templurhu anapu santuariu jimbo, uéraspti máteru ánjeli ka ísï uinhachakuspti imani enga nuberhu uaxakatini japka: “¡Ueenia úrani jósani, pʼikuntsïa jimboka niáraskia tiempu para uarhotani ka pʼikuntskua sési tsïristia echerirhu!”. 16 Ka ima enga nuberhu uaxakatini japka, echerirhu inchajpaspti jósani ka echeri uarhotanhaspti.
17 Ka templurhu anapu santuariurhu enga auandarhu jaka, uéraspti máteru ánjeli; imajtu jósa ma kámaxapti enga uarhomukukata japka.
18 Ka altarirhu uéraspti máteru ánjeli enga juramukuenga chpirini. Ka uinhachakuspti imani enga jósa uarhomukukatani kámani japka ka arhispti: “¡Ueenia úrani jósani enga uarhomukukata jaka ka echerirhu pʼikuntsïa ubasïni jimboka sési niniskia!”. 19 Ánjeli inchajpaspti jósani echerirhu ka pʼikuspti echerirhu anapu ubasïni ka jima kʼuaninhaspti nani enga ubasï tsitandunhajka enga jindeeka Tata Diosïiri ikiatapu. 20 Iretarhu uéramanisï tsitandunhaspti uba, ka iurhiri uéraspti jima enga ubasï tsitandunhajka, ka xáni kániispti iurhiri enga jamberi kabaiuechani frenuecharhisï niárakuauenga ka ma 296 kilometrisï* iurhespti.