Roma
14 Sési eroka je imani enga no xáni jakajkujka,* joperu asï no sési exea je imeechani engaksï no májkueni eratsejka eska chá. 2 Kʼuiripu ma enga kánikua jakajkujka, iámu ambe arhasïndi, joperu ima enga no xáni jakajkujka, xakua ambejkusï arhajti. 3 Ima enga iámu ambe arhajka, no jatsisti para no sési exeni imani enga no iámu ambe arhajka, ka ima enga no iámu ambe arhajka, no jatsisti para jusgarini imani enga iámu ambe arhajka, jimboka Tata Diosï tsípikua jingoni jiókaska imani kʼuiripuni. 4 ¿Neeskiri tʼu parari jusgarini imani kʼuiripuni enga máteru nemani jántspikujka? Imeeri patronisï jatsiti para uandani sini ima jántspiri sési ambe úxaki o nómbe, jimboka Tata Diosï Jeobasï jarhuatani jarhajka para ima orhepani uérani.*
5 Máruksï eratsesïndi eska ma jurhiatikua sánderu ambakitiiska eska máteruecha ka máteruechaksï eratsesïndi eska pauani pauani májkueniiska. Joperu mándani kʼuiripusï jatsiti para sési mítetini jarhani sini sési jarhaski ima ambe enga jakajkujka o nómbe. 6 Ima enga uandajka eska ma jurhiatikua sánderu ambakitiiska eska máteruecha, kʼéri ambe arhisïndi Tata Diosï Jeobani. Ka májkueni, ima enga iámu ambe arhajka, kʼéri ambe arhisïndi Tata Diosï Jeobani jimboka diosmaiamukua íntskuntasïnga, ka ima enga no iámu ambe arhajka, ístu k’éri ambe arhisïndi Tata Diosï Jeobani ka diosmaiamukua íntskuntasïndi. 7 Jimbokachi jucha no irekaxaka para juchajkumindu, nijtu nema uarhijki para imajkumindu. 8 Jimboka, engachi irekaska, jindeesti parachi Tata Diosï Jeobani jimbo irekani, ka engachi uarhiska, jindeesti parachi Tata Diosï Jeobani jimbo uarhini. Ísï jimbo, no arhiati engachi irekaska o engachi uarhiska, jimbokachi íntskuntaskia juchaari tsípikuani Tata Diosï Jeobani. 9 Jimboka Kristu arini ambe jimbosï uarhika ka tsíntani: para jindeeni Tata imeecheeri engaksï uarhirini jaka ka ístu imeecheeri engaksï tsípiti jaka.
10 Joperu, ¿andiresï jusgarijki chiiti erachini?* ¿O andiresï no sési exejki chiiti erachini? Jimbokachi iáminduecha Tata Diosïni japarini jauaka ka imajtsïni jusgariuati. 11 Jimboka ísï karakata jarhaska: “Ísï eskajtsï na sési mítetini jaka eskani ji tsípiti jarhaska, ísï uandasïndi Tata Diosï Jeoba, ístujtsï uaaka sési mítetini jarhani eskajtsïni iáminduecha tinguixurhichiaka ka iáminduechaksï niáraati míteni eskani ji jindeeska Tata Diosï”. 12 Jimajkani, mándani arhinchi jatsiaka para aianguni Tata Diosïni ambe engachi xáni úka.
13 Ísï jimbo, ju je nóteru jusgarperania, sánderu sési, méntkisï miá je eskajtsï no jatsiska para ójkutani jarhani erachini ma* o chá úni eska ima no sési ambe niátaaka. 14 Jimbokani ji Jesúsiiri* chúxapatiiska, ji sési mítetixaka eska tʼirekua ambe no ísku jatini niárasïnga ikichakueni jásï ambe úkuarhini. Joperu enga kʼuiripu ma niárajkia ísï exeni tʼirekua ambe komueska ikichakueni jásï ambe, jiájkani para ima no sési jarhastia imani ambe arhani. 15 Ísï jimbo, engari niáraska no sési pʼikuastani chiiti erachini imani ambe jimbo engari arhajka, nóteruri xénchpeni jarhasïngia. Jimajkani, indeni ambe jimbo engari tʼu arhajka, asï ú eska chiiti erachi nóteru jakajkuakia, jimboka Kristu ístu uarhiska imani jimbo. 16 Asï imani ambe ú engari tʼu exejka eska sési jarhaska, joperu engaksï jimbo kʼuiripuecha úpiringa no sési ambe uandani chiiti ambe. 17 Jimboka ambe enga arhajka o ambe enga itsïmajka kʼuiripu ma, no indeni jimbosï uaati inchani Tata Diosïiri Reinurhu, sánderu sési, jimboka espiritu santusï jarhuatajka para ima sési jámani, para sési pájperani máteruechani jingoni ka para tsípikua jingoni irekani. 18 Jimboka Tata Diosï jaiapanhentasïnga imani kʼuiripuni enga ísï marhuakujka Kristuni komueska jántspiri ma ka kʼuiripuechajtuksï sési exesïndi.
19 Ju je jánguarhintani jarhani imani ambe úni enga jarhuajpejka para sési pájperani máteruechani jingoni ka ístu imani ambe úni engajtsïni jarhuataaka uinhaperperantani. 20 Ka indeni ambe jimbo engari tʼu arhajka, ásteru jámia kʼamajkuni indeni ambe enga Tata Diosï úrini jakaia. Ísïisti, sési jarhasti iámu ambe arhani, joperu no sési jarhasti eska kʼuiripu ma no sési ambe úraaka máteru nemani indeni ambe jimbo enga arhajka. 21 Sánderu sésiisti no arhani kʼuiripeta ambe, nijtu arhani binu, nijtu imani ambe úni enga no sési ambe úraaka chiiti erachini. 22 Na engari exejka indeni ambe, tʼujkuresï jatsika para míteni ka Tata Diosï. Kánikuari tsípiaka engari no méntku no sési pʼikuarherani jauaka engari na uaakia imani ambe engari tʼu exejka eska sési jarhaska. 23 Ka enga kʼuiripu ma auaka ambe ma ka jini no míteni sini sési jarhaski arhani o nómbe, no sési úxatiia jimboka no míteska sini sési jarhaski o nómbe. Jimboka ima kʼuiripu enga újka ambe ma ka jini no míteni sini sési jarhaski ísï úni, pekariini jarhasïndi.