Eska juuaka chíti Reinu

Jeoba aiatspesti: “Nóteru nema ueraati, ni no sési pʼikuarherani, ni pʼamenchani ni uarhini. Jíksïni kutsunharhikuaka iámu chári uekuani. Nóterujtsï miáuakia ióntki anapu no sési jásï ambeni”.

Jeoba péraspti Adani ka Ebani jardini de Edenirhu paraksï sési irekani ka pínandikua jingoni. Jatsisptiksï para kómarhini imeri Tátini enga auandarhu jaka ka uánikua uájpechani kánguarhiani para echerini uinirani. Adani ka Eba, nóksï kurhajchaspti Jeobani, peru ambe enga ima uékaenga úni no mójtakurhisti. Ini librurhu, exeskachi eska Tata Diosï méntkisï kumplirisïnga iámu ambe enga eiatspijka. Imeri Reinu ambakiti kóntperatechani juáuati echerirhu, ka ísï kumpliriuati ambe enga aiakupka Abraanini.

No ióni jimbo, nóteru jauatia Satanasi ni imeri demoniuecha ka ni no sési úricha. Iáminduechaksï Jeobani kómarhiati. Nóteruchi pʼamenchaakia ni uarhini, sánderu sési, pauani pauanchi kánikua uinhapikua jingoni jauaraaka ka kánikuachi sési pʼikuarheraaka jimbokachi tsípiti jauaka. Echeri paraisu ma úkuarhintaati. Iáminduchi áspiti tʼirekua jatsiaka ka ambakiti kʼumanchikuechani. Ka nóteru jauati kʼuiripu enga tsitiaka no sési ambe úni ka uarhipeni, iáminduksï ambakiti kʼuiripueuati. Animalicha engaksï no sési útspejka, nóterujtsïni chérhiatia, ni jucha imechani.

Kánikuachi tsípiaka enga Jeoba úndaakia tsítantaani uarhirichani. Sésichi eroantauaka imechani engaksï ióntki irekapka komu Abeli, Noe, Abraani, Sara, Moisesi, Ruti, Esteri ka Dabidi. Imajtsïni jarhuataati paraisu ma úntani echerini. Méntkisïchi jatsiaka uánikua ambe para úni enga interesantiuaka.

Jeoba uékasïndi eskari tʼu Paraisurhu irekaaka. Jimachi uánikua ambe jorhenguarhiaka Tata Diosïri ambe engachi no méni eranhaskaka. Ísï jimbo, ¡ju je pauani pauani sánderu andarherani Jeobani, iásï ka para méntkisï!