¿Nénchi uékasïni eskajtsïni jeiapanhintaaka, parhakpini anapuecha o Jeoba?

1. ¿Ambechi uékasïni iáminduecha?

ERANHASKA je eskachi exentaska nemani engachi mítika ka respetarini, pero ima no miásïndi nachi arhinhasïni nijtsïni jamberi mítintani. ¿Nénachi pʼikuarherapirini? Seguru eska no sési, jimboka normaliska uékani eskajtsïni máteruecha miáuaka. Peruchi no uékasïnga eskaksï solu mítiaka néskichi, sino ístu nachi jásï kʼuiripueski ka ambe engachi újka (Núm. 11:16; Job 31:6).

2, 3. ¿Ambe uá úkuarhini engachi uékaaka mítikateni? (Exe je dibujuni enga uénakuarhu jaka).

² Ísï eska na úkuarhijka máteru ambe jingoni, juchari pekadu uáti úni eska uékani mítikateni, no no sési jauaka. Ístu, Satanasiri parhakpini uáti úni eskachi uékaaka kʼéri ambeni ka famosueni. Engachi ísï újka, nochi kʼéri ambe arhini jarhasïnga Jeobani, imani enga jukanchaka para kʼéri ambe arhinhani (Jaŋ. 4:11).

³ Jesusiri jurhiatikuecha jimbo, máru relijioniri orhejtsïkutichaksï uékasïrendi eskaksï kánikua mítikatepiringa, peru ima ambe no sési jarhaspti. Jesusi arini ambe arhiaspti imeri chúxapatichani: “Xéparini kararichani jingoni engaksï tsitijka xukuparhakua ambakiti [...] jukani, ka engaksï gustarijka eskaksï sési uandajpanhaaka plasecharisï, ka ístu tiostecharhisï ka kʼumanchikuecharhisï sánderu ambarhati uaxantsïkuecharhu uaxakani”. Ístu uandaspti eskaksï “imecha sánderu no sési kastigarinhaaka” (Luk. 20:46, 47). Peru Jesusi sési ambe uandaspti uarhiiti tsïndiri enga sántku tumina íntspipka no erokuarhiparini eska kʼéri ambe arhinhapiringa (Luk. 21:1-4). Ini ambe úparini, Jesusi xarhataspti na enga exejka Jeoba enga nema uéjka eska kʼéri ambe arhinhaaka. I artikulujtsïni jarhuataati májkueni exeni ini ambe eska Jeoba na exejka.

NÉNCHI UÉKASÏNI ESKAJTSÏNI MÍTIAKA

4. ¿Nénchi uékasïni eskajtsïni mítiaka, ka andi?

⁴ ¿Nénchi uékasïni eskajtsïni mítiaka? Nochi uékasïnga mítikateni parhakpinirhu komu eskuelarhu, negosiuecharhu ochi uékani famosueni. Sánderu sési, imani ambechisï uéjka enga Pablu uandapka: “Iásïjtsï mítiskia Diosïni, o paraksïni sánderu jurhimbitku arhini, Diosïksïni mítistia chánksïni. Jimajkani, ¿andijtsïsï kʼuanhatsintani jaki parajtsï janhanharhini uénani anapu jorhenguani enga débiliika ka enga nómindu marhuajka, ka engajtsï cha uékani jaka jántspikuni?” (Gal. 4:9). ¡Xáni kʼéri pribilejiu ma para jucha, niárani mítikateni Tata Diosïni jimbo, Juramuti iámindu amberi! Ima uékasïndi juchari amigueni. Ísï eska na uandapka kʼuiripu ma enga Bibliaeri ambe exejka, “imajtsïni niárasïndi jaiapanhintani ka kuidarini”. Engajtsïni Jeoba niárajka exeni komueska imeri amiguecha, niárasïngachi kumplirini ambe engachi jimbo kueraanhaka (Ecl. 12:13, 14).

5. ¿Ambechi uá úni parajtsïni Tata Diosï ísï exeni komueska amigu ma?

⁵ Inde ambesï úkuarhinchapti Moisesi. Enga arhipka Jeobani eska jurajkupiringa sánderu sési kurhanguani imeri juramukuechani, Jeoba arhispti: “Uáka ambe engarini kurhachika, jimbokaksïni juchiti éskuecha jaiapanhintaska ka nombri jimbokini mítiska” (Éx. 33:12-17). Juchajtuchi uánikua kóntperatechani jatsiasïnga engajtsïni Jeoba niárajka mítini. Peru ¿ambechi uá úni parajtsïni Tata Diosï ísï exeni komueska amigu ma? Xénchani ka aiakuni juchari tsípikuani (arhinta je 1 Korintu 8:3).

6, 7. ¿Ambe úpirini úni eskachi nóteru Jeobaeri amiguepiringia?

⁶ Peruchi jatsiska para kuidarini juchari pájperakua Jeobani jingoni. Májkueni eskaksï ima kristianu Galasia anapuecha enga Pablu karakuapka, nochi jatsiska para “janhanharhini uénani anapu jorhenguani enga débiliika ka enga nómindu marhuajka”, i ambejtu arhikuekasïndi no uékani eskajtsïni i parhakpini kʼéri ambe exeaka (Gal. 4:9). Ima kristianuechaksï niáraspti mítikateni Tata Diosïni jimbo. Peru Pablu uandaspti eskaksï ima erachicha kʼuanhatsintaxapka imani ambe úni enga no marhuajka. O sea, arhiaxapti: “Iásï engajtsï xáni progresarikia, ¿andijtsïsï kʼuanhatsintani jaki imani ambe úni engajtsï jurajkukia ka enga no ma ambe marhuajka?”.

⁷ ¿Uáchi juchajtu ísï úkuarhinchani? Jo. Engachi mítipka Jeobani, jamberichi jurajkuka máru ambe enga úpiringa úni eskajtsïni Satanasiri parhakpini kʼéri ambe exepiringa (arhinta je Filipusʌ 3:7, 8). Jamberichi no uékapka unibersidadirhu nirani, sánderu ambakiti ánchikuarhita ma jatsini o kánikua tumina andani negosiurhu ma. Engachi mítipka kústani o deporti ma úni, jamberichi úpiringa rikueni o famosueni. Peruchi jurajkuspka iámu ambe (Ebr. 11:24-27). ¿Iásïchi ísï exesïnia enajkichi tsïtakuarhi ambe ma? Ísï eratsini kánikua no sési japirindi. Úpiringachi ménderu uénani jirinhani imani ambe engachi ióntki ísï exepka komu ‘débili ka enga nómindu marhuajka’.

JU JE JÁNGUARHINTANI ESKAJTSÏNI JEOBA SÁNDERU JAIAPANHINTAAKA

8. ¿Ambechi uá úni parajtsïni Jeoba jaiapanhintani?

⁸ ¿Ambechi uá úni parajtsïni Jeoba jaiapanhintani ka no i parhakpini? Uétarhisïndi eskachi tsimani ambe miáni jauaka. Primeru, eska Jeoba méntkisï íntsaasïnga kóntperatechani imechani engaksï no méni jurajkujka (arhinta je Ebreu 6:10; 11:6). Jeoba kánikua jukaparharaasïndi iáminduechani ka mándani arhini ka exesïndi eska no jurhimbitku úni japiringa enga no kasu úkuapiringa imeri marhuarichani. Jeoba “mítiasti imerichani” (2 Tim. 2:19). Jeoba jingontku jarhasïndi ambe engaksï nitamakuarhinchani jarhajka imeri marhuaricha ka mítisti néna úni paraksï orhepani uérakuani tsʼéjkukuechani (Sal. 1:6; 2 Ped. 2:9).

9. Uandantaa je máru ejempluechani enga Jeoba xarhatapka eska jaiapanhintasïrenga imeri iretani.

⁹ Ménisï, Jeoba kʼéri ambe úspti para xarhatakuni imeri iretani eska jaiapanhintasïrenga (2 Crón. 20:20, 29). Por ejemplu, ju je eratsintani na enga pʼímutantaapka israelitechani mar Charhapitirhu, enga faraoniri ejersitu andanguani japka (Éx. 14:21-30; Sal. 106:9-11). Ambe enga úpka Jeoba, xáni kʼéri ambespti engaksï jimesïsï anapuecha seguirini japka uandani imeri ambe asta kuarenta uéxurhini jamberi (Jos. 2:9-11). Kánikuajtsïni uinhaperantasïndi miáni na enga ióntki Jeoba xarhatapka uékperakua ka uinhapikua ka sánderu iásï enga axuterku jakaia enga Gog de Magog uénaaka uarhipeni (Ezeq. 38:8-12). Ima tiempu, kánikuachi sési pʼikuarheraaka engachi jánguarhintaka parajtsïni Jeoba jeiapanhintani ka no i parhakpini.

10. ¿Ambechi máteru ambe jatsiski para miáni?

¹⁰ Máteru ambe engachi jatsika para miáni, jindesti eska Jeoba xarhatasïnga eskajtsïni jeiapanhintasïnga imani ambe úparini engachi no méni erokuarhini japka. Jeoba no kóndiantauati imechani engaksï ambakiti ambe újka nomasi paraksï máteruecha exeani. ¿Andi? Jimboka Jesusi uandaspka eska engaksï máteruecha kʼéri ambe arhiauaka, imajku jindeuaka imecheri kóntperata (arhinta je Mateu 6:1-5). Peru ístu uandaspti eska Jeoba exesïnga enga nema no felisitarinhajka imani ambe jimbo enga máteruecha jimbo úka. Tata Diosï exesïndi ambe enga újka ka kóndintasïndi ka ménisï imani ambe jingoni enga no erokuarhini jauaka. Ju je máru ejempluechani exeani.

UÁTSÏ KAXUMBITI MA KÓNTPERATECHANI INTSÏNHAASÏNDI ENGA NO EROKUARHIAUENGA

11. ¿Néna xarhataspi Jeoba eska jaiapanhintasïrenga Mariani?

¹¹ Enga tiempuepkia para Jesusi andajpenuni ixú Echerirhu, Jeoba erakuspti uátsï kaxumbitini ma enga Maria arhinhenga para Jesusini kánguarhini. Ima Nasareti irekaspti, ireta sapichu ma enga iauani japka Jerusaleni uératini ka templueri (arhinta je Lukasʌ 1:26-33). ¿Andisï imani erakupi? Ánjili arhispti eska Tata Diosï jeiapanhintaspka. Maria xarhataspti eska kánikua espiritualispka enga ísï tátsekua uandontskuarhipka imeri parienti Elisabeti jingoni (Luk. 1:46-55). Jeoba exespti Mariani na enga sési marhuakuni japka, jimbosï íntskupti ini xáni ambakiti kóntperatani enga no erokuarhenga.

12, 13. ¿Néna kʼéri ambe arhinhaspi Jesusi enga andajpenupka ka enga templurhu pánhapka?

¹² Enga Jesusi andajpenupkia, Jeoba no Jerusaleni ni Beleni anapu kʼérati enkargaduechani o gobiernuechani aianguaspti eska Jesusi andajpenuspka. Sánderu sési, úraaspti máru ánjilichani paraksï eianguani máru kʼuiripu kaxumbitichani engaksï karichichani eranguani japka Beleni uéramanisï (Luk. 2:8-14). Karichi erangutichaksï niraspti exeni charhakuni (Luk. 2:15-17). Seguru eska Maria ka Jose kánikuaksï tsípipka engaksï exepka na engaksï xáni jukaparharenga Jesusini. Ju je exeni diferensiani de na enga kánikua ménderueni jámajka Jeoba ka Noambakiti. Enga Satanasi jóskueri jorhenatichani axaapka (astrólogos) paraksï Jesusini pʼorhembini ka imeri tátembechani, Jerusaleni kʼéri ma problema úkuarhispti enga mítikuarhipka eska Jesusi andajpenuspka (Mat. 2:3). Engaksï iámu iretarhu anapuecha mítipka eska Jesusi andajpenuspka, úspti eskaksï uánikua sapiicha uándikunhapiringa (Mat. 2:16).

¹³ Enga kuarenta jurhiatikua nitamapkia enga Jesusi andajpenupka, Maria jatsispti para kéjtsïtakua ma úkuni Jeobani, Jerusaleni anapu templurhu enga nuebi kilometrisï (seis millas) japka Beleni uératini (Luk. 2:22-24). Enga nirani japkia Jose ka Jesusini jingoni, jamberi Maria eratsini japti sini saserdoti kʼéri ambe arhipirini Jesusini imani ambe jimbo enga sánderu orhepatini úpiringa. Ísïsti, Jesusi kʼéri ambe arhinhaspti, peru a lo mejori no ísï eska Maria na erokuarhini japka. Jeoba Simeonini úraspti, achati ma “enga meru jurhimbitku jámenga ka Diosïni janhanharhini” ka Anani, profetisa biuda ma enga 84 jatiripkia paraksï uandantani eska Jesusi jindepiringa Kristu, Mesiasi enga aiatspinhapka (Luk. 2:25-38).

14. ¿Náki kóntperatechani íntsaaski Jeoba Mariani?

¹⁴ ¿Xarhatakupi Jeoba eska jeiapanhintaspka Mariani enga sési kuidaripka ka kʼuiriperani imeri Uájpani? Jo. Primeru, ústi eska ambe enga Maria úpka ka uandani Bibliarhu karakata pakarapiringa. Peeka Maria no úpka pámbini Jesusini ima tanimu uéxurhini ka terujkani enga duraripka imeri eianhperakua. ¿Nasareti pakarapi jimboka biuda máepkia? Jamberi. Ísï jimbo, no úpti intsïnhaani uánikua kóntperatechani engaksï máru kʼuiripuecha intsïnhaapka. Peru kʼóru jima jarhaspti enga Jesusi uarhipka (Juanu 19:26). Ka ístu disipuluecha jingoni jarhaspti Jerusaleni ima jurhiatikua ante de Pentekostesi úkuarhini uéxurhini 33 jimbo engaksï espiritu santu intsïnhapka (Uku. 1:13, 14). Seguru eska niárapka erakunhani ísï eskaksï máteruecha. Jiájkani, i ambe arhikuekasïndi eska intsïnhaska kóntperata para Jesusini jingoni jarhani auandarhu para méntkisï. ¡Xáni kʼéri kóntperata ma imeri ambakiti ánchikuarhita jimbo!

JEOBA XARHATASÏNDI ESKA JEIAPANHINTASÏNGA IMERI UÁJPANI

15. Enga Jesusi Echerirhu japka, ¿néna xarhatakuspi Jeoba eska jeiapanhintaspka?

¹⁵ Jesusi no erokuarhisïrendi eskaksï relijioniri orhejtsïkuticha o politikuecha jeiapanhintapiringa. Sánderu sési, uékasïrendi eska Jeoba jeiapanhintapiringa. Ka kánikua uinhapintapti enga Jeoba tanimu uelta ísï úpka, jiáni enga Jeoba mismu uandapka auandarhu uératini. Enga Jesusi na itsï atakuarhipkia ríu Jordanirhu, Jeoba uandaspti: “I jindesti juchiti uátsï engani ji xáni uékajka ka engani jimbo xáni tsípikuarhijka” (Mat. 3:17). Aparti de Jesusi, solu Juanu el Bautista kurhaspti imani uandakuechani. Masi o menusi ma uéxurhini ante de Jesusi uarhini, tanimu imeri apostulichaksï kurhaaspti Tata Diosïni enga uandapka: “I jindesti juchiti uátsï engani ji xáni uékajka ka engani jimbo xáni tsípikuarhijka, kurhajcha je” (Mat. 17:5). Últimu, Jeoba ménderu uandajpaspti imeri Uájpani auandarhu uératini máru jurhiatikua ante de Jesusi uarhini (Juanu 12:28).

16, 17. ¿Néna xarhatakuspi Jeoba Jesusini eska jeiapanhintaspka imani ambe úparini enga Jesusi no erokuarhenga?

¹⁶ Jesusi mítispti eska ísï uándikunhapiringa komueska nema enga no sési ambe uandajka Tata Diosïri, ambe ma enga no ísïpka. Nájkiruka ísï uándikunhapiringa, kómarhispti eska Jeobaeri eratsikua úkuarhipiringa ka no ambe enga Jesusi uékenga (Mat. 26:39 42). Ima ‘tekaantasti [...], no kasu úparini indeni kʼuratsekua ambeni enga arhinhapka’ ka no uékaspti eska parhakpini anapuecha jeiapanhintapiringa, sino eska imeri Tátijku jeiapanhintapiringa (Ebr. 12:2). ¿Néna xarhatakuspi Jeoba eska jeiapanhintaspka?

¹⁷ Enga Jesusi Echerirhu japka, arhispti Jeobani, imeri Tátini eska íntskuntapiringa imani uinhapikuani enga antesi jatsipka auandarhu (Juanu 17:5). No ma ambe xarhatasïndi eska erokuarhixapka sánderu ambe, komu sánderu kʼéri puestu ma intsïnhani. Peru ¿ambe úspi Jeoba? Xarhatakuspti eska jeiapanhintaspka, úparini ambe ma enga Jesusi no erokuarhenga. Tsítantasti ka ústi eska “kʼéri ambeuaka”. Ístu, íntskuspti ambe ma enga nótki nema intsïnhani japka imani tiempuni: tsípikua ma auandarhu enga no méni uarhiaka (Filip. 2:9; 1 Tim. 6:16).a ¡Xáni kʼéri kóntperata ma enga no méni jurajkuka Jeobani!

18. ¿Ambejtsïni jarhuata no jirinhani kʼuiripuecheri jeiapanhintskua?

¹⁸ ¿Ambejtsïni jarhuata no jirinhani kʼuiripuecheri jeiapanhintskua? Miáni eska Jeoba méntkisï kóndiantaasïnga imechani engaksï no méni jurajkujka ka eska someni íntsaasïnga imani ambe engaksï no erokuarhini jarhajka. Nochi mítiska nénajtsïni kóndinta Jeoba sánderu orhepani. Mientrasi engachi aguantariuaka i parhakpini anapu problemechani, ju je méntkisï miáni eska parhakpini ka ístu kʼuiripuecheri jeiapanhintskua, nóteru ióndanksï kʼamajkunhaakia (1 Juanu 2:17). Juchari Táti uékpiti Jeoba, jurhimbitku jámasïndi ka no mirikurhisïndi ambe engachi újka ni uékperakuani engachi xarhatajka imeri nombri jimbo (Ebr. 6:10). Ísïsti, imajtsïni kóndintaati, jamberi imani ambe jingoni engachi iáiasï ni sikiera eranhaskajka.