Ju je jindéni Tatá Diosïri pʼíchpirini para méntkisï

Uétaresïndi jánguarhintani para uáni pʼíchpirichani ka uni jatsiani para méntkisï. Enga jucha jánguarhintaska méntkisï jindéni Tatá Diosïri pʼíchpirini, jucha jatsiauaka uánikua kómperhatechani. Jesúsi arhiaspti imechani engaksï imani jakajkuenga: «Indeni ambe enga sesi jimboeka [...] uáti eska cha nóteru jindeuaka jántspiricha» (Juanu 8:32). ¿Ambe arhikuekaspi Jesúsi?

Jucha iásï ¿ambe úkuechani jimbo nóteru jupikakata jauaia? Jucha uáka jurajkuani imani jakajkukuechani engaksï no jurhimbitika ka imani chikuanderakuechani enga Satanasi etsakuaka. Istu jucha nóteru májkueni jauakia eska ima milloni jimbo kʼuiripuecha engaksï no míteka Tatá Jeobáni ka engaksï no ma erhokuarikua jingoni irékajka (Roma 8:22). Istu Tatá Diosïri pʼíchpiricha nóteruksï chérhisïndia uarhikuani (Ebreu 2:14, 15).

Ambe jimbo jucha nóteru jupikakata jauaia, Tatá Diosïri jimbangi parhakpinirhu. ¡Enga jucha nóteru jupikakata jauaka, jucha na xani sesi irékuaria! Enga ixu parhakpinirhu sesi jándentakia, nóteru jauatia kʼérati uarhiperakuecha, pʼamenchakuecha nijtu no sesi járhati úkuecha. Nóteru jauati kʼuiripu nombe jatsikuarhiricha, nijtu kʼarhingua. Jucha nóteru jupikakata jauakia tʼarepekueri, kutsïmikueri, ni uarhikueri, nóteru jauatia chétapu ambe, nijtu no sesi kámberakua. Biblia isï uandasïndi Tatá Diosïri ambe: «Iámindu ambakiti intsïmperakua, ka istu iámindu ambakiti ambe enga sésika, auandarhu uératini jurasïndi, ka axanhasïndi Diosï tátini jimbo» (Santiagu 1:17).

Tatá Diosïri pʼíchpirichaksï irékati para méntkisï. Tsípikua para méntkisï ambakiti intsïmperakua meuati enga Tatá Diosï íntsauaka imechani engaksï jirinhajka imeri sesi pájperakuani (Roma 6:23). Eratsi je ambe enga arhikuekajka para cha, irékani para méntkisï.

Jucha ióni tsípekua jatsiaka para uánikua ambe uni. Jucha jamberi uékaka jorhenguarhini kústani, pʼitakatechani atantani, o chikari jingoni ánchikuarheni. O jucha jamberi uékaka jorhenguarheni animalicheri ambe, anhatapuecheri ambe ka tsïtsïkicheri ambe. O jamberi uékani nirani miiuni máteru nani isï, ka mítiani jima anapu kʼuiripuechani. ¡Ka jimboka jucha irékaka para méntkisï, jucha uáka uni iámindu indeni ambe!

Jucha jatsiaka ióni tsípekua para uánikua pʼíchpirichani uáni. Jimboka jucha irékaka para méntkisï, jucha uáka mítiani uánikua máteru Tatá Diosïri pʼíchpirichani. Jucha mítiaka ambe engaksï imecha jorhenaka uni, na engaksï jasï kʼuiripueka ka istu jucha uáka imecheri pʼíchpirini. Jucha uékauaka ka imajtujtsïni uékati (1 Korintu 13:8). Jimboka jucha irékaka para méntkisï, jucha uáka pʼíchpiri úkuarhini iámindu parhakpinirhu anapuechani jingoni. Ka ambe enga sánderu jukaparakueka, eska juchari sesi pájperakua Tatá Jeobáni jingoni, sánderu uinhapipani jauaka enga na nitamani jauaka uéxurinicha. ¡Ju je jindéni Tatá Diosïri pʼíchpirini para méntkisï!