Mateu
20 ”Jimboka auandarhu anapu Reinu, ísïisti eska achamasï ma enga echeri ma jatsikuarheka nani enga ubasï jukajka ka enga xarhentku nirajka jirinhaantani kʼuiripuechani paraksï imeeri echeri jimbo ánchikuarhini. 2 Ka enga na pakatperapkia ánchikuarhiriichani jingoni eska ma denariu* maiamuapiringa ma jurhiatikua jimbo, axaaspti imeeri echeri jimbo. 3 Ka ménderu uéraspti nuebisï* tsípa anapu, ka merkadurhisï, exeaspti máteru kʼuiripuechani engaksï ísku japka jimbokaksï no jatsispka ánchikuarhita. 4 Ísï jimbo, arhiaspti: ‘Chájtu ní je ánchikuarhini juchiiti echeri jimbo nani enga ubasï jukajka ka jíksïni maiamuaka na enga xáni sésku jauaka’. 5 Ka imeechaksï niraspti ánchikuarhini. Achamasï ménderu uéraspti teruxutinisï* ka ménderu tresisï* ka exeaspti máteru ánchikuarhiriichani. 6 Últimu, ménderu uéraspti sinkisï* ka exeaspti máteruechani engaksï ísku japka anhandetini. Ísï jimbo, kurhamarhiaspti: ‘¿Andijtsïsï chá chúskuta ísku jarhani?’. 7 Imeechaksï arhispti: ‘Jimbokajtsïni no nema íntskuxaka ánchikuarhita’. Achamasï arhiaspti: ‘Chájtu ní je ánchikuarhini juchiiti echerirhu nani enga ubasï jukajka’.
8 ”Enga na chúripkia, ima achamasï enga ubasï jatsikupka, arhispti maiordomuni: ‘Ióarhia ánchikuarhiriichani ka maiamua. Imeechani orheta maiamua engaksï últimu janoka ka tátsekua imeechani engaksï orheta niáraka’. 9 Engaksï na niárapka imeecha engaksï sinkisï ueenapka ánchikuarhini, mándani arhinksï ma denariu maiamunhaspti. 10 Jimboksïsï imeecha engaksï orhetku niárapka ánchikuarhini eratseni japti eskaksï sánderu maiamunhapiringa, joperu imeechajtuksï ma denariu maiamunhaspti. 11 Engaksï na maiamunhapkia, ueenasptiksï no sési ambe uandani ima achamasïiri ambe enga ubasï jatsikupka 12 ka arhisptiksï: ‘I kʼuiripuecha engaksï últimu niáraka, ma orajkuksïsï ánchikuarhiti ka tʼuri májkueni maiamuaxaka eska juchantsïni engachi chúskutaka uinhamu ánchikuarhini ka xáni tsándu’. 13 Joperu achamasï arhispti ánchikuarhirini ma: ‘Amigu, jíkeni no no sési úchixaka. Pakatperaskachi eskakeni ma denariu maiamupiringa, ¿no ísïiski? 14 Pʼíkia sentabu engakeni íntskuni jaka ka níia níntani. Uékasïnga májkueni maiamuni imani enga últimu janoka ánchikuarhini ísï eska tʼungini. 15 ¿Andi ji no uaa úni ambe engani uékaaka imani ambe jingoni enga juchiitiika? ¿Ori no sési exesïni* jimbokani ji sési kaasïnga máteruechani?’. 16 Ísï jimbo, imeecha engaksï últimueka, orheteuatiksï ka imeecha engaksï orheteeka, últimueuatiksï”.
17 Engaksï karhamani japka para Jerusaléni niárani, Jesúsi támu páaspti imeeri 12 chúxapatiichani ka xanharu jimbo arhiaspti: 18 “Exe je, Jerusalénchi karhamaxaka ka jini Achamasïiri Uájpa kʼérati saserdotiicheeri ka karariicheeri jájki jimbo jurajkunhaati ka imeechaksï juramuati eska uándikunhaaka 19 ka imani kʼuiripuecheeri jájki jimbo jurajkunhaati engaksï no Israeli anapueka ka imaksï teresmarhuati, kʼuikirhiatiksï ka chkarirhuksï ma cháparhataati; ka tanimu jurhiatikua jimbo tsítanhantaati”.*
20 Jimajkani, Sebedeu uájpeecheeri amamba, andarhieraspti Jesúsini imeeri tsimani uájpeechani jingoni ka tinguixurhikuspti* para kurhakuni ambe ma. 21 Jesúsi kurhamarhispti: “¿Amberi uékasïni?”. Uarhiiti arhispti: “Juramu eskaksï juchiiti tsimani sapiicha* tʼungini jingoni uaxakaaka chiiti Reinurhu, ma chiiti jurhijkandani jimbo ka máteru uikixkandani jimbo”. 22 Jesúsi uandaspti: “Chájtsï no míteska ambe engajtsï kurhajkuarhini jaka. ¿Andi chá uaa imani kopa jimbo itsïmani engani ji no ióni jimbo itsïmaaka?”. Ka imaksï arhispti: “Jo, uaakachi”. 23 Jesúsi arhiaspti: “Jo, chájtsï juchiiti kopa jimbo itsïmaaka, joperuni no jísïni uandajka néksï uaxakaa juchiiti jurhijkandani jimbo ka uikixkandani jimbo. Imaksïsï uaxakaati jima né enga juchiiti Taati míndakia”.
24 Engaksï máteru 10 chúxapatiicha mítepka ini ambe, kánikuaksï ikiaspti imani tsimani ermanuecha jingoni. 25 Joperu Jesúsi iáminduechani tánaantaspti ka arhiaspti: “Míteskajtsï eskaksï iretarhu anapu juramutiicha imeecheeri jájki jimbo jatsiska iretani ka eskaksï kʼérati achamasïicha juramukuasïnga kʼuiripuechani. 26 Chájtsï no jatsiska para ísï kámberani. Sánderu sési, ima enga uékaaka sánderu kʼéri ambeeni, jatsisti para máteruechani jántspikuani 27 ka ima enga uékaaka orheteeni chánksïni jingoni, jatsisti para máteruechani jántspikuani. 28 Ka i ambesï úti Achamasïiri Uájpa. Ima no jurhasti paraksï marhuakuni sino para máteruechani marhuakuani ka para íntspini imeeri tsípikuani* para uánikua kʼuiripuechani euajpiantani”.
29 Engaksï na uéntani japkia Jerikó uératini, uánikua kʼuiripuechaksï chúxapaspti. 30 Ka tátsekua, tsimani kʼuiripuecha engaksï no ueenga exeni, xanharu jimboksï uaxarhuspti ka engaksï kurhaapka eska Jesúsi jimeesïsï nitamaxapka, uinhachasptiksï: “¡Tata, Dabidi Uájpa, pʼamojkujtsïni sáni!”. 31 Jimajkani kʼuiripuechaksï xukaaspti ka arhiasptiksï eskaksï pínasku japiringa, joperu imeechaksï sánderu uinhachasïreendi: “¡Tata, Dabidi Uájpa! ¡Pʼamojkujtsïni sáni!”. 32 Ísï jimbo, Jesúsi anhaxurhispti, ióarhiaspti imani tsimani kʼuiripuechani ka kurhamarhiaspti: “¿Ambejtsï uékasïni eskani uaaka chánksïni jimbo?”. 33 Imeechaksï arhispti: “Tata, jarhuatajtsïni parachi úni exeni”. 34 Ka Jesúsi mintsita jingoni pʼamojkuaspti ka pʼánharhikuaspti ka imeechaksï jirejiresï ueenaspti exeni ka nirasptiksï chúxapani.