¿Iámindu uandanhiatecha engaksï jaka sentabu jimboesïni?
Ambe enga Biblia uandajka
Nómbe. Biblia no uandasïndi eska sentabu no sésiiska ka ni eska iámindu no sési jásï ambe enga úkuarhijka sentabu jimboesïnga. Jarhasti refrani ma enga uandajka “Sentabusï újti eska no sési jásï ambe jauaka”, ka kʼuiripuechaksï uandasïndi eska i refrani Bibliarhu pʼitakateeska. Peru, ¿ísïiski i ambe? Nómbe. Bibliarhu arhisïndi: “Jukari sentabu tsitini úsïndi eska nema ueenaaka no sési ambe niátani” (1 Timoteo 6:10).
¿Ambe uandasïni Biblia sentabueri ambe?
Biblia arhisïndi eskajtsïni sentabu uaaka jarhuatani ka asta kuájchakuni, engachi sési úraska. (Eclesiastés 7:12). Ístu, sési ambe uandasïndi ima kʼuiripuecheri engaksï sési ambe újka ka jarhuajpeni sentabu jingoni (Proverbios 11:25).
Joperu, jingontku je, Bibliajtsïni miátantasïndi eskachi no jatsiska para jukari jukaparharani sentabuni juchaari irekuarhu. Ebreu 13:5 arhisïndi “Asï jáma je jatsikuarhekuekani, sino tsípi je indeni ambe jingoni engajtsï jatsika”. ¿Ambejtsïni jorhendasïni i ambe? Eskachi jatsiska para sési úrani sentabuni ka no xáni jukaparharani. Ambe engachi uaaka úni, jindeesti sési pʼikuarherani engachi jatsiaka imani ambe engachi meru uétarhinchajka, komu: tʼirekua, xukuparhakua ka nani irekani (1 Timoteo 6:8).
¿Nénajtsïni uaa no sési úchini engachi jukari tsitiaka sentabuni?
Ima kʼuiripu enga jukari tsitijka sentabuni no jatsiati tsípikua para méntkisï (Efesu 5:5). Uénani jámani, jimboka jukari tsitini sentabu, ísïiska komueska idoluechani kómarhiani o no ísï kómarhini jarhani Tata Diosïni eska ima na uékajka (Kolosasi 3:5). Tsimani úni jámani, paraksï jatsini ambe engaksï xáni tsitijka, niárasïndiksï nóteru kurhajchaania Tata Diosïri juramukuechani. Ka Proverbios 28:20 arhisïndi “ima enga uéjka sóntku riku úkuarhini niáraati kastigarinhani”. Jamberiksï niáraati fraudi ambe úni, no sési ambe niátani para úni euakuarpini o asta jimeesïsï inchamukuni para nemani sekuestrarini o uándikuni.
Ka nájkirukachi no no sési ambe uaaka, jukari tsitini sentabuni, uaati eskachi uánikua uandanhiatechani jatsiauaka. Biblia uandasïndi: “Imeecha engaksï jánguarhintani jaka jatsikuarherini, méntkuksï tsʼéjkunhani jarhasïndi ka ísïksï nirasïndi enajkiksï sïndari ma jingoni jupinha. Ka no sési nikuasïndi jimbokaksï ísku ambe ma tsitisïnga ka enga no sési útspijka, ka inde ambe úsïndi eskaksï no sési nitamakuarhiaka ka eskaksï uarhiaka” (1 Timoteo 6:9).
Na engajtsïni marhuachejka ísï úni eska Biblia na uandajka
Engachi imani ambe úska enga Tata Diosï jaiapanhentajka ka nóchi úni imani ambe engachi míteka eska no sési jarhaska para sentabu jatsini, ísïchi mítekateuaka komueska kʼuiripu ma enga jurhimbitku jámasïnga ka sésichi pʼikuastaaka Tata Diosïni. Ka engachi méntkisï jánguarhintaska ísï úni eska ima na uandajka, imajtsïni aiachisïndi: ‘Jíkeni no méni késtakucheaka ka nijtukini méni jurajkua jandiajku’ (Ebreu 13:5, 6). Ístu uandasïndi: “Kʼuiripu enga jurhimbitku jámajka uánikua kóntperatechani intsïnhauati” (Proverbios 28:20).