¿Arhiasïnksï Jeobaeri testiguecha kʼuiripuechani eskaksï mójtakuaka imecheri relijionini?
Nómbe, nóksï nemani arhiasïndi eskaksï jurajkuaka imecheri relijionini. Rebista La Atalaya engachi jucha sánderu úrajka, uandasti: “No sési jarhasti afuersa úni eska nema jurajkuaka imeri relijionini”.a Ka nochi ísï úsïnga ini ambe jimbo:
Jesusi no méni ústi eskaksï afuersa jakajkupiringa ambe enga ima jorhentpienga. Ima mítispti eskaksï uánikuecha no jiókuarhipiringa ambe enga ima jorhentpienga (Mateu 7:13, 14). Ma xanhari, engaksï máru imeri jorhenguarhiticha jurajkupka jimbokaksï no jiókuarhispka ambe enga ima jorhentpini japka, ima jurajkuaspti paraksï níntani, no úspti eskaksï afuersa pakarapiringa (Juanu 6:60-62, 66-68).
Jesusi jorhendaspti imeri jorhenguarhitichani eskaksï no jámapiringa afuersa úni eskaksï kʼuiripuecha jurajkuapiringa imecheri jakajkukuechani. Sánderu sési, imechaksï jatsispti para jánguarhintani imechani jirinhani engaksï uékapiringa kurhajchaani (Mateu 10:7, 11-14).
No ma ambe jimbo marhuasïndi úni eska nema afuersa mójtakuaka imeri relijionini. Tata Diosï uékasïndi eskaksï mintsita jingoni marhuakuaka ka no jimboka nema afuersa úska eskaksï marhuakuaka (Deuteronomio 6:4, 5; Mateu 22:37, 38).
¿Uékasïnksï Jeobaeri testiguecha afuersa disipulu uáni?
Ísïsti eskachi jucha etsakunixaka ambe enga Biblia uandajka “iápuru parhakpinirhu asta jima enga sánderu iauanika” ka eskachi úsïnga i ambe iápurisï asta “kʼumanchikuecharhu”, eska na uandajka Biblia (Ukuecha 1:8; 10:42; 20:20). Májkueni eskaksï na úka primeru kristianuecha jingoni, ménisïchi arhinhasïnga eskachi jucha afuersa úsïnga eskaksï kʼuiripuecha inchaaka juchari relijionirhu (Ukuecha 18:12, 13). Peru i ambe no ísïsti. Respetarisïngachi ambe engaksï máteruecha uékaaka jakajkuni. Ambe engachi jucha uékajka jindesti eskaksï kʼuiripuecha mítiaka ambe enga Biblia uandajka parakaksï uáka erakuni náki relijionini jatsini.
Nochi méni úsïnga eska nema afuersa jakajkuaka ambe engachi jucha jakajkujka. Nójtuchi úrasïnga relijionini parachi politikaeri ambe uandani, nichi aiatspini tumina o jarhuajperata ambe parakaksï kʼuiripuecha Jeobaeri testigu úkuarhiaka. Nochi ísïska eska imecha engaksï uandajka eskaksï kristianueska peru engaksï no újka ambe enga Kristu jorhentpika.b
¿Uá kʼuiripu ma jandiajku erakuni mójtakuni relijionini?
Profeta Abraani jurajkusti tátembecheri relijionini
Biblia xarhatasïndi eska jo, jimboka uánikua ejempluechani jataaska kʼuiripuecheri engaksï jurajkuka tátembecheri relijionini paraksï úni Tata Diosï jurhimbitini marhuakuni. Ísï ústi Ruti, Abraani, máru Atenas anapuecha ka apostuli Pablu (Josué 24:2; Rut 1:14-16; Ukuecha 17:22, 30-34; Galasia 1:14, 23). Ístu, Biblia uandasïndi eska enga nema uékaaka uáti no sési erakuni ka jurajkuni relijionini enga Tata Diosï jeiapanhintajka (1 Juanu 2:19).
La Declaración Universal de Derechos Humanos, enga seguni ONU jindeeka “nani enga uaxastakata jaka iámu parhakpinirhu na engaksï jatsika para kánhani kʼuiripuecha”, uandasïndi eskachi iámindu “uáka erakukuarheni mójtakuani juchari jakajkukuechani o relijionini”. Ístu uandasïndi eskaksï iáminduecha uáka inbestigarini, jiókuarhini ka etsakuni informasioni ka ambe engaksï eratsijka. Ka ístu ixú inchasïndi relijioniri ambe.c Peru, jatsini ini sésikuani ístu arhikuekasïndi eska ma jatsiska para jiókuarhini eskaksï máteruechajtu uáka kuájpiani imecheri jakajkukuechani ka engaksï uékaaka no jiókuarhini ambe engachi jucha jakajkujka.
¿No sési pakatasïni familiani enga nema mójtakujka relijionini?
No méntkisï. Biblia uandasïndi eskachi jatsiska para iáminduechani respetariuani, no arhiparini náki uéjkiksï relijioni jatsini (1 Pedru 2:17). Ka ístu Jeobaeri testiguechachi kurhajchasïnga juramukuani enga uandajka eskachi jatsiska para respetariani juchari tátichani, nájtukaksï i, máteru relijioni jatsiaka (Efesu 6:2, 3).
Peru no iáminduechaksï jiókuarhisïndi ambe enga Biblia uandajka. Uarhiiti ma enga Zambia kʼuiripeka, uandasïndi: “Juchiti iretarhu, mójtakuni relijionini, jindespti [...] nóteru jaiapanhintania familiani ka ni iretani”. Peru enga uátsïpka, úndaspti Bibliaeri ambe jorhenguarhini Jeobaeri testiguecha jingoni, ka mójtakuspti imeri relijionini. Ima uandasïndi: “Juchiti tátichajtsïni mémindu arhispti eskaksï ikiaxapka jindeni jingoni, ka eskajtsïni nóteru mintsikasïrengia. I ambe kánikuarini úkua jukachispti, jimbokani ji kánikua jukaparharasïrenga, eskajtsïni juchiti táticha jeiapanhintapiringa. [...] Sánderu jeiapanhintani Tata Diosïni ka eska relijionirhu anapu pʼindekuechani, no arhikuekasïndi eska ma nóteru jeiapanhintasïngia familiani”.d
a Exe je La Atalaya 1 de eneru 2002, pájina 12, párrafu 15.
b Ejemplu ma jindesti eska uéxurhini 785 ísï, rei Carlomagno juramukua ma uaxastaspti enga uandaenga eska uándikunhapiringa ima enga rejioni Sajonia ísï irekapiringa, enga no uékapiringa itsï atakuarhini komueska katoliku. Máteru ejemplu jindesti inde enga arhinhaenga Paz de Augsburgo, tratadu ma enga 1555 jimbo firmarikuarhipka tsimani grupuecha jimbo engaksï uarhiperani japka jini Sacro Imperio Romano. Indeni trataduni jimboksï uandasïndi eska mándani grupueri prinsipi tsimani ambejku úpiringa úni: katolikueni o luteranu. Ka prinsipiri marhuarichaksï jatsispti para imani relijionini jiókuarhini, enga ima erakupiringa. Engaksï no uékapiringa ísï úni, jatsisptiksï para jurajkuni imani echerini
c Inde jásï sésikuani xarharasïndi ini dokumentuechani jimbo la Carta Africana de Derechos Humanos y de los Pueblos, la Declaración Americana de los Derechos y Deberes del Hombre, la Carta Árabe de Derechos Humanos de 2004, la Declaración de Derechos Humanos de la Asociación de Naciones del Sudeste Asiático, el Convenio Europeo de Derechos Humanos ka el Pacto Internacional de Derechos Civiles y Políticos. Peru no iámindu paisichaksï jánguarhintasïndi ísï respetariauani sésikuechani engaksï kʼuiripuecha jatsiajka.
d Biblia uandasïndi eska Tata Diosïri arhinhakua jindeska Jeoba.