SEMANA 37
Ísï eska Sansóni mintsika je Tata Diosï Jeobani
“Tata Diosï Jeoba, tʼu engari kʼéri Juramutiika, jimboetakua asïrini mirikurhi. Oh, Tata Diosï, íntskurini uinhapikua” (JUEC. 16:28).
PIREKUA 30 Juchiiti amigu, Tata Diosï ka Taati
AMBE ENGACHI EXEAKAa
1, 2. ¿Andisï xáni sési jaki eskachi jorhenguarhiaka Sansóniiri ejempluni?
¿AMBEJTSÏ orheta eranhaskasïni engajtsï Sansóniiri ambe kurhaajka? Jamberijtsï eranhaskajka na enga xáni uinhapitiipka. Inde ambe ísïisti, joperu ístu inde achamasï enga kánikua uinhapitiipka ístu úspti ambe ma enga jimbo kánikua no sési nikupka. Nájkiruka ísï úpka, Tata Diosï Jeoba exespti ambe enga xáni úpka Sansóni para marhuakuani iámu imeeri tsípikuarhu. Ísï jimbo, Bibliarhu kararkuarhispti Sansóniiri ejempluni parakachi juchajtu uaaka jorhenguarhini imeeri ambe.
2 Tata Diosï Jeoba úraspti Sansónini paraka ambakiti ambe úpiringa Israeli, enga jindeepka imeeri ireta. Uánikua uéxurhini tátsekua enga Sansóni na uarhipkia, Tata Diosï Jeoba úspti eska apostoli Pablu karapiringa Sansóniiri nombrini, lista ma jimbo ima kʼuiripuecheeri engaksï kánikua mintsikapka Tata Diosïni (Ebr. 11:32-34). Sansóni méntkisï jarhuajperata kurhakuspti Tata Diosï Jeobani, asta jiáni jamberi enga kánikua no sési nitamakuarhini jarheenga. Ísï jimbo, ini jorhenguarhikua jimbo exeni jauakachi eskajtsïni imeeri ejemplu kánikua uinhaperantasïnga ka ístujtsïni uánikua ambe jorhendasïndi engajtsïni marhuacheaka.
SANSÓNI MINTSIKASPTI TATA DIOSÏ JEOBANI
3. ¿Náki ánchikuarhita intsïnhaspi Sansóni?
3 Enga Sansóni andajpenupka, filisteuechaksï juramuxapti Israeli ka kánikuaksï no sési kaasïreendi kʼuiripuechani (Juec. 13:1). Jimbokaksï filisteuecha xáni no sési kámpisïreenga, israeliteechaksï kánikua no sési nitamakuarhisïreendi. Ísï jimbo, Tata Diosï Jeoba, Sansónini erakuspti “paraka ueenapiringa pʼímutantani Israelini filisteuecheeri” (Juec. 13:5). ¡Xáni kʼéri ánchikuarhita ma! Sansóni jatsispti para mintsikani Tata Diosï Jeobani.
Sansóni mintsikaspti Tata Diosï Jeobani ka úraspti ambe enga ima jatsipka para úni ambe enga Tata Diosï uékeenga. (Exea je párrafuechani 4 ka 5).
4. Tata Diosï Jeoba, ¿néna jarhuataspti Sansónini? (Jueces 15:14-16).
4 Ju je exeni ma uelta enga Sansóni xarhatapka eska mintsikasïreenga Tata Diosï Jeobani. Ma jurhiatikua uánikua sondaduecha engaksï Filistea anapuepka nirasptiksï Leí, enga jamberi Judáisï pakareenga paraksï Sansónini jupikani. Judá anapu achamasïichaksï kánikua chéspti. Ísï jimbo, uandasptiksï eskaksï pápiringa Sansónini imeeri enemiguecha jingoni. Mismu israeliteechaksï uinhamu jótaspti tsimani sïndariicha jingoni engaksï jimbanhiipka ka pásptiksï filisteuecha jingoni (Juec. 15:9-13). Peru “Tata Diosï Jeobaeri espiritu íntskuspti uinhapikua” ka Sansóni úspti katsïkuani sïndariichani. Tátsekua “exentaspti burrueri kʼénchenderakua ma enga nótki kʼarhini japka”, jupikaspti... ¡ka imani jingoni 1, 000 filisteuechani uándikuaspti! (arhinta je Jueces 15:14-16).
5. ¿Néna xarhataspi Sansóni eska mintsikasïreenga Tata Diosï Jeobani?
5 ¡¿Burrueri kʼénchenderakua ma?! ¿Andisï Sansóni indeni ambe úrapi? Jimboka mítespka eska Tata Diosï Jeoba jarhuatapiringa ambe uéjki enga ima úrapiringa para filisteuechani andaani. I achamasï enga kánikua mintsikeenga Tata Diosïni, úraspti ambe enga jimeesïsï japka para úni ambe enga Tata Diosï Jeoba uékeenga. Ka jimboka Sansóni mintsikaspka Tata Diosïni, ima úspti eska andaapiringa filisteuechani.
6. ¿Ambechi uaa jorhenguarhini Sansóniiri ambe?
6 Tata Diosï Jeoba ístujtsïni íntskuati uinhapikua parachi jucha úni náki uéjki responsabilidadini engachi intsïnhaaka imeeri kúnguarhikuarhu, nájkiruka ísï xarharaaka eska kánikua úkua jukaska. Tata Diosï uaati mámaru ambe úrani parajtsïni jarhuatani, asta imani ambe engachi jucha no erokuarhini jauaka. Enga chá mintsikaska Tata Diosï Jeobani, uaakajtsï seguru jarhani eskaksïni ima jarhuataaka úni ambe enga ima uékajka ka eskaksïni íntskuaka uinhapikua, ísï eska na úpka Sansóni jingoni (Prov. 16:3).
7. ¿Náki ejemplu xarhatasïni eska jukaparhakueska kurhakuni Tata Diosï Jeobani eskajtsïni jarhuataaka?
7 Uánikua erachiicha ka pirenchiicha engaksï konstruksionirhu ánchikuarhijka xarhatastiksï eskaksï mintsikasïnga Tata Diosï Jeobani. Ióntki, Tata Diosï Jeobaeri kúnguarhikua exesïreendi na engaksï jáxepiringa Kʼumanchikua Reinuericha ka máteru konstruksioniicha ka imeechaksï uaasïreendi. Peru jimboka Tata Diosïiri kúnguarhikua sánderu kʼéxaka, iásïksï jatsisptia para ménderueni úni ambe ma. Erachiicha engaksï ini ánchikuarhitani exejka, kurhakusptiksï Tata Diosï Jeobani eska jarhuataapiringa ka ueenasptiksï máteru ambe úni. Ueenasptiksï piaani kʼumanchikuechani engaksï úkata japkia ka ménderuksï sési jájkuantasïreendi. Robert, enga ini últimu uéxurhiniicha jimbo uánikua proiektu konstruksioniicheeri jimbo japka interu parhakpinirhu, uandasïndi: “Orhetachi iáminduecha úkua jukanchaspka ísï ánchikuarhini iásï. Kánikua ménderueniispti imani ambe jingoni engachi antesi ueenga. Joperu erachiichaksï tsípikua jingoni jiókuarhispti ísï ánchikuarhini, ka i ambe xarhataspti eska Tata Diosï Jeoba újchakuraxapka ini ambe”. Ístu i ambe xarhatasïndi eska Tata Diosï Jeoba orhekupaxaka imeeri iretani paraka uaaka ambe enga ima uéjka. Ísï jimbo, sési jauati eskachi ménisï kurhamarhikuarhiaka: “¿Kurhakusïni Tata Diosï Jeobani eskarini jarhuataaka ka jiáni enga uétarhiaka ménderueni úni ambe ma, ísï úsïni?”.
SANSÓNI JIÓKUARHISPTI TATA DIOSÏ JEOBAERI JARHUAJPERATANI
8. ¿Ambe úspi Sansóni enga kánikua kʼarhichani japka?
8 Jamberijtsï miájka máteru ambe enga Sansóni úpka. Pori ejemplu, uarhipespti leoni ma jingoni ka uándikuspti, ka tátsekua jandiajku uándikuaspti 30 acheetiichani engaksï filisteuepka ka engaksï Askelóni anapuepka (Juec. 14:5, 6, 19). Sansóni mítespti eska no úpiringa úni ini ambe enga Tata Diosï Jeoba no jarhuatapiringa. Sansóni sési jimbo mintsikasïreendi Tata Diosïni. Ka xarharaspti i ambe jiáni enga na uándikuapkia 1,000 filisteuechani kʼarhichani pakarapka. Enbesi de ima jandiajku jirinhani itsï, Tata Diosï Jeobani kurhakuspti eska jarhuatapiringa (Juec. 15:18).
9. ¿Néna mókukuspi Tata Diosï Jeoba ambe enga kurhakupka Sansóni? (Jueces 15:19).
9 ¿Néna mókukuntaspi Tata Diosï Jeoba ambe enga Sansóni kurhakupka? Milagru ma jimbo, úspti eska itsï uérapiringa. Enga Sansóni itsïmapkia, “uinhapintaspti ka sési pʼikuarherantaspti” (arhinta je Jueces 15:19). Ima lugari enga Sansóni itsïmapka útasï jarhaspti imani tiempu jimbo enga Samueli karapka libru de Jueces. Engaksï israeliteecha exeenga imani lugarini nani enga itsï uéreenga, jamberiksï miánteendi eska engaksï Tata Diosï Jeobani mintsikapiringa, ima jarhuataapiringa engaksï no sési nitamakuarhini japiringa.
Sansóni uinhapintaspti enga itsïmapka, itsïni enga Tata Diosï íntskupka. Juchajtuchi jatsiska para úrani ambe engajtsïni íntskujka Tata Diosï Jeoba parajtsïni jarhuatani no méni jurajkuni imani. (Exe je párrafu 10).
10. ¿Ambechi jatsiski para úni parajtsïni Tata Diosï Jeoba jarhuatani? (Ístu exea je imajeniichani).
10 Májkueni eska Sansóni, iáminduechachi jatsika para kurhakuni Tata Diosï Jeobani eskajtsïni jarhuataaka. No arhiparini ambe engachi jorhenaka úni o ambe engachi úkia Tata Diosïiri kúnguarhikuarhu, iáminduechachi uétarhinchasïnga eskajtsïni jarhuataaka. Jatsiskachi para kaxumbitiini ka jiókuarhini eskajtsïni jiántkusï sési nicheaka engachi mintsikaska Tata Diosï Jeobani. Sansóni jiáni uinhapintaspti enga itsïmapka imani itsïni enga Tata Diosï Jeoba íntskupka. Májkueni eska Sansóni, engachi jucha jurajkuska eskajtsïni Tata Diosï Jeoba jarhuataaka nóchi méni jurajkuaka imani (Mat. 11:28).
11. ¿Ambechi jatsiski para úni parakajtsïni marhuacheaka Tata Diosï Jeobaeri jarhuajperata, ka náki ejemplujtsïni íntskusïni temungurhiri ma?
11 Ju je exeni Alexéiri ejempluni, Rusia anapu erachi ma enga kánikua no sési kánhani jaka imeeri paisi jimbo. ¿Ambe jarhuataxaki tekaantani? Ima ka imeeri uarhiiti uandasïndi eskaksï jánguarhintasïnga estudiarini Bibliani ka kómarhini Tata Diosï Jeobani. Alexéi uandantaspi: “Jánguarhintasïnga ambakiti programa jatsini engareni jarhuataaka sánderu andarhierani Tata Diosïni, komu jorhenguarhini Bibliani ka pauani pauani arhintani. Ístu, tsípeechani juchiiti uarhiiti ka ji, arhintasïngachi karakatani enga jindeeka para mándani jurhiatikua ka májku kʼérichi kómarhisïnga Tata Diosï Jeobani”. ¿Ambechi jorhenguarhisïni iiri ambe? Nóchi jatsiska para juchajkumindu mintsinharhikuarhini, sino Tata Diosï Jeobani mintsikani. ¿Nénachi uaa ísï úni? Engachi Bibliani jorhenguarhiska, kómarhini, engachi niraska tánguarhikuecharhu ka aianhpini i ambe ambejtsïni jarhuataati sánderu mintsikani Tata Diosïni. Engachi ísï úska, Tata Diosï Jeobajtsïni kánikua újchakuraati ka jarhuataatijtsïni parachi seguiriini marhuakuni. Tata Diosï íntskuspti uinhapikua Sansónini, ka ístujtsïni íntskuati juchantsïni.
SANSÓNI NO CHKÉTAKUARHISPTI
12. ¿Ambe no sési ambe niáraspi úni Sansóni, ka andisï i ambe enga Dalila jingoni úpka ménderueniipi eska máteruecha jingoni?
12 Ísï eska jucha, Sansóni no perfektuespti, ísï jimbo, ménichani niáraspti no sési ambe úni. Ma xanhari kánikua no sési nikuspti, jimboka no úxapka imani ánchikuarhitani enga Tata Diosï arhipka. Enga ióni sáni páni japkia komu juesi, “niáraspti tsitini nanakani ma enga Dalila arhinheenga ka enga baie de Soreki irekapka” (Juec. 16:4). Ante de míteni Dalilani, uékasïreendi tembuchani nanaka ma jingoni enga filistea anapuepka. Peru Biblia uandasïndi eska “i ambe Tata Diosïni Jeobani jimboespka, enga exeni japka néna no sési úkuani filisteuechani”. Ísï tátsekua, Sansóni niraspti ireta Gasa enga filistea japka ka pakaraspti ísku jándiiri kʼumanchikuarhu ma. Jiáni Tata Diosï Jeoba íntskuspti uinhapikua Sansóni paraka pʼikuantapiringa iretarhu anapu puerteechani paraka ísï ireta nóteru kuájchakukata japiringia (Juec. 14:1-4; 16:1-3). Joperu Dalilani jingoni no májkueniispti, jimboka jamberi ima israeliteepti ka Sansónisï uékani japti sánderu míteni para tembuchani imani jingoni, peru i ambe no jarhuatapirindi imani ánchikuarhita jingoni enga Tata Diosï íntskupka, enga jindeepka para uarhipeni filisteuechani jingoni.
13. ¿Ambe úspi Dalila para no sési ambe úkuni Sansónini?
13 Filisteuechaksï uékasïreendi eska Dalila traisionaripiriinga Sansónini, jimboksïsï uánikua sentabu aiakupti ka ima jiókuarhispti. ¿Xáni xénchasïreeni Sansóni Dalilani? ¿Andi no kuenta íntskukuarhipi ambe enga uékeenga úni? Ambe uéjki jimboeni, Dalila méntku kurhamarhini jarhasïreendi Sansónini andisï xáni uinhapipi, ka jimboka méntku ísï arhini jarhasïreenga, Sansóni niáraspti aianguni. Joperu indeni ambe jimbo kánikua no sési nikuspti Sansóni, jimboka ma tiempu jimbo nóteru jatsispkia uinhapikua ka ístu Tata Diosï Jeoba nóteru jaiapanhentasptia (Juec. 16:16-20).
14. ¿Ambe úkuarhinchaspi Sansóni enga ísï mintsikapka Dalilani?
14 Sansóni sánderu mintsikaspti Dalilani ka eska Tata Diosï Jeobani, peru kánikua no sési uéranchaspti enga ísï úpka. Filisteuechaksï jupikaspti ka pʼitanharhikuasptiksï éskuechani. Tátsekuaksï Gasa ónhaspti, imani ireta jimbo enga Sansóni puerteechani pʼikuapka, ka jimaksï jántspiri úspti para granu ambe urhuni. Tátsekuaksï filisteuecha kʼéri kʼuínchikua ma úspti ka kéjtsïtakuaksï ma úkuspti imeecheri diosï Dagónini, jimbokaksï eratsesïreenga eska ima jarhuataaspka jupikani Sansónini. “Petasptiksï Sansóni jima uératini enga ónhakuarhetini japka” paraksï tsípikuarhini, i ambe arhikuekasïndi eskaksï imeecha teresmarhuntsï uékeenga ka no sésiksï kámani (Juec. 16:21-25).
Tata Diosï Jeoba uinhapikua íntskuspti Sansónini paraka jusgariuapiringa filisteuechani. (Exe je párrafu 15).
15. ¿Néna xarhataspi Sansóni eska ménderu mintsikasïreengia Tata Diosï Jeobani? (Jueces 16:28-30; exe je dibujuni enga ueenakuarhu jaka ini rebistarhu).
15 Sansóni kánikua no sési ambe úspti, peru no chkétakuarhispti. Uékasïreendi kʼamarani imani ánchikuarhitani enga Tata Diosï Jeoba íntskupka, enga jindeepka filisteuecha jingoni uarhiperani (arhinta je Jueces 16:28-30). Ísï jimbo, Sansóni mintsita jingoni kurhakuspti Tata Diosï Jeobani ini ambe: “Jurajkurini ataantani filisteuechani”. Tata Diosï kurhaaspti imeeri kómarhikuani ka úspti eska ima ménderu uinhapipiringa. Tata Diosï Jeobaeri jarhuajperata jimbo, Sansóni uándikuaspti sánderu uánikua filisteuechani imani jurhiatikua jimbo eska iámindu imeeri irekua jimbo.
16. ¿Ambechi jorhenguarhisïni Sansóniiri ambe?
16 Nájkiruka Sansóni no sési nitamakuarhinchapka imani ambe jimbo enga erakupka úni, no chkétakuarhispti seguiriispti úni ambe enga Tata Diosï uékeenga. Ísï jimbo, engachi niáraaka úni ambe ma enga no sési jaka ka niáranchi tsïtaani pribilejiuechani ochi jurhimberanhantani, ísï eska Sansóni, ju je no chkétakuarhini. Ju je miáni eska Tata Diosï Jeoba listu jarhasïnga parajtsïni puáchentani (Sal. 103:8-10). Nájkirukachi uaaka ambe ma enga no sési jauaka, útasïchi uaaka marhuakuni Tata Diosï Jeobani ísï eska na úpka Sansóni.
Jamberi Sansóni kánikua no sési pʼikuarherapti imani ambe jimbo enga no sési úpka, peru no chkétakuarhispti. Juchajtuchi no jatsiska para chkétakuarhini. (Exea je párrafuechani 17 ka 18).
17, 18. ¿Nénaksïni uinhaperantasïni Michaeliiri ejemplu? (Ístu exea je imajeniichani).
17 Ju je exeni ambe enga úkuarhinchapka tumbi ma enga arhinhajka Michael. Ima sierbo ministerialiispti ka prekursori regulari, ka ístu máteru ambe úxapti para marhuakuni Tata Diosï Jeobani. Joperu niáraspti no sési ambe úni, ísï jimbo tsïtaaspti responsabilidadiichani enga kúnguarhikuarhu jatsiapka. Ima uandantasïndi: “Kánikua jánguarhintaxapka marhuakuni Tata Diosï Jeobani. Peruni ma repentku ísï pʼikuarheraspka eskani nóteru úpiringia. Mítespka eskarini Tata Diosï no jurajkupiringa, peruni kurhamarhikuarhisïreenga sini úpirini ménderu sési pájperantani imani jingoni o sini úpirini ménderu ísï marhuani kúnguarhikuarhu eska antesi”.
18 Michael ambakiti ambe erakuspti úni; no chkétakuarhispti. Ima uandasïndi: “Jánguarhintaspka sánderu andarhierani Tata Diosï Jeobani. Kánikuarini jarhuataspti mintsitarhu uératini kómarhini Tata Diosïni, estudiarini ka eratsentani ambe engani jorhenguarhienga Biblieri ambe”. Tiempu jingoni, Michael ménderu intsïnhaaspti responsabilidadiichani kúnguarhikuarhu, ka iásï orhejtsïkutiistia ka prekursori regulari. Ima uandasïndi: “Na engajtsïni xáni jarhuataka ka uinhaperantani erachiicha ka sánderia orhejtsïkutiicha, jarhuatastirini exeni eskarini Tata Diosï Jeoba útasï xénchasïnga. Iásï úsïngia marhuakuni ambakiti konsiensia ma jingoni. Ambe engani nitamanchaka, jorhendastireni eska Tata Diosï Jeoba puákuntasïnga náki uéjki kʼuiripuni enga sési jimbo móantajka”. Májkueni eska Michael, uaakachi seguru jarhani eska nájkirukachi úka ambe ma enga no sési jaka, uaakachi útasï marhuakuni Tata Diosï Jeoba ka intsïnhaani imeeri kóntperateechani, peru solu jiáni engachi jánguarhintaska mójtakurhini ka engachi mintsikaska Tata Diosï Jeoba (Sal. 86:5; Prov. 28:13).
19. ¿Nénaksïni uinhaperantaski Sansóniiri ejemplu?
19 Ini jorhenguarhikua jimbo exeskachi máru ambe enga Sansóni úpka. Nájkiruka ima no perfektuepka, no chkétakuarhispti imani ambe jingoni enga úkuarhipka Dalila jingoni, sánderu sési, seguiriispti marhuakuni Tata Diosï Jeobani. Ka Tata Diosï seguiriispti úrani Sansónini paraka niárapiringa kʼéri ambe úni. Ima seguiriisïreendi ísï exeni Sansónini komueska achamasï ma enga kánikua mintsikeenga imani, jimbosï kararkuarhiti Sansóniiri nombrini imani listarhu engaksï imeeri marhuariicha jaka engaksï no méni jurajkupka ka engaksï Ebreu kapitulu 11 jimbo jaka. Kánikuajtsïni uinhaperantasïndi míteni eskajtsïni juchaari Taati auandarhu anapu xénchasïnga ka eskajtsïni uékasïnga uinhaperantani, sánderia jiáni engachi problemeechani jatsiajka ka engachi uétarhinchani jarhajka eskajtsïni jarhuataaka. Ísï jimbo, májkueni eska Sansóni, ju je ini ambe kurhakuni Tata Diosï Jeobani: “Jimboetakua asïrini mirikurhi. Oh, Tata Diosï, íntskurini uinhapikua” (Juec. 16:28).
PIREKUA 3 Jeoba tʼuri jíndeni jingoni jarhaska
a Uánikua kʼuiripuecha, asta imeecha engaksï no káni míteka Biblieri ambe, kurhaastiksï Sansóniiri ambe. Jarhastiksï pirekuecha, pelikuleecha engaksï imeeri ambe uandajka. Peru ambe enga Biblia uandajka Sansóniiri ambe, no ísku kuentu máesti. Uaakachi uánikua ambe jorhenguarhini i achamasïiri enga kánikua mintsikeenga Tata Diosïni.