Galasia
6 Erachiicha,* enga jauaka kʼuiripu ma enga no sési ambe niátani jauaka ka no kuenta íntskukuarheni jarhani, chá engajtsï újka ambe enga espiritu santu uandajka, iatsitakuarhu jarhuata je* imani kʼuiripuni. Joperu chá, xéparini jáma je mándani arhini parajtsï no chájtu tsʼéjkunhani. 2 Seguirii je jarhuajperani engajtsï uandanhiata ambe jatsiaka ka ísïjtsï úni jauaka ambe enga Kristueri lei uandajka. 3 Jimboka, enga nema eratsejka eska kʼéri ambeeska ka jini no ma ambeeni, jandiajku tontu úkuarhixati. 4 Joperu mándani kʼuiripu jatsisti para exeni ambesï úni jaki ka jiáni kʼóru sési pʼikuarheraati enga exeaka ambe enga úni jaka, joperu no jatsisti para máteru kʼuiripuni jingoni terukukuarhintani jarhani. 5 Jimboka mándani kʼuiripu jatsiska para miákuarhini jarhani ambe enga uaaka.
6 Ístu, ima enga jorhendanhani jaka Tata Diosïiri uandakuani jatsisti para ambakiti ambe intsïmbini imani enga jorhendani jaka.
7 Asï tontu úkuarhi je: no nema úsïndi Tata Diosïni chʼanakuni. Jimboka ambe enga kʼuiripu ma jatsintaaka, indeni ambesï pʼikuntaati. 8 Ima enga jatsintajka ambe ma, imani ambe úparini ambe enga kuerpu tsitijka, uarhikuani pʼikuntaati,* joperu ima enga jatsintajka ambe ma, imani ambe úparini ambe enga espiritu santu uéjka, tsípikua para méntkisï pʼikuntaati. 9 Ísï jimbo, ju je seguiriini jarhani sési ambe úni, jimboka engachi no kuatantaaka, niáraati ima jurhiatikua* engachi pʼikuntaaka. 10 Ísï jimbo, na engachi jatini uaaka, ju je jarhuataani iáminduechani joperu sánderumindia juchaari erachiichani, jimbokachi juchajtu májkueni mintsikasïnga.
11 Exe je na engaksïni xáni kʼérati karachika ka juchiiti jájki jingonksïnisï karachika.
12 Imeecha engaksï fuersa újka parajtsï chá pasïri pʼikujtsïkuni tsʼiuerakuani,* uékasïndiksï sési pakarani kʼuiripuecha jingoni.* Joperuksï ima ísï jámasïndi paraksï no no sési kánhani Kristuni jimbo.* 13 Jimbokaksï ni imeecha jamberi engaksï pasïri pʼikujtsïkujka tsʼiuerakuani újki ísïmindu úni eska Lei na uandajka, joperuksï kʼóru uékasïndi eskajtsï chá pasïri pʼikujtsïkuaka tsʼiuerakuani, paraksï ima úni arhikuarhini indeni ambe jimbo engajtsï chá úkuka chaari kuerpuni. 14 Joperuni ji no méni uékapiringa arhikuarhini, indeni jimbojkusïni arhikuarhijka enga juchaari Tata Jesukristu uarhika chkarirhu ma enga jindeeka para no sési nitamakuarhini, ka indeni jimbo enga ima ísï uarhika, para ji i parhakpini uarhistia* ka jíjtuni uarhiskia para parhakpini. 15 Jimboka no indesï uétarhijka eska kʼuiripu ma pasïri pʼikujtsïkuaka tsʼiuerakuani o eska no pʼikujtsïkuaka, sánderu sési, ambe enga uétarhijka jindeesti jimbanhi kueraakata máeni. 16 Eskaksï pínandikua jatsiaka ka eska pʼamojkunhaaka Tata Diosïiri Israeli, jo, iámindu imeecha engaksï ísï irekani jaka eska na terukuntajka ini eratsekua jingoni.
17 Ka iásï para orhepatini nóteruni uékasïngia eskajtsïni no sési arhini jauaka, jimbokani pʼinderiichani* jukaaska juchiiti kuerpurhu indeni jimbo engani ji Jesúsiiri jántspiriika.
18 Erachiicha, eskaksïni juchaari Tata Jesukristu kánikua kóndentaaka jimbokajtsï ambakiti mintsita ma jukaska. Eska ísï úkuarhiaka.