Tiempu enga nóteru nema uéjkia ambakiti jángua ma xarhatani
¿KÁNTSÏ uandapirini chá eska uénaska kʼamakurhini sési jásï jángua ambe? ¿Chaari jurhiatikuecha jimbo, o chaari familiaricheri o amiguecheri jurhiatikuecha jimbo engaksï sánderu jatiriijkia eskajtsï chá? Máruksï uandasïndi eska Primeru Kʼéri Uarhiperakuarhu enga interu Parhakpinirhu úkuarhipka, enga uénapka 1914 jimbo, jiáni kʼuiripuechaksï uénaspti no sési jángua ma jatsini. Robert Wohl, jorhentpiri Istorieri ambe karaspti imeeri librurhu The Generation of 1914 (La generación de 1914): “Enga na kʼamarapkia uarhiperata, imeecha engaksï tsípiti pakarapka, nóksï méni úspti mirikuarhini eska agostu 1914 jimbo kʼamakurhiska ma irekuarhikua ka máteru uénani”.
Istoriador Norman Cantor, ísï uandaspti: “Sési pájperakuecha engaksï kʼamakurhini japkia, jiájkanksï méni kʼamakurhispti iápurisï. Politikuecha ka generalicha engaksï no sési kámenga imeechani engaksï imeeri juramukuarhu jimbo japka, komueska animalicha engaksï axanhajka paraksï uándikunhani, ¿náki prinsipiuecha jángueri ka relijioniri ambe úpirini úni eskaksï kʼuiripuecha no kámberapiringa eska animali salbaji ma? [...] Na enga xáni uarhinhapka Primera Uarhiperata enga interu Parhakpinirhu úkuarhipka [1914-1918] úspti eska nóteru jukaparharapiringia kʼuiripueri tsípikua”.
Istoriadori H. G. Wells uandaspti imeeri librurhu Esquema de la Historia, eska jorhentperakua ebolusioniri ambe, úspti eskaksï kʼuiripuecha nóteru jatsipiringia ambakiti jángua ma. ¿Andi? Máruksï uandasïreendi eskaksï kʼuiripuecha ísïispka komueska animali uinhapiti ma. Wells, enga ebolusionistepka, 1920 jimbo karaspti: “Kʼuiripuechaksï erakuspti ísï irekani eska animali ma engaksï újka máteruecha jingoni jarhani, joperu ísï eskaksï na jámajka uíchuecha engaksï animalichani jupiajka [...], ísï jimbo sésiksï exespti eska imeecha engaksï ísïpka komueska kʼérati uíchuecha no sési kámapiringa ka juramukuani máteruechani”.
Norman Cantor uandaspti eska Primeru Uarhiperata enga úkuarhipka interu parhakpinirhu úspka eskaksï kʼuiripuecha nóteru ambakiti jángua ma jatsipiringia. Ka ístu uandaspti: “Kʼuiripu engaksï jatiripkia nóksï sési jarhaspti iámu ambe jimbo, na engaksï eratsenga politikeri ambe, na engaksï xukuparheenga ka na engaksï exenga ísku jándikueri ambe”. Ka iglesiechaksï úspti eska nóteru japiringia ambakiti jángua ma, jimbokaksï jiókuarhispka ebolosioniri ambe, ka úni eskaksï kʼuiripuecha uarhiperapiringa. Generali Frank Crozier karaspti: “Iglesiecha engaksï kristianecheka jindeestiksï engaksï úka eska sánderu uarhiperapiringa ka uándikperapiringa ka kánikuaksï sési marhuakuaska imeechani”.
Nóteru jukaparharanhasïndia ambakiti jángua
Diesi uéxurhini tátsekua enga Primera Kʼéri Uarhiperata úkuarhipka imani uéxurhinicha jimbo kʼuiripu kánikua mójtakurhispti, jimbokaksï nóteru jukaparharasïrengia ambakiti jángua ka uandasïreendiksï eska iámu ambe engaksï uénga sési jarhaspka. Frederick Lewis Allen enga istorieri ambe míteka, uandaspti: “Jamberi ma jurhiani, inde diesi uéxurhinicha engaksï tátsekua nitamapka Primera Kʼéri Uarhiperateri enga interu parhakpinirhu úkuarhipka, miánhantaati komueska jurhiatikuecha enga kʼuiripu úndapka kánikua no sési jámani o no sési jásï jángua ma jatsini. [...] Jimboka nóteru jarhaspkia ima ambe enga uénga eskaksï kʼuiripuecha sési jásï jángua ma jatsipiringa ni ima ambe enga uénga eska jatsikuarhekua ambe japiringa ka eska kʼuiripu ambakiti irekakua ma jatsipiringa, úkua jukaspti ambakiti jánguechani exeantani”.
Uéxurhini 1930 jimbo ísï úndaspti kánikua no sési jánhaskuarhini, jimboka iámu ambe enga antesi úkuarhipka úspti eska uánikua kʼuiripuecha nóteru jatsikuarhenhapiringia sentabu. Ka 1939 jimbo interu parhakpinirhu úkuarhispti máteru uarhiperakua enga kánikua no sési útspijka, i jindeespti: Segundu Kʼéri Uarhiperata. Ísï jimbo, nasionichaksï uénaspti uaani armechani ka uánikua máteru ambe para sánderu no sési útspini, inde ambe úspti eska nóteru xáni pobrinhapiringia, peru ístu úspti eska kánikua kómu nitamakuarhinhapiringa, ambe ma enga no nema eranhaskenga. Kʼéri uarhiperakua kʼamajkuaspti uánikua iretecha, máruksï jindeespti tsimani iretecha Japón anapu, engaksï iámu kʼamajkunhapka bomba atomikecha jimbo. Uánikua kʼuiripuechaksï uarhispti jima engaksï ónhakata japka ka nani engaksï no sési kánhenga. Indeni uarhiperakuarhu 50 miioni kʼuiripuechaksï uarhispti, asta sapiicha jamberi.
Enga Segundu Kʼéri Uarhiperakua úkuarhini japka interu parhakpinirhu, kʼuiripuechaksï nóteru jánguarhintasptia ambakiti jángua ma jatsini ka úsptiksï ambe engaksï ima exenga eska sési jarhaspka. Libru Love, Sex and War—Changing Values, 1939-45 (Amor, sexo y guerra: el cambio de los valores, 1939-1945) uandasïndi: “Ísïispti enajki jima enga kʼéri uarhiperakua úkuarhini japka úpiringaksï úni ambe engaksï uékeenga, ka enga jamberi uarhiperanhani japiringa né uéjki úpirindi ísku jándikua ambe niátani ka i ambe iápurisï niáraspti etsakuarhini. [...] Ambe enga úkuarhini japka kʼéri uarhiperakua jimbo úspti eska nóteru japiringia ambakiti jángua ma ka máru kʼumanchikuecharhu ísïispti enajki tsípikua nóteru ióni durariuenga ka nóteru jukaparhakuenia ísï eska nemeri enga uarhiperakuarhu ma nirajka”.
Jimboka kʼuiripu úpiringa na uéjki jatini uarhini, úndasptiksï sánderuksï uékani nemani jingoni jarhani nájkiruka no xáni iónipiringa. Uarhiiti ma no no sési exesïrendi na engaksï jámeenga kʼuiripuecha imani tiempu jimbo enga xáni no sési jánhaskuarhini japka, ima uandaspti: “Juchachi no ísku jándikua ambe niátasïreenga. Ambe enga úkuarhini japka jindeespti kʼéri uarhiperakua ma”. Ka sondadu ma Estados Unidos anapu ma, uandaspti: “Sáno iámu kʼuiripu uandasïreendi eskachi ísku jándikua ambe niátasïrenga, peruchi tumbiispka ka mítespkachi eskachi na uéjki jatini úpiringa uarhini”.
Máru engaksï tsípiti pakarapka imani kʼéri uarhiperakua jimbo kómu nitamakuarhixaptiksï imani xáni no sési jásï ambe jimbo enga úkuarhipka. Asta iásï jamberi máru imeecha engaksï tsípiti pakaraka ka asta imeecha engaksï jiáni sapiipka, miántasïndiksï na enga xáni no sési úkuarhipka jiáni. Uánikuechaksï nóteru mintsikasïrendia ka nóksï jánhaskasïreendi néna úni ambakiti jángua ma jatsini, jimbokaksï no janhanharhisïrenga juramutichani engaksï uandeenga ambe enga sési o no sési japka. Kʼuiripuechaksï úndaspti exeni eska iámu ambe engaksï juramuticha uaxastapka, úpirindi mójtakurhini.
Jimbanhi juramukuecha jángueri ambe
Ísï tátsekua enga na nitamapkia Segundu Kʼéri Uarhiperata, uérasptiksï máru estudiuecha engaksï uandeenga na engaksï exejka kʼuiripuecha seksueri ambe. Ma estudiu jindeespti informi Kinsey, enga jukari ochosientu pájinecha jukaka ka enga únhaka jini Estados Unidos uéxurhinicha kuarenta jimboisï. Indeni informi jingoni enga uérapka, uánikua kʼuiripu nóteru no sési exesïrendi nani uéjkisï seksueri ambe uandani, ambe ma engaksï ióntki no uénga. Nájkiruka tátsekua exenhapka eska i estudiu jukari ambe uandasïreendi omoseksualidadiri ka máteru no sési járhati jánguecheri ambe, i estudiu xarhataspti eska enga na nitamapkia k’éri uarhiperata úndaspti nóteru xáni ambakiti jángua ma jarhania.
Ma tiempu jimbo kʼuiripu jánguarhintaspti ísï xarhatani eska ambakiti jángua ma jatsispka. Jimbosï radiurhu, sinerhu ka telebisionirhu úsïreendiksï ambe ma paraka no xarharapiringa ísku jándikua ambe o letrecha engaksï ísku jándikueri ambe uandeenga. Peru inde ambe no xáni ióni durarispti. William Bennett, Edukasioniri sekretariu jini Estados Unidos anapu, uandaspti: “Uéxurhinicha 1960 jimboisï, paisirhu sóntku uénaspti no sési jásï jángua ma jarhani”. Ka i jásï jángua niáraspti uánikua máteru paisicharhu jarhani. Peru ¿andi xáni sóntku niárapi no sési jásï jángua ma jarhani imani tiempu jimbo?
Imani tiempu jimbo uérasptiksï tsimani grupuecha ma jindeespti para úni eskaksï janhanharhinhapiringa nanakecha ka máteru para jiókuarhini na enga kʼuiripu exenga seksueri ambe. Ístu uénaspti únhani ambakiti pastiiechani engaksï jindeeka para no káni charhakuechani. Ka jimbokaksï úsïreenga relasioni seksuali jatsini ka nóksï embarasada pakarani, i ambe úspti eskaksï né uéjki jingoni úpiringa relasioni seksuali jatsini no ma kompromiso jingoni.
Ísï jimbo, prensa, sine ka telebisioni nóteruksï no sési exesïreendia enga ísku jándikueri ambe xarharapiringa. Zbigniew Brzezinski, enga jindeepka direktori del Consejo Nacional de Seguridad Estados Unidos anapu, uandaspti eska telebisionirhu anapu programechaksï xarhatasïnga eska “sési jarhaska enga ma jandiajku uékajka sési pʼikuarherani, eska no no sési exenhasïnga atajperakua ambe [ka] eska jiókuarhinhasïnga ísku jándikueri ambe”.
Uéxurhinicha setenta jimboisï, sánderu mítenhastia bideokasetera para bideuechani exeani. Iásïksï úsïrendia exeani imeecho imajenicha engaksï ísku jándikueri ambe xarhatajka, engaksï no méni nipiringa exeni sinerhu máteruecha jingoni. Nóteru iónistia enga internetirhu sánderu xarharajka pornografia ambe ka né uéjki iámu parhakpinirhu úsïndi exeni komputadorecharhu.
Iámu ambe enga úkuarhipka kánikuajtsïni chérasïndi. Direktori kárseliri Estados Unidos anapu ma, uandaspti: “Diesi uéxurhini antesi úsïreenga uandontskuarhekuani tatakechani engaksï kárselirhu inchaenga, ima ambeeri enga sési jaka ka ambe enga no sési jaka, peru imeechani engaksï iásï inchajka nóksï mítesti ambeeri enga uandontskuarhekuani jarhajka”.
¿Nanichi uaa exentani jarhuajperata?
Nóchi úsïnga nirani iglesiecharhu jirinhani jarhuajperata para sési jángua ma jatsini. Nóksï kuájpisïndi jurhimbikua Biblieri ambe, ísï eskaksï na úpka Jesúsi ka imeeri chúxapaticha primeru siglurhu anapu, iglesiechaksï apoiarisïndi no sési jásï ambe enga úkuarhijka parhakpinirhu ka ambe engaksï kʼuiripuecha újka. Karari ma uandaspti: “¿Náki uarhiperakua jimbo nema no uandaspi eska Tata Diosïsï jarhuatani japka? ”. Máru uéxurhinistia enga saserdoti ma Nueva York anapu, uandapka iglesieri ambe ka na enga kumplirikuarhika juramukuecha jángueri ambe: “Iglesia jindeesti májku kúnguarhikua enga no xáni uétarhijka para inchani ísï eska para autobusi ma karapani”.
Ísïisti, xarharasïndi eska iámu no sési jásï ambe enga úkuarhini jaka parhakpinirhu, uétarhisïndi eska únhaaka ambe ma. Peru, ¿ambe meru uétarhisïni eska mójtakurhiaka? ¿Né uaa úni ka néna uaa?
[Komentariu]
“Na enga xáni uarhinhapka Primera Uarhiperata enga interu Parhakpinirhu úkuarhipka [1914-1918] úspti eska nóteru jukaparharapiringia kʼuiripueri tsípikua”
[Imajeni]
Sáno iámindu kʼuiripuechaksï úsïndi tsípikuarhini imani ambe jingoni enga ísku jándikueri ambejka