Ju je seguirini marhuakuni Jeobani nájkirukachi nóteru jurajkunhakia ísï úni

1, 2. a) ¿Andijtsïnisï no ísku pakataa engajtsïni juramuticha nóteru jurajkuakia úni juchari ánchikuarhitani? b) ¿Ambechi jorhenguarhia ini artikulu jimbo?

UÉXURHINI 2018 jimbo, jukari 223,000 aianhpirichaksï irekaxapti imani lugaricha jimbo engachi no jatsipka sésikua para úni juchari ánchikuarhitani. I ambejtsïni no ísku pakatasïndi, jimboka ísï eskachi na exeka máteru artikulurhu, míteskachi eskachi ambakiti kristianuecha no sési kánhaaka (2 Tim. 3:12). No arhiparini nani engachi irekani jaka, juramutichajtsïni uáti ma repentku arhini eskachi nóteru kómarhiakia Jeobani.

² Engajtsïni gobiernu nóteru jurajkuskia úni juchari ánchikuarhitani, jamberichi úpiringa kurhamarhikuarhini: “Engachi no sési kánhaaka, ¿arhikuekaa eskajtsïni Jeoba nóteru jaiapanhintasïnguia? ¿Nóteruchi uáia kʼéri ambe arhini Jeobani? ¿Jatsipirinchi para máteru nani ísï mótsini para úni agustu marhuakuni Jeobani?”. Ini artikulu jimbochi mókuantauaka ini kurhamarhikuechani. Ístuchi exeaka nénachi uá seguirini marhuakuni Jeobani nájkirukachi nóteru jatsiakia sésikua para úni juchari ánchikuarhitani ka ambe jingonchi jatsiski para jingontku jarhani.

ENGACHI NO SÉSI KÁNHAAKA, ¿ARHIKUEKAA ESKAJTSÏNI JEOBA NÓTERU JAIAPANHINTASÏNGUIA?

3. Eska na arhijka 2 Korintu 11:23-27, ¿ambe nitamakuarhispi apostuli Pablu ka ambejtsïni jorhendasïni imeri ejemplu?

³ Engachi nóteru jurajkunhakia úni juchari ánchikuarhitani, úpiringachi eratsini eskajtsïni Jeoba nóteru jaiapanhintasïnguia. Peru inde ambe no ísïsti. Ju je exeni apostuli Pablueri ambe. Ísïsti, Jeoba kánikua jaiapanhintasïrendi. Intsïnhaspti kʼéri kóntperata para karaani 14 kartechani engaksï Karakata Griegaecharhu jaka ka apostulispti para no Israeli anapuecha. Nájkiruka indeni kóntperatechani intsïnhaapka, kánikua no sési kánhaspti (arhinta je 2 Korintu 11:23-27). Ambe enga Pablu nitamakuarhipka, jorhendasïndijtsïni eska Jeoba jurajkusïnga eskaksï imeri ambakiti marhuaricha no sési kánhaaka.

4. ¿Andijtsïnisï kʼuiripuecha no sési kámajki?

⁴ Jesusi uandaspti andichisï no sési kánhapirini. Uandaspti eskachi no sési kánhapiringa jimbokachi no májkueni jámapiringa eska parhakpini anapuecha (Juanu 15:18, 19). Engachi ísï no sési kánhajka, no arhikuekasïndi eskajtsïni Jeoba nóteru újchakuraxakaia. Sánderu sési, arhikuekasïndi eskachi imani ambe úxaka enga sési jaka.

¿NÓTERUCHI UÁIA KʼÉRI AMBE ARHINI JEOBANI?

5. ¿Kʼuiripuechaksï úsïni úni eska Jeoba nóteru kʼéri ambe arhinhakia? Jatsiku je ejemplu ma.

⁵ Kʼuiripu no uáti úni eska Tata Diosï enga iámindu ambe újka úni nóteru kʼéri ambe arhinhakia. Uánikuechaksï jánguarhintasti ísï úni ka nóksï ústi. Ju je exeni ambe enga úkuarhipka Segunda Guerra Mundial jimbo. Uánikua paisiri anapu juramutichaksï kánikua no sési kámaspti Tata Diosïri iretani. No solu Alemania anapu nasichaksï no sési kaaspti, sino ístu Australia ka Canadá anapu juramuticha ka máteru paisicha. Nájkirukaksï no sési kaani japka, úkuarhispti ambe ma Jeobaeri jarhuajperata jingoni. Uéxurhini 1939 enga uénakuarhipka guerra, 72,475 aianhpirichaksï jarhaspti interu parhakpinirhu. Peru enga guerra kʼamakurhipkia 1945, informichaksï xarhatasïndi eskaksï aianhpiricha jukari tsimani xanhari sánderu uánispkia: 156,299.

6. Engachi ísï no sési kánhajka, ¿néna jarhuataasïni máteruechani? Jatsiku je ejemplu ma.

⁶ Enbesi dejtsïni chérani, inde ambe uáti úni eskachi sánderu uékaaka marhuakuni Jeobani. Ju je exeni ambe enga nitamakuarhipka temungurhiri ma engaksï tataka sapichuni ma kánguarhienga ka paisi ma jimboksï irekani jima enga gobiernu nóteru jurajpekia úni juchari ánchikuarhitani. Íksï erachicha no chéspti, sánderu sési, uénasptiksï marhuani komu prekursori regularicha. Para pirenchi úni ísï marhuani, jurajkuspti imeri ánchikuarhitani nani enga sési maiamunhenga. Erachi uandantaspti eska enga gobiernu nóteru jurajkuapkia úni juchari ánchikuarhitani, uánikua kʼuiripuechaksï uékasïrenga míteni Testiguecheri ambe. Ísï jimbo, sánderu fásilispti uénani jorhentpini Bibliaeri ambe. Ístu inde ambe enga úkuarhipka, kánikua jarhuataaspti máteruechani. Indeni mismu paisi jimbo, orhejtsïkuti ma uandaspti eska uánikua imecha engaksï nóteru marhuakuenguia Jeobani, ménderuksï uénaspka nirani tánguarhikuecharhu ka aianhpini.

7. a) ¿Ambechi jorhenguarhisïni Levítico 26:36, 37 jimbo? b) ¿Ambejtsï uá cha engajtsïni gobiernu niáraska nóteru jurajkunia úni juchari ánchikuarhitani?

⁷ Engajtsïni juchari ikiatspiticha nóteru jurajkujkia úni juchari ánchikuarhitani, uékasïndiksï eskachi chéaka marhuakuni Jeobani. Jamberiksï chkuanderakua ambe uandaati juchari ambe, polisiauechani axaani juchari kʼumanchikuarhu paraksï iámindu ambe exeni, afuersajtsïni páni juesicha jingoni o astajtsïni ónhaani máru juchantsïni. Uékasïndiksï eskachi kánikua chéaka engachi exejka eskaksï ónhaaxaka máru erachichani. Engachi jurajkupiringa eskajtsïni inde ambe chérapiringa, ísïpirindi enajkichi jucha mismu no jurajpeni japirini úni juchari ánchikuarhitani. Peru nóchi uékasïnga ísïni komu ima kʼuiripuecha enga Levítico 26:36, 37 (arhinta je) uandaajka. Ju je no jurajkuni eskajtsïni kʼuiripu chéraaka parachi nóteru májkueni marhuakunia Jeobani o astachi niárani jurajkuni. Iámu mintsita jingonchi mintsikasïnga Jeobani ka nóchi jurajkusïnga eskachi ísku pakaraaka chétapu jimbo (Is. 28:16). Kurhakusïngachi Jeobani eskajtsïni jarhuataaka. Mítiskachi eska imeri jarhuajperata jingoni, ni sánderu kʼérati juramutichaksï uá eskachi nóteru marhuakuakia juchari Tata Diosïni (Ebr. 13:6).

¿JATSIPIRINCHI PARA MÁTERU NANI ÍSÏ MÓTSINI?

8, 9. a) ¿Ambe jatsiski para erakuni kʼuiripu ma o familieri orhejtsïkuti ma? b) ¿Ambejtsïni jarhuataa ambakiti ambe erakuni úni?

⁸ Engachi niárapiringa nóteru jurajkunhania úni juchari ánchikuarhitani, jamberichi kurhamarhikuarhipiringa sinchi mótsipirini máteru paisi jimbo nani engachi úpiringa agustu marhuakuni Jeobani. I ambe máesti enga ma jatsika para jandiajku erakuni. Jamberi jarhuatauati máru erachichani exeni ambe engaksï úpka máru primeru siglurhu anapu kristianuecha jiáni engaksï no sési kánhapka. Engaksï kʼuiripuecha tsakapkuerapka Estebanini, Jerusaleni anapu disipuluechaksï uapurisï mótsispti jini Judea ka Samaria ka astaksï Fenisia, Chipri ka Antiokia ísï niraspti (Mat. 10:23; Uku. 8:1; 11:19). Peru máteru erachichaksï jamberi exejti eska apostuli Pablu jima pakaraspka nani engaksï kánikua no sési kaani japka kristianuechani. Nájkiruka úpiringa no sési ambe nitamakuarhini, pakaraspti para úni aianhpini ambakiti ambe ka uinhaperantaani kristianuechani engaksï imani iretecha jimbo japka nani engaksï no sési kánhani japka (Uku. 14:19-23).

⁹ ¿Ambechi jorhenguarhisïni ini istoriecheri? Eska mándani familieri orhejtsïkuti jatsiska para erakuni ambe úni. Ante de erakuni ambe úni, jatsisti para kómarhini Jeobani ka exeni néna jarhaski imeri familia ka ístu jarhuataua o nómbe engaksï mótsiska. Para ini ambe exeni, mándani kristianu jatsisti para miákurhini ambe enga újka (Gal. 6:5, Táta Diósïri Uandakua Tata Jesukristueri Aiatsperakua [TDU]). Nóchi jatsiska para uandani ambe ma imani ambe jimbo enga máteru nema uáka.

NÉNACHI UÁ MARHUAKUNI JEOBANI NÁJKIRUKACHI NÓTERU JURAJKUNHAKIA ÍSÏ ÚNI

10. ¿Ambejtsïni arhia Beteli anapuecha ka orhejtsïkuticha eskachi uáka?

¹⁰ ¿Nénachi uá seguirini kʼéri ambe arhini Jeobani jiáni engachi nóteru jatsiaka sésikua para ísï úni? Beteli uératini, kúnguarhikuarhu anapu orhejtsïkutichaksï arhinhaati ambe engaksï uáka ka néna konseguiriuani publikasionichani, uáni tánguarhikuechani ka aianhpini. Peru engaksï Beteli anapuecha no uáka orhejtsïkuticha jingoni uandontskuarheni, jiájkani orhejtsïkutichaksï Bibliani jupindaskuarhiparini ka juchari publikasionicharhu, arhiatijtsïni ambe engachi uáka parachi seguirini marhuakuni Jeobani (Mat. 28:19, 20; Uku. 5:29; Ebr. 10:24, 25).

11. ¿Andichisï seguru jaki eskachi méntkisï jatsiaka imani ambe engachi uétarhinchajka para juchari jakajkukua no chkeni ka ambechi uá úni parachi no euanhantani Bibliani ni publikasionichani?

¹¹ Jeoba aiatspisti eskaksï imeri marhuaricha iámindu ambe jatsiaka para imecheri jakajkukua seguirini uinhapiti jarhani (Is. 65:13, 14; Luk. 12:42-44). Ísï jimbo, uákachi seguru jarhani eska imeri organisasioni jánguarhintaaka úni ambe ma parajtsïni íntskuni ambe engachi uétanchichaaka parachi no jurajkuni Jeobani. Peruchi juchajtu uáka úni ambe ma. Engachi nóteru jurajkunhaskia úni juchari ánchikuarhitani, ju je exeni nanichi uá jískani Bibliani ka publikasionichani. Ísï jimbo, ju je jingontku jámani ka no jima jískani nani engaksï uáka sóntku exentani indeni xáni ambakiti ambe engachi sïranda jimbo jatsika, tabletarhu o selularirhu. Iáminduechachi jatsiska para úni ambe ma para juchari jakajkukua no chkeni.

12. ¿Ambeksï uá orhejtsïkuticha para úani tánguarhikuechani peru eska no kuenta íntskukuarhinhaaka?

¹² ¿Ambe úkuarhia tánguarhikuecha jingoni engachi mándani semana jatsijka? Orhejtsïkutichaksï exeati néna engaksï úkuarhiaka peru eskaksï máteruecha no kuenta íntskukuarhiaka. Jamberijtsïni arhiati eskachi grupu sapirhaticha jimbo tánguarhiaka ka jamberi someni mójtakurhini jauati nani engachi tánguarhiaka ka ora. ¿Ambechi uá úni jucha parachi kuájchakuani juchari erachichani? Iatsitakuarhu uandani engachi niáraaka tánguarhikuarhu ka engachi nintani jámaaka ka jamberichi imani xukuparhakua jupakani engachi pauani pauani jukajka.

13. ¿Ambechi jorhenguarhisïni juchari erachicheri ambe engaksï jima irekapka enga antesi jindepka Unión Soviética?

¹³ ¿Ka aianhpikua jingonia? No iápurisï májkueni jánhaskuarhiati. Peru, jimbokachi xénchasïnga Jeobani ka kánikuachi tsitini Reinueri ambe uandantani, jánguarhintaakachi exeni néna aianhpini (Luk. 8:1; Uku. 4:29). Emily Baran enga istoriaeri ambe exejka, arini ambe uandaspti Jeobaeri testiguecheri aianhpikueri ambe jini enga antesi jindepka Unión Soviética: “Enga gobiernu arhiapka Testiguechani eskaksï no úpiringa aianguani máteruechani ambe engaksï jakajkuenga, imechaksï uénaspti predikarikuani besinu jembechani, ánchikuarhitarhu anapu kompanieruechani ka amiguechani. Ka engaksï ónhanhapka indeni ambe jimbo, predikarikuasptiksï imechani engaksï ístu ónhakata japka”. Juchari erachicha engaksï jima irekapka enga antesi jindepka Unión Soviética nóksï jurajkuspti aianhpini nájkirukaksï nóteru jurajkunhenguia úni juchari ánchikuarhitani. Eskachi juchajtu májkueni eratsitini jauaka úni enga niáraaka jurhiatikua engachi nóteru jurajkunhakia aianhpini jima engachi irekani jaka.

AMBE ENGACHI JINGONI JATSIKA PARA JINGONTKU JARHANI

14. Engachi ísï úska eska na arhijka Salmo 39:1, ¿ambe jingonchi jatsiski para jingontku jámani?

¹⁴ Ju je jingontku jámani ambe engachi aianguauaka máteruechani. Jiáni engachi nóteru jatsiakia sésikua parachi úni juchari ánchikuarhitani, jatsiskachi para míteni káni jindeski “tiempu para pínasku pakarani” (Ecl. 3:7). Nóchi jatsiska para uandantani imani ambe enga no jatsika para mítekuarhini, komu na engaksï arhinhajka erachicha, nani engachi tánguarhijka, na engachi aianhpijka ka nani engachi pʼiuajka juchari publikasionichani. Nóchi jatsiska para indeni ambe aianguani juramutichani, ni amiguechani o parientichani engaksï juchari paisirhu jaka o máteru paisi jimbo. Engachi ísï úpiringa, juchari erachichaksï úpirindi no sési ambe úkuarhinchani (arhinta je Salmo 39:1).

15. ¿Ambe jánguarhintaa úni Noambakiti ka nénachi uá orhepani uérakuni?

¹⁵ Ju je no jurajkuni eskaksï sapirhati problemecha uáka eskachi nóteru májku kʼéri jauakia. Noambakiti mítisti eska engaksï ma kʼumanchikuarhu anapuecha no májku kʼéri jarhajka, nóksï úsïnga orhepani uérani (Mar. 3:24, 25). Ísï jimbo, méntkisï jánguarhintaati parachi no májku kʼéri jarhani. Indeni ambe úparini, uékasïndi eskachi jucha mismu uénaaka uarhiperani enbesi de imani jingoni.

16. ¿Náki ambakiti ejemplu xarhataski pirenchi Gertrud Poetzinger?

¹⁶ Asta ambakiti erachichaksï jatsisti para jingontku jámani indeni ambe jimbo. Ju je exeni ambe engaksï nitamanchapka Gertrud Poetzinger ka Elfriede Löhr. I tsimani pirenchicha engaksï erakukateka, ónhakataksï jarhaspti máteru pirenchicha jingoni nasicheri kampu de konsentrasioni ma jimbo. Gertrud uénaspti enbidiarini Elfriedeni jimboka uinhaperantaasïrenga imeri diskursuecha jingoni máteru pirenchichani engaksï ístu ónhakata japka. Ísï tátsekua, no sési pʼikuarheraspti ka kómarhispti Jeobani eska jarhuatapiringa. Karaspti: “Jatsiskachi para jiókuarhini eskaksï máteruecha sánderu jorhenaska úni ambe ma o sánderu ánchikuarhita ambe jatsini eskaksï máteruecha”. ¿Néna niáraspi nóteru enbidiarini pirenchini? Ambakiti kualidadichani exekuaspti ka na enga jásï kʼuiripu máepka Elfriede. Ísï úspti sési pájperantani pirenchi jingoni. Tsimarhanksï uéntaspti káselirhu ka sésiksï marhuakuspti Jeobani astaka kʼamakurhipka imecheri tsípikua Echerirhu. Engachi jánguarhintaska sési peuantaani juchari problemechani erachichani jingoni, uákachi májku kʼéri jarhani (Kol. 3:13, 14).

17. ¿Andichisï jatsi para kurhajchaani imani erachichani engajtsïni orhejtsïkujka?

¹⁷ Ju je méntkisï ísï úni ambe engachi arhinhaaka. Engachi ísï úska ambe engajtsïni arhiaka erachicha engaksï orhejtsïkujka ka mintsinharhikueni, nóchi jatsiauaka uandanhiatechani (1 Ped. 5:5). Ju je exeni ejemplu ma. Paisi ma jimbo engachi no újka úni juchari ánchikuarhitani, erachichaksï arhinhaspti eskaksï no íntspiapiringa publikasionichani aianhpikuarhu. Peru prekursori ma eratsispti eska ima sánderu sési mítispka úni ambe ka no kasu úspti ambe enga arhinhapka. ¿Ambe úkuarhispi? Ma jurhiani engaksï xanharu ísï aianhpini japka, polisia kurhamarhikua úkuaspi imani ka máteru erachichani. Peekaksï gobiernueri ánchikuarhiricha chúxapaapka ka iámindu publikasionichanksï kaaxapti engaksï imecha íntspiapka. ¿Ambechi jorhenguarhisïni? Eskachi jatsiska para úni ambe engachi arhinhaaka, nájkirukachi eratsiaka eskachi jucha sánderu sési míteska úni ambe ma. Jeobajtsïni újchakuraati engachi méntkisï kurhajchaaska imani erachichani enga ima erakuaka parajtsïni orhejtsïkuni (Ebr. 13:7, 17).

18. ¿Andichisï no jatsi para juramuni ambe ma engaksï erachicha no uétarhinchajka úni?

¹⁸ Ju je no juramuni imani ambe enga no uétarhiaka. Engaksï orhejtsïkuticha juramuska ambe ma enga no uétarhijka, erachichaksï úkua jukanchaati. Erachi Juraj Kaminský uandantaspti ambe enga úkuarhipka jini enga ióntki jindepka Checoslovaquia, jiáni engaksï no jurajkunhenga úni juchari ánchikuarhitani: “Engaksï na ónhaapka uánikua orhejtsïkutichani, máru engaksï pakarapka para orhejtsïkuani kúnguarhikuechani ka sirkuituechani, uénasptiksï juramuni na engaksï jatsipiringa para jámani aianhpiricha. Listaksï ma úspti para ambe engaksï úpiringa úni ka ambe nómbe”. Jeobajtsïni no íntskusti sésikua parachi jucha arhiani máteruechani ambe engaksï jatsika para úni. Ima enga ísku jatini juramujka ambe ma, no kuájchakuani jarhasïndi erachichani, sino mínguarhini jarhasïndi erachicheri jakajkukuani (2 Kor. 1:24, TDU).

JU JE MÉNTKISÏ MARHUAKUNI JEOBANI

19. Eska na arhijka 2 Crónicas 32:7, 8, ¿andichisï no jatsi para chéni nájkirukajtsïni Noambakiti jánguarhintajka chérani?

¹⁹ Juchari sánderu kʼéri ikiatspiti enga jindeka Noambakiti, méntkisï no sési káuati Jeobaeri ambakiti marhuarichani (1 Ped. 5:8; Jaŋ. 2:10). Ima ka ístu iáminduecha engaksï imeri jájki jimbo jaka, jánguarhintaatiksï parajtsïni no jurajkuni úni juchari ánchikuarhitani. Peruchi seguiriuaka marhuakuni Jeobani nákirukajtsïni uékaaka chérani (Deut. 7:21). Jeoba juchantsïni jingoni jarhasti ka seguiriuatijtsïni jarhuatani nájkirukachi nóteru jatsiakia sésikua para úni juchari ánchikuarhitani (arhinta je 2 Crónicas 32:7, 8).

20. ¿Ambejtsï eratsitixaki úni?

²⁰ Ju je májkueni úni eskaksï juchari erachicha primeru siglurhu anapuecha, engaksï arhiapka juramutichani: “Tantiarichka je sési, si enga sánderu sésika Diosïni japarini chánksïni janhanharhini ka eska para Diosï janhanharhini, jimboka jucha nómindu uáka no uandantani [ambe] engachi exeka ka kurhandini” (Uku. 4:19, 20).