Kurhajchaani chiiti taatiichani ísïisti komueska sentabu kuantpini bankurhu ka méntkisïri íntspintani. Engari sánderu responsabliiska sánderuksïni mintsikaati ka sánderuksïni uékaati kuánetani.
PARA TUMBIICHA
10 Mintsinharhikueni
¿AMBE ARHIKUEKASÏNI?
Ima enga mintsinharhikuejka, janhanharhiasïndi juramukuechani, úsïndi ambe enga aiatspejka ka méntkisï jurhimbitku uandantasïndi. Enga ísï újka, imeeri taatiicha, amiguecha ka imeeri patroniicha mintsinharhisïndiksï.
¿ANDISÏ JUKAPARHAKUE?
Paraksïni sánderu jurajkuni úni ambe ma, jatsiskari para xarhatani eskari mintsinharhikueska.
“Parakaksïni chiiti taatiicha sánderu mintsikaaka, jatsiskari para eratsekua jukarini ka méntkisïri úni ambe engaksïni arhiaka ka no solu jiántku engari imeecha jingoni jauaka” (Sarahi).
BIBLIERI KARAKATA: “Tsʼéjkukuarhi je chájkumindu” (2 Korintu 13:5).
¿AMBERI UAA ÚNI?
Ari konsejuechaksïni jarhuataati paraksïni chiiti taatiicha uaaka ménderu mintsikani o eskaksïni sánderu mintsikaaka.
Asï chkuandera. Engari chkuanderaska, kʼuiripuechaksïni nóteru mintsikaatia. Joperu engari jurhimbitku uandantaska ka jurhimbitku jámani ka sánderu jiáni engari no uaaka sési úni ambe ma, máteruechaksïni niáraati mintsikani.
“No úkua jukasti jurhimbitku uandantani engari tʼu sési uéranchaaka. Joperu engari jurhimbitku uandantaska nájkirukari no sési uéranchaaka inde ambesï újti eskaksïni máteruecha mintsikaaka” (Caiman).
BIBLIERI KARAKATA: “Uékasïngachi iámindu ambe jimbo sési jámani” (Ebreu 13:18).
Responsabliini. Estados Unidos, exenhasti eska 78% ima kʼuiripuecheri engaksï ánchikuarhita íntspijka, exesïndiksï eska “tanimu ambeeri enga sánderu jukaparhakueka para ma ánchikuarhita intsïnhani”, jindeeska eska ma responsabliuaka. Jorhenguarhini responsabliini iásï, kánikuakeni jarhuataati jiáni engari kʼériuakia.
“Juchiiti taatiichaksï kuenta íntskukuarhesïndi eskani responsabliiska engajtsïni no méntku arhini jarhajka ambe engani jatsika para úni. Engani ísï újka imeechajtsïni sánderu mintsikasïndi” (Sarah).
BIBLIERI KARAKATA: “Mintsikaparini eskarini janhanharhiaka [...] seguru jarhaska eskari sánderu jamberi uaaka ka eska engakeni arhikia” (Filemoni 21).
Tekaantskua jatsi. Ma sóntku úsïndi exeni eska tumbi ma kʼéni jarhasïnga, joperu tiempu pásïndi paraksï máteruecha exeni eskaksï tumbiicha eratsekua jukarixakaia ka responsabliinksï.
“Nóri uaaka úni eskaksïni chiiti taatiicha o máteruecha sóntku mintsikaaka, joperu engari responsabliuaka, imeechaksïni sánhani arhiati mintsikani” (Brandon).
BIBLIERI KARAKATA: “Ka ísï tekaantani jarhani iáminduecha jingoni” (1 Tesalonika 5:14).