5 Uandontskuarheni sapiicha jingoni

¿AMBE ARHIKUEKASÏNI?

Sési uandontskuarheni sapiicha jingoni, úsïndi eskaksï taatiicha ka sapiicha uandaaka ambe engaksï eratsejka ka pʼikuarherani.

¿ANDISÏ JUKAPARHAKUE?

Tumbi sapichu ma jingoni uandontskuarheni úpirindi úkua jukani. Libru ma uandasïndi eska engaksï sapiicha sapirhajka, iámu ambeksï aianguasïnga taatiichani, joperu engaksï tumbi sapirhatiijkia, nóteruksï xáni uandontskuarhekuasïndia ka taatiichaksï nóteru mítesïndia ambe engaksï eratsejka ka pʼikuarherani. Joperu taatiicha, asï eratsi je eskajtsï no uaaka uandontskuarheni chaari sapiicha jingoni, imeechaksï iásïsï uétarhinchajti eskajtsï uandontskuarheaka imeecha jingoni.

¿AMBEJTSÏ UAA ÚNI?

Jiáni uandontskuarheku je chaari sapini enga ima uékaaka. No arhiati nájkirukajtsï iauani chúrikua jamberi uandontskuarheaka.

“Ménichanchi uékapiringa ísï arhiani sapiichani: ‘Chúskutaskachi májku kʼéri jarhani ka iásïri uékasïni uandontskuarheni’. Joperu, ¿néna uaa ma ísï uandani enga jiániuaka enga sapi ma uékajka ueenhekuarhini? ¿No indeni ambechisï uékajki taatiicha?” (Lisa).

“Tsitisïnga xarhentkuni kʼuíni, joperu ménisï, terujkani chúrisï sánderuni sési uandontskuarheska juchiiti tumbi sapirhatiicha jingoni” (Herbert).

BIBLIERI KARAKATA: “Asï nema jirinhakuarhie solu indeni ambe enga para imajkumindu sési uéraaka sino ambe enga jarhuataaka máteruntu” (1 Korintu 10:24).

Asï máteru ambe eratseni ja je. Taati ma uandasïndi: “Ménichani engajtsïni juchiiti sapiicha uandontskuarhechini jarhajka, ji máteru ambe eratseni jarhasïnga ka imaksï kuenta íntskukuarhesïndi”.

Engajtsï chájtu ísï újka, páta je telebisionini ka máekandu jurajku je selularini o máteru aparatu ambe ka kurhajcha je chaari sapini ka ísïjtsï xarhatakuni jauaka eskajtsï jukaparharasïnga ambe engaksïni aianguni jaka.

“Uétarhisïndi eskaksï juchaari uájpeecha míteaka eskachi pendienti pásïnga na engaksï pʼikuarhinhejka. Engachi no ísï úska, imajtsïni jarhariati ka máteru nemanksï arhiati para jarhuataani” (Maranda).

“Asï jukari uandanhia je ni sikiera jiáni engaksï chaari uájpeecha no sési jásï ambe uandaaka” (Anthony).

BIBLIERI KARAKATA: “Kurhandi je sési ambe engaksïni arhini jaka” (Lukasʌ 8:18).

Jánguarhi je na uéjki jatini uandontskuarhekuani. Ménichani tumbiichaksï jiáni tsitisïndi uandontskuarheni taati jémbeecha jingoni engaksï sési pʼikuarherani jarhajka.

“Jucha jiáni sánderu sési uandontskuarhesïnga engachi nirani jarhajka nani. Jimbokachi máekanduechani uaxakatini jarhasïnga ka engachi no eratperani jarhajka úsïngachi sánderu sési uandontskuarheni” (Nicole).

Ístuchi jiáni uaaka uandontskuarheni engachi tʼireni jauaka.

“Engachi senarini jarhajka, iáminduechachi uandantasïnga na engajtsïni nicheka ima jurhiatikua. I ambe úsïndi eskachi márku jauaka ka miátantasïndijtsïni eskachi no jatsiska para jandiajku orhepani uérakuani uandanhiateechani” (Robin).

BIBLIERI KARAKATA: “Jorhenguarhi je iáminduecha sóntku kurhandini, peru ióndantsï mókukuarhini” (Santiagu 1:19).