Enga nema petanhantajka: jindeesti uékperakua xarhatatspeni

JULIANI uandantasïndi: “Imani jurhiatikua jimbo enga kúnguarhikuarhu anunsiu ma nitamataranhapka, paraksï uandantani eska juchiiti sapi nóteru Jeobaeri testiguespkia, kánikuani no sési pʼikuarheraspka jimboka ima ka ji kánikuachi sési pájperasïreenga ka uánikua ambechi májku kʼéri úsïreenga. Ima ambakiti sapi máespti, peru ma repentku mójtakuarhispti ka ueenaspti no sési ambe úni. Juchiiti uarhiiti someni uerani jarhasïreendi, ka ji no mítesïreenga ambe úni parani sési pʼikuastantani. Kurhamarhikuarhisïreengachi ambechi no sési úspi”.

Nájkiruka xáni no sési pʼikuastpejka, ¿uaa néna uaa nema uandani eska petantani nemani kúnguarhikuarhu uératini jindeeska xénchperakua xarhatatspeni? ¿Andisï Biblia uandajki eska ménisï uétarhisïnga nemani petantani kúnguarhikuarhu uératini? Ka, ¿ambe úsïni eska nema petanhantaaka kúnguarhikuarhu uératini?

¿KÁNI UÉTARHISÏNI NEMANI PETANTANI KÚNGUARHIKUARHU UÉRATINI?

Tsimani ambe jarhasti enga jimbo Jeobaeri testigu ma uaaka petanhantani kúnguarhikuarhu uératini. Primeru, enga kʼéri pekadu ma uaaka, ka segundu, enga no arrepentirikuarhiska.

Nájkiruka Jeoba no erokuarhijka eskaksï imeeri marhuariicha perfektueuaka, ambe enga erokuarhijka jindeesti eskaksï ísï jámaka eska ima na uékajka. Por ejemplu, no jiókuarhisïndi eskaksï imeeri marhuariicha ísku jándikua ambe uaaka, eskaksï idoluechani kómarhiauaka, eskaksï sïpaaka, eskaksï uaaka ambe ma para sentabu sïpakuani máteruechani, eskaksï uándikpiaka o eskaksï sïkuamikua ambe uaaka (1 Korintu 6:​9, 10; Apokalipsisi 21:8).

Ísïisti, chájtujtsï májkueni eratsejka eska ambe enga Tata Diosï kurhakuajka imeeri marhuariichani sési ambeeska ka eskajtsïni kuájchakusïnga. ¿Ka né no uékasïni irekani imeechani jingoni engaksï sési kámpijka, engaksï sési ambe újka ka engaksï mintsinharhikueka? I ambesï jarhajti Tata Diosïiri iretarhu. Ísï sési jarhani erachiicha jingoni Jeobaeri iretarhu, jindeesti jimboka jiáni engachi aiakukuarhika Tata Diosïni Jeobani iáminduechachi aiakuska eskachi kurhajchaapiringa imeeri juramukuechani.

Joperu, ¿ambe úkuarhisïni enga Tata Diosïiri marhuari ma kʼéri pekadu ma újka jimboka no jingontku jarhaspka? Ióntki jarhasptiksï máru Jeobaeri marhuariicha engaksï niárapka ísï úkuarhinchani ka ima no jirejiresï jurajkuaspti. Ma enga ísï úkuarhinchapka jindeespti Dabidi. Nájkiruka ísku jándikua ambe niátapka ka uándikuni achamasïni ma, profeta Natáni arhispti: “Jeoba [. . .] tekaachintaxatikini chiiti pekaduni” (2 Samuel 12:13).

¿Joperu andisï tekaakuntapi Jeoba Dabidini? Jimboka ima mintsita jingoni móantaspka (Salmo 32:​1-5). Májkueni, iásïjtu enga kristianu ma kʼéri pekadu ma újka ka enga móantajka ka enga jurajkujka no sési jásï úkuani, no petanhantasïndi kúnguarhikuarhu uératini (Úkuecha 3:​19; 26:20). Peru enga no mintsita jingoni móantaska, orhejtsïkutiicha engaksï komite judisiali jimbo jarhajka jatsisïndiksï para petantani kúnguarhikuarhu uératini.

Úpiringachi eratseni eska enga nema ísï petanhantajka kúnguarhikuarhu uératini kánikua no sési ambeeska, sánderia engachi sési pájperajka imani jingoni enga petanhantaajka. Joperu, Bibliajtsïni xarhatachesïndi uánikua ambe engachi jimbo uaaka mintsinharhini eska jindeeska xénchperakua xarhatani enga nema ísï petanhantajka.

ANDISÏ MARHUAJKI ENGA NEMA PETANHANTAJKA

Jesúsi uandasti eska jánhaskakua xarharasïnga úkuecha jingoni (Mateu 11:19). Enga nema petanhantajka kúnguarhikuarhu uératini jimboka no móantasïnga jindeesti jánhaskakua xarhatani ka ístu sési uaxastakata jarhasti Bibliarhu, jimboka úsïnga eska ambakiti ambe uéraaka. Ju je exeni tanimu ambe:

Úsïndi eska kʼuiripu ambakiti ambe eratseaka Tata Diosï Jeobaeri ambe. Jucha Jeobaeri testiguecheska, ísï jimbo ima ambe engachi jucha újka úsïndi eskaksï kʼuiripuecha sési o no sési ambe eratseaka Jeobaeri ambe (Isaías 43:​10). Májkueni eska na újka eska sési uandanhaaka taatiicheeri ambe, enga sapi ma sési o no sési jámajka, ístu, engachi jucha sési o no sési újka kʼuiripuechaksï sési o no sési ambe eratseati Tata Diosï Jeobaeri ambe. Esekieliiri jurhiatikuechani jimbo, ireteecha engaksï jimeesïsï irekapka enga Israeli japka mítesptiksï eskaksï Judiuecha kómarhisïreenga Tata Diosï Jeobani (Ezequiel 36:​19-23).

Májkueni úkuarhisïndi juchantsïni jingoni kʼuiripuechaksï mítesti eskachi jucha marhuakusïnga Jeobani. Ísï jimbo engachi jucha sési jámaaka ka sési ambe úni kʼuiripuechaksï sési uandaati Tata Diosï Jeobaeri ambe. Peru engachi ísku jándikua ambe niátapiringa no sésichi jájkuni japiringa Tata Diosïiri pímbinhasï nombrini. Jimbojtsïnisï apostoli arhijti: “Ásteru jurajkutakuarhi jeia parajtsï imani ambe úni ambe engajtsï ióntki pʼindepka úni jiáni engajtsï no mítepka imani; sánderu sési, chájtu májkueni pímbinhasïi je ambe uéjkijtsï úni, ísï eska na pímbinhasïika ima engaksïni ióarhika, jimboka ísï karakata jarhaska: ‘Chájtsï jatsiska para pímbinhasïini jimbokani ji pímbinhasïiska’” (1 Pedru 1:​14-​16).

Ísïisti, engachi jucha sési jámaaka, indeni ambe jimbo sési uandanhaati juchaari Tata Diosïiri ambe engachi marhuakujka. Joperu, enga Jeobaeri testigu ma pʼindejka no sési jásï ambe úni, imeeri besinuechaksï niárasïndi míteni imeeri no sési jánguani. Ísï jimbo, enga ima petanhantajka kúnguarhikuarhu uératini, marhuasïndi parakaksï kʼuiripuecha míteka eska Jeoba pímbinhasï ireta ma jatsiska ka eska ísï úsïnga ambe ma eska Biblia na uandajka. Ju je exeni ejemplu ma. Suiza anapu acheeti ma niraspti kʼumanchikua Reinuerirhu ka uandaspti eska uékasïreenga Jeobaeri testigu úkuarhini. ¿Andi? Jimboka imeeri piremba petanhantaspka kúnguarhikuarhu uératini jimboka ísku jándikua ambe úspka, ka acheetiinka uékasïreendi jarhani kúnguarhikuarhu ma jimbo enga no jiókuarhipiringa no sési jásï ambe.

Kuájchakuasïndi kúnguarhikuarhu anapu erachiichani. Apostoli arhiaspti Korintu anapu kristianuechani eska no sési jarhaspka jurajkuani kúnguarhikuarhu imeechani engaksï no sési ambe niáteenga ka engaksï no móantenga. Uandaspti eska “sántku xarhipiti iámu tsïrerini xarhiperasïnga”, eska ístu ima enga no sési jásï ambe niátajka úpirindi úni eskaksï máteruechajtu májkueni jámapiringa eska ima. Tátsekua arhiaspti ambe engaksï jatsipka para úni, uandaspti: “Petanta je kúnguarhikuarhu uératini indeni kʼuiripuni enga xáni no sési ambe niátani jaka” (1 Korintu 5:​6, 11-​13).

Xarharasïndi, eska inde achamasïiri enga Pablu uandani japka ísku jándikua ambe niátaxapka, ka eska no kʼuratsekua jingoni ísï úsïreenga. I ambe jimbo, máteru kúnguarhikuarhu anapu erachiichaksï ueenaspti sési exeni imani ambe enga ima úni japka (1 Korintu 5:​1, 2). Engaksï jurajkupiringa eska seguiripiringa ísï jámani kúnguarhikua ístu ueenapirindi sési exeni indeni ambe ka asta niárapirindiksï jamberi ísku jándikueri pʼindekuechani engaksï ióntki úkuarhienga jini Korintu. Májkueni, enga iásïjtu jurajkunhaaka eska kristianu ma kʼérati pekaduechani uauaka úpirindi úni eskaksï máteruechajtu ueenapiringa no xáni jukaparharani Tata Diosïiri juramukuechani (Eclesiastés 8:​11). Imeecha engaksï pekadu ambe újka ka engaksï no móantajka ísïistiksï eska “tsakapuecha engaksï itsïirhu jatameka” ka enga úpiringa úni eskaksï erachiicha nóteru mintsikapiringia Tata Diosïni (Judasï 4, 12).

Uaati úni eska pekadori móantaaka. Jesúsi uandaspti eska tumbi ma kéndikuspka imeeri kʼumanchikuarhu uératini ka eska iámu úraspka imeeri erensiani ísku jándikua ambe úparini. Jorhenguarhispti enga no sési ambe nitamakuarhipka ka enga nóteru úpkia imeeri familiani jingoni jarhani. Últimu, ima tumbi mójtakurhispti ka kʼuanhatsentaspti imeeri kʼumanchikuarhu (Lukasï 15:​11-​24). Imeeri taati jémba kánikua uékperakua jingoni jióntaspti. Ambe enga Jesúsi uandapka ima taatiiri ambe enga xáni sési kámapka imeeri sapini, jarhuatasïndijtsïni kurhanguni na enga pʼikuarherajka Tata Diosï Jeoba juchantsïni jimbo. Bibliajtsïni xarhatachesïndi eska Tata Diosï no uékasïnga eska no sési úri ma tsïnchiaka, sini eska “seguiriuaka imeeri xanharu jimbo ka eska seguiriuaka irekani” (Ezequiel 33:11).

Sáno májkueni, imeecha engaksï petanhantajka kúnguarhikuarhu uératini nóteruksï jindeesïndi kúnguarhikua jingoni, enga ísïika eska imeecheri familia, ka sánderu orhepatini jamberiksï kuenta íntskukuarheati eska ambe engaksï xáni tsïtaka. Ka úpirindiksï no sési nitamakuarhinchani imani ambe jimbo engaksï erakupka úni. Jamberiksï miántajka na engaksï xáni sési pʼikuarhereenga engaksï Tata Diosï Jeobaeri amiguepka ka engaksï imeeri erachi jingoni japka. Ka íni ambe jimbo, jamberiksï niárani móantani ka ménderuksï kʼuanhatsentani Jeobani jingoni.

Paraka pekadori ma móantaaka uékperakua uétarhisïndi, peru ístu eska mátirku arhinhaaka ambe enga no sési úni jaka. “Engareni atapiringa nema enga jurhimbitiika, xarhatani japirindi eskarini xénchasïnga; engareni xukapiringa ísïipirindi enajkirini aseiti atajtsïkuni japirini”, ísï uandaspti Dabidi (Salmo 141:5). Parachi úni sánderu sési kurhanguani íni uandakuechani, ju je eratsentani ma ambe. Ju je eranhaskani eska kánikua tsʼirakuarhixaka ka eskaksï máru kʼuiripuecha karhamaxaka juáta ma jimbo nani enga niebi uekorhejka. Máechakua kuatarasïndi, ueenasïndi kʼuanhapintani ka kʼuíni. Joperu enga ima jima kʼuíska enga xáni tsʼirakuarhijka, úpirindi sóntku uarhini. Máteru enga imeecha jingoni jámani jaka tsinharitasindi ka para ísï úni kánharhikuarhu atasïndi, astakaksï niáraaka né enga uaaka jarhuatani. Nájkiruka pʼameaka enga ima ísï ataaka i ambe uaati úni eska ima no uarhiaka. Májkueni, Dabidi kánikua diosmaiamukua íntspesïreendi enga nema úpiringa jurhimberantani imani, nájkiruka ima no tsitipiringa, jimboka kurhangusïreenga eska kánikua marhuakupiringa inde ambe.

Enga nema petanhantajka kúnguarhikuarhu uératini, jamberi indeni ambe uétarhinchajti ima enga no sési ambe niátajka. Diesi uéxurhinisï tátsekua enga na petanhantapka kúnguarhikuarhu uératini Julianiiri uájpa, engachi uandapkia antesi, ueenaspti ménderu sési ambe úni ka kʼuanhatsentaspti kúnguarhikuarhu. Iásï orhejtsïkutiistia ka i ambe uandasïndi: “Engani petanhantapka kúnguarhikuarhu uératini jarhuatastirini parani exeni eskani no sési úxapka ambe ma. Meru uétarhinchasïreenga eskajtsïni petantapiringa kúnguarhikuarhu uératini” (Ebreu 12:​7-​11).

NA ENGA UAAKA JARHUATANHANI IMA ENGA PETANHANTAAKA KÚNGUARHIKUARHU UÉRATINI

Enga nema petanhantajka kúnguarhikuarhu uératini, kánikua no sési pʼikuastasïndi máteruechani. Peru úsïndi úkuarhini ambe ma, iáminduechachi uaaka jarhuajpeni paraka enga nema petanhantajka ísï kúnguarhikuarhu uératini marhuauaka.

Orhejtsïkutiichaksï jatsisti para jánguarhintani xarhatani uékperakuani enga Tata Diosï Jeoba xarhatajka jiáni engaksï arhijka nemani eska petanhantaaka kúnguarhikuarhu uératini. Paraksï ísï úni, uékperakua jingonksï arhisïndi kʼuiripuni ka paraka sési kurhanguaka ambe enga jatsika para úni para úni ménderu kʼuanhatsentani kúnguarhikuarhu. Ístu, ménichanisïksï nirasïndi pʼorhembini nemani enga petanhantaaka kúnguarhikuarhu uératini ka enga xarhatani jaka eska uékasïnga mójtakuni imeeri irekuani, paraksï miátantani ambe enga jatsika para úni para úni ménderu andarhientani Tata Diosï Jeobani.a

Familia xarhatakusïndi imeeri uékperakua kúnguarhikuani ka ístu imani enga petanhantajka kúnguarhikuarhu uératini engaksï jiókuarhijka ambe engaksï orhejtsïkutiicha erakuka úni. Juliani miásïndi: “Ji méntkisï xénchaska juchiiti sapini, joperu imeeri jángua úspti eskachi nóteru úpiringuia sési pájperani”.

Kúnguarhikuarhu anapu erachiichajtuksï uaatia xénchperakua xarhatani engaksï no kúnguarhiska imeechani jingoni engaksï petanhantajka kúnguarhikuarhu uératini (1 Korintu 5:​11; 2 Juanu 10, 11). Ísïksï uaati xarhatani eskaksï jiókuarhisïnga eska Jeoba jurhimberantaxaka imani kʼuiripuni imani ambe jimbo engaksï orhejtsïkutiicha úka. Peru útasïksï uaati máteru ambe úni. Jatsistiksï para xénchperakua xarhatakuani imeecheri familiarichani engaksï petanhantaaka, jimbokaksï imeechajtu no sési nitamakuarhinchaxaka. Imeecheri familiarhu anapuechaksï no petanhantaasti, ísï jimbo jatsiskachi para jánguarhintani parakaksï no ísï pʼikuarheraaka eskaksï jandiajku jarhaska (Roma 12:​13, 15).

Juliani ísï kʼamarhukusïndi uandani: “Enga nema petanhantajka kúnguarhikuarhu uératini jindeesti ambe ma enga meru uétarhijka ka engajtsïni jarhuatajka parachi janhanharhiani Tata Diosï Jeobaeri juramukuechani. Nájkiruka kánikua no sési pʼikuastpejka, sánderu orhepatini sési ambe niárasïndi jarhani ini ambe jimbo. Engani ji sési exepiringa imani ambe enga juchiiti sapi no sési úni japka, seguru jarhaska eska ima no méni kʼuanhatsentapiringa Jeobani jingoni”.