Nénachi niáraski jatsini Biblia

Kʼéri ma milagruesti enga Biblia asta iásï jamberi jaka ka engachi újka arhintani. Jukari mili nobesientosi uéxurhini ísïistia enga kʼamaraka karanhani ka ima ambe úranhasti para karani enga niárajka kʼamakurhini (komu papiru enga úkata japka papirueri tepakua jingoni ka pergaminu enga sïkuiriri animali jingoni úkata japka) ka ístu imani idiomecha jimbo karanhaspti enga iásï namunituterkuksï uandajkia. Ístu, máru achamasïcha engaksï kánikua juramukua jatsipka, desde emperadoricha asta máru relijioniri orhejtsïkutichaksï kánikua jánguarhintaspti para kʼamajkuni Bibliani.

¿NÉNA úski i libru asta iásï jamberi jarhani ka eskaksï iásï jamberi xáni uánikua kʼuiripuecha uaaka arhintani? Ju je exeni tsimani ambe.

Uánikua kopiechaksï únhasti ima karakatecheri

Israelitechaksï kánikua sési kuájchakuaspti orheta Biblieri anapu karakatechani ka uánikua kopiechaksï uaaspti. Pori ejemplu, reichaksï arhinhaspti eskaksï jatsispka para kopia ma karakuarhini ima leiri engaksï saserdoti lebitecha patsenga (Deuteronomio 17:18).

Uánikua israelitechaksï tsitisïreendi arhiantani Karakatechani, jimbokaksï ísï exeasïreenga komu Tata Diosïri Uandakua; jimboksïsï máru kararicha engaksï sési jorhendakata japka jánguarhintapti xáni sési kopiariuani. Esdrasi, karari ma enga janhanharhienga Tata Diosïni, mítekatespti jimboka sési kopiarisïrenga imani leini enga Jeoba israelitechani íntsaapka Moisésini jimbo (Esdras 7:6). Masoretecha engaksï kopiariuapka Karakata Ebreaechani (Antiguo Testamento) uéxurhinicha 500 ka 900 ísï, imeechaksï asta miuasïreendi letrechani paraksï no támisï karani ambe ma. Jimbokaksï ima xáni jánguarhintapka sési kopiarini karakatechani, Biblia asta iásï jamberi jarhasti nájkirukaksï uánikuecha jánguarhintapka kʼamajkuni.

Pori ejemplu, jukari 150 uéxurhinisï ante de Jesúsi, Siria anapu juramuti ma kánikua jánguarhintaspti kámajkuani iámindu kopiechani Karakata Ebreaecheri jini Palestina. Judiuecheri uandantskua ma uandasïndi: “Karukuasptiksï ka kurhiraasptiksï iámindu leiri karakatechani engaksï exeantapka”. The Jewish Encyclopedia uandasïndi: “Ofisialichaksï kánikua jánguarhintaspti paraksï ísï úni eskaksï na arhihapka. Uándikusïrendiksï nemani enga jatsipiringa Tata Diosïri karakatani”. Peru nájkirukaksï ísï jámapka, Palestina ka máteru nanisï, judiuecha ka máteruechaksï úspti patsani máru Karakatecheri kopiechani.

Sánisï tátsekua engaksï Karakata Griegecha (Nuevo Testamento) kʼamaranhapkia karanhani uánikua kopiechaksï jarhasptia ima karakatecheri, profesiecheri ka ambe enga xáni Tata Diosï kararkuarhipka ima ambeeri enga ióntki úkuarhipka. Pori ejemplu apostoli Juanu karaspti imeeri ebanjeliu jini Éfesu o jima no iauani. Peru jini Egipto enga iauani jaka jima uératini enga Juanu karapka imeeri ebanjeliu, exentasptiksï ma kopia ima karakateri. Imeecha engaksï mítekuka, uandasïndiksï eska ima kopia úkuarhispka menusi de sinkuenta uéxurhinisï tátsekua enga Juanu na kʼamarapkia karani. I ambe xarhataspti eskaksï kristianuecha engaksï máteru paisicha jimbo irekapka nóksï ióni jimbo niáraspka jatsiani kopiechani ima karakatecheri enga Tata Diosï kararkuarhiapka.

Uánikua kʼuiripuechaksï kámasïreendi kopia ma Tata Diosïri karakateri ka i ambe ústi eska útasï japiringa uánikua uéxurhini tátsekua enga Jesúsi na uarhipkia. Pori ejemplu, uandanhasïndi eska 23 de febreru de 303, Roma anapu emperadori Diocleciano exexapti na engaksï imeeri soldaduecha kuáskuani japka iglesiarhu anapu puertechani ka kurhiraanksï Tata Diosïri Karakateri kopiechani. Ima eratsespti eska enga kurhiraapiringa Tata Diosïri Karakateri kopiecha, nóteruksï japiringia kristianuecha, isï jimbo pauandikua uandaspti eskaksï máteruechani japarini kurhiraapiringa Blibliechani iápuru jimeesïsï enga ima juramuenga. Peruksï no úspti iámu exeantani para kurhiraani ka ima karakatecha engaksï no kurhiraapka, marhuasptiksï para sánderu uánikua kopiecha únhani. Por ejemplu, iásï jamberiksï jarhasti kʼérati particha tsimani Bibliecheri engaksï jamberi sánisï tátsekua kopiarinhapka jiáni enga Dioclesiano uékeenga kʼamajkuani. Ma jini Roma jarhasti ka máteru jini Londres, British Libraryrhu.

Ka nájkirukaksï nótki exenhantani jaka ima karakatecha engaksï meru orheta karanhapka, jarhastiksï uánikua kopiecha iámu o ma partiri, Peru, ¿kopiechaksï nóteru májkueni arhisïndia eskaksï orheta karakatecha? W. H. Green enga kánikua míteka Biblieri ambe, i ambe uandaspti Karakata Ebreaecheri: “Uaakachi seguru uandani eska no jarhaska máteru ióntki anapu karakata enga ísï xáni sési kopiarinhaka”. Ka Sir Frederic Kenyon, enga kánikua míteka ióntki anapu karakatecheri ambe, i ambe karaspti Karakata Griegaecheri ambe: “Sánderu ióntki anapu kopiecha engaksï asta iásï jamberi jaka, máru uéxurhinisï tátsekua únhastiksï engaksï orheta Biblieri kararicha na kʼamarapkia karani. Jimbochisï újka seguru jarhani eska Biblia engachi iásï jatsika, ísïmindu uandasïnga eska jiáni enga ueenakuarhu karanhapka. Peru nóchi uaaka májkueni uandani máteru ióntki anapu libruecheri ambe”.

Máteru idiomecha jimbo tradusirinhasti

Máteru ambe enga úka eska Biblia sánderu mítekatepiringa, jindeesti jimboka uánikua idiomecha jimbo tradusirinhaska. I ambe xarhatasïndi eska Tata Diosï uékasïnga eskaksï iápurisï anapu kʼuiripuecha ka náki uéjki idiomaksï uandani kómarhiaka imani ísï “eska espiritu na arhiauaka ka jurhimbikua jingoni” (Juanu 4:​23, 24 TNM; Miqueas 4:2).

Primeru traduksioni enga mítekuarhika eska úkuarhiska Karakata Ebreaecheri, jindeesti traduksioni griegu jimbo enga ísï mítekateka komu Septuaginta jarhaska. Imeecha engaksï tradusirika jindeesptiksï judiuecha engaksï griegu uandeenga ka engaksï no Palestina irekapka. Ka kʼamarasptiksï ma dosientu uéxurhinisï ante de Jesúsi irekani ixú echerirhu. Iámu Biblia ka sánderia Karakata Griegaecha, tradusirinhastiksï uánikua idiomecha jimbo máru uéxurhinicha tátsekua enga na kʼamaranhapkia karanhani. Peru tátsekua, enbesi deksï jarhuataani kʼuiripuechani parakaksï arhintapiringa Tata Diosïri Karakatani, máru reicha ka relijioniri orhejtsïkutichaksï jánguarhintaspti parakaksï kʼuiripuecha no jatsipiringa Biblia ma. No nemanksï jurajkuspti para Bibliani tradusirini imani idiomecha jimbo enga sánderu uandanheenga jimbokaksï no uékasïreenga eskaksï kʼuiripuecha jorhenguarhipiringa jurhimbikua ambe Tata Diosïri.

Nájkiruka iglesia ka juramutichaksï no uékeenga, máru acheeticha engaksï no chépka, tradusirisptiksï Biblia imani idiomecha jimbo enga sánderu uandanheenga, mítiparini eskaksï úpiringa uándikunhani. Pori ejemplu, William Tyndale acheeti ma enga Inglaterra anapuepka ka enga Oxford estudiaripka, tradusirispti primeru sinku libru Karakata Ebreaecheri ka uéxurhini 1530 jimbo petaspti. Nájkiruka uánikua ikiatspitichani jatsiapka, ima jindeespti primeru kʼuiripu enga inglesi jimbo tradusiripka Bibliani, ebreu uératini. Ístu, ima jindeespti primeru enga úrapka Jeobaeri nombri imeeri traduksionirhu inglesi jimbo. Máteru acheeti jindeespti Casiodoro de Reina, iglesia katolika uékasïreendi uándikuni jimboka tradusirixapka Biblia espanioli jimbo. Ísï jimbo, para úni kʼamarani, máteru nanisï niraspti komu Inglaterra, Alemania, Francia, Holanda ka Suezia.a

Asta iásï jamberi, Biblia útasï tradusirinhaxati uánikua idiomecha jimbo ka méntku imprimirinhaxati uánikua Bibliecha. Enga ísï Biblia útasï jaka ka enga xáni etsakurhikia iámu parhakpinirhu, xarhatasïndi eska ísïiska ambe enga apostoli Pedru karapka Tata Diosïri jarhuajperata jimbo: “Uitsakua xanisïndi ka tsïtsïkicha uarhinksï, peru [Tata] Diosïri uandakua méntkisï jindeesti” (1 Pedru 1:24, 25).

[Nota]

[Rekuadruecha]

¿NÁKI BIBLIANI ERAKUA PARANI ARHINTANI?

Uánikua Biblieri traduksionichaksï jarhasti. Joperu máruksï úrasïndi uandakuecha engaksï iásï nóteru úrakuarhejkia ka engaksï kánikua úkua jukaka para kurhanguni. Máteru traduksionichaksï fásilisti para kurhanguni joperu ima ambe engaksï uandajka no xáni mintsinharhikuesti. Ka jarhastiksï máteru traduksionicha engaksï mándani uandakuani tradusirika ísï eskaksï na arhienga ióntki anapu karakatecha.

Biblia inglesi jimbo Traducción del Nuevo Mundo de las Santas Escrituras engaksï Jeobaeri testiguecha úka, tradusirikata jarhasti úraparini ima ióntki anapu karakatecha engaksï ióntki anapu idiomecha jimbo karakuarhipka, ka imeecha engaksï tradusirika nóksï uékasïndi eska mítekuarhiaka neeskiksï. I traduksioni marhuastia paraksï úni tradusirini máteru 60 idiomecha jimbo. Traduktorichaksï jánguarhintaspti sési exeani karakatechani engaksï idioma orijinalicha jimbo jaka. Biblia Traducción del Nuevo Mundo no úkua jukasti para kurhanguni ka sési terukuntasïndi ióntki anapu karakatecha jingoni engaksï ióntki anapu idiomecha jimbo karakata jaka. Traduktorichaksï uékasïndi eska imeecha engaksï iásï arhintaaka Biblia, uaakaksï fásili kurhanguni májkueni eskaksï na fásili kurhangupka imeecha engaksï arhintapka Biblia jiáni enga karanhapka.

Máru jorhenatichaksï estudiaristia uánikua iásï anapu traduksionicha paraksï exeni sinksï mintsinharhikueski o nómbe. Estados Unidos anapu jorhenati ma, uéxurhini 2003 jimbo petaspti libru ma nani enga terukutantenga nuebe traduksionicha Biblieri inglesi jimbo.b Ima terukutantaspti uánikua Bibliarhu anapu tekstuechani engaksï iásï mámaru tradusirikuarhika. Terukutantaspti ima tekstuecha karakata grieguecha jingoni para exeni sinksï traduktoricha ísï jatsiraspi traduksionirhu eskaksï imeecha na kurhanguenga. ¿Ka ambe uandaspi ima ambeeri enga terukutantapka?

BeDuhn uandasïndi eskaksï uánikua kʼuiripuecha eratsesïnga eska Biblia Traducción del Nuevo Mundo no májkueni uandasïnga eska máteru traduksïonicha jimbokanha imeecha engaksï tradusirika, ísïksï tradusiristi seguni ambe engaksï imeecha jakajkuenga. Joperu BeDuhn uandasïndi eska ísï xarharasïnga enajki ménderueni uandajki jimboka kánikua sési tradusidu jarhaska ka jimboka sési terukuntasïnga idioma orijinalicha jingoni. Ka nájkiruka BeDuhn no káni sési exejka na engaksï tradusidu jaka máru bersikuluecha Bibliarhu Traducción del Nuevo Mundo, ima uandasïndi eska i Biblia jindeeska enga sánderu sési tradusidu jaka ka eska ima máteruecha enga ima terukutantaapka. Ka ístu uandasïndi eska i Biblia jukari ambakiti traduksioni máeska.

Acheeti Benjamin Kedar enga Israel anapueka, kánikua mítesti idioma ebreueri ambe ka uéxurhini 1989 jimbo i ambe uandaspti Biblieri Trducción del Nuevo Mundo: “Ini traduksioni jimbo, sési xarharasïndi na engaksï mintsita jingoni jánguarhintapka sési kurhanguni ka ísïmindu tradusirini eska na jindeeka. [...] Ji no nani exeska eskaksï uékapiringa sikiera sánisï máteru ambe jatsikuni enga no ióntki anapu karakatecharhu jaka”.

Chá kurhamarhikuarhi je: “¿Andisïni uéjki Bibliani arhintani? ¿Uékasïnga Biblia ma enga fásiliuaka para arhintani nájkiruka no xáni mintsinharhikueuaka? ¿O uékasïnga Biblia ma arhintani enga ísïmindu uandaaka eskaksï na uandeenga karakata orijinalicha enga Tata Diosï kararkuarhiapka?” (2 Pedru 1:20, 21). I kurhamarhikuechaksïni uaati jarhuatani parajtsï sési erakuni náki Bibliani arhintani.

[Nota]

[Imajeni]

Biblia Traducción del Nuevo Mundo de las Santas Escrituras tradusidu jarhasti uánikua idiomecha jimbo.

[Imajeni]

Karakata masoretikuecha

[Imajeni]

Ma parti enga jukaka ambe enga arhijka Lukasʌ 12:7, “Asï ché je jimbokajtsï sánderu jukaparhaska chá ka eska uánikua pajaru sapirhaticha”

[Nani enga uéraka ilustrasioni]

Primeru pájina: Biblioteca Nacional de Rusia (San Petersburgo); segundu ka terceru: Bibelmuseum, Münster; sánderu tátsepani: © The Trustees of the Chester Beatty Library (Dublín)