Ambe enga kurhanguarhijka ima enga arhintajka

¿Na jatini jamberichi aianhpia ambakiti aianhperakuani?

Jesúsi uandaspti: “Ka ambakiti aianhperakua Tata Diosïiri Reinueri, iámu parhakpinirhu uandanhantaati paraksï iámindu ireteecha mítetini jarhani ka jimajkani kʼamajkunhaati parhakpini” (Mat. 24:14). Ini bersikulurhu ka ístu 6 ka 13 jimbo, uandakua télos ísï tradusirikuarhisïndi “kʼamajkunhaati parhakpini”. Ka i ambe imanisï arhikuekajti enga mátirku kʼamajkunhaaka Satanásiiri parhakpinini Armajedonirhu (Apok. 16:14, 16). Ísï jimbo, seguiriini jauakachi uandantani ambakiti aianhperakuani asta sanititu antesi jamberi enga mátirku kʼamajkunhaaka parhakpini. Ka i, ambe máesti engachi iásï sánderu sési kurhangujkia.

Asta iásï jamberi ísïchi kurhangusïreenga eskachi nóteru aianhpepiringia ambakiti aianhperakuani enga na kʼamajkunhapiringia k’éri Babilonia ka enga na ueenapiringia kʼuiripu kánikua no sési nitamakuarhini (Apok. 17:3, 5, 15, 16). Ísïchi jakajkusïreenga eska Tata Diosï Jeoba nóteru jurajkuapiringia kʼuiripuechani paraksï kurhaani ambakiti aianhperakuani imani tiempu jimbo engaksï kʼuiripuecha ueenapiringa kánikua no sési nitamakuarhini (Is. 61:2). Ístuchi eratsesïreenga eska ima kʼuiripuecha engaksï no méni jurajkupiringa Tata Diosï Jeobani, eskaksï imeechajku tsípiti pakarapiringa imani tiempuni engaksï kʼuiripuecha kánikua no sési nitamakuarhiaka. Ka ísïchi uandasïreenga eskaksï imeecha ísïipiringa eska ima judiuecha engaksï tsípiti pakarapka jiáni enga Jerusaléni kʼamajkunhapka uéxurhini 607 jimbo, jimbokaksï iicha t’uini mínda ma jatsikunhaspkia tsʼérukuarhu jimbokaksï Tata Diosï Jeobani marhuakusïreenga ka nóksï no sési ambe úni (Ezeq. 5:11; 9:4). Joperu ambe engachi ióntki jakajkuenga no terukuntasïndi imani ambe jingoni enga Jesúsi uandapka ixú Mateu 24:14 jimbo, jimboka i bersikulu xarhatasïnga eskaksï kʼuiripuecha útasï uaaka jiókuarhini ambakiti aianhperakua ante de mátirku kʼamajkunhani Noambakitiiri parhakpini Armajedonirhu.

Ambe enga uandajka Mateu 24:14 úsïndi eskachi sánderu sési kurhanguaka Apokalipsisi 16:21, enga xanuateeri ambe uandajka enga ísï kʼénharhika komueska tsakapu. ¿Andichisï ísï uandajki? Jimboka apostoli Pablu karaspka eska para ima kʼuiripuecha engaksï “imani xanharu jimbo nirani jaka nani engaksï pʼímutanhantaaka”, ambakiti aianhperakua ‘ísïiska enajkiksï tsípikuani sïpiruni jaki’. Joperu, para imeecha engaksï ikiakujka Tata Diosïni, ‘ísïisti komueskaksï uarhikuani sïpiruni jarhani’ (2 Kor. 2:15, 16). I k’uiripuechaksï no jaiapanhentasïndi ambakiti aianhperakuani, jimboka i ambe xarhatasïnga eska parhakpinirhu Satanási juramuxaka ka eska no ióni jimbo kʼamajkunhaaka, ísï jimbo, i tsimani tekstuechaksï xarhatasïndi na engaksï jiókuarhipiringa kʼuiripuecha ambakiti aianhperakuani (Juanu 7:7; 1 Juanu 2:17; 5:19).

Joperu ístu, Apokalipsisi 16:21 uandasïndi eska aianhpikua ísïiuaka eska k’éri xanuata. Jimboka jiáni enga kʼuiripu ueenaaka no sési nitamakuarhini, peekachi jatsiaka para kʼuiripuni mátirku aianguni sini erakukuarhia tsípiti pakarani o no ambe. Ka i marhuauati parakaksï uánikua kʼuiripuecha míteaka Tata Diosïiri nombrini (Ezeq. 39:7). ¿Arhikuekasïni i ambe eska jiáni enga na kʼamajkunhakia k’éri Babilonia jauakaksï útasï kʼuiripuecha engaksï ísï exeaka aianhpikuani komueska pʼuntsumikua enga sési jájkundejka ka uékanksï sánderu ambe míteni? Peeka jo. Jamberiksï miántaati oksï jiáni míteni eskaksï Jeobaeri testiguecha ióni aianhpispka eskaksï relijioni no jurhimbitiicha kʼamajkunhapiringa.

Sáno májkueni ambe úkuarhispti Ejiptu engaksï na nitamapkia 10 plaguecha. Ísï tátsekua enga Tata Diosï Jeoba na kastigariuapkia “Ejiptu anapu diosïichani”, “uánikua kʼuiripuecha engaksï no israeliteepka” kurhisptiksï Tata Diosïiri iretani (Éx. 12:12, 37, 38). Jamberi ima engaksï no israeliteepka niáraptiksï mintsikani Tata Diosï Jeoba jimbokaksï exespka eskaksï ima 10 plaguecha enga Moisési uandaapka niáraspkaksï ísï úkuarhini.

Náki uéjki kʼuiripu enga Tata Diosï Jeobani mintsikaaka ísï tátsekua enga na kʼamajkunhakia k’éri Babilonia jatsiati sésikua para ísï exenhani komueska karichi ma ka para jarhuataani Kristueri ermanu jémbeechani engaksï útasï Echerirhu jauaka (Mat. 25:34-36, 40). Inde tiempu engaksï kʼuiripuecha útasteru uaaka ísï exenhani komueska karichiicha jiáni kʼamarhukuati enga na sánderku kueratani jauakia para ueenani Armajedoni, jiáni engaksï últimu erakukateecha auandarhu pánhaaka.

I ambe engachi iásï sánderu sési kurhangukia xarhatasïndi na enga Tata Diosï Jeoba xáni xénchpejka ka pʼamojpeni. Jo, ima ‘no uékasïndi eska nema kʼamajkunhaaka’ sino eskaksï iámindu kʼuiripuecha móantaaka (2 Ped. 3:9).