Politikeri uarhiperata | ⁠¿Ambe uandasïni Biblia?

Sánderu uarhiperanhaxati juramutiiri ánchikuarhiriichani jingoni.

¿Andiksïsï politikuecha xáni uarhiperajki? ¿Niára kʼamakurhini ménisï? ¿Ambe uandasïni Biblia?

Biblia uandasptia eska politikuecha no téroamberapiringa

Biblia uandasptia eska juchaari jurhiatikuecha jimbo, enga ísï mítekateeka komu “últimu jurhiatikuechani jimbo” uánikua k’uiripuechaksï uarhipeni uékapirini ka nóksï nani máru uékaati kurhanguni.

• “Últimu jurhiatikuechani jimbo kánikua no sési jánhaskuarhiaka ka eska kánikua úkua jukaaka. Jimbokaksï kʼuiripuecha jandiajkumindu xénchakuarhiaka, [...] nóksï diosmaiamukua arhijpiati, ka jurajpinksï jámaati, [...] nóksï nani máru uékaati kurhanguni, [...] no sésiksï jámaati, [...] nóteruksï mintsinharhikueuatia ka inchandimeatiksï, kʼéramakuarhiatiksï” (2 Timoteu 3:1-4).

Ístu, Biblia uandaspti eskaksï japiringa marcheecha jimbokaksï no jaiapanhentasïnga ambe enga juramutiicha úni jaka, sánderu úkuarhini japiringa juchaari jurhiatikuecha jimbo (Lukasï 21:9). Ka i uarhiperata ambe ka enga juramutiicha no téroamberajka niáraaka kʼamakurhini.

Kʼamakurhiati politikuecheeri uarhiperata

Biblia uandasïndi eska Tata Diosï kénditaati kʼuiripuecha juramukuani ka juaati imeeri juramukuani.

• “Tata Diosï auandarhu anapu, gobiernu ma uaxastaati enga no méni kʼamajkunhaaka ka no jindeuati para máteru ireta. I gobiernu purundurhiauati ka kʼamajkuauati iámindu ini gobiernuechani, ka íjkusï jauati para méntkisï” (Daniel 2:44).

Tata Diosïiri Reinu uaati eska jauaka sési jimbo pínandikua iámu parhakpinirhu.

• Biblia uandasïndi Jesukristueri “Juramuti Pínandikueri,” ima uaati eska “méntkisï pínandikua jauaka” (Isaías 9:6, 7).

• Ini jurhiatikuecha jimbo, imeecha engaksï uéjka inde Reinu irekani jorhenguarhixatiksïa pínandikua jatsini. Biblia uandasïndi inde kʼuiripuecheeri: “Jatsiatiksï para imeecheeri uarhiperatarakuechani tarherakua uántanksï ka imeecheeri lansechani uarhotatarhakua uántani, ireta ma no uarhiperaati máteru ireta jingoni, niteruksï jorhenguarhiaia uarhiperani” (Isaías 2:3, 4).

Para sánderu ambe míteni, arhinta je artikuluni “¿Qué cosas logrará el Reino de Dios?” ka exe je bideuni ¿Ambeski Tata Diosïri Reinu?