“Engani ji débili pʼikuarherajka, jimajkanimindusïni sánderu uinhapitijka”

1. ¿Ambe niáraspi uandani apostuli Pablu?

APOSTULI PABLU niáraspti uandani eska ménisï débili pʼikuarherasïrenga. Uandaspti eska imeri kuerpu kʼamakurhipaxapka, eska jánguarhintasïrenga úni ambe enga sési jaka ka eska Jeoba no méntkisï ísï mókukuantasïrenga imeri kómarhikuechani eska ima na uékenga (Rom. 7:21-23; 2 Kor. 4:16; 12:7-9). Ístu uandaspti eskaksï imeri ikiatspiticha ísï exesïrenga enajki ima no sáni uinhapepi.b Peru no méni eratsespti eska ima no ma ambe marhuasïrenga, nájkirukaksï máteruecha no sési ambe uandenga imeri ambe ka nájkiruka ima mítepka eska ménisï no úsïrenga sési úni iámindu ambe (2 Kor. 10:10-12, 17, 18).

2. Eska na uandajka 2 Korintu 12:9, 10, ¿náki jukaparhakua ambe jorhenguarhispi Pablu?

² Pablu niáraspti jukaparhakua ambe jorhenguarhini: eska kʼuiripu ma uáka debili pʼikuarherani, peru sési jimbo kánikua uinhapini (arhinta je 2 Korintu 12:9, 10). Enga Jeoba arhipka Pabluni eska imeri “uinhapikua sési jimbo uinhapitiska para ima enga sánderu débilika”, arhikuekaxapti eska ima íntskupiringa uinhapikua enga Pablu uétarhinchani japka. Para uénani, ju je exeni andichisï no jatsi para xáni uandanhiani engajtsïni juchari ikiatspiticha no sési arhijka.

JU JE TSÍPINI ENGACHI NO SÉSI ARHINHAAKA

3. ¿Andichisï jatsi para tsípini engachi no sési arhinhajka?

³ No nema uékasïndi eska no sési arhinhaaka. Peru engachi jukari uandanhiaska engajtsïni juchari ikiatspiticha no sési arhijka, niáraakachi no sési pʼikuarherani (Prov. 24:10). Jimajkani, ¿ambechi jatsiski para úni engajtsïni imecha no sési arhiska? Uákachi májkueni úni eska Pablu ka tsípini engachi no sési arhinhaaka (2 Kor. 12:10). ¿Andi? Jimboka engachi no sési arhinhajka ka no sési kánhani, xarhatasïndi eskachi sési jimbo Jesusiri chúxapatiska (1 Ped. 4:14). Jesusi uandaspti eskaksï imeri chúxapaticha no sési kánhapiringa (Juanu 15:18-20). Ka inde ambesï úkuarhipti primeru siglurhu. Por ejemplu, imecha engaksï májkueni eratsenga eska grieguecha, ísïksï exeasïrendi kristianuechani enajkiksï no ma ambe mítepi ka nóksï kʼéri ambeeni. Ka para judiuecha, kristianuechaksï ‘no káni mítekuspti ka níjtuksï xáni jorhenani’ ísï eskaksï na arhiapka apostulichani Pedruni ka Juanuni (Uku. 4:13). Uánikua kʼuiripuechaksï eratsesïrendi eskaksï kristianuecha no kʼéri ambespka jimbokaksï no jatsispka juramukua politikarhu ni ejersiturhu ka jimboksïsï no xénchanhendi.

4. ¿Ambeksï úspi ióntki anapu kristianuecha engaksï imecheri ikiatspiticha no sési arhiauenga?

⁴ Ióntki anapu kristianuechaksï seguirispti marhuakuni Tata Diosïni nájkirukaksï imecheri ikiatspiticha no sési ambe uandenga imecheri ambe. Por ejemplu, kʼéri kóntperata máespti para apostuli Pedru ka Juanu engaksï no sési kánhenga jimbokaksï Jesusiri chúxapatispka ka jimbokaksï aianhpisïrenga ambe enga Jesusi jorhentpipka (Uku. 4:18-21; 5:27-29, 40-42). Primeru siglurhu anapu kristianuechaksï no jatsispti ambe jimbo kʼuratseni, jimbokaksï ima chúxapaticha engaksï xáni kaxumbitipka, sánderu ambakiti ambeksï úspka kʼuiripuecha jimbo ka eska imecheri ikiatspiticha. Por ejemplu, ima karakatecha engaksï Tata Diosïri jarhuajperata jimbo karaapka, asta iásï jamberiksï uánikua kʼuiripuechani marhuakuaxati ka úsïndiksï eskaksï erokuarhikua ma jatsiaka. Ka ima Reinu engaksï imecha aianhpienga, ini jurhiatikuecha jimbo úkuarhixati ka no ióni jimbo iámu Echerirhu juramuati (Mat. 24:14). Peru ima kʼéri juramukua enga xáni no sési kaapka ióntki anapu kristianuechani, nóteru ambe ma parakarastia. Ístu, ima ambakiti Jesusiri chúxapatichaksï iásï auandarhu juramuxatia. Peru imecheri ikiatspitichaksï uarhistia; ka engaksï ma repentku niáraska tsíntani, ima Reinu juramukuauati engaksï kristianuecha aianhpienga ka engaksï imecha xáni kurhunhiauenga (Jaŋ. 5:10).

5. Eska na uandajka Juanu 15:19, ¿andijtsïnisï no xénchajki kʼuiripuecha?

⁵ Ístu, ini jurhiatikuecha jimboksï jarhasti kʼuiripuecha engajtsïni no xénchajka, engajtsïni teresmarhujka ka ísïjtsïni exeni enajkichi no ma ambe míti ni kʼéri ambeni. ¿Andi? Jimbokachi no májkueni jámasïnga ni exeni ambe ma eskaksï máteru kʼuiripuecha. Kʼuiripu sési exeasïndi imechani engaksï kʼéramakuarhijka, teparakuarhini ka engaksï no sési ambe újka. Peru juchachi jánguarhintasïnga kaxumbitini, sési pʼikuastpini ka kurhajchani Tata Diosïni. Ístu, nóchi inchamukusïnga politikarhisï níjtuchi uéjki jarhani ejersituecheri lista ma jimbo para paisini ma kuájpini. Jimbokachi no uékasïnga májkueni jámani eskaksï i parhakpini anapuecha, ísïjtsïni exesïndi eskachi no kʼéri ambeska (arhinta je Juanu 15:19; Rom. 12:2).

6. ¿Nénajtsïni úraxaki Jeoba para kʼéri ambe úni?

⁶ Peru nájkirukajtsïni kʼuiripuecha ísï exejka, Jeobajtsïni úraxati parachi kʼéri ambe úni. Por ejemplu, sánderuchi aianhpixaka interu parhakpinirhu. Tata Diosïri marhuarichachi uásïnga rebistechani engaksï sánderu uánikua idiomecha jimbo tradusirinhajka ka engaksï sánderu etsakurhijka, ka úrasïngachi Bibliani para uánikua kʼuiripuechani jarhuataani paraksï sánderu sési irekani. Ka iámindu i ambe Jeobani jimboesti enga úraani jaka máru kʼuiripuechani engaksï ísï xarharajka enajkiksï no uá indeni xáni kʼéri ambe úni. ¿Ka ambechi uá uandani mándani arhini juchari ambe? ¿Uájtsïni Jeoba jarhuatani parachi uinhapikua jatsini? Ka enga ísï úska, ¿ambechi uá úni parajtsïni ima jarhuatani? Ju je exeni tanimu ambe engachi jorhenguarhijka apostuli Pablueri.

JU JE NO JUCHA MISMU MINTSINHARHIKUARHINI

7. ¿Náki jindeski ma ambe engachi jorhenguarhijka Pablueri ambe?

⁷ Ma ambe engachi jorhenguarhijka apostuli Pablueri, jindesti eska engachi marhuakujka Jeobani nóchi jatsiska para juchari uinhapikuani mintsikani o ambe engachi xáni jorhenaka úni. Para kʼuiripuecha, Pablu uánikua ambe jatsispti para úni kʼéramakuarhini ka no sáni chéni. Pablu, jini Tarsu tʼarhexespti, ireta ma enga Roma ísï japka ka enga jatsikuarhirinhapka ka ístu nani enga ambakiti unibersidadi ma japka. Pablu sési jorhendakata jarhaspti jimboka imeri jorhentpiri jindespka Gamalieli, judiuecheri orhejtsïkuti ma enga kánikua mítekatepka (Uku. 5:34; 22:3). Ka Pablujtu niáraspti kʼéri ambeni para judiuecha. Ima uandaspti: “Ka ji uánikua juchiti nasionirhu anapuechani engaksï májku jatiripka jíndeni jingoni, andaasïrenga sánderu tsitini Israeli anapu jakajkukuani” (Gal. 1:13, 14; Uku. 26:4). Peru inde ambe no úspti eska imajku mintsinharhikuarhipiringa.

8. a) Eska na arhijka Filipusʌ 3:8, ¿néna exesïreni Pablu imani ambe enga jurajkupka? b) ¿Andisï uandapi Pablu eska tsípisïrenga enga débili pʼikuarherenga?

⁸ Pablu mintsita jingoni jurajkuspti imani ambe enga uénga eskaksï kʼuiripuecha kʼéri ambe exepiringa. Asta niáraspti uandani eska basurespka parhakpini anapu ambe (arhinta je Filipusʌ 3:8). Peru kʼóru jatsispti para uánikua ambe nitamakuarhini jimboka Kristueri chúxapati úkuarhispka. Imeri iretarhu anapuechaksï niáraspti kurhunhini (Uku. 23:12-14). Ka ístu, Roma anapuechaksï niáraspti atani ka kárselirhu ónhani (Uku. 16:19-24, 37). Ístu kánikua no sési pʼikuarherasïrendi jimboka mítespka eska kʼamanharhintstispka ka úkua jukanchani imani ambe úni enga sési japka (Rom. 7:21-25). Peru no jurajkuspti eska inde ambe ni imeri ikiatspiticha úpiringa eska ima nóteru Jesusiri chúxapatipiringuia. Sánderu sési uandaspti: “Jimbosïni xáni tsípijka engani débili pʼikuarherajka”. ¿Andisï ísï uandapi? Jimboka enga débili pʼikuarherenga, exesïrenga na enga Tata Diosïri uinhapikua jarhuatenga (2 Kor. 4:7; 12:10).

9. ¿Ambechi uá úni nájkirukachi uánikua ambe jatsika engajtsïni úpiringa ójkutani?

⁹ Engachi uéjka eskajtsïni Jeoba íntskuaka uinhapikua, nóchi jatsiska para eratseni eskachi úsïnga úni ambe ma juchari uinhapikua jimbo, ambe engachi míteka, nani engachi anapueka o juchari jatsikuarhikua ambe jimbo. No indeni ambe jimbojtsïnisï Jeoba úrajti. Tata Diosïri iretarhu, nóksï uánikuesti engaksï uánikua ambe mítekuka, ka ni engaksï uinhapitika ka níjtu engaksï kʼéri ambeeka eska parhakpini anapuecha na exejka. Sánderu sési, Jeoba úraxati imani “ambe engaksï parhakpini anapuecha ísï exejka” enajki ísku ambee (1 Kor. 1:26, 27). Ísï jimbo, nájkirukachi uánikua ambe jatsika engajtsïni úpiringa ójkutani, uákachi marhuakuni Jeobani. Por ejemplu, enga nema uékaaka úni parachi nóteru seguru jarhania ambe engachi jakajkujka ka chérantsïni, ju je kurhakuni Jeobani eskajtsïni íntskuaka balori para kuájpini ambe engachi jakajkujka (Efes. 6:19, 20). O engachi jánguarhintani jaka orhepani uérakuni kʼéri pʼamenchakuani ma, ju je kurhakuni Jeobani eskajtsïni íntskuaka uinhapikua parachi seguirini marhuakuni na engachi xáni uáka. Méni engachi exejka na engajtsïni jarhuatajka, juchari jakajkukua sánderu kʼésïndi ka sánderuchi uinhapiti pʼikuarherasïnga.

JU JE AMBAKITI AMBE JORHENGUARHINI IMA KʼUIRIPUECHERI ENGA BIBLIA UANDAAJKA

10. ¿Andichisï jatsi para arhintani ambe engaksï nitamakuarhipka ióntki anapu Tata Diosïri marhuaricha, komu imecheri ambe enga Ebreu 11:32-34 uandaajka?

¹⁰ Pablu pʼindespti jorhenguarhini Tata Diosïri Karakateri ambe. Indeni ambe jimbo, niáraspti uánikua ambe míteni, peru ístu enga arhintenga, úspti uánikua ambe jorhenguarhini Jeobaeri ambakiti marhuaricheri ambe. Imani kartarhu enga ebreuechani karakuapka, Pablu arhiaspti eskaksï májkueni úpiringa ambe ma eska ambakiti Tata Diosïri marhuaricha (arhinta je Ebreu 11:32-34). Ju je exeni ejemplu ma, rei Dabidiri. Ima jatsispti para tekaantani imani ambe engaksï xáni no sési úkupka imeri ikiatspiticha, peru ístu máru kʼuiripuecheri engaksï imeri amiguepka. Ju je sánderu ambe exeni Dabidiri ambe. Ísïchi uáka exeni na enga xáni jarhuatapka Pabluni enga eratsentenga ambe enga xáni nitamakuarhipka Dabidi ka nénachi uá májkueni úni eska Pablu.

11. ¿Andisï ísï xarhareni enajki Dabidi no uinhapepi? (Exe je dibujuni enga uénakuarhu jaka).

¹¹ Enga kʼéri uarhipiti Goliati, exepka Dabidini, úndaspti ísku nemeni exeni ka teresmarhuni. Goliati ísï úspti jimboka sánderu iójtarhaspka ka sési jorhendakata jarhani para uarhipini. Peru Dabidi solu tumbi sapichu máespti enga no jorhenapka uarhipini ni listu jarhani para guerrarhu nirani, peru kʼóru mintsikasïrendi eska Jeoba íntskupiringa uinhapikua. Ka ísï úkuarhispti jimboka úspka uándikuni imeri ikiatspiti Goliatini (1 Sam. 17:41-45, 50).

12. ¿Náki máteru uandanhiata niáraspi jatsini Dabidi?

¹² Dabidi niáraspti máteru uandanhiata jatsini enga úpiringa ísï pʼikuastani enajki no úpirini orhepani uérakuni. Dabidi ambakiti jántspiri máespti Sauliri enga Jeoba erakupka para Israeli juramuni. Uénani jámani, Sauli janhanharhisïrendi Dabidini, peru tátsekua kʼéramakuarhispti ka uénani enbidiarini Dabidini. Úndaspti no sési kámani ka asta uékaspti uándikuni (1 Sam. 18:6-9, 29; 19:9-11).

13. ¿Ambe úspi Dabidi enga rei Sauli xáni no sési kámapka?

¹³ Nájkiruka Sauli no sési kámenga, Dabidi méntkisï janhanharhispti, jimboka mítespka eska ima jindespka rei enga Jeoba erakupka (1 Sam. 24:6). Níjtu uandapi eska Tata Diosïri kulpespka imani ambe jimbo enga Sauli no sési úpka. Sánderu sési mintsikaspti eska Jeoba íntskupiringa uinhapikua para tekaantani imani kʼéri tsʼéjkukuani enga jatsipka (Sal. 18:1, ka ambe enga arhijka antesi de Salmo 18 uénakuarhini).

14. Májkueni eska Dabidi, ¿náki uandanhiatani úspi orhepani uérakuni Pablu?

¹⁴ Apostuli Pablu sáno májkueni jásï ambe nitamakuarhispti eska Dabidi. Ima uánikua ikiatspitichani jatsiaspti engaksï kánikua juramukua jatsipka politikarhu ka relijionirhu. Ichaksï uánikua xanhari atarkuarhispti ka kárselirhu ónhani. Májkueni eska Dabidi, asta imecha engaksï jatsipiringa para jarhuatani, niárasptiksï no sési kámani. Ístu, máru kúnguarhikuarhu anapuechaksï nóteru uékasptia jarhuatani (2 Kor. 12:11; Filip. 3:18). Peru no méni jurajkuspti eskaksï imeri ikiatspiticha ójkutapiringa para ima seguirini Jesusiri chúxapatini. Méntkisï aianhpispti nájkiruka no sési kánhenga. No méni jurajkuaspti erachichani nájkirukaksï imecha no sési pʼikuastapka. Peru sánderu jukaparhakua ambe, no méni jurajkuspti Tata Diosïni astaka uarhipka (2 Tim. 4:8). Nájkiruka xáni no sési ambe nitamakuarhipka, úspti orhepani uérani jimboka Jeobani mintsikaspka ka no imeri uinhapikuani.

15. ¿Ambechi uékasïni úni ka nénachi uá ísï úni?

¹⁵ ¿Jatsiskichi para tekaantani jarhani engajtsïni no sési arhijka o no sési kámani eskuelarhu, ánchikuarhitarhu o juchari familiarhu anapuecha engaksï no Testigueka? ¿Ménisïjtsïni no sési kámaski kúnguarhikuarhu anapu ma? Enga ísïka, ju je miáni Dabidiri ka Pablueri ejempluni. Ju je jánguarhintani ‘ambakiti ambe jimbo andani indeni ambe enga no sésiika’ (Rom. 12:21). Ísïsti, juchachi no uékasïnga tsakapu ma kʼuanirani nemani, ísï eska Dabidi na úpka, sánderu sési, uékasïngachi Bibliani úrani para mintsitarhu ka eratsekuarhu niárakuani imani kʼuiripuechani engaksï ambakiti mintsita ma jukaka. ¿Nénachi uá ísï úni? Bibliani úraparini para mókukuantani kʼuiripuecheri kurhamarhikuechani, sési kaani ka janhanharhiani imechani engajtsïni no sési kámajka ka ambakiti ambe úni máteruecha jimbo, asta imechani jimbo engajtsïni ikiachijka (Mat. 5:44; 1 Ped. 3:15-17).

JU JE JIÓKUARHINI MÁTERUECHERI JARHUAJPERATA

16, 17. ¿Ambe no méni mirikurhispi Pablu?

¹⁶ Ante de Kristueri chúxapatini, apostuli Pablu enga ísï mítekatepka komu Saulu, tumbi máespti enga no janhanharpienga ka enga no sési káuenga Jesusiri chúxapatichani (Uku. 7:58; 1 Tim. 1:13). Peru Jesusi auandarhu uératini uandajpaspti, úspti eska Pablu nóteru úpiringuia exeni ka nóteru jurajkusptia eska no sési kaapiringa kúnguarhikuarhu anapuechani. Paraka úpiringa ménderu exeni, Pablu imani kʼuiripuecha jingoni niraspti enga antesi no sési kaapka. Kaxumbikua jingoni jurajkuspti eska Ananiasi jarhuatapiringa, Jesusiri chúxapati ma enga úpka eska Pablu ménderu úpiringuia exeni (Uku. 9:3-9, 17, 18).

¹⁷ Ísï tátsekua, Pablu niáraspti kʼéri ánchikuarhita ambe úni kúnguarhikuarhu, peru no méni mirikurhispti ambe enga Jesusi jorhendapka jiáni enga auandarhu uératini uandajpapka enga ima Damasku nirani japka. Méntkisï kaxumbikua xarhataspti ka tsípikua jingoni jiókuarhispti eskaksï erachicha ka pirenchicha jarhuatapiringa. Uandaspti eskaksï imecha kánikua jarhuataspka ka uinhaperantani (Kol. 4:10, 11).

18. ¿Andichisï úpirini úkua jukanchani eskajtsïni máteruecha jarhuataaka?

¹⁸ ¿Ambejtsïni jorhendasïni Pablueri ejemplu? Engachi uénapka Bibliaeri ambe jorhenguarhini, jamberichi tsípikua jingoni uékenga eskajtsïni máteruecha jarhuatapiringa, jimbokachi mítespka eskachi uánikua ambe kueratanchaxapka para jorhenguarhini Tata Diosïri ambe (1 Kor. 3:1, 2). ¿Ka iásïa? Engachi ióni páni jakaia Jeobani marhuakuni ka uánikua ambechi mítenia, jamberichi nóteru xáni uéjkia eskajtsïni máteruecha jarhuataaka, ka sánderu engajtsïni ima uékaaka jarhuatani enga nótki xáni ióni páni jaka kúnguarhikuarhu. Peru Jeoba someni úraasïndi erachichani ka pirenchichani parajtsïni uinhaperantani (Rom. 1:11, 12). Engachi uéjka eskajtsïni Jeoba íntskuaka imeri uinhapikua, jatsiskachi para jurajkuni eskajtsïni erachicha ka pirenchicha jarhuataaka.

19. ¿Andisï Pablu úpi kʼérati ánchikuarhitechani uáni?

¹⁹ Enga Pablu na kristianu úkuarhipkia, kʼérati ánchikuarhitechani uáspti. ¿Andi? Jimboka niáraspka kurhanguni eska para nema úni ambakiti ambe úni, jatsiska para kaxumbitini ka mintsikani Jeobani ka no májku mintsinharhikuarhini o imani ambe enga ma míteka, ni jatsikuarhekua ambe o máteru ambe. Ísï jimbo, ju je májkueni úni eska Pablu: mintsikani Jeobani, jorhenguarhini imani kʼuiripuecheri ambe enga Biblia uandaajka ka jiókuarhini eskajtsïni erachicha jarhuataaka. Jiájkani, nájkirukachi ísï pʼikuarheraaka enajkichi no uá úni ambe ma, Jeobajtsïni íntskuati uinhapikua.