SEMANA 48
Mintsika je eskaksïni Tata Diosï Jeoba jarhuataka jiáni enga no sési jánhaskuarhini jauaka
“Uinhapikuarhintsï je [...]. Jimbokani ji chánksïni jingoni jarhaska, —ísï uandasïndi Tata Diosï Jeoba enga orhekupaajka ejersituechani—”(AGEO 2:4).
PIREKUA 118 Ú eskaksïni sánderu mintsikaaka
AMBE ENGACHI EXEAKAa
1, 2. ¿Nénachi májkueni no sési jásï ambe nitamakuarhixaki iásï eskaksï judiuecha engaksï Jerusaléni kʼuanhatsentapka? (Ístu exe je rekuadruni “Ageo, Sakariasi ka Esdrasiiri jurhiatikuecha jimbo”).
¿UANDANHIASÏNTSÏ imani ambe jimbo enga sánderu orhepatini úkuarhiaka? Jamberijtsï no jatsika ánchikuarhita ma ka uandanhiasïngajtsï néna manteneriini chaari familiani. Jamberijtsï uandanhiajka chaari familiani jimbo jimboka no sési jánhaskuarhixaka politika jimbo, jimbokaksï no sési kánhasïnga o jimbokaksïni juramutiicha no jurajkusïnga parajtsï aianhpini. Engajtsï indeni ambe nitamakuarhini jaka, kánikuaksïni uinhaperantaati míteni na enga Tata Diosï Jeoba jarhuataapka israeliteechani engaksï sáno májkueni ambe nitamakuarhini japka.
2 Judiuecha engaksï méntkisï Babilonia irekapka, uétarhinchasptiksï kánikua mintsikani Tata Diosïni paraksï úni jurajkuni jatsikuarhekua ambe ka sési jásï irekua ma paraksï nirani irekani ireta ma jimbo engaksï no miiupka. Jiáni engaksï imani ireta jimbo niárapka, úndasptiksï úkua jukanchani sentabu ambe jimbo, politikuecheeri problemeechani jimbo ka imeecheeri ikiatspitiichaksï ueenaspti no sési kaani. Ini ambe jimbo engaksï nitamakuarhini japka, máruksï úkua jukanchaxapti mintsita jingoni ánchikuarhini paraksï sési jájkuntani Tata Diosï Jeobaeri Templuni. Ísï jimbo, uéxurhini 520 jimbo ante de Jesúsi, Tata Diosï Jeoba axaspti profeta Ageoni ka Sakariasini para uinhaperantani iretani (Ageo 1:1; Zac. 1:1). Eskachi na exeni jauaka, i profeteecheeri ánchikuarhita marhuaspti, joperu sáno 50 uéxurhini tátsekua, judiuechaksï ménderu chkétakuarhispti jimbosï Esdrasi kʼuanhatsentapti Jerusaléni Babilonia uératini para uinhaperaantani ka jarhuataani paraksï orheta peerani Tata Diosïiri ambe (Esd. 7:1, 6).
3. ¿Náki kurhamarhikuechanchi mókuantani jaua? (Proverbios 22:19).
3 Ageoueri ka Sakariasiiri proefesiechaksï jarhuataspti Tata Diosïiri iretani paraksï seguiriini mintsikani Tata Diosï Jeobani nájkirukaksï imeeri ikiatspitiicha no sési káuenga ka ístujtsïni juchantsïni jarhuataati iásï parachi seguiriini mintsikani eskajtsïni Tata Diosï Jeoba jarhuataaka ambe uéjki enga úkuarhini jauaka (arhinta je Proverbios 22:19). Ini jorhenguarhikua jimbochi exeni jauaka ambe enga Tata Diosï Jeoba arhipka imeeri iretani Ageo ka Sakariasini jimbo ka ístuchi exeaka Esdrasiiri ejempluni. I ambejtsïni jarhuataati mókuantani arini kurhamarhikuechani: ¿Néna niáraspi no sési pʼikuastaani judiuechani ima problemeecha engaksï jatsiapka jiáni engaksï Jerusaléni kʼuanhatsentapka? ¿Andichisï jatsi para orheta peerani Tata Diosïiri ambe jiáni engachi no sési nitamanchani jauaka? ¿Ka ambejtsïni jarhuataa sánderu mintsikani Tata Diosï Jeobani?
PROBLEMEECHA ENGAKSÏ JUDIUECHA JATSIAPKA ÚSPTI ESKAKSÏ UANDANHIAPIRINGA
4, 5. ¿Ambe úspi eskaksï máru judiuecha chkétakuarhipiringa ka nóteru uékania úntani Tata Diosïiri templuni?
4 Jiáni engaksï judiuecha Jerusaléni niántapkia, kánikuaksï ánchikuarhita jatsispti. Ka engaksï na niántapkia, jirejiresïksï úntaspti Tata Diosï Jeobaeri altarini ka templueri pítsekuechani (Esd. 3:1-3, 10). Joperuksï xáni uánikua problemeechani jatsiapti engaksï no ióndapka chkétakuarhini. ¿Andi? Imeechaksï no solu jatsispti paraksï templuni úntani, ístuksï jatsispti paraksï imeecheeri kʼumanchikuechani uaantani, kampuechani ánchitaani. Ka ístuksï jatsispti paraksï kéndaani imeecheeri familiechani (Esd. 2:68, 70). Joperu ístu imeeri ikiatspitiichaksï no ísku pakaraspti, sóntkuksï ueenaspti úni ambe ma paraksï judiuecha nóteru úntania templuni (Esd. 4:1-5).
5 Ístuksï judiuecha problemechani jatsiaspti sentabu jimbo ka politika jimbo. Imani jurhiatikuechani jimbo, israeliteechaksï Persieri juramukua jimbo jarhaspti. Ísï tátsekua enga Rei Siro uarhipka 530 ante de Jesúsi, Kambisesi ueenaspti juramuni ka ueenaspti uarhipeni Ejiptuni jingoni. Ka engaksï nirani japka Ejiptu, jamberiksï soldaduecha Israelisï nitamapti, ka kurhakuasptiksï judiuechani itsï ka tʼirekua, ka inde ambe úpti eska ireta sánderu no sési nitamakuarhini japiringa. Ka jiáni enga rei Dariu I ueenapka juramuni, kánikua no sési jánhaskuarhispti imani ireteechani jimbo engaksï perseecha juramuenga. Iámindu inde ambe úspti eskaksï uánikua judiuecha engaksï Jerusaléni kʼuanhatsentapka kurhamarhikuarhipiringa nénaksï úpirini manteneriuani imeecheeri familiechani. Iámindu ini ambe jimbo, uánikuechaksï niáraspti eratseni eska no tiempuespka para ménderu úntani Tata Diosï Jeobaeri templuni (Ageo 1:2).
6. ¿Náki máteru problemechanksï jatsiaspi judiuecha ka ambe arhiaspi Sakariasi? (Zacarías 4:6, 7).
6 (Arhinta je Zacarías 4:6, 7). Judiuechaksï no solu jatsiaspti problemechani sentabu jimbo ka politikeeri ambe jimbo, ístuksï imeeri ikiatspitiicha no sési kaaxapti. Uéxurhini 522 ante de Jesúsi, imeecheeri ikiatspitiichaksï úspti eskaksï nóteru úntapiringia Tata Diosï Jeobaeri templuni, joperu Sakariasi arhiaspti judiuechani eska Tata Diosï Jeoba úrapiringa imeeri espiritu santuni para kénditani ambe uéjki ambe enga ójkutaapiringa. Uéxurhini 520 jimbo, rei Dariu jurajkuaspti eskaksï seguiripiringa úntani templuni ka íntsaaspti sentabu parakaksï ísï úpiringa ka ístu juramukuaspti jimeesïsï anapu juramutiichani eskaksï jarhuataapiringa (Esd. 6:1, 6-10).
7. ¿Náki kóntperateechanksï intsïnhaaspi judiuecha jimbokaksï orhetku peeraspka Tata Diosïiri ambe?
7 Ageo ka Sakariasini jimbo, Tata Diosï Jeoba aiakuaspti imeeri marhuariichani eska imeechani jingoni japiringa engaksï orheta peerapiringa imeeri templuni úntani (Ageo 1:8, 13, 14; Zac. 1:3, 16). Ka jimbokaksï profeteecha uinhaperaantaspka, judiuechaksï ueenaspti úntani templuni uéxurhini 520 jimbo ka menusi de sinko uéxurhini jimboksï kʼamaraspti. Nájkirukaksï uánikua uandanhiateechani jatsiapka, orhetkuksï peeraspti Tata Diosïiri ambe, jimbosï Tata Diosï jarhuataapti imani ambe jingoni engaksï uétarhincheenga para irekani ka ístu parakaksï no méni jarharipiringa ka ísïksï úspti tsípikua jingoni marhuakuni Tata Diosï Jeobani (Esd. 6:14-16, 22).
ORHETA PEERA TATA DIOSÏ JEOBAERI AMBE
8. ¿Nénajtsïni jarhuatasïni Ageo 2:4 orheta peerani Tata Diosï Jeobaeri ambe? (Ístu exe je notani).
8 Míteskachi eska ima jurhiatikua enga kánikua no sési nitamakuarhinhaaka, axuterku jarhaskia, ísï jimbosï xáni jukaparhakueti nirani aianhpini (Mar. 13:10). Joperu engachi no sáni jatsikuarheaka sentabu, ojtsïni juramutiicha no jurajkuni parachi aianhpini, jamberi no xáni fásiliuati eskachi aianhpiaka. ¿Ambejtsïni jarhuataa orheta peerani Reinueri ambe? Méntkisï mintsikani eska Tata Diosï Jeoba enga orhekupaajka ejersituechani,b juchantsïni jingoni jarhaska. Ísï jimbo nóchi jatsiska para uandanhiani. Engachi orheta peeraska Tata Diosïiri Reinueri ambe, imajtsïni jarhuataati (arhinta je Ageo 2:4).
9, 10. ¿Néna kumplirikuarhiski Mateu 6:33 temungurhiri ma jingoni?
9 Ju je Oleg ka Irineeric ejempluni exeni, temungurhiri ma engaksï prekursoriika. Ísï tátsekua engaksï mótsipka para jarhuatani kúnguarhikuani ma, tsïtasptiksï imeecheeri ánchikuarhitani jimboka imeecheeri paisi jimbo no sési jánhaskuarhixapti sentabu jimbo. Nájkirukaksï no xáni jatsipka sentabu ma uéxurhini, méntkisïksï pʼikuarheraspti eska Tata Diosï Jeoba xénchaasïreenga ka eska no méni jurajkuaspka, ka ístuksï erachiicha jarhuataasïreendi. ¿Nénaksï úspi orhepani uérani? Oleg ueenakuarhu kánikua kómu pʼikuarheraspti. Uandasïndi: “Méntkisï aianhpini jarhani Tata Diosïiri ambe, jarhuatasptijtsïni parachi imani ambe eratseni enga sánderu jukaparhakueka”. Enga ima ka imeeri témba jirinhani japka ánchikuarhita, jánguarhintasptiksï méntkisï aianhpini jarhani.
10 Ma jurhiatikua engaksï niántapka imeecho aianhpikuarhu uératini mítesptiksï eska amigu ma 160 kilometru (100 miia) biajariispka para tsimani bolsa tʼirekua pákuani. Oleg uandantasïndi: “Imani jurhiatikua jimbochi úspka ménderu exeni na enga xáni uandanhiajka Tata Diosï Jeoba ka kúnguarhikua juchantsïni jimbo”. Sésichi mítetixaka eska Tata Diosï Jeoba no méni mirikurhiasïnga imeeri marhuariichani nájkirukaksï no sési ambe nitamakuarhini jauaka (Mat. 6:33).
11. ¿Ambejtsïni íntskua Tata Diosï Jeoba engachi orheta peeraska imeeri ambe?
11 Tata Diosï Jeoba uékasïndi eskachi jánguarhintaaka disipuluechani uaani, ánchikuarhita ma enga újka para pʼímutantani imeecheeri tsípikuani. Eskachi na exeka párrafu 7 jimbo, Ageo uinhaperaantaspti judiuechani paraksï seguiriini úntani templuni. Ísïispti enajki arhiani japi eskaksï ménderu ueenapiringa templueri pítsekuechani uaantani ka eskaksï mirikurhipiringa imani uéxurhiniichani engaksï no ma ambe úpka. Tata Diosï Jeoba aiakuaspti eska engaksï ima kurhajchapiringa, eska ima újchakuraapiringa (Ageo 2:18, 19). Juchajtuchi uaaka seguru jarhani eskajtsïni Tata Diosï Jeoba újchakuraaka engachi orheta peeraaka imani ánchikuarhitani engachi intsïnhaaka.
AMBECHI UAA ÚNI PARACHI SÁNDERU MINTSIKANI TATA DIOSÏ JEOBANI
12. ¿Andiksïsï Esdrasi ka ima grupu enga imani jingoni nirani japka uétarhincheeni kánikua mintsikani?
12 Uéxurhini 468 ante de Jesúsi, Esdrasi Babilonia uératini niraspti Jerusaléni máteru grupu judiuecha jingoni. Esdrasi ka imeecha engaksï imani jingoni nirani japka uétarhinchasïreendiksï kánikua mintsikani indeni biajini jimbo, jimbokaksï kánikua oru páxapka ka plata enga rei íntsaapka para templu. Úpirindiksï kuarhukpiticha no sési úkuani ka euakuarhiani (Esd. 7:12-16; 8:31). Ístuksï no ióndaspti kuenta íntskukuarheni eska Jerusaléni no seguruespka para irekani jimbokaksï iretarhu no uánikua kʼuiripuecha irekaxapka ka ístu bardeecha ka puerteechaksï chʼamatakata jarhaspti. ¿Nénajtsïni jarhuatasïni Esdrasiiri ejemplu parachi sánderu mintsikani Tata Diosï Jeobani?
13. ¿Ambe jarhuataspi Esdrasini sánderu mintsikani Tata Diosï Jeobani? (Ístu exe je notani).
13 Esdrasi exespti na enga jarhuatapka Tata Diosï Jeoba imeeri iretani jiáni engaksï no sési nitamakuarhinchani japka. Máru uéxurhini antesi 484 jimbo, jiáni enga rei Asueru juramupka eskaksï uándikunhapiringa iámu judiuecha engaksï imani lugarichani jimbo irekani japka nani engaksï perseecha juramuenga, jamberi Esdrasi Babilonia irekapti (Est. 3:7, 13-15). Esdrasi ka ístu iámindu judiuecha, úpirindiksï uarhini. Ka engaksï mítepka ini ambe, xánksï uandanhiaspti engaksï jamberi nóteru tʼireengia. Ka ueparinksï kómarhispti Tata Diosï Jeobani eska jarhuataapiringa (Est. 4:3). Ju je eranhaskani na engaksï pʼikuarherapka Esdrasi ka ístu máteru judiuecha jiáni engaksï mítepka eskaksï imeechasï uándikunhapka engaksï uékeenga judiuechani uándikuani (Est. 9:1, 2). Ambe enga Esdrasi nitamakuarhipka imani jurhiatikuechani jimbo engaksï xáni úkua jukapka, preparariispti para orhepani uérakuani imani tsʼéjkukuechani engaksï sánderu orhepani jupiringa ka inde ambe úspti eska sánderu mintsikapiringa Tata Diosï Jeobani ka eska ima úpiringa kuájchakuni imeeri iretani.d
14. ¿Ambe úspi jorhenguarhini pirenchi ma jiáni enga nóteru jatsipkia ánchikuarhita?
14 Jiáni engachi no sési nitamakuarhini jarhajka ka exenchi na engajtsïni Tata Diosï Jeoba kuidarijka, sánderuchi mintsikasïnga imani. Ju je exeni Anastasieri ejempluni, pirenchi ma enga Europa del Este irekaka. I pirenchi jurajkuspti imeeri ánchikuarhitani jimboka no uékasïreenga politikarhu inchamukuni. Anastasia uandantasïndi: “Jiáni jamberi, no méni niáraska kueratanchani sentabu”. Ka ístu uandasïndi: “Uandontskuarhekuspka Tata Diosï Jeobani iiri ambe ka imarini uékperakua jingoni kuidarispti. Engani ménderu niáraska no jatsini ánchikuarhita, no chéaka. Míteska eskarini juchiiti Taati auandarhu anapu kuidariuaka iásï ka ístu sánderu orhepatini”.
15. ¿Ambe jarhuataspi Esdrasini paraka seguiriipiringa mintsikani Tata Diosï Jeobani? (Esdras 7:27, 28).
15 Esdrasi exespti eska Tata Diosï Jeoba jarhuataxapka. Enga Esdrasi exepka na enga xáni jarhuatapka Tata Diosï Jeoba antesi, inde ambe jarhuataspti paraka sánderu mintsikapiringa Tata Diosï Jeobani. Ju je exeni uandakuani “Tata Diosï Jeobaeri jájki jíndeni jingoni jarhasti” enga jaka Esdras 7:27, 28 jimbo, (arhinta je). Esdrasi sinko xanhari uandaspti indeni jásï mismu uandakuechani imani librurhu enga ima karaka (Esd. 7:6, 9; 8:18, 22, 31).
¿Nanichi uaa exeni eskajtsïni Tata Diosï Jeoba jarhuatasïnga? (Exe je párrafu 16).e
16. ¿Kánchi uaa sánderu exeni eskajtsïni Tata Diosï Jeoba jarhuataxaka? (Ístu exea je fotuechani).
16 Tata Diosï Jeobajtsïni uaati jarhuatani jiáni engachi no sési ambe nitamakuarhini jauaka. Pori ejemplu, jamberichi jatsiaka para arhini juchaari patronini eskajtsïni jurajkuaka nirani kʼéri tánguarhikuecharhu o eskachi sánderu kókuani uéntaaka ánchikuarhitarhu parachi úni nirani tánguarhikuarhu. Enga i ambe úkuarhiska, uaakachi exeni na engajtsïni jarhuataaka Tata Diosï Jeoba ka sánderuchi mintsikaaka.
Esdrasi templurhu jarhasti ka jima kómarhisïndi Tata Diosï Jeobani ka uerasïndi israelitecheeri pekaduechani jimbo. Kʼuiripu enga ístu templurhu jaka, uerasïndi. Jimajkani Sekaníasi sési pʼikuastaantasïndi arhiaparini: “Útasï jarhasti erokuarhikua ma para Israeli. [...] Jucha tʼungini jingoni jarhaska” (Esd. 10:2, 4). (Exe je párrafu 17).
17. ¿Néna xarhataspi Esdrasi eska kaxumbitiispka jiáni enga no sési nitamakuarhini japka? (Ístu exe je dibujuni enga ueenakuarhu jaka).
17 Esdrasi kaxumbitiispti ka kurhakuspti Tata Diosï Jeobani eska jarhuatapiringa. Jiáni enga uandanhiani jarheenga imani ambe jimbo enga jatsipka para úni, Esdrasi kaxumbikua jingoni kómarhisïreendi Tata Diosï Jeobani (Esd. 8:21-23; 9:3-5). Jimboka Esdrasi mintsikasïreenga Tata Diosï Jeobani, máteruechajtuksï májkueni úsïreendi (Esd. 10:1-4). Engachi jukari uandanhiani jauaka sentabu ambe jimbo o juchaari familia jimbo, kómarhiakachi Tata Diosï Jeobani mintsikaparini eskajtsïni jarhuataaka.
18. ¿Ambejtsïni jarhuataa sánderu mintsikani Tata Diosï Jeobani?
18 Sánderuchi mintsikaaka Tata Diosï Jeobani engachi kaxumbitiiska, engachi kurhakuska jarhuajperata ka engachi jurajkuska eskajtsïni juchaari erachiicha jarhuataaka. Erika, pirenchi ma enga tanimu sapiichani kánguarhiajka, méntkisï mintsikaspti Tata Diosï Jeobani, ima charhakuni ma tsïtaspti ka ístu uarhiranchaspti uámbani. Erika eratsentasïndi iámindu indeni ambe enga nitamanchaka ka uandasïndi: “Nóri míteska néna engakeni jarhuataaka Tata Diosï Jeoba. Ménichani na engakeni ima jarhuataaka, ískukini pakataati. Uánikua uelta exeska eska Tata Diosï Jeoba úraaska juchiiti amiguechani para mókuantani juchiiti kómarhikuechani imani ambe jingoni engaksï úka o uandaka. Engani aianguajka ambe engani nitamanchani jarhajka, sánderu fásiliisïndi eskajtsïni jarhuataaka”.
MÉNTKISÏ MINTSIKA TATA DIOSÏ JEOBANI
19, 20. ¿Ambechi uaa jorhenguarhini imani judiuecheeri engaksï no úpka kʼuanhatsentani Jerusaléni?
19 Ístuchi uaaka ambakiti ambe jorhenguarhini imani judiuecheeri engaksï no úpka kʼuanhatsentani Jerusaléni jimbokaksï jatiriispkia, pʼamenchaxapka oksï jatsini para imeecheeri familiechani kuidariuani. Joperuksï kánikua tsípikua jingoni jarhuataaspti imeechani engaksï úpka níntani ka uánikua ambeksï íntsaaspti parakaksï úpiringa templuni úntani (Esd. 1:5, 6). Jamberiksï 19 uéxurhini ísï tátsekua engaksï primeru grupu judiuecheeri kʼuanhatsentapka Jerusaléni, imeecha engaksï Babilonia pakarani japka seguiriiptiksï axani jarhuajperata ambe (Zac. 6:10).
20 Engachi no uaaka úni xáni ambe engachi uékapiringa para marhuakuni Tata Diosï Jeobani, uaakachi seguru jarhani eska ima kánikua jukaparharasïnga xáni engachi xáni újka imani jimbo. ¿Andichisï ísï uandajki? Imani ambe jimbo enga Tata Diosï profeta Sakaríasini arhipka. Tata Diosï Jeoba kurhakuspti profeta Sakaríasini eska úpiringa korona ma imani oru ka plata jingoni engaksï judiuecha axapka engaksï Babilonia pakarapka (Zac. 6:11). I “kʼéri korona” “miátaantapirindi” eskaksï imeecha tsípikua jingoni íntspispka (Zac. 6:14, noteecha). Ísï jimbo, seguruchi jarhaska eska Tata Diosï Jeoba no méni mirikurhiaka na engachi xáni jánguarhintajka imani marhuakuni nájkirukachi no sési nitamakuarhini jauaka (Ebr. 6:10).
21. ¿Ambejtsïni jarhuataa mintsikani Tata Diosï Jeobani no arhiparini ambe enga úkuarhiaka sánderu orhepatini?
21 Míteskachi eska ini últimu jurhiatikuechani jimbo sánhani arhiakachi sánderu no sési nitamakuarhini ka eska jamberi sánderu no sési jánhaskuarhipani jauaka (2 Tim. 3:1, 13). Joperuchi no jatsiska parachi jukari uandanhiani. Ju je miáni ambe enga Tata Diosï Jeoba arhiapka imeeri marhuariichani Ageoueri jurhiatikuechani jimbo: “Ji chánksïni jingoni jarhaska [...]. Asï ché je” (Ageo 2:4, 5). Juchajtuchi seguru jarhaska eska engachi úska ambe enga ima uéjka, Tata Diosï Jeoba juchantsïni jingoni jauati. Engachi úska ambe engachi jorhenguarhika Ageo ka Sakaríasiiri profesiecharhu, ka ístu Esdrasiiri ejempluni jingoni, méntkisïchi mintsikaaka Tata Diosï Jeobani nájkirukachi no sési nitamakuarhini jauaka.
PIREKUA 122 ¡Ju je uinhapiti jarhani!
a I jorhenguarhikua úkata jarhasti parajtsïni jarhuatani sánderu mintsikani Tata Diosï Jeobani jiáni engachi sentabu uétarhinchani jauaka, enga problema ambe jauaka politikeeri ambe o jiáni engajtsïni máteruecha no jurajkujka parachi aianhpini.
b Uandakua “Tata Diosï Jeoba enga orhekupaajka ejersituechani”, 14 uelta jukanharhisti libru de Ageo jimbo. I uandakua miátantaasïreendi judiuechani ka ístu juchantsïni eska Tata Diosï Jeoba kánikua uinhapitiiska ka eska ima orhekupaasïnga kʼérati ejersituechani ánjelicheeri (Sal. 103:20, 21).
c Máru nombriichaksï mójtakurhisti.
d Esdrasi ambakiti karantsti máespti Tata Diosïiri uandakueri. Ima mintsikaasïreendia Tata Diosï Jeobaeri profesiechani antesi de Jerusaléni nirani (2 Crón. 36:22, 23; Esd. 7:6, 9, 10; Jer. 29:14).
e AMBE ENGAKSÏ XARHATAJKA IMAJENIICHA: Erachi ma arhixati imeeri patronini eska sésikua íntskuaka para kʼéri tánguarhikuarhu nirani, joperu ima arhisïndi eska nómbe. Erachi kómarhisïndi Tata Diosï Jeobani ka kurhakusïndi eska uaaka ménderu uandontskuarheni imeeri patronini jingoni. Erachi exerasïndi pʼímarperakua para kʼéri tánguarhikueri ka arhisïndi eskajtsïni Biblia jarhuatasïnga sánderu ambakiti kʼuiripueni. Imeeri patroni eratsentani pakarasïndi ka jurajkusïndi erachini para nirani imeeri kʼéri tánguarhikuarhu.