Mateu

26 Enga Jesúsi na uandapkia ini ambe, arhiaspti imeeri chúxapatiichani: 2 “Eskajtsï chá na mítekia, tsimani jurhiatikua jimbo úkuarhiatia Paskua ka Achamasïiri Uájpa kʼuiripuecheri jájki jimbo jurajkunhaati ka chkarirhu ma cháparhatanhaati”.

3 Jimajkani, kʼérati saserdotiicha ka iretarhu anapu orhejtsïkutiichaksï tánguarhintaspti Kaifásiiri kʼumanchikuarhu ekuaru, ima jindeespti sánderu kʼéri saserdoti, 4 ka iáminduechaksï ueenaspti uandontskuarheni nénaksï jámapirini para jupikani Jesúsini ka uándikunksï. 5 Joperuksï uandaspti: “Jurajku orheta kʼuínchikua nitamani paraksï no kʼuiripuecha ueenani no sési jámani ka tátsekua no sési jánhaskuarhini”.

6 Enga Jesúsi Betania japka, Simóniiri kʼumanchikua jimbo, ima enga lepra pʼamenchapka, 7 uarhiiti ma andarhieraspti enga jatakua sapichu ma kámani japka enga tsakapu urapiti jingoni úkata japka.* Ima jatakua sapichu uinirixapti aseiti enga kánikua sési jájkundeenga ka enga kánikua jukaparhapka. Ka enga Jesúsi tʼireni japka,* uarhiiti ueenaspti éjpurhu atajtsïkuni. 8 Engaksï Jesúsiiri chúxapatiicha exepka ini ambe, kánikuaksï no sési exespti ka uandasptiksï: “¿Andisï i uarhiiti ísku ambendurhini* jaki aseiti? 9 Úpirindi kánikua sentabu jimbo ataranhantani ka imeechani íntsaani engaksï no ma ambe jatsikuarheka”. 10 Ka jimboka Jesúsi kurhajchaaspka, arhiaspti: “Asï ambe ma arhi je ini uarhiitini. Inde ambakiti ambe ústi jíndeni jimbo. 11 Jimboka imeecha engaksï no ma ambe jatsikuarheka, méntkisïksï chánksïni jingoni jauati, joperuni ji no méntkisï chánksïni jingoni jauaka. 12 Engareni i uarhiiti ísï atarhika aseiti enga sési jájkundejka, jindeesti para jiáni engani jatsinhantaaka. 13 Jíksïni sési jimbo arhisïnga eska iámu parhakpinirhu, nani uéjkisï enga uandanhantaaka ambakiti aianhperakua, ístu uandanhantaati ambe enga i uarhiiti úka ka méntkisï ísï miánhaati”.

14 Jimajkani, ima enga Judasï Iskariote arhinheenga ka enga 12 apostoliichani jingoni kuenta úkuarhienga, niraspti kʼérati saserdotiichani exeani 15 ka kurhamarhiaspti: “¿Ambejtsïni íntskua engani traisionariiska Jesúsini?”.* Imeechaksï aiakuspti 30 moneda plateeri. 16 Ka jiáni uératini, Judasï ueenaspti jirinhakuntani néna jámapirini para Jesúsini traisionariini.

17 Ka primeru jurhiatikua jimbo Kʼuínchikueri enga Kurhinda No Xarhipiti* Jukari Únheenga, Jesúsiiri chúxapatiichaksï niraspti andarhierani ka kurhamarhisptiksï: “¿Naniri uékasïni eskachi úntaaka iámindu ambe parari tʼu Paskueri tʼirekua arhani?”. 18 Jesúsi arhiaspti: “Ní je iretarhu, jinijtsï exentaaka achamasïni ma ka arhiakajtsï: ‘Jorhentpiri uandasïndi: “No ióni jimbo uándikunhaakia. Chiiti kʼumanchikuarhu úntaaka Paskueri kʼuínchikuani juchiiti chúxapatiichani jingoni”’”. 19 Ka imeeri chúxapatiichaksï úspti ambe enga ima arhiapka ka iámindu ambeksï úntaspti para Paskueri kʼuínchikua.

20 Enga chúripkia, Jesúsi uaxaparhakutixapti mesarhu imeeri 12 chúxapatiicha jingoni. 21 Ka engaksï tʼireni japka, arhiaspti: “Jíksïni sési jimbo arhisïnga eskarini chá máisï traisionariuaka”. 22 Engaksï imeeri chúxapatiicha kurhaapka ini ambe, kómu pʼikuarherasptiksï ka iáminduechaksï ueenaspti arhini: “Tata, no jiiska, ¿a no?”. 23 Jesúsi arhiaspti: “Ima enga jíndeni jingoni atarhutajka kurhinda platonirhu, ima jindeesti engareni traisionariuaka. 24 Ísïisti, Achamasïiri Uájpa níntaati ísï eska na karakata jaka imeeri ambe. Joperu, ¡lástima ima kʼuiripu enga Achamasïiri Uájpani traisionariuaka! Sánderu sési japirindi enga no andajpenupiringa”. 25 Judasï, enga ma ratu jimbo traisionariipiringia, arhispti: “Jorhentpiri, no jiiska, ¿a no?”. Ka Jesúsi arhispti: “Tʼuri míteskia”.

26 Engaksï útasï tʼireni japka, Jesúsi pʼíkuspti kurhinda ma ka enga na kómarhipkia Tata Diosïni,* arhukuspti. Íntsaaspti imeeri chúxapatiichani ka arhiaspti: “Í je, á je. I kurhinda arhikuekasïndi juchiiti kuerpu”. 27 Ístu pʼíkuspti kopa ma, diosmaiamukua arhispti Tata Diosïni ka íntsaaspti imeeri chúxapatiichani ka arhiaspti: “Ini kopa jimbo itsïma je iáminduecha, 28 jimboka i arhikuekasïnga juchiiti iurhiri, ‘iurhiri enga újka eska Tata Diosïiri pakatperakua ueenaaka jarhani’. Iurhiri enga uánikua kʼuiripuecha jimbo tsïtanhaaka paraksï puáminhaantani imeecheeri pekaduechani. 29 Joperu jíksïni arhisïnga eskani nóteruni auakia ini binuni asta jiáni engani chánksïni jingoni auaka jimbanhi binu juchiiti Taatiiri Reinurhu”. 30 Ka engaksï na pirepkia para kʼéri ambe arhini Tata Diosïni, nirasptiksï Olibusïiri juáta jimbo.

31 Jiájkani Jesúsi arhiaspti: “I chúri, iáminduechajtsïni jurajkuaka* imani ambe jimbo engani nitamakuarhiaka. Jimboka karakata jarhaska: ‘Ataaka karichi erangutini ka iámindu karichiichaksï etsandurhikuarhiati’. 32 Joperu engani na tsítanhantaakia,* ji orhepaaka jini Galilea ka jinichi exejperantaaka”. 33 Pedru arhispti: “Nájkirukaksïni iáminduecha jurajkuaka* jimbokari ísï nitamakuarhiaka, ¡jíkeni no méni jurajkuaka!”. 34 Jesúsi arhispti: “Jíkeni sési jimbo arhisïnga eska i chúri ante de tʼarhechu ma pireni, tʼuri tʼuini tanimu uelta uandaakia eskarini no míteska”. 35 Pedru arhispti: “Nájkirukani tʼungini jingoni uándikunhaaka, ji no méni uandaaka eskakeni no míteska”. Ka iámindu imeeri chúxapatiichaksï májkueni uandaspti.

36 Tátsekua, Jesúsi imeeri chúxapatiicha jingoni niraspti jini Jetsemaní ka arhiaspti: “Uaxaka je ixú, nipa ji jini kómarhini Tata Diosïni”. 37 Jimajkani páspti Pedruni ka tsimani Sebedeu uájpeechani ka ueenaspti kómu pʼikuarherani ka kánikua uandanhiani. 38 Arhiaspti: “Ji ísï pʼikuarheraxaka enajkini uarhiaia xáni uandanhiani. Ixú pakara je ka jingontku ja je jíndeni jingoni”. 39 Tátsekua jarhariaspti sáni, tinguikuatsespti ka ísï kómarhispti Tata Diosïni: “Juchiiti Taati, enga uaaka ísï úkuarhini, kénditacherini ini kopani. Joperu eska no úkuarhiaka ambe engani ji uéjka sino ambe engari tʼu uékajka”.

40 Tátsekua andarhientaaspti imeeri chúxapatiichani ka exespti eskaksï kʼuíxapka ka kurhamarhispti Pedruni: “¿Andi nójtsï úski sikiera ma ora jingontku jarhani jíndeni jingoni? 41 Jingontku ja je ka méntku únda je kómarhini parajtsï úni orhepani uérakuni tsʼéjkukuani. Ísïisti, chaari mintsita uékasïndi úni ambe enga sési jaka, joperu chaari kuerpu* no úsïndi pʼíngukuarhini”. 42 Ka ménderu niraspti kómarhini: “Juchiiti Taati, engareni no úska kénditacheni ini kopani astakani itsïmaaka, eska úkuarhiaka ambe engari tʼu uéjka”. 43 Ménderu andarhientaaspti ka ménderuksï kʼuíxapti jimbokaksï uarhixapka kʼuínchani. 44 Ísï jimbo, jima jurajkuaspti ka ménderu niraspti kómarhini para tanimu úni jámania. Ka májkueni kómarhispti. 45 Jiájkani ménderu kʼuanhatsentaspti jima engaksï imeeri chúxapatiicha japka ka arhiaspti: “¡Iásï enga i ambe úkuarhini jaka chájtsï masi arhixaka kʼuíni ka mintsikuarhini! ¡Exe je! Oreestia paraka Achamasïiri Uájpa no sési úriicheeri jájki jimbo jurajkunhaaka.* 46 Jauara je, juia je jimboka janoxakaia ima engareni traisionariuaka”. 47 Enga Jesúsi útasï ini ambe arhiani japka imeeri chúxapatiichani, jimajku niáraspti Judasï, ima enga 12 apostoliichani jingoni kuenta úkuarhienga ka ístuksï uánikua kʼuiripuecha niáraspti espada ka chkari ambe jingoni. Ini kʼuiripuechani, kʼérati saserdotiicha ka iretarhu anapu orhejtsïkutiichaksï axaaspti.

48 Joperu Judasï enga Jesúsini traisionariipka, tʼuini arhiasptia: “Imani engani ji putinharhikuaka, imantsï jupikaaka”. 49 Ísï jimbo, seguiriispti Jesúsini andarhierani ka arhispti: “¿Ixújtsï jarhaski Jorhentpiri?”.* Ka uékperakua jingoni putinharhikuspti. 50 Joperu Jesúsi arhispti: “Amigu, ¿amberi úni jurhaski?”. Jimajkani andarhierasptiksï Jesúsini ka jupikasptiksï. 51 Ka máechakua enga Jesúsi jingoni jámani japka, ma repentku pʼitajtarhaspti espadani ka ataspti sánderu kʼéri saserdotiiri jántspirini ka méntku kutsïkua pʼikueeraspti. 52 Jimajkani Jesúsi arhispti: “Inchajtarhantsï indeni espadani, jimboka imeecha engaksï espada jimbo atajpijka, espada jimboksï uarhiati. 53 ¿Andi tʼu na uandasïni? ¿No uaa kurhakuni juchiiti Taatini eskarini iáiasï uánikua* ánjeliichani axacheauaka? 54 Joperu engani ísï úpiringa, jiájkani ¿néna úkuarhipirini ambe enga karakata jakaia eska i ambe jatsiska para ísï úkuarhini?”. 55 Jimajkani Jesúsi arhiaspti kʼuiripuechani: “¿Espada ka chkariicha jingontsïni jurhaski jupikani enajkini ambe ji sïpari máe? Pauani pauani uaxakasïreenga templurhu jorhentpini ka chájtsïni no jima jupikaspka. 56 Joperu iámindu i ambe ísï úkuarhisti paraka niárapiringa úkuarhini ambe engaksï Tata Diosïiri uandakua páriicha* karapka”. Jimajkani iámindu imeeri chúxapatiichaksï jurarkuspti ka sïpakuarhisptiksï.

57 Ka imeecha engaksï Jesúsini jupikapka, Kaifásiri* kʼumanchikuarhuksï páspti enga tʼuini tánguarhintatini japkia karariicha ka orhejtsïkutiicha jingoni. 58 Ka Pedru iauani jatini chúxapaxapti ka ekuaru jamberi niáraspti sánderu kʼéri saserdotiiri kʼumanchikuarhu. Ka ísï tátsekua enga na inchaakupkia, kʼumanchikuarhu anapu jántspiriicha jingoni uaxakaspti para exeni néna uérapirini iámu ambe.

59 Kʼérati saserdotiicha ka Kʼérati Juesiichaksï* jirinhaaxapti kʼuiripuechani engaksï chkuanderakua ambe uandantapiringa Jesúsiiri ambe paraksï úni uándikuni. 60 Joperuksï no ma ambe exekuntaxapti nájkirukaksï uánikua kʼuiripuecha niárapka chkuanderakua ambe uandantani. Últimu, tsimani kʼuiripuechaksï niáraspti 61 engaksï uandapka: “I achamasï uandaspti: ‘Ji uaaka xerentani Tata Diosïiri templuni ka tanimu jurhiatikua jimbo ménderu úntani’”. 62 Jiájkani sánderu kʼéri saserdoti jauaraspti ka kurhamarhispti Jesúsini: “¿Nóri ambe ma uandaa? ¿Ísïiski ambe engaksï i kʼuiripuecha uandani jaka chiiti ambe?”. 63 Joperu Jesúsi no ma ambe uandaspti. Ísï jimbo, sánderu kʼéri saserdoti arhispti: “¡Jurhimbitkujtsïni aiangu jimboka engari no ísï úska, chkuanderakundi jauaka Tata Diosïni, imani enga tsípiti jaka! ¿Tʼu jindeeski Kristu Tata Diosïiri Uájpa?”. 64 Ka Jesúsi arhispti: “Jo, tʼuri mismu uandaxaka. Joperu jíksïni arhisïnga eska iásï uératini, chájtsï exeaka Achamasïiri Uájpani uaxakatini jarhani Tata Diosïiri jurhijkandani jimbo enga xáni uinhapitiika ka jurhani jarhani auandarhu anapu nubeecharhisï”. 65 Jimajkani sánderu kʼéri saserdoti karunhespti ka uandaspti: “¡No sési ambe uandasti Tata Diosïiri ambe! ¿Ambeteruchi úni kurhajchaua máteru kʼuiripuechani? ¡Chájtsï mismu kurhaaskia na enga no sési uandaka Tata Diosïiri ambe! 66 ¿Nájtsï exesïni chá?”. Ka iáminduechaksï arhispti: “¡Jurajku uándikunhani!”. 67 Jiájkani ueenasptiksï tʼuánharhikuni ka atani. Ka máteruechaksï páksanharhikusïreendi 68 ka arhisïreendiksï: “Kristu, engari tʼu Tata Diosïiri uandakua páriika, aiangujtsïni aberi nékini ataski”.

69 Pedru ekuaru uaxakatixapti ka uarhiiti ma enga imani kʼumanchikua jimbo jántspienga andarhieraspti ka arhispti: “¡Tʼujturi Jesúsi jingoni jámaxapka enga Galilea anapueka!”. 70 Joperu ima iáminduechani japarini uandaspti eska no ísïispka. Uandaspti: “No ísïisti, ískuri ambe ma uandaxaka”. 71 Ka enga Pedru jamukutenisï nirani japkia, máteru uátsï exespti ka arhiaspti imeechani engaksï jima japka: “I achamasï Jesúsi jingoni jámaxapti enga Nasareti anapueka”. 72 Ka Pedru ménderu uandaspti eska no ísïispka. Ka jurariispti: “¡Ji méntkuni no míteska indeni achamasïni!”. 73 Ísï tátsekua, imeecha engaksï jimeesïsï japka, andarhierasptiksï Pedruni ka arhisptiksï: “Ísïisti, tʼujturi imeechani jingoni jámasïnga jimbokari tʼujtu májkueni uandasïnga”. 74 Jiájkani Pedru ueenaspti uandani eska no sési ambe úkuarhinchapiringa enga chkuanderani japiringa ka jurariispti: “¡Ji méntkuni no míteska ini achamasïni!”. Ka jimajku pirespti tʼarhechu ma. 75 Ka Pedru míjpaaspti* ambe enga Jesúsi arhipka: “Ante de tʼarhechu ma pireni, tʼuri tʼuini tanimu uelta uandaakia eskarini no míteska”. Jimajkani uéakuntaspti ka jurajkutakuarhispti uerani xáni no sési pʼikuarherani.