Para jatsiani pʼíchpirichani, jucha oreta pʼíchpiri úkuarhiaka

Sesi pájperakua uaxastakata jarhasti uékperakuarhu. Engajtsï sánderu jorhenguarhiaka Tatá Jeobéri ambe, sánderujtsï exenchaka ka sánderujtsï pʼikuarhinhiaka imani marhuakuni. Inde ambeksïni manataati parajtsï tatá Jesúkristueri jorhenguarhiri úkuarheni (Mateu 28:19). Cha uáka jindéni méntkisï Tatá Jeobéri pʼíchpirini enga cha kúriauaka imechani engaksï Tatá Jeobéri ambe uandantajka, ma irétesti enga kánikua tsípijka. ¿Cha ambe ua para imechani jingonini?

Xarhata je eskajtsï uékasïnga Tatá Diosïni, kurhajchaparini imeri juramukuechani. «Jimboka para Diosïni uékani, jindeska eskaksï uáka eska imajtsïni na juramuchijka, ka no kuetsapiti ambesti engajtsïni ima juramuchijka.» (1 Juanu 5:3.)

Iréka je eskajtsï na jorhenguarhini jaka. Jesúsi uandantaspti ma uandantskua, engajtsïni ini ambe jorhendajka. Ma achati enga sesi mítikupka, úspti imeri kʼumanchikuani kʼerendarhu, ka ma achati tandonhari, úspti imeri kʼumanchikuani kutsarirhu. Ka enga júpka kʼéri janikua ma, ima kʼumanchikua enga kʼerendarhu uaxastakata japka, anhaxurhitini pakaraspti, joperu ima kʼumanchikua enga kutsarirhu uaxastakata japka, xerhekuarintaspti kánikua no sesi kúskaparini. Jesúsi uandaspti eskaksï kʼuiripuecha engaksï kurhajchajka imeri jorhenguarhikuechani ísïstiksï eska ima achati enga sesi mítikupka ka enga úpka imeri kʼumanchikuani ma kʼerendarhu. Istu uandaspti eska imecha engaksï kurhajchajka imeri jorhenguarikuechani joperuksï no uékajka isï irékani, isïstiksï eska ima achati tandonhari enga uaxastapka imeri kʼumanchikuani kutsarirhu. ¿Cha naki inde tsimarani achatichani uékapirini jindéni? (Mateu 7:24-27.)

Aiakukuari je chári tsípekuani Tatá Diosïni. Uákajtsï uni ini ambe, arhiparini Tatá Jeobáni kómarhikua ma jimbo eska cha uékasïnga marhuakuni para méntkisï. Enga jucha újka, ambe enga Tatá Diosï uéjka, jucha isï xarhatasïga eska jucha tatá Jesúkristueri chúxapatiska (Mateu 11:29).

Itsï atakuarhi je. Bautisarikuari paraka juparinhantaka chiti pekaduecha, kómarhiparini tatá Jesúkristueri nombri jimbo (Ukuecha 22:16).

Marhuaku je Tatá Diosïni kʼama kʼamasï o iámindu chiti mintsita jingoni. «Ka iámindu ambe engajtsï uáka, u je tsípekua jingoni komueska juchari Tatáni marhoakuni jarhani ka no kʼuiripuechani.» (Kolosasi 3:23.)