Jarhuata je estudiantini para marhuakuni Tata Diosï Jeobani

1, 2. a) ¿Andiksïsï Biblieri jorhenguarhiriicha úkua jukanchani jarhajki erakuni sinksï Jeobaeri testigu úkuarhia o nómbe? b) ¿Ambechi exea ini artikulu jimbo?

¿JIÁNI engari uékani japkia Jeobaeri testigu úkuarhini jarhaspi ambe ma engari jimbo no seguru japka? Jamberiri cheenga eskaksï ikiachepiringa ánchikuarhitarhu anapu kompanieruecha, amiguecha o familiariicha. O jamberiri eratseenga eskari no úpiringa ísï úni eskaksï na uandajka Tata Diosïiri juramukuecha. Enga ísïika uaakari kurhangukuani andiksïsï máru Biblieri jorhenguarhiriicha úkua jukanchajki erakuni sinksï Jeobaeri testigu úkuarhia o nómbe.

² Jesúsi mítespti eska ísï pʼikuarherani nójtsïni jurajkusïnga marhuakuni Tata Diosï Jeobani (Mat. 13:20-22). Ka nájkiruka Jesúsi míteapka máru kʼuiripuechani engaksï no tekaani japka imeeri chúxapatiini, seguru jarhaspti eskaksï ma jurhiani niárapiringa imeeri chúxapatiini. Engachi májkueni úska eska Jesúsi, uaakachi jarhuataani Biblieri jorhenguarhirichani paraksï 1) exeni ambe ójkutaaxaki engaksï jimbo no marhuakuni jaka Tata Diosïni, 2) sánderu xénchani Tata Diosï Jeobani, 3) orheta peerani Tata Diosï Jeobani ka paraksï 4) seguiriini jarhani tekaantani nájkirukaksï uandanhiateechani jatsiauaka. Ju je exeni nénachi uaaka májkueni úni eska Jesúsi parachi jarhuatani Biblieri jorhenguarhirini ma Jeobaeri testigu úkuarhini úraparini libruni Tsípikua jingoni ireka je.

JARHUATA EXENI AMBE ÓJKUTAXAKI ENGA JIMBO NO ÚNI JAKA MARHUAKUNI TATA DIOSÏNI

3. ¿Ambe ójkutaxapi Nikodemuni para Jesúsiiri chúxapatiini?

³ Nikodemu judiuecheri k’éri juramuti máespti, joperu jarhaspti ambe ma enga jimbo no ueenga Jesúsiiri chúxapatiini. Ka seisi mesesi ísï tátsekua enga Jesúsi na ueenapkia aianhpini, Nikodemu mítesptia eska Jesúsi Mesíasispka (Juanu 3:1, 2). Joperu ima ‘chérhiasïreendi judiuechani’, jimbosï sïpatikuarku uandontskuarhekupti Jesúsini (Juanu 7:13; 12:42). Jamberi cheendi eska nóteru k’éri exenhapiringia ka ístu tsïtani jatsikuarhekua ambe enga niárapiringa Jesúsiiri chúxapatiini.a

4. ¿Néna jarhuataspi Jesúsi Nikodemuni para kurhanguni ambe enga Tata Diosï uékeenga eska úpiringa?

⁴ Nikodemu sési mítespti ambe enga arhienga Moisésiiri Lei, joperu uétarhinchaxapti eska nema jarhuatapiringa kurhanguni ambe uékasïreeni Tata Diosï Jeoba eska ima úpiringa. ¿Néna jarhuataspi Jesúsi? Arhutaspti tiempu para jarhuatani, asta uékaspti uandontskuarheni imani jingoni nájkiruka chúrikuepiringa. Ístu, iatsitakuarhu arhispti ambe enga jatsipka para úni para úni imeeri chúxapatiini, moántani imeeri pekaduecheeri, itsï atakuarhini ka xarhatani eska mintsikasïreenga Tata Diosïiri Uájpani (Juanu 3:5, 14-21).

5. ¿Ambechi uaa úni parachi jarhuatani jorhenguarhirini ma exerani ambe ójkutaxaki para marhuakuni Tata Diosï Jeobani?

⁵ Jamberi jorhenguarhiri sési mítetia Biblieri ambe, joperu uétarhinchajti eska nema jarhuataaka exeni ambe ójkutaxaki para Tata Diosï Jeobani marhuakuni. Jamberi jukari ánchikuarhini jati o jamberi imeeri familia no uéjti eska ima Jeobaeri testigueuaka. ¿Nénari uaa t’u májkueni úni eska Jesúsi? Arhutani tiempu parari jarhuatani jorhenguarhirini. Pori ejemplu, uaakari arhini parajtsï márku nirani nani o parajtsï nirani arhani sáni ambe. Engajtsï indeni ambe uaaka, jamberi no úkua jukanchaati parakeni aianguni ambe ójkutaxaki. Ka ísïiri uaaka jarhuatani para ima exeni ambe uaa mójtakuni ka ístu miátantani eska sánderu jukaparhakueska xarhatani eska xénchasïnga Tata Diosï Jeobani ka eska no tʼunginisï jatsika para jaiapanherantani.

6. ¿Nénari uaa jarhuatani jorhenguarhirini ma paraka uaa ísï úni eska na jorhenguarhini jaka? (1 Korintu 16:13).

⁶ Paraka Biblieri jorhenguarhiri ma uaaka ísï úni eska na jorhenguarhini jaka, jatsisti para seguru jarhani eska Tata Diosï Jeoba jarhuataaka (arhinta je 1 Korintu 16:13). ¿Nénari uaa jarhuatani? Miánta jiáni engari eskuela nireenga, ¿na jásïri maestruni ma uékasïreeni eskakeni jorhendapiringa? Jamberi imani enga tekaantskua jatsipka ka engakeni jarhuatapiringa seguru p’ikuarherani. Jánguarhi xásï maestru máeni, jimboka ambakiti maestru ma no solu jorhentpisïnga ambe enga Tata Diosï uéjka eskachi uaaka, sino jarhuataa jorhenguarhirini paraka kurhanguaka ka exeni eska Tata Diosï Jeoba jarhuataaka mójtakurhini. ¿Ambe máteru amberi uaa úni parari jarhuatani jorhenguarhirini?

JARHUATA PARA SÁNDERU XÉNCHANI TATA DIOSÏ JEOBANI

7. ¿Néna jarhuataaspi Jesúsi ima kʼuiripuechani engaksï kurhajcheenga paraksï sánderu xénchani Tata Diosï Jeobani?

⁷ Jesúsi mítespti eska engaksï imeeri chúxapatiicha xénchapiringa Tata Diosïni, sánderuksï no úkua jukanchapirindi kurhajchani. Ísï jimbo, Jesúsi someni jorhendasïreendi imani ambe enga jarhuatapiringa paraksï sánderu xénchani imeeri Taati auandarhu anapuni. Pori ejemplu, terukutantasti Tata Diosï Jeobani achamasï ma jingoni enga ambakiti ambe íntsaajka imeeri uájpeechani (Mat. 7:9-11). Jamberi máru ima kʼuiripuecha engaksï kurhajcheenga Jesúsini, nóksï jatsipti taati xénchpetiini ma. Eranhaska je na engaksï pʼikuarherapka enga Jesúsi aianguapka Taati xénchpetiiri ma enga sési erontapka imeeri uájpani enga kánikua no sési ambe úpka joperu enga móantapka. I ambe jarhuataapti kurhanguni eska Tata Diosï Jeoba kánikua xénchaasïnga kʼuiripuechani (Luk. 15:20-24).

8. ¿Nénari uaa jarhuatani Biblieri jorhenguarhirini paraka sánderu xénchaaka Tata Diosï Jeobani?

⁸ Engajtsï exeraska jorhenguarhini na engaksï xáni jukaparhakueka Tata Diosï Jeobaeri kualidadiicha, jarhuatantsï jauaka paraka ima sánderu xénchani Tata Diosï Jeobani. Méni engajtsï jorhenguarhiaka, jarhuata je kurhanguni eska ambe enga jorhenguarhini jaka xarhatasïnga eska Tata Diosï Jeoba xénchasïnga. Engajtsï exeni jauaka euajpintskueri ambe jarhuata je exeni eska Tata Diosïiri intsïmperata máeska para ima (Rom. 5:8; 1 Juanu 4:10). Enga jorhenguarhiri kurhanguska na enga Tata Diosï xáni xénchajka, jamberi sánhani arhiati sánderu xénchani Tata Diosï Jeobani (Gal. 2:20).

9. ¿Ambe jarhuataspi Michaelini para marhuakuni Tata Diosï Jeobani?

⁹ Iásï exenchi jauaka Michaeliri ejemplu, enga Indonesia anapueka. Enga ima 18 jatiripka máteru paisirhu niraspti ánchikuarhini. Ísï tátsekua kʼuanhatsentaspti Indonesia, tembuchaspti ka nanakanksï ma kánguarhispti. Joperu ménderu niraspti ánchikuarhini ka jurajkuspti imeeri familiani. Tátsekua imeeri témba ka imeeri uájpa ueenasptiksï jorhenguarhini Biblieri ambe ka uánikua ambeksï mójtakuspti. Joperu jiáni enga Michaeliri amamba uarhipka, ima junguaspti para kuidarini imeeri taati jémbani ka uékaspti jorhenguarhini Biblieri ambe. Engaksï jorhenguarhini japka jorhenguarhikua 27 librurhu Tsípikua jingoni ireka je, partirhu “Jorhenguarhi je sánderu ambe”, mintsitarhu niárakuspti ka pʼíaraspti uerani enga eranhaskapka na enga xáni no sési pʼikuarherapka Tata Diosï Jeoba exeni na enga imeeri Uájpa xáni no sési nitamakuarhipka. Ka enga kurhangupkia na enga xáni xénchajka Tata Diosï Jeoba ka Jesúsi kánikua sési pʼikuarheraspti ka itsï atakuarhispti.

JARHUATA ORHETA PEERANI TATA DIOSÏ JEOBANI

10. ¿Néna jarhuataaspi Jesúsi imeeri chúxapatiichani paraksï orheta peerani Tata Diosï Jeobani? (Lukasï 5:5-11; ístu exe je imajenini).

¹⁰ Máru imeechani enga Jesúsi aianguapka, sóntkuksï kuenta íntskukuarhespti eska Jesúsi jindeespka Mesíasi. Joperuksï uétarhinchasïreendi kurhanguni eska paraksï Tata Diosïni marhuakuni, jatsispkaksï para ainhpini. Pedru ka Andrési, sánksï ióni páxaptia marhuakuni Jesúsini ante de ima pʼímarhiani paraksï iámu ambe jurajkuni ka únksï tiempu kompletueri marhuakuni (Mat. 4:18, 19). Imeechaksï Santiagu ka Juanu jingoni kurucha pʼitamatiispti ka kánikua sési nikuasïreendi (Mar. 1:16-20). Joperu Pedru ka Andrési, jurajkusptiksï imeecheeri ánchikuarhitani paraksï Jesúsiiri chúxapatiini. Joperu engaksï erakupka indeni ambe úni, ístuksï exesptia nénaksï kéndaapirini imeecheeri familiechani ka ístu Jesúsini chúxapani. Jiájkani, ¿ambe jarhuataaspi paraksï sánderu jukaparharani aianhpikuani ka eska sentabuni? Lukasï uandantasïndi eska Jesúsi milagru ma úspti para xarhatakuani eska Tata Diosï Jeoba úpiringa íntsaani ambe engaksï uétarhinchapiringa. I ambe jarhuataapirindi seguru jarhani eska Tata Diosï Jeoba méntkisï jarhuataapiringa engaksï orheta peerapiringa imani (arhinta je Lukasï 5:5-11).

11. ¿Ambechi uaa úni paraka jorhenguarhiri sánderu mintsikaaka Tata Diosïni?

¹¹ Juchachi iásï no uaasïnga milagruechani ísï eska Jesúsi, joperuchi kʼóru uaaka aianguni jorhenguarhirini eska Tata Diosï Jeoba jarhuatasïnga imani enga orhetku peerajka Tata Diosïiri ambe. Pori ejemplu, ¿miásïndi na engakeni jarhuatapka Tata Diosï jiáni engari ueenapka nirani tánguarhikuecharhu? Jamberiri uandontskuarhepka chiiti patroni jingoni ka arhindi eskari no úpiringa pakarani para sánderu ánchikuarhini jimbokari no uékasïreenga tánguarhikuecharhu kueratani. Ka aianguni jorhenguarhirini na engakeni jarhuatapka Tata Diosï engari indeni ambe úpka ka eska inde ambe úspka eskari sánderu mintsikapiringa imani.

12. a) ¿Andisï sési jaki eskari pʼímarhiauaka erachiichani engari niuaka jorhentpini Biblieri ambe? b) ¿Ísturi ambe uaa úni parari jarhuatani jorhenguarhirini orheta peerani Tata Diosï Jeobani? Jatsiku je ejemplu ma.

¹² Ístu kánikua marhuakuati jorhenguarhirini engaksï máteru erachiicha aianguaka ambe engaksï úpka paraksï orheta peerani Tata Diosï Jeobani. Pori ejemplu, uaakari pʼímarhini erachini o pirenchini ma enga mámaru ambe nitamakuarhika ka arhini eska aianguaka jorhenguarhirini na enga niáraka míteni Biblieri ambe ka ístu ambe enga úpka para orheta peerani Tata Diosï Jeobani. Ístu sési japirindi eskari arhutapiringa tiempu para exeni jorhenguarhiri jingoni bideuechani engaksï ini partirhu jaka “Jorhenguarhi je sánderu ambe” o “Ístu exe je ini ambe” librurhu Tsípikua jingoni ireka je. Pori ejemplu engari estudiariini jauaka jorhenguarhikua 37, ka exeni bideuni Jeobajtsïni íntskuati ambe engachi uétarhinchajka uandontskuarhi bideueri ambe ka jarhuata kurhanguni eska Tata Diosï Jeoba jarhuataaka enga ima orheta peeraska.

JARHUATA PARA SEGUIRIINI JARHANI TEKAANTANI NÁJKIRUKA UANDANHIATEECHANI JATSIAUAKA

13. ¿Néna jarhuataspi Jesúsi imeeri chúxapatiichani paraksï úni orhepani uérakuani uandanhiateechani?

¹³ Jesúsi uánikua xanhari arhiaspti imeeri chúxapatiichani eskaksï no sési kánhapiringa ka eska asta familiariicha jamberi no sési kaapiringa (Mat. 5:11; 10:22, 36). Ante de Jesúsi uándikunhani, arhiaspti eskaksï imeechajtu jamberi úpiringa uándikunhani (Mat. 24:9; Juanu 15:20; 16:2). Ka ístu arhiaspti eskaksï jingontku jámapiringa ka nóksï arhirperani jarhani imani kʼuiripuecha jingoni engaksï ikiakuauenga paraksï úni seguiriini jarhani aianhpini.

14. ¿Nénachi uaa jarhuatani jorhenguarhirini ma para úni tekaantani enga no sési kánhani jauaka? (2 Timoteu 3:12).

¹⁴ Májkueni eska Jesúsi, uaakachi arhini jorhenguarhirini ambe engaksï úpiringa arhini o úkuni imeeri ánchikuarhitarhu anapu kompanieruecha, amiguecha o kʼumanchikuarhu anapuecha jimboka jorhenguarhixaka Biblieri ambe (arhinta je 2 Timoteu 3:12). Máru ánchikuarhitarhu anapu kompanieruechaksï uaati teresmarhuni jimboka nóteru májkueni jámasïngia eska antesi. Ka asta imeeri familiarhu anapuechaksï teresmarhuati jimboka jorhenguarhixaka Biblieri ambe. Kánikua jukaparhakuesti eskari uandontskuarhekuaka íri ambe ante de no sési kánhani jimboka ísï tʼuini míteakia ambe úni ka ambe uandani.

15. ¿Ambe uaa jarhuatani jorhenguarhirini ma engaksï imeeri familiariicha no sési kámani jauaka?

¹⁵ Enga jorhenguarhiri no sési kánhani jaka, jarhuata je exeni andiksïsï imeeri parientiicha ikiani jaki enga ima testiguecha jingoni jorhenguarhini jaka. Jamberiksï parienticha eratsejti eskaksï Jeobaeri testiguecha chkuanderakua ambe jorhentpisïnga o eska no ambarhati kʼuiripueska. Jesúsijtu sáno májkueni ambe nitamakuarhispti, asta máru imeeri familiarichaksï jamberi eratsespti eska ima loku úkuarhispkia (Mar. 3:21; Juanu 7:5). Ísï jimbo, jukaparhakuesti eska jorhenguarhiri jorhenguarhiaka tekaantstini ka iáminduechani iatsitakuarhu uandontskuarhekuani, asta imeeri familiariichani.

16. ¿Ambechi uaa úni paraka jorhenguarhiri iatsitakuarhu uandontskuarhekuaka máteruechani Biblieri ambe?

¹⁶ Jiájkani ¿ambe uaa úni Biblieri jorhenguarhiri ma enga imeeri familiari ma uékaka sánderu ambe míteni Biblieri ambe? No jatsisti para jukari uánikua ambe jorhentpini Biblieri ambe para no kuatajpini ka tátsekua nóteru ambe ma uékania míteni. Ísï jimbo, uaakajtsï arhini eska sántku ambe uandontskuarhekuaka ka imani ambe enga no xáni úkua jukaaka kurhanguni. Enga ísï uaaka, familiari máteru uelta jimbo uékaati sánderu ambe jorhenguarhini Biblieri ambe (Kol. 4:6). Jorhenguarhiri ístu uaati arhiani imeeri familiariichani eskaksï uaaka inchani pájinarhu jw.org jimbo ka jirinhantani Jeobaeri testiguecheeri ambe engaksï uékaaka sánderu ambe míteni.

17. ¿Nénajtsï uaa jorhendani jorhenguarhini paraka ima uaaka mókuntani engaksï kurhamarhini jauaka Jeobaeri testiguecheeri ambe? (Ístu exe je imajenini).

¹⁷ Uaakari úrani partini “Kurhamarhikuecha engaksï sánderu úkuarhijka Jeobaeri testiguecheri” enga jw.org jimbo jaka parari jorhendani jorhenguarhirini mókuantani kurhamarhikuechani engaksï familiariicha ka ánchikuarhitarhu anapu kompanieruecha úkuauaka (2 Tim. 2:24, 25). Miá eska librurhu Tsípikua jingoni irekua je, mándani jorhenguarhikuarhu rekuadru ma jarhaska enga arhijka: “Máruksï i ambe uandasïndi”. Ísturi uaaka arhini eska ensaiariuaka mókuntskuechani imeeri uandakuecha jingoni. Ka uaakari arhini ambe enga jarhuataaka para ima jorhenguarhini sánderu sési mókuntani. Enga ima ísï úska jarhuataati no chéni uandantani ambe enga jakajkujka.

18. ¿Nénari uaa jarhuatani jorhenguarhirini paraka ima uékaaka ainhpini kúnguarhikua jingoni? (Mateu 10:27).

¹⁸ Jesúsi arhiaspti imeeri chúxapatiichani eskaksï iámindu kʼuiripuechani aianguapiringa ambakiti aianhperakuani (arhinta je Mateu 10:27). Ísï jimbo, enga jorhenguarhiri ueenaska ainhpini kúnguarhikua jingoni, exeati eska Tata Diosï Jeoba jarhuataxaka ka jorhenguarhiati sánderu mintsikani. Ísï jimbo, ¿nénari uaa jarhuatani jorhenguarhirini paraka ima ueraaka ainhpini kúnguarhikua jingoni? Enga jauaka kampania ma para aianhpini, uaakari arhini ambe uétarhisïni úni para publikadorini. Aiangu je eska sánderu fasiliisïnga ueenani ainhpini enga kampania ma jarhajka. Ísturi uaaka arhini eska uaaka matrikularikuarhini para tánguarhikua enga semana jimbo jarhajka. Inde ambe jarhuataati para no chéni aianhpini.

XARHATAKU ESKARI MINTSIKASÏNGA

19. ¿Jesúsi néna xarhatakuaspi imeeri chúxapatiichani eska mintsinharhiasïreenga ka nénachi uaa juchajtu májkueni úni?

¹⁹ Ante de Jesúsi uándikunhani ka auandarhu nirani arhiaspti imeeri chúxapatiichani eskaksï ménderu imani jingoni japiringa. Jiáni, imaksï no kurhanguxapti eska Jesúsi arhiaxapka eskaksï imani jingoni nipiringa auandarhu. Nájkirukaksï Jesúsiiri chúxapatiicha no iámu ambe kurhanguenga, ima seguru jarhaspti eskaksï imeecha uékasïreenga jaiapanherantani Tata Diosï Jeobani (Juanu 14:1-5, 8). Jesúsi mítesti eskaksï tiempu uétarhinchasïreenga paraksï kurhanguni máru ambe, komu pori ejemplu, eskaksï auandarhu nipiringa irekani (Juanu 16:12). Juchajtuchi uaaka xarhatakuni jorhenguarhirini eskachi mintsikasïnga ka eskachi exesïnga eska uékasïnga marhuakuni Tata Diosï Jeobani.

20. ¿Néna xarhatakuspi Malaui anapu pirenchi ma jorhenguarhiri eska mintsinharhisïreenga?

²⁰ Jukaparhakuesti eskachi mintsikaaka eska jorhenguarhiri uéksïnga imani ambe úni enga sési jaka. Malaui anapu pirenchi ma enga Chifundo arhinhajka, ueenaspti jorhendani Alinafeni Biblieri ambe, uátsïni ma enga katolikeepka. Engaksï jorhenguarhikua 14 jimbo japkia librueri Tsípikua jingoni ireka je, Chifundo kurhamarhispti Alinafeni sini sési japi úrani imajeniichani para Tata Diosïni kómarhini. Alinafe ikiaspti ka arhispti: “Jísïni jatsika parani erakukuarhini sini úraaua imajeniichani o nómbe”. Jimbosï Chifundo eratsepti eska jamberi nóteru uékapiringia jorhenguarhini, joperu no kuatantaspti ka seguiriispti jorhendani jimboka mintsikasïrenga eska ima tiempu jingoni, kurhangupiringa eska no sési jarhaska imajeniichani úrani. Jimbosï máru mesiichani tátsekua, Chifundo arini ambe kurhamarhipti enga jorhenguarhikua 34 jimbo jaka: “¿Nénaksïni jarhuataskia asta iásï jamberi Bibliaeri ambe jorhenguarhini ka sánderu sési míteni Jeobani, enga Tata Diosï jurhimbitiika?”. Chifundo uandantasïndi eska Alinafe sési jásï ambe uandaspka ka ma ambe enga uandapka jindeesti eskaksï Jeobaeri testiguecha no úsïnga imani ambe enga Biblia uandajka eska no sési jarhaska. Tátsekua Alinafe nóteru úraastia imajeniicha ka úsptia itsï atakuarhini.

21. ¿Ambechi uaa úni para jarhuatani jorhenguarhirini ma para niárani marhuakuni Tata Diosï Jeobani?

²¹ Ísïisti, Tata Diosïjkusï újti eska kʼéaka o eska nema niáraaka marhuakuni, joperu juchajtuchi uaaka jarhuajpeni paraka jorhenguarhiri marhuakuaka Tata Diosï Jeobani (1 Kor. 3:7). Jimbochisï no solu jorhendaajka imani ambe enga Tata Diosï uéjka eskachi uaaka, sino ístu eskaksï kánikua xénchaaka Tata Diosïni. Ístuchi jorhendaasïnga eska inde uékperakua jarhuatauaka orheta peerani Tata Diosï Jeobani, ka mintsikani Tata Diosï Jeobani jiáni engaksï no sési ambe nitamakuarhini jauaka. Engachi xarhatakujka jorhenguarhirini eskachi mintsinharhisïnga, jarhuatani jarhasïngachi paraka imajtu mintsikaaka eska uaaka marhuakuni Tata Diosï Jeobani.