¿Meru jarhaski Tata Diosï ma?

Ambe enga Biblia uandajka

Bibliarhu uánikua ambe uandasïndi engajtsïni xarhatachejka eska Tata Diosï jarhaska. Ístu, Bibliajtsïni arhisïndi eska parachi úni mintsikani Tata Diosïni, jatsiskachi para sési eratsentani ka no imani ambejku jakajkuni ambe engaksï relijionicha uandajka (Roma 12:1; 1 Juanu 5:20). Ju je exeni máru ambe enga Biblia arhijka engajtsïni xarhatachejka eska Tata Diosï jarhaska.

• Exesïngachi eska jarhaska Kueraajpiri ma jimboka auandarhu ka Echerirhu iámindu ambe sési úkata jarhaska ka úsïngachi irekani. Biblia uandasïndi: “Jimboka iámindu k’umanchikuecha úkata jarhasïnga nemani jimbo, peru ima enga kueraaka iámindu ambeeni, jindeesti Diosï” (Ebreu 3:4). Máruksï úpirindi uandani eska i ambe ísku ambeeska, joperu uánikua k’uiripuecha engaksï kánikua jorhenaka, jakajkusïndiksï eska ísïiska eska Biblia na uandajka.a

• Iáminduechachi uékasïnga míteni para ambechi kueraanhaski ka engachi no niáraska kurhanguni i ambe, nóchi úsïnga meru tsípikua jingoni irekani. Uékani míteni i ambe, sánderu jukaparhakuesti eska uékani jatsini ambe engachi uétarhinchajka para irekani. Biblia uandasïndi eska i ambe ísïiska komueska k’arhimani jarhani, joperu no t’irekueri ambe sino para jorhenguarhini Tata Diosïri ambe ka k’éri ambe arhini (Mateu 4:4; Jaŋaskuecha 4:11). Uékani míteni i ambe, xarhatachesïndijtsïni eska jarhaska Tata Diosï uékpiti ma engajtsïni kueraaka parachi úni míteni imani ka únchi tsípikua jingoni irekani.

• Uánikua profesiecha enga Biblia uandaajka, niárastiksï ísïmindu úkuarhini nájkirukaksï uánikua uéxurhini antesi karakuarhipka. Míteni eskaksï i profesiecha niáraspka ísïmindu úkuarhini eska na karakata japka, xarhatasïndi eska no k’uiripuechaksïsï kararkuarhiapka (2 Pedru 1:21).

• 

  Ima engaksï Bibliani karapka, siensieri ambeksï mítespti enga jiánisï no mítekuarhipka. Pori ejemplu, máru k’uiripuechaksï ióntki anapu uandasïrendi eska Echeri, elefante ma jimbo jarhaspka, jabalí ma jimbo, toru ma o máteru animali jimbo. Joperu Biblia uandasïndi eska Tata Diosï “no ma ambe jimbo tirhipas[ka] echerini” (Job 26:7). Ístu, para uandani na enga jásïika Echeri, Biblia uandasïndi eska uirhipitiska (Isaías 40:22). Uánikua k’uiripu eratsesïndi eska ima acheeticha engaksï Bibliani karapka úspkaksï míteni iámindu indeni ambe jimboka Tata Diosï mítitaraaspka.

• Biblia mókuantasïndi uánikua kurhamarhikuecha engaksï úkuarhijka imeecha engaksï no jakajkujka Tata Diosïni. Pori ejemplu ícha: Enga Tata Diosï xáni uékpitika ka uinhapitiini, ¿andisï kómu nitamakua ambe jaki ka xáni no sési ambe úkuarhini? ¿Andiksïsï ménisï relijionicha újki eska no sési ambe úkuarhiaka? (Titu 1:16). Na enga Biblia mókuantajka i ka máteru kurhamarhikuechani, uaati jarhuatani imeechani engaksï no jakajkujka Tata Diosïni.