Úkuecha
9 Joperu Saulu útasï chéraaxapti Tateeri chúxapatiichani ka uékasïreendi uándikuani.* Jimbosï nípti sánderu kʼéri saserdotini exeni 2 ka arhispti eska sïranda ma úkupiringa para ima Damasku páni, jima engaksï judiuecha tánguarhijka para Tata Diosïni kómarhini, ka ini sïranda jingoni, úpirindi jupiani iámindu imani acheetiichani ka uarhiitiichani engaksï Tateeri Xanharurhu jámeenga ka para Jerusaléni paani.
3 Ka enga niárani japkia Damasku, ma repentku tsónhastaspti auandarhu anapu tʼíntskua ma, 4 ima kuarhatsespti ka kurhaaspti enga nema arhipka: “Saulu, Saulu, ¿andirenisï xáni no sési kámani jaki?”. 5 Ka Saulu kurhamarhispti: “¿Tata, neeskiri?”. Ka ima arhispti: “Jesúsiiska. Ima engari tʼu xáni no sési kámani jaka. 6 Joperu jauaria ka ní iretarhu inchaakuni ka jimaksïni arhiati ambe engari jatsika para úni”. 7 Ka ima achamasïicha engaksï imani jingoni nirani japka, ískuksï pakaraspti ka nóksï jamberi úsïreendi uandani jimbokaksï kurhaaxapka eska nema uandaxapka, joperuksï no nemani exesïreendi. 8 Saulu jauaraspti joperu no ma ambe exesïreendi nájkiruka éskani japka, jimboksïsï jupijtatini pápti Damasku. 9 Ka tanimu jurhiatikua jimbo, méntku no ma ambe exespti ka ístu no ma ambe arhaspti nijtu itsïmani.
10 Ka Damasku, Jesúsiiri chúxapati ma jarhaspti enga Ananíasi arhinheenga, ka jánhaskua ma jimbo, Tata arhispti: “¡Ananíasi!”. Ka ima arhispti: “¿Ambe úskia Tata?”. 11 Ka Tata arhispti: “Jauara, ní imani xanharu jimbo enga arhinhajka Jurhimbiti ka ní Judasïiri kʼumanchikuarhu ka Sauluni kurhanguarhi, achamasï ma enga Tarsu anapueka. Ima iáiasï kómarhixati 12 ka jánhaskua ma jimbo exesti eska achamasï ma enga Ananíasi arhinhajka inchasïnga ka eska pʼájtsïkusïnga para ima úni ménderu exeni”. 13 Joperu Ananíasi arhispti: “Tata, uánikua kʼuiripu jarhasti enga mámaru ambe uandajka inde achamasïiri ambe ka ístu na enga xáni no sési kámakia chiiti iretani jini Jerusaléni. 14 Ka kʼérati saserdotiichaksï íntskusti juramukua para ixújtu jupiani* iámindu imeechani engaksï mintsikajka chiiti nombrini”. 15 Joperu Tata arhispti: “Ní, jimbokani indeni achamasïni erakuska para juchiiti ambe uandantani ireteecharhisï, ístu para juramutiichani aianguani ka Israeli uájpeechani. 16 Ka ji exeraaka na enga xáni no sési nitamakuarhiaka juchiiti nombri jimbo”.
17 Ísï jimbo, Ananíasi niraspti, inchaakuspti kʼumanchikuarhu, tátsekua pʼájtsïkuspti ka arhispti: “Erachi* Saulu, Jesúsi,* ima engakeni xanharu jimbo xarhachika engari jurhani japka, axastireni parakari tʼu uaaka ménderu exeni ka parakeni Tata Diosï íntskuni imeeri espiritu santu”. 18 Ka ima jirejiresï jupinharhiantaspti chésïini* járhatiichani ka úsptia ménderu exeni. Jimajkani jauaraspti ka itsï atasptiksï,* 19 tátsekua tʼirespti sáni ka uinhapintaspti.
Ka Damasku pakaraspti namuni jurhiatikua Jesúsiiri chúxapatiichani jingoni engaksï jima japka 20 ka jirejiresï ueenaspti uandantani Jesúsiiri ambe jima engaksï judiuecha tánguarhijka para Tata Diosïni kómarhini, ka uandasïreendi eska Jesúsi, Tata Diosïiri Uájpeeska. 21 Joperu iámindu ima kʼuiripuecha engaksï kurhajcheenga, ískuksï pakarasïreendi ka uandasïreendiksï: “¿Andi no i jindeeski achamasï enga xáni no sési kaani japka jini Jerusaléni imeechani engaksï indeni nombrini mintsikeenga? ¿Andi no jurhaspi para jupiani ka para kʼérati saserdotiichani jingoni paani?”.* 22 Joperu Saulu sánhani arhixapti sánderu sési jorhentpini ka ísku pakataasïreendi judiuechani engaksï Damasku irekapka, jimboka sési arhistakuasïreenga paraksï ima kurhanguni eska Jesúsi jindeeska Kristu.
23 Joperu ísï ióni jimbo, judiuechaksï uékasïreendi uándikuni. 24 Ka Saulu niáraspti míteni eskaksï uékasïreenga uándikuni, ka jimbokaksï imeecha jurhiakua ka chúrikua kuáni jarhasïreenga puertani paraksï uándikuni, 25 imeeri chúxapatiichaksï chúrikua niraspti pʼirani, ka kʼéri bardarhu, bentana ma jukaspti ka jimeesïsïksï késkuntaspti xúndi ma jingoni.
26 Enga na niárapkia Jerusaléni, ima jámaspti kúrhiani Jesúsiiri chúxapatiichani, joperuksï iáminduecha chérhisïreendi jimbokaksï no jakajkusïreenga eska imajtu Jesúsiiri chúxapatiispkia. 27 Ísï jimbo, Bernabé niraspti jarhuatani ka apostoliichani jingoni páspti. Tátsekua sési aianguaspti iámindu ambe, na enga Saulu xanharu jimbo exepka Tatani ka eska Tata imani jingoni uandontskuarhespka, ka ístu aianguaspti na enga Saulu no sáni chéparini aianhpipka Jesúsiiri nombri jimbo jini Damasku. 28 Ísï jimbo, Saulu imeechani jingoni pakaraspti ka iámu Jerusalénisï jámasïreendi* ka no sáni chéparini jámasïreendi aianhpini Tateeri nombri jimbo. 29 Uandontskuarhesïreendi ka arhirperasïreendi imani judiuecha jingoni engaksï griegu uandeenga. Joperuksï imeecha uánikua xanhari uékaspti uándikuni. 30 Engaksï erachiicha niárapka míteni ini ambe, Sesareaksï páspti ka tátsekuaksï Tarsu axaspti.
31 Ísï jimbo, iámindu kúnguarhikuarhu anapuecha engaksï Judea, Galilea ka Samariaisï japka, úndasptiksï pínandikua jatsini ka uíuinhasïksï jarhasptia. Ka sánderuksï uániixaptia jimbokaksï chénharhisïreenga* Tata Diosï Jeobani ka ístu jimboka espiritu santu sési pʼikuastaantasïreenga.
32 Ka jimboka Pedru iámu imani ireteecha jimbo jámaxapka, kétsemaspti para ístu nirani pʼorhembiani imani erachiichani* engaksï Lida irekani japka. 33 Jima, acheetini ma exespti enga Eneasi arhinheenga, ima no úsïreendi manakuarhini ka ochu uéxurhiniisptia enga ísku apojtsïkupka. 34 Ka Pedru arhispti: “Eneasi, tata Jesukristukenisï ambakerantani jati. Jauara ka sési peentia chiiti kamani”. Ka ima jirejiresï jauaraspti. 35 Ka iámindu imeecha engaksï Lida irekapka ka ístu imeecha engaksï Saróni pákua jimbo irekapka, niárasptiksï exeni ini ambe ka jakajkusptiksï Tatani.
36 Ka uarhiiti ma jarhaspti Jope, enga Jesúsiiri chúxapatiipka ka Tabita arhinhasïreendi enga griegu jimbo jindeeka Dorkasi.* Ima ambakiti ambe úsïreendi ka kánikua jarhuataasïreendi imeechani engaksï uétarhinchani jarheenga.* 37 Joperu imani jurhiatikuechani jimbo, pʼamenchaspti ka uarhispti. Ísï jimbo, juparhisptiksï imeeri kuerpuni ka kuarturhuksï ma peeraspti enga kʼumanchikuarhu karhakua japka. 38 Ka ireta Lida, Jope no iauani jarhaspti, ísï jimbo, engaksï chúxapatiicha mítepka eska Pedru imani ireta jimbo jámaxapka, tsimani acheetiichanksï axaaspti paraksï arhini Pedruni: “Ju kókuani sáni”. 39 Pedru jirejiresï jauaraspti ka imeecha jingoni niraspti. Enga na niárapkia, imani kuarturhuksï páspti enga kʼumanchikuarhu karhakua japka ka iámindu tsïndiichaksï ueparini niraspti andarhierani Pedruni ka exerasptiksï iámu takusï ambe* enga Dorkasi úpka jiáni enga útasï tsípiti japka. 40 Jimajkani Pedru iáminduechani arhiaspti eskaksï uéntapiringa, tátsekua tinguixurhispti ka kómarhispti Tata Diosïni. Ka tátsekua exespti uarhirini ka arhispti: “Tabita, ¡jauara!”. Jimajkani ima éskantaspti ka enga na exepka Pedruni, jirejiresï jauaraspti. 41 Ka Pedru jájki íntskuspti para ima úni jauarani. Tátsekua uandajpaaspti erachiichani* ka tsïndiichani ka iáminduechaksï exespti eska Tabita ménderu tsípiti jarhaspkia. 42 Ka iámindu Jope anapuechaksï niáraspti míteni ini ambe ka uánikua kʼuiripuechaksï jakajkuspti Tatani. 43 Pedru ióni sáni pakaraspti Jope, Simóniiri kʼumanchikuarhu. Simóni acheeti máespti enga sïkuiri ambakereenga.