Agostu

I bersikulu uandasïndi tsimani ambe enga kánikua jukaparhakueka: 1) eskaksï imeecha engaksï jurhimbitku jámajka uandanhiateechani jatsiasïnga ka 2) eskajtsïni Tata Diosï Jeoba iámindu ambe jimbo jarhuatasïnga. Ma ambe enga Tata Diosï Jeoba újka parajtsïni jarhuatani, jindeesti eskajtsïni jarhuatasïnga kurhanguni eska ini parhakpini jimbo uandanhiateechanchi jatsiauaka. Ísïisti, Tata Diosï Jeobajtsïni aiachisïndi eskachi tsípikua jingoni irekaaka engachi marhuakuska, peru inde ambe no arhikuekasïndi eskachi iásï no jatsiauaka uandanhiateechani (Is. 66:14). Tata Diosïjtsïni arhisïndi eskachi eratsentaaka na engachi irekaaka sánderu orhepatini; nani engachi uaaka irekani para méntkisï ísï eska ima na uéjka (2 Kor. 4:16-18). Ka enga jamberi niáraaka ima jurhiatikua, pauani pauantsïni jarhuatasïndi parachi orhepani uérani (Lam. 3:22-24). ¿Ambechi jorhenguarhisïni máru Tata Diosï Jeobaeri marhuariicheeri engaksï ióntki irekapka ka ístu máteruecheeri engaksï iásï irekani jaka. Ísï eskachi na exeni jauaka, jamberichi jatsiauaka uandanhiateechani engachi no erokuarhiani jauaka. Peru engachi mintsikaska Tata Diosï Jeobani, imajtsïni méntkisï jarhuataati (Sal. 55:22). w23.04 14, 15 párr. 3, 4

Uaakachi uánikua ambe jorhenguarhini José ka Maríeri ambe, imeechaksï listu jarhaspti para kurhajchaani juramutiichani asta jiáni jamberi enga kánikua úkua jukapka ísï úni (Luk. 2:1-6). Ma xanhari enga María nuebe mesesi páni japkia embarasada, Roma anapu juramuti Sésar Augustu juramuspti eska sensu ma únhapiringa. Paraka José ka María kurhajchapiringa indeni leini, jatsisptiksï para Beléni nirani ka ma 150 kilometrisï (93 miia) xanharani, jimeesïsï engaksï uánikua juáteecha japka. Indeni ambe úni, kánikua úkua jukapirindi ka sánderia para María. Jamberiksï uandanhiani japti tsimarhani jimbokaksï no uékasïreenga eskaksï no sési ambe úkuarhinchapiringa María ka nijtu charhaku. ¿Ka ambe úkuarhipirini enga María jimeesïsï kánguarhipiringa charhakuni? ¡María Mesíasinisï kánguarhipirindi! Ka jamberi inde ambakiti rasoni máepirindi paraksï no kurhajchani indeni leini. Joperuksï José ka María no indeni ambe arhiparhataspti paraksï no kumpliriini indeni leini jingoni. Ka Tata Diosï Jeoba újchakuraaspti engaksï ísï kurhandirapka: María sési niáraspti Beléni ka charhaku sési andajpenuspti ka asta kumplirikuarhispti Biblieri profesia ma (Miq. 5:2). w23.10 8 párr. 9; 9 párr. 11, 12

Uánikua chésïndi engaksï eratsejka eskaksï jatsiska para komentariini. Enga chá ísï pʼikuarherajka, ambe ma engaksïni uaaka jarhuatani jindeesti sési prepararikuarhini (Prov. 21:5). Enga chá sánderu sési jorhenguarhiska informasionini, sánderu fásiliuati eskajtsï tarhataaka jájki parajtsï komentariini. Máteru ambe engajtsï uaaka úni, jindeesti no xáni uánikua ambe uandani (Prov. 15:23; 17:27). Engajtsï no xáni uánikua ambe uandaaka nójtsï xáni chéaka. Enga chá imani ambe uandaska enga chá jorhenguarhika, máteruechaksï exeati eska chá sési prepararikuarhiska ka eskajtsï sési kurhanguska informasionini. Enga chá újkia ma o tsimani xanharisï komentariini, joperujtsï útasï chéni pʼikuarherani nájkirukajtsï úkia máru ambe engaksï i konsejuecha arhijka, ¿ambejtsï uaa úni? Miá je eska Tata Diosï Jeoba kánikua jukaparharasïnga na engajtsï xáni jánguarhintajka komentariini (Luk. 21:1-4). Peru ima no erokuarhisïndi eskajtsï chá imani ambe uaaka engajtsï no újka úni (Filip. 4:5). Ísï jimbo, exe je ambe engajtsï uaaka úni, jánguarhinta je ísï úni ka kurhaku je Tata Diosï Jeobani eskaksïni jarhuataaka no xáni chéni. Orhetajtsï uaaka komentariu ma íntspini enga no xáni kʼéaka. w23.04 21 párr. 6-8

Apostoli Pablu terukutantasptijtsïni sondaduecha jingoni engaksï jingontku jarhajka para uarhipeni ka engaksï jukantajka xukuparhakuani para uarhipeni. Enga guerra ma úkuarhijka sondadu ma jatsisti para méntkisï listu jarhani para uarhipeni. Májkueni, jucha xarhatasïnga eskachi listu jarhaska para Tata Diosï Jeobaeri jurhiatikua, engachi mintsikaska Tata Diosïni ka xénchpeni enga ísïika komu inchanhikua tiámueri jukantani, ka engachi seguiriiska mintsikani ambe enga úkuarhiaka sánderu orhepatini enga ísïika komu kájtsïkua tiámueri jukantani. Ísï eska inchanhikua tiámueri na kuájchakuenga sondaduni, mintsikani Tata Diosïni ka xénchpetiini kuájchakusïndi juchaari mintsitani. I kualidadichajtsïni jarhuatasïni parachi seguiriini marhuakuni Tata Diosï Jeobani ka májkueni jámani eska Jesúsi. Engachi mintsikaska Tata Diosïni, seguruchi jarhasïnga eska ima maiamuantasïnga imeechani engaksï no méni jurajkujka (Ebr. 11:6). Ístu, mintsikani Tata Diosïni úsïndi eskachi no méni jurajkuaka Jesúsini juchaari Orhejtsïkuti, nájkirukachi no sési nitamakuarhini jauaka. Parachi sánderu mintsikani Tata Diosïni ka únchi orhepani uérakuani uandanhiateechani, ju je májkueni úni eska ima erachiicha engaksï no jurajkuka Tata Diosïni nájkirukaksï no sési kánhani jaka oksï problemeechani jatsiani sentabu jimbo. Ka parachi no jukari jatsikuarhekuekani, uaakachi májkueni úni eska imeecha engaksï arisku sáni irekajka ka engaksï orhetku peerajka Tata Diosïiri Reinueri ambe. w23.06 10 párr. 8, 9

Kʼuiripu ma enga pʼíngukuarhijka úsïndi pʼínguni ambe enga pʼikuarherajka ka ambe enga újka. I kualidadi jarhuatasïndijtsïni parachi no úni ambe enga no sési jaka, ístujtsïni jarhuatasïndi parachi úni ambe enga sési jaka. Engachi úkua jukanchani jarhajka ísï úni o engachi no káni uékani jarhajka ísï úni. Ju je miáni eska espiritu santu úsïnga eskachi uaaka pʼíngukuarhini. Ísï jimbo, engachi kurhakuska Tata Diosï Jeobani eskajtsïni íntskuaka imeeri espiritu, uaakachi xarhatani ini kualidadini enga kánikua jukaparhakueka (Luk. 11:13; Gal. 5:22, 23). Asï erokuarhi je eska iámindu ambe sési jauaka. Ini parhakpini jimbo, jamberi no méni niáraati iámu ambe sési jarhani. Engachi erokuarhiska eska iámu ambe sési jauaka, jamberi nóchi méni niáraaka úni ambe engachi eratsetini jaka. Jamberichi ménichani no úni jarhajka úni ambe engachi eratsetini jaka jimbokachi ísï exesïnga eska kánikua úkua jukaska. Engajtsï chá ísï nitamakuarhini jaka, ¿andijtsïsï no jánguarhintajki sánhani arini úni ambe engajtsï eratsetini jaka? Pori ejemplu, engajtsï uéjka kualidadi ma xarhatani, uaakajtsï sapichitu ambe úni para indeni kualidadini xarhatani; ka engajtsï uéjka iámu Bibliani arhintani, orhetajtsï uaaka no xáni kánhachani arhintani. w23.05 29 párr. 11-13

Ini tiempu jimbo, Tata Diosï Jeoba úraxati imeeri organisasionini parajtsïni seguiriini jorhendani imeeri ambe ka i ambejtsïni kánikua jarhuatasïndi parachi seguiriini jámani “Xanharu Pímbinhasïkueri” jimbo (Is. 35:8; 48:17; 60:17). Pori ísï arhini, enga nema uékajka Biblieri ambe jorhenguarhini, sésikua intsïnhasïndi para “Xanharu Pímbinhasïkueri” jimbo jámani. Máruksï no iauani nirasïndi indeni xanharu jimbo ka jurajkusïndiksï. Joperu máteruechaksï sési eratsetixati seguiriini indeni xanharu jimbo jámani astakaksï niáraaka jima engaksï uékani jaka niárani. Peru, ¿naniksï uékasïni niárani? Para imeecha engaksï erokuarhini jaka auandarhu irekani, “Xanharu Pímbinhasïkueri” paasïndi “[Tata] Diosïiri paraisurhu” enga auandarhu jaka (Apok. 2:7). Ka para imeecha engaksï erokuarhini jaka Echerirhu irekani, i xanharu páuati asta jima enga Kristu na kʼamaraakia Juramuni Mili Uéxurhini, jiáni engaksï iámindu kʼuiripuecha perfektueuakia. Enga chá nirani jaka ini xanharu jimbo, asï tátsepanisï eraa je. Seguirii je xanharani astakajtsï niáraaka jima engajtsï uékani jaka, jimbanhi parhakpinirhu. w23.05 17 párr. 15; 19 párr. 16-18

Engajtsï eratsentaska iámindu ambe enga Tata Diosï Jeoba újka chánksïni jimbo, sésijtsï pʼikuarheraaka ka inde ambeksïni jarhuataati parajtsï uékani aiakukuarheni imani (Sal. 116:12-14). Biblia uandasïndi eska “iámindu sési jásï intsïmperata ambe ka ambakiti ambe” Tata Diosï Jeoba íntspisïnga (Sant. 1:17). Ka sánderu ambakiti intsïmperata engajtsïni íntskuka, jindeesti imeeri Uájpeeri tsípikuani, Jesúsiiri. Indeni xáni ambakiti intsïmperata jimbo, iásïjtsï chá uaakia imeeri amigueni ka irekani para méntkisï (1 Juanu 4:9, 10). Engajtsï aiakuska chaari tsípikuani Tata Diosï Jeobani, xarhatakuntsï jauaka eskajtsï agradeseriisïnga na engaksïni ima xáni xénchaajka ka ístu ambe enga xáni úkia chánksïni jimbo (Deut. 16:17; 2 Kor. 5:15). w24.03 5 párr. 8

Engachi exejka na engaksï jámajka ka irekani kʼuiripuecha ísïchi pʼikuarherasïnga eska Loti, ambakiti achamasï ma enga ióntki irekapka. Ima kánikua uandanhiasïreendi “imeechani jimbo engaksï jurajkutakuarheenga paraksï nánterkueni jámani”, jimboka ima mítespka eska juchaari Taati auandarhu anapu kurhunhisïnga engaksï kʼuiripuecha ísï jámajka (2 Ped. 2:7, 8). Jimboka Loti xénchasïreenga Tata Diosï Jeobani ka kánikua janhanharhini, imajtu kurhunhisïreendi na engaksï jámeenga ima kʼuiripuecha imani tiempu jimbo. Iásï sáno májkueni ambe úkuarhixati. Kʼuiripuechaksï no kánikua janhanharhiasïndi oksï meru no janhanharhiani Tata Diosïiri juramukuechani. Peru nájkirukaksï kʼuiripuecha ísï jámajka, engachi xénchajka Tata Diosïni ka chénharhini, uaakachi pímbinhasï jarhani ísï eska Tata Diosï na jaiapanhintajka. Tata Diosï Jeoba úrasïndi libru de Proverbios parajtsïni jarhuatani pímbinhasï jarhani. Iámindu kristianuecha —acheetiicha, uarhiitiicha, tumbiicha ka ístu imeecha engaksï jatiriikia— uaatijtsïni kánikua marhuacheni inde ambakiti konsejuechani engaksï indeni libruni jimbo jaka. Kʼuiripu ma enga chénharhijka Tata Diosï Jeobani no kuájpiasïndi no sési úriichani níjtu kúnguarhijki imeecha jingoni. w23.06 20 párr. 1, 2; 21 párr. 5

Jamberiksïni chaari familia no sési kámajti ojtsï jamberi chá no sánderu jánguarhintani jaka sentabu ambe jirinhani jimbokajtsï uékasïnga orheta peerani Tata Diosïiri Reinueri ambe (Mat. 6:33). Enga ísïika uaakajtsï seguru jarhani eska Tata Diosï Jeoba míteska ambe engajtsï xáni úkia imani jimbo (Ebr. 6:10). Ka jamberijtsï chá mismu exekia eska ísïiska ambe enga Jesúsi uandapka: “Jíksïni sési jimbo arhisïnga eska no nema jarhaska enga jíndeni jimbo ka ístu ambakiti aianhperakua jimbo jurajkuka imeeri kʼumanchikuani, ermanu jémbeechani, pirembeechani, amambani, taati jémbani, uájpeechani o echeriichani enga no niáraaka iásï, ini jurhiatikuecha jimbo, 100 uelta sánderu intsïnhantani —kʼumanchikuechani, ermanu jémbeechani, pirembeechani, amambeechani, uájpeechani ka echeriichani, nájkiruka no sési kánhaaka— ka imani tiempu jimbo enga jurhani jaka tsípikua para méntkisï” (Mar. 10:29, 30). Imani kóntperatechani enga chá intsïnhakia sánderuksï ambakiti ambeesti ka eska ima ambe enga chá jurajkuka parajtsï úni marhuakuni Tata Diosïni (Sal. 37:4). w24.03 9 párr. 5

Jiáni engaksï Judea anapu kristianuecha kʼarhingua japka. Ka engaksï Antiokía de Siria anapu erachiicha mítepka ini ambe, imeechaksï ʻEratsesptiksï tántani eskaksï xáni sáni jatsikuarhepka, paraksï axakuani erachiichani engaksï Judea japkaʼ (Úku. 11:27-30). Nájkiruka ima erachiicha engaksï no sési nitamakuarhini japka iauani irekapka, Antiokía anapu erachiichaksï listu jarhaspti paraksï jarhuataani (1 Juanu 3:17, 18). Juchajtuchi uaaka pʼamojperakua xarhatani engachi mítejka eskaksï máteru kristianuecha no sési nitamakuarhixaka. Úpiringachi arini ambe úni parachi sóntku jarhuataani: arhiani orhejtsïkutiichani eskachi uékasïnga jarhuajpeni, ístuchi uaaka donasioni íntspini ka kómarhijpikuani imeechani engaksï no sési nitamakuarhini jaka. Jamberiksï erachiicha uétarhinchaati eskachi jarhuatauaka imani ambe jingoni engaksï sánderu uétarhinchajka. Enga juchaari rei, tata Jesukristu, junguaka para jusgariuani kʼuiripuechani, uékasïngachi eska exeaka eskachi úxaka ambe ma para pʼamojkuani máteruechani, ka eskajtsïni arhiaka: “Pʼí je auandarhu anapu Reinuni” (Mat. 25:34-40). w23.07 4 párr. 9, 10; 6 párr. 12

Májkueni eska Tata Diosï Jeoba, Jesúsijtu kurhangusïndi ka no inchandimesïndi. Ka xarhataspti indeni ambe enga Echerirhu jámani japka aianhpini. Nájkiruka ima axanhapka para Tata Diosïiri ambe jorhendaani ʻIsraeli anapu karichiichani engaksï tsïnchetini japka’, ma uelta jarhuataspti uarhiitini ma enga no israeliteepka. Uarhiiti mintsita jingoni kurhakuspti eska ambakerantapiringa imeeri uájpani, enga noambakitiiri espiritu iatiru no sési kámeenga. Jesúsi pʼamojkuspti indeni uarhiitini ka ambakerantaspti uájpani (Mat. 15:21-28). Ju je exeni máteru ejemplu. Ísï no ióni jimbo enga Jesúsi na ueenapkia aianhpini, ima uandaspti: “Nákinterku nema engareni negariuaka [...], jíjtuni negariuaka” (Mat. 10:33). ¿Nóteru jiókaspia Pedruni jimboka tanimu xanhari uandaspka eska no mítespka? Nómbe. Jesúsi mítespti eska Pedru sési jimbo móantaspka ka eska kánikua mintsikasïreenga Tata Diosïni. Enga Jesúsi na tsíntapkia, xarhakuspti Pedruni ka jamberi arhipti eska puákuntaspkia ka eska xénchasïreenga (Luk. 24:33, 34). Exeskachia eska Tata Diosï Jeoba ka Jesúsi kurhangusïngaksï ka eskaksï no inchandimesïnga. ¿Ka juchaia? Tata Diosï Jeoba erokuarhisïndi eskachi juchajtu májkueni uaaka. w23.07 21, 22 párr. 6, 7

¿Ambechi uaa arhiani máteruechani parakaksï mintsikaaka eska kumplirikuarhiaka ambe enga Tata Diosï Jeobajtsïni aiachijka? Primeru, jimboka Tata Diosï Jeobaeska engajtsïni aiachini jaka. Apokalipsisi arhisïndi: “Ima enga kʼéri uaxantskuarhu uaxakatini japka, uandaspti: ʻ¡Exe! Jimbanhi úntaxaka iámindu ambe’”. Tata Diosï Jeoba úsïndi kumplirini ambe enga aiatspejka ka jatsisti jánhaskakua ka uinhapikua para ísï úni. Segundu, Tata Diosï Jeoba ísï uandasïndi enajki úkuarhini jakiia i ambe, jimboka seguru jarhaska eska ísï úkuarhiaka. Jimbosï ima ini ambe uandajti: “Jimbokaksï mintsinharhikueska ka jurhimbikua ambeesti”. Ka ístu uandasïndi: “¡Inde ambe ísï úkuarhistia!”. Ka terseru, jimboka Tata Diosï Jeoba méntkisï kʼamarasïnga ambe enga ueenajka úni. I uandakuechaksï xarhatasïndi eska ísïiska “ji jindeeska Alfa ka Omega” (Apok. 21:6). Tata Diosï Jeoba xarhataati eska Satanási chkuandera máeska ka eska para no ma ambe marhuasïnga. Ísï jimbo, engaksïni nema arhiska “Inde no méni niáraati ísï úkuarhini”. Arhikunta ka sési aiangu ambe enga arhijka Apokalipsisi 21:5, 6. Xarhataku je kʼuiripuni eska Tata Diosï Jeoba kumpliriuaka ambe engajtsïni aiachijka (Is. 65:16). w23.11 7 párr. 18, 19

Jeoba ini ambe aiakuspti Abraánini enga ima 75 jatiripka ka enga no ma sapini kánguarhienga. ¿Joperu Abraáni úspi exeni enga kumplirikuarhipka i ambe? No iámindu ambe exespti. Ísï tátsekua enga na parhikupkia riuni Éufratesi, 25 uéxurhini erokuarhispti ka tátsekua milagru ma jimbo, kánguarhispti uájpa Isaakini. Ka 60 uéxurhini ísï tátsekua andajpenusptiksï imeeri nimakuecha, Esaú ka Jakobu (Ebr. 6:15). Joperu Abraáni no exespti engaksï imeeri desendientiicha niárapka jindeeni kʼéri ireta ma, nijtu engaksï pʼipka imani Echerini engaksï Aiaminhapka. Nájkiruka ísïipka, i achamasï enga no méni jurajkupka Tata Diosïni, niáraspti kánikua sési pájperani imeeri Kuerajpiri jingoni (Sant. 2:23). ¿Úsïntsï eranhaskani na enga xáni sési pʼikuarheraaka Abraáni enga tsíntaaka? Míteati eskaksï iámindu nasioniicha újchakuranhaspka jimboka ima mintsikaspka Tata Diosïni (Gén. 22:18). ¿Ambechi jorhenguarhisïni? Jamberichi ini jurhiatikuecha jimbo no exeaka iámindu ambe engajtsïni Tata Diosï Jeoba aiachika. Joperu engachi tekaantaska ísï eska Abraáni, seguruchi jauaka eskajtsïni Tata Diosï Jeoba újchakuraaka iásï, ka jimbanhi parhakpinirhu sánderujtsïni újchakuraati (Mar. 10:29, 30). w23.08 24 párr. 14

Enga rei Usíasi tumbi máepka, kánikua kaxumbitiispti ka jorhenguarhispti “chénharhini Tata Diosï jurhimbitini”. Ima 68 uéxurhini irekaspti, ka sáno iámindu indeni tiempu jimbo, Tata Diosï Jeoba újchakuraspti (2 Crón. 26:1-4). Usíasi andaaspti uánikua nasioniichani engaksï ikiakuenga ka ístu úspti eska Jerusaléni sési kuájchakukata japiringa (2 Crón. 26:6-15). Seguru eska Usíasi kánikua sési pʼikuarherapka enga úni japka úni iámindu ini ambe Tata Diosï Jeobaeri jarhuajperata jimbo (Ecl. 3:12, 13). Rei Usíasi pʼindespti juramukuani máteruechani. Ka jamberi inde ambe úpti eska eratsepiringa eska úpiringa úni ambe enga ima uékapiringa. Ma jurhiatikua inchaspti Tata Diosï Jeobaeri templurhu ka insiensu kurhiraspti, ambe ma engaksï reiicha no ueenga úni (2 Crón. 26:16-18). Kʼéri saserdoti Asaríasi jurhimberantaspti ka rei Usiasi kánikua ikiaspti. Xáni no sési enga rei Usiasi nóteru kurhajchapkia Tata Diosï Jeobani, ísï jimbo ima kastigarispti lepra jingoni (2 Crón. 26:19-21). ¡Kánikua ménderuenipirindi imeeri tsípikua enga seguiriipiringa kaxumbitiini! w23.09 10 párr. 9, 10

Ísï tátsekua enga apostoli Pedru na erakunhapkia espiritu santu jimbo, útasï jatsispti para seguiriini jánguarhintani mójtakurhini. Uéxurhini 36 jimbo, Pedru exespti na enga Korneliu, enga insirkunsisuepka, espiritu santu intsïnhapka. I ambe xarhatakuspti eska “Tata Diosï iáminduechani májkueni kaasïnga” ka eska máteru nasionirhu anapuechajtuksï úpiringa jarhani kúnguarhikuarhu (Úku. 10:34, 44, 45). Jiáni uératini Pedru ueenaspti tʼireni no judiuecha jingoni, ambe ma enga antesi no méni úpiringa (Gal. 2:12). Peru máru kristianuecha engaksï judiuepka, eratsesïreendiksï eska no sési jarhaspka májku kʼéri tʼireni imeecha jingoni engaksï no judiuepka. Engaksï máru kristianuecha engaksï májkueni eratseenga eska imeecha niárapka Antiokía, Pedru nóteru uékasptia tʼireni imeecha jingoni engaksï no judiuepka, jamberi jimboka chésïreenga no sési pʼikuastaani imani kristianuechani engaksï judiuepka. Enga Pablu ini ambe exepka, ima iáminduechani japarini xukaspti Pedruni (Gal. 2:13, 14). Nájkiruka ini ambe úpka, Pedru no chkétakuarhispti; seguiriispti jánguarhintani mójtakurhini. w23.09 22 párr. 8

Enga chá exekuarhikia ka kuenta íntskukuarheni eskajtsï no úxaka úni ambe ma, asï chkétakukuarhi je. Miá je “na enga xáni sési kámpijka Tata” ka eskaksïni ima jarhuataaka parajtsï sánderu sési úni ambe ma (1 Ped. 2:3). Apostoli Pedrujtsïni i ambe aiachisïndi: “Tata Diosï[ksïni] [...] kʼamaraati sési jorhendani iámindu ambe. Ima uaati eskajtsï uíuinhasï jauaka”. Ma xanhari, Pedru ísï pʼikuarheraspti eska no jukanchaspka Tata Diosïiri Uájpeeri orhepatini jimbo jarhani (Luk. 5:8). Joperu Pedru seguirispti sési marhuakuni Kristuni, jimboka Tata Diosï Jeoba ka Jesúsi xénchperakua jingonksï jarhuataspka. Ka indeni ambe jimbo, ima intsïnhasti sésikua para inchani “Reinurhu enga jindeeka para méntkisï enga juchaari Tata Jesukristueriika, ima engajtsïni pʼímutantajka” (2 Ped. 1:11). ¡Xáni ambakiti ambe enga Pedru intsïnhaka! Enga chá májkueni jánguarhintaska eska Pedru ka jurajkuntsï eskaksïni Tata Diosï Jeoba kʼamaraaka sési jorhendani, ístujtsï uaaka intsïnhani tsípikua para méntkisï. Ka ísïjtsï ʻpʼímutanhantaaka, indeni ambe jimbo engajtsï chá xáni mintsikajkaʼ (1 Ped. 1:9). w23.09 31 párr. 16, 17

Tabernakulurhu, ekuaru ma jarhaspti: lugari ma enga ótakata japka ka saserdotiichaksï jima marhuakusïreendi Tata Diosïni. Imani ekuaru jimbo, kʼéri altari ma jarhaspti kobriiri nani engaksï kéjtsïtakuecha kurhiranheenga. Ístu jarhaspti kʼéri itsï jatakua ma enga kobriiripka, nani engaksï saserdotiicha jupajkuenga ka jupanduni ante deksï imeecheri ánchikuarhitani úni (Éx. 30:17-20; 40:6-8). Iásï ante deksï niárani saserdotiini Jesúsini jingoni jini auandarhu. Ima kʼéri itsï jatakua enga tabernakulurhu japka ka ístu templurhu, miátantaasïndi erakukateechani, ka iámindu kristianuechani, na enga xáni jukaparhakueka pímbinhasï jarhani imeecheeri jánguarhu ka eskaksï jatsiska para sési marhuakuni Tata Diosïni. ¿Ka naniksï kómarhisïni Tata Diosïni ima “uánikua kʼuiripuecha”? Apostoli Juanu exespti eskaksï imeecha ‘kʼéri uaxantskuarhu orhepani anhandetixapka’ ka eskaksï “chúrikua ka jurhiakuaksï” marhuakuxapka Tata Diosïni. Inde uánikua kʼuiripuechaksï kómarhisïndi Tata Diosïni ixú Echerirhu, enga jindeeka ekuaru enga uérakua jaka Tata Diosïiri templurhu (Apok. 7:9, 13-15). ¡Xáni sési engachi iáminduecha jatsika nani engachi uaaka kómarhini Tata Diosï Jeobani imeeri templurhu! w23.10 28 párr. 15, 16

Tata Diosï Jeoba ístu úraasïndi orhejtsïkutiichani parajtsïni uinhaperantani (Is. 32:1, 2). Ísï jimbo, uandontskuarhi je imeecha jingoni engajtsï uandanhiata ma jatsiaka. Tsípikua jingoni jiókuarhi je engaksïni uékaska jarhuatani. Tata Diosï Jeoba imeechani úraasïndi paraksïni uinhaperantani. Ístu, ambe enga Biblia uandajka erokuarhikueri parachi irekani para méntkisï, iasea auandarhu o ixú Echerirhu jiáni enga paraisu ma úkuarhintaakia uinhaperantasïndijtsïni (Rom. 4:3, 18-20). Iámindu kristianuechachi erokuarhixaka irekani para méntkisï, iasea auandarhu o ixú Echerirhu jiáni enga paraisu ma úkuarhintaaka. Jimbokachi i ambe erokuarhixaka, uinhapikuarhintasïngachi para tekaantani tsʼéjkukuechani, parachi úni aianhpini ambakiti ambe Reinueri ka parachi uaani juchaari ánchikuarhiteechani engachi kúnguarhikuarhu jatsiajka (1 Tes. 1:3). Ju je exeni na enga inde erokuarhikua uinhaperantapka apostoli Pabluni. Pablu uandantaspti eska ísï jarhaspka enajkiksï katsinhani japi, eskaksï no sési kámaspka, eskaksï kuáskuspka, ka eska ménichani no jánhaskasïreenga ambe úni. Ka ménichani sáno niáraspti uarhini (2 Kor. 4:8-10). Para Pablu úni tekaantani eratsentaspti imeeri erokuarhikuani (2 Kor. 4:16-18). Ima eratsentaspti imani ambe enga jatsipiringa sánderu orhepatini. w23.10 15, 16 párr. 14-17

Engajtsï kómarhijka, eratsenta je sini Tata Diosï Jeoba exexaki eskachi uétarhinchaxakaia imani ambe engachi kurhajkuarhika. Jamberichi jucha eratsejka eskachi uétarhinchaxakaia imani ambe engachi kurhakuni jaka. Joperu Tata Diosï Jeobajkusï míteti na jatinchisï uétarhinchajki imeeri jarhuajperata (Ebr. 4:16). Engajtsïni Tata Diosï Jeoba no mókuchintaaka jirejiresï ambe engachi kurhakuaka, jamberichi úpiringa eratseni eskajtsïni no uékasïnga mókuchintani. Joperu jamberi ima exejti eskachi útasï nótki uétarhinchaxaka. Pori ejemplu, tumbi ma kurhakusti Tata Diosï Jeobani eska ambakerantapiringa pʼamenchakueri ma. Joperu ima no úxati ambakentani. Enga Tata Diosï Jeoba ambakerantapiringa, Satanási úpirindi uandani eska i tumbi seguirixaka marhuakuni Tata Diosï Jeobani nomasi jimboka ima ambakerantaspka (Job 1:9-11; 2:4). Joperu Tata Diosï Jeoba mítestia na enga jatini kʼamajkuauaka iámindu pʼamenchakuechani (Is. 33:24; Apok. 21:3, 4). Ísï jimbo, nóchi jatsiska para erokuarhini eska Tata Diosï Jeoba uaauaka milagruechani para kénditaani pʼamenchakuechani. Jiájkani, ¿i tumbi ambe úpirini kurhakuni Tata Diosï Jeobani? Eska íntskuaka uinhapikua ka eska jarhuataaka para no xáni uandanhiani para úni seguiriini marhuakuni Tata Diosï Jeobani nájkiruka pʼamenchani jaka. w23.11 24 párr. 13

Sansóni kánikua no sési ambe úspti, peru no chkétakuarhispti. Uékasïreendi kʼamarani imani ánchikuarhitani enga Tata Diosï Jeoba íntskupka, enga jindeepka filisteuecha jingoni uarhiperani (Juec. 16:28-30). Ísï jimbo, Sansóni mintsita jingoni kurhakuspti Tata Diosï Jeobani ini ambe: “Jurajkurini ataantani filisteuechani”. Tata Diosï kurhaaspti imeeri kómarhikuani ka úspti eska ima ménderu uinhapipiringa. Tata Diosï Jeobaeri jarhuajperata jimbo, Sansóni uándikuaspti sánderu uánikua filisteuechani imani jurhiatikua jimbo eska iámindu imeeri irekua jimbo. Nájkiruka Sansóni no sési nitamakuarhinchapka imani ambe jimbo enga erakupka úni, no chkétakuarhispti seguiriispti úni ambe enga Tata Diosï uékeenga. Ísï jimbo, engachi niáraaka úni ambe ma enga no sési jaka ka niáranchi tsïtaani pribilejiuechani ochi jurhimberanhantani, ísï eska Sansóni, ju je no chkétakuarhini. Ju je miáni eska Tata Diosï Jeoba listu jarhasïnga parajtsïni puáchentani (Sal. 103:8, 9). Nájkirukachi uaaka ambe ma enga no sési jauaka, útasïchi uaaka marhuakuni Tata Diosï Jeobani ísï eska na úpka Sansóni. w23.09 6 párr. 15, 16

I ambe no arhikuekasïndi eska Tata Diosï Jeoba tsípisïnga engachi no sési nitamakuarhini jarhajka, sino eska tsípisïnga engachi tekaantani jarhajka. ¿A no eskaksïni kánikua uinhaperantasïnga míteni eskajtsï uaaka sési pʼikuastani Tata Diosï Jeobani engajtsï no jurajkuska ka tekaantani? (Sal. 5:12). Ju je miántani Abraánini. Ima úspti jaiapanherantani Tata Diosïni jimboka tekaantaspka tsʼéjkukuechani enga nitamakuarhiapka. Ísï jimbo Tata Diosï niáraspti ísï exeni komueska imeeri amigu, ka komu nema enga sési jámajka Jeobani japarini (Gén. 15:6; Rom. 4:13, 22). Májkueni úkuarhiati juchantsïni jingoni. Tata Diosïjtsïni no imani ambe jimbojku sési exeati engachi marhuakuni jaka ni pribilejiuecha jimbo engachi jatsiaka kúnguarhikuarhu, sino imajtsïni jaiapanhentaati engachi no méni jurajkuska ka seguiriinchi tekaantani. Ka indeni ambechi uaaka iáminduchi úni, no arhiparini na engachi xáni jatiriika, ambe engachi nitamakuarhini jaka ka na engachi xáni jorhenaka. ¿Tsʼéjkukuajtsï ma jatsiski? Miá je eska engajtsï no méni jurajkuska Tata Diosïni, imaksïni jaiapanhentaati. Míteni eskajtsïni Tata Diosï Jeoba jaiapanhentaxaka kánikuajtsïni sési pʼikuastasïndi ka uinhaperantasïndi juchaari erokuarhikuani. w23.12 11 párr. 13, 14

Kánikua jukaparhakuesti para tatakeecha engaksï kristianueka, jorhenguarhini sési uandontskuarheni máteruecha jingoni. Jimbokaksï jatsisïnga para kurhajchani máteru nemani ka kurhanguni na enga eratsejka ka pʼikuarherani (Prov. 20:5). Engari kʼuiripuni ma jingoni jauaka, uaakari jorhenguarhini na enga eratsejka o ambe enga pʼikuarherajka jimbokari exeni jauaka na uandajka, na enga jánharhintajka o na enga níjkurhani jarhajka. Joperu engari méntkisï selulari ambe jimbojku uandontskuarhejka o korreu elektroniku jimbo ka mensajicha jimbo, sánderuri úkua jukanchaaka uandontskuarheni jiáni engari máteruecha jingoni jauaka. Ísï jimbo, jánguarhi exeni nénari úni sánderu kʼuiripuecha jingoni jarhani parari kurhajchaani (2 Juanu 12). Kristianu ma enga sési eratsejka jatsisti para jorhenani mantenerikuarhini jandiajku ka ístu imeeri familiani (1 Tim. 5:8). Kánikua sésiisti eskari jorhenguarhiaka máru ambe úni parari mantenerikuarhini (Úku. 18:2, 3; 20:34; Éfes. 4:28). Jánguarhinta sési ánchikuarhini ka asï ambe ma ísku jatini ueena úni ka nóri kʼamarani. Engari jorhenguarhiska sési úni ambe ma ka ísïri úni, máteruechaksï sési ambe uandaati chiiti ambe, ka sánderu fásiliuati eskari exentaaka ánchikuarhita ma ka nóri sóntku tsïtaaka. w23.12 27 párr. 12, 13

Enga Biblia úraajka uandakuechani “Tata Diosï Jeobaeri jurhiatikua” imani tiempuni arhikuekasïndi enga ima kʼamajkuajka imeeri enemiguechani ka pʼímutantani imeeri iretani. Ka ísï úkuarhistia ióntki, jiáni enga Tata Diosï Jeoba kastigariuapka imeeri enemiguechani (Is. 13:1, 6; Ezeq. 13:5; Sof. 1:8). “Tata Diosï Jeobaeri jurhiatikua” nóteru ióni kuerataxatiia para niárani ka ueenakuarhiati enga Kʼéri Babilonia kʼamajkunhaaka ka Armajedoniiri uarhiperakua jingoni kʼamakurhiati. Ka parachi úni tsípiti pakarani indeni “jurhiatikua” jimbo, jatsiskachi para desde iásï ueenani preparadu jarhani. Asta Jesúsi jorhentpispti eskachi jatsiska para “jingontku jarhani” para jiáni enga “kʼéri mískuarhita úkuarhiaka”, ísï jimbo inde ambe arhikuekasïndi eskachi méntku jánguarhintani jauaka prepararikuarhini (Luk. 12:40; Mat. 24:21). Primeru Karakatarhu para Tesalónika anapuecha, apostoli Pablu uandaaspti máru ejempluechani para jarhuataani kristianuechani paraksï preparadu jarhani para Tata Diosï Jeobaeri jurhiatikua. Pablu mítespti eska kánikua kuerataxapka paraka niárapiringa inde jurhiatikua (2 Tes. 2:1-3). Joperu, uandaspi eska kánikua jukaparhakueska preparadu jarhani ísï komu sienga axuterku japiringia. w23.06 8 párr. 1, 2

Uéxurhini 1978 jimbo, ueenaspti únhani kʼéri edifisiu ma Tokio (Japón) enga 60 pisueriipka. Engaksï kʼuiripuecha jimeesïsï nitameenga, kurhamarhikuarhisïreendiksï sini ima edifisiu no xerekuarhentapirini enga uinhamu jenchepiringa. ¿Peru ambeksï úspi injenieruecha paraka inde edifisiu no xerekuarhentapiringa? Sésiksï uaxastaspti, ka ístu eska úpiringa manakuarhini sáni paraka no xerekuarhentapiringa enga uinhamu jenchepiringa. Pori ísï arhini, kristianuechachi májkueniiska eska inde kʼéri edifisiu. ¿Andi? Májkueni eska i edifisiu kristianu ma jatsisti para uiuinhasï jarhani, joperu ístu eska uaaka ixúani ka ixúani manakuarhini. Pori ejemplu, jatsisti para uiuinhasï ka sési anhaxurhitini jarhani para méntkisï úni ambe enga Tata Diosï Jeoba uandajka ka ístu kurhajchaani imeeri Leiichani, Jatsisti para listu jarhani para ʻkurhajchaniʼ Tata Diosïni ka méntkisï ísï úni eskaksï imeeri prinsipiuecha na uandajka. Joperu ístu jatsisti para ʻkurhanguniʼ eska méntkisï enga uaaka o enga uétarhiaka, uaaka ménderueni úni ambe ma, pori ísï arhini ixúani ka ixúani manakuarhini (Sant. 3:17, Táta Diósïri Uandakua Tata Jesukristueri Aiatsperakua). I ambejtsïni jarhuataati parachi no méntku inchandimentani meru ísï uékani úni ambe ma ka níjtu ísku exeani Tata Diosïiri juramukuechani. w23.07 14 párr. 1, 2

Satanási tsʼéjkuspti Jesúsini paraka no kurhajchapiringa Tata Diosï Jeobani ka jurajkuni (Mat. 4:1-11). Satanási meru uékasïreendi eska Jesúsi pekariipiringa parakajtsïni no úpiringa euajpintani. Enga Jesúsi aianhpini jámapka ístu jatsispti para tekaantani máteru jásï tsʼéjkukuechani. Pori ejemplu, imeeri enemiguechaksï no sési kámaspti ka arhisptiksï eskaksï uándikupiringa (Luk. 4:28, 29; 13:31). Ka jatsispti para tekaakuantani imeeri chúxapatiichani engaksï no ueenga sési ambe úni jimbokaksï no perfektuespka (Mar. 9:33, 34). Ístu jiáni engaksï jusgariini japka ka arhinksï eskaksï uándikupiringa, no sésiksï kámaspti ka teresmarhuni. Tátsekua, ísïksï uándikuspti enajki ima no sési úri máepi (Ebr. 12:1-3). Ka enga na uarhini japkia Tata Diosï Jeoba nóteru kuájchakusptia, jimbosï ima jatsipti para jandiajku orhepani uérakuni indeni tsʼéjkukuani (Mat. 27:46). Tata Jesukristu kánikua maiampisti parajtsïni juchantsïni euajpintani. Engachi eratsentajka ambe enga xáni úka Jesúsi juchantsïni jimbo, úsïndi eskachi iámu mintsita jingoni xénchaaka. w24.01 10, 11 párr. 7-9

Tekaantskua, jarhuataatijtsïni parachi úni sési pájperani máteruechani jingoni. Engachi tekaantstiiska, jingontkuchi kurhajchauaka máteruechani engajtsïni arhini jauaka ambe ma (Sant. 1:19). Ístuchi jánguarhintaaka sési pájperani iáminduecha. Ka nóchi sóntku ikiauaka nijtuchi uandaa ambe ma enga no sési pʼikuastauaka máteruechani jiáni engachi jukari uandanhiani jauaka. Ístu engajtsïni nema arhinchaaka, nóchi sóntku ikiauaka, nijtuchi ísï kámaa imani kʼuiripuni eskajtsïni ima na kámaaka. Sánderu sési, seguiriuakachi tekaatsperantani ka mintsita jingonchi puátsperantani (Kol. 3:12, 13). Tekaantstiini, jarhuataatijtsïni ambakiti ambe erakuni úni. Enbesi de jirejiresï úni ambe ma ka no eratseparini, arhutaakachi tiempu para exeni ambe ka ambechi uaa úni ka imani ambechi erakuni engajtsïni sánderu marhuacheaka. Pori ejemplu, engachi ánchikuarhita jirinhani jauaka, jamberichi uékaaka jiókuarhini náki uéjki ánchikuarhitani. Joperu engachi tekaantstiiska, exeakachi néna jarhuataa o no sési úkuni juchaari familiani ka ístu sintsïni jarhuataa parachi seguiriini jarhani sési pájperani Tata Diosï Jeoba jingoni. Engachi tekaantstiiska, nóchi erakuaka imani ambe engajtsïni uaaka no sési úchini. w23.08 22 párr. 8, 9

I Jamberijtsï kuatantaaka jimbokajtsï jánguarhintaxaka no no sési ambe niátani. Joperu engajtsï eratsentaaka ambe engajtsï arhipka Tata Diosï Jeobani jiáni engajtsï aiakupka chaari tsípikuani, inde ambeksïni íntskuati uinhapikua parajtsï no no sési ambe niátani. ¿Néna? Jiáni enga kʼuiripu ma aiakujka Tata Diosï Jeoba imeeri tsípikuani, nóteru irekasïndia para imajkumindu. I ambe arhikuekasïndi eska no jámaaka tsitini ni úni imani ambe enga Tata Diosï Jeoba no jaiapanhentajka (Mat. 16:24). Ísï jimbo, jiáni engachi tsʼéjkukua ma jatsijka, nóchi jámasïnga eratseni ambechi uaa. Juchachi sési mítetini jarhasïngia ambechisï jatsi para úni: kurhajchani Tata Diosï Jeobani. Ka ísïchi úsïnga jimbokachi imantkusï uéjka jaiapanherantani. Jiáni engachi aiakupka juchaari tsípikuani Tata Diosïni, méntkuchi támu peeraspka imani ambe engachi uékeenga úni ka ísïchi májkueni úni jauaka eska Jobu. Ima no sési ambe nitamakuarhispti joperu méntku no sáni chéspti uandani: “Marhuakuaka Tata Diosïni iámu mintsita jingoni” (Job 27:5). w24.03 9 párr. 6, 7

Jeoba Tata Diosï máesti enga kánikua xénchpejka (2 Kor. 13:11). Ima kánikua uandanhiasïndi mándani arhini juchantsïni jimbo, ísï jimbo, uaakachi seguru jarhani eskajtsïni ima kuájchakusïnga jimbokajtsïni xénchasïnga (Sal. 32:10). Engachi sánderu eratsentaaka na engajtsïni xarhatachekia Tata Diosï Jeoba eskajtsïni xénchasïnga, niáraakachi jakajkuni eska ima meru jarhaska ka sánderuchi andarhieraaka. Ísï jimbo, uaakachi kómarhini ka mintsita jingoni kurhakuni eskachi uékasïnga eskajtsïni ima xarhatacheaka imeeri xénchperakua. Ístuchi uaaka aiangukuarhini ambe engajtsïni xáni uandanhiatajka ka mintsikani eskajtsïni ima kurhanguchisïnga ka ístu eskajtsïni uékasïnga jarhuatani (Sal. 145:18, 19). Tata Diosï Jeobaeri xénchperakuajtsïni ísï sési pʼikuastasïndi komueska chpiri enga érhuni jarhajka jiáni enga kánikua tsʼirakuarhijka. Ka úsïndi eskachi uinhapikuarhintaaka ka sésichi pʼikuarherantani. Ísï jimbo, kánikuachi sési pʼikuarherasïnga jimbokajtsïni Tata Diosï Jeoba kánikua xénchasïnga. Ísïiti, iáminduechachi uékasïnga uandani: “Xénchasïnga Jeobani” (Sal. 116:1). w24.01 31 párr. 19, 20

Jesúsi no solu arhispti kʼuiripuni néna enga arhinhajka Tata Diosï Jeoba. Judiuechaksï mítesptia indeni ambe. Sánderu sési, aianguaspti “na enga jásïika ima” (Juanu 1:17, 18). Pori ejemplu, Karakateecha engaksï Ebreu jimbo jaka uandasïreendiksï eska Tata Diosï Jeoba pʼamojpitiiska (Éx. 34:5-7). Ka Jesúsi xarhataspti eska inde ambe meru ísïispka enga uandantapka ejempluni uájpeeri enga tsïnchetini japka. Engachi arhintajka eska taati jémba andajkuarhiska exeni “enga útasï iauani ísï jurhani japka” ka eska uiriipaspka kúmuni ka kamajchakuni ka sési jimbo puákuntani, exesïngachi eska Tata Diosï Jeoba meru pʼamojpitiiska (Luk. 15:11-32). Ísï jimbo, Jesúsi meru jarhuataspti kʼuiripuechani parakaksï kurhangupiringa na enga jásïika Tata Diosï Jeoba. w24.02 10 párr. 8, 9

Tata Diosï Jeobajtu sési pʼikuastantasïndi imeechani engaksï no sési nitamakuarhini jarhajka. ¿Ambejtsïni jarhuataa pʼamojpeni ka sési pʼikuastantaani máteruechani? Ísï eska Tata Diosï Jeoba na újka, xarhataani inde járhati kualidadichani engajtsïni jarhuataaka sési pʼikuastantani nemani. Ju je exeani máru kualidadichani. ¿Ambejtsïni jarhuataa parachi seguiriini xénchperani ka sési pʼikuastperantani? (1 Tes. 4:18). Jatsiani indeni kualidadichani, pori ejemplu, kurhangukuani máteruechani, xénchpeni ka sési kámpini (Kol. 3:12; 1 Ped. 3:8). Engachi pʼamojkuauaka erachiichani ka uandanhiani imeechani jimbo, inde ambe úsïndi eskachi uékaaka jarhuataani engaksï no sési nitamakuarhini jarhajka. Jesúsi ísï uandaspti: “Kʼuiripu ma uandasïn[di] ambe enga xáni mintsitarhu jatsijka. Ambakiti kʼuiripu ma, ambakiti ambe uandasïndi jimboka ambakiti ambe jatsiska imeeri mintsitarhu” (Mat. 12:34, 35). Jiájkani, engachi sési pʼikuastantajka juchaari erachiichani xarhatakuani jarhasïngachi eskachi xénchaasïnga. w23.11 10 párr. 10, 11

Parachi úni kurhanguani Biblieri profesiechani, jatsiskachi para jarhuajperata kurhajkuarhini. Ju je eratsentani arini ejempluni. Eranhaska je eskajtsï nirasïnga siudadi ma jimbo engajtsï no miiuka, peruksïni pámbetasïndi amigu ma enga sési miiuka. Chaari amigu sési mítesti nani engajtsï jaka ka nani engaksï pájpejka mándani xanharu. ¡Xáni sési engaksïni chaari amigu pámbeka! Tata Diosï Jeoba, ísïisti komueska inde amigu, ima sési mítesti náki tiempu jimbochi irekaxaki ka ambe enga úkuarhiaka sánderu orhepatini. Ísï jimbo, parachi kurhanguani Biblieri profesiechani, jatsiskachi para kaxumbikua jingoni kurhakuni Tata Diosï Jeobani eskajtsïni jarhuataaka (Dan. 2:28; 2 Ped. 1:19, 20). Ísï eska ambakiti taati ma, Tata Diosï Jeoba uékasïndi eska sési nikuauaka sánderu orhepatini imeeri uájpeechani (Jer. 29:11). Kʼuiripuechaksï no úsïndi míteni ambe enga úkuarhiaka sánderu orhepatini, joperu Tata Diosï Jeoba kʼóru mítesti iámindu ambe. Ima kararkuarhisti imeeri Karakatarhu, profesiechani parachi tʼuini mítetini jarhania ambe enga úkuarhiaka sánderu orhepatini (Is. 46:10). w23.08 8, 9 párr. 3, 4