Jorhenguarhikua 8
Márku irékuarhiricha engaksï ísï irékajka eska Tatá Diosï ná uéjka
¿Né jindeski juramuti kʼumanchikuarhu? (1)
¿Uamba néna jatsiski para kámani imeri témbani? (2)
¿Ambe jatsiski para úni ma táti jémba? (3)
¿Náki jindeski témberi ánchikuarhita kʼumanchikuarhu? (4)
¿Ambe kurhakuasïni Tatá Diosï táti jémbechani ka uájpechani? (5)
¿Ambe uandasïni Biblia jurajperakueri ambe ka para méntku jurajperani? (6, 7)
1. Biblia uandasïndi eska uamba jindeska juramuti imeri kʼumanchikuarhu (1 Korintu 11:3). Achati máechakuajku témbani jatsiati, ka jatsistiksï para tembuperani, ná enga uaxastakata jaka juramutichani jimbo (1 Timoteo 3:2; Titu 3:1).
2. Uamba jatsisti para uékani imeri témbani ísï eska ima ná uékakuarhijka. Májkueni jatsisti para kámani eska Jesúsi ná kájka imeri chúxapatichani (Efesu 5:25, 28, 29). No méni jatsisti para atani níjtu no sési kámani, sino, janhanharhini ka jukaparharani (Kolosasi 3:19; 1 Pedru 3:7).
3. Táti jémba jatsisti para ánchikuarhini, para kéndani imeri kʼumanchikuarhu anapuechani. Jatsisti para íntskuni imeri témbani ka imeri uájpechani tʼirekua, xukuparhakua ka kʼumanchikua ma, ka jorhendani Tatá Diosïri ambe (1 Timoteo 5:8). Uamba urhejtsikuati jorhendani imeri kʼumanchikuarhu anapuechani parakaksï mítiaka Tatá Diosïri ambe ka ambe enga Tatá Diosï uáka (Deuteronomio 6:4-9; Efesu 6:4).
4. Témba jatsisti para ambakiti jarhoajperi máeni, para imeri uamba (Génesis 2:18). Jatsisti para jarhoani uambani sési jorhendani uájpechani (Proverbios 1:8). Tatá Jeobá uékasïndi eska témba uékperakua jingoni exeauaka imeri kʼumanchikuarhu anapuechani (Proverbios 31:10, 15, 26, 27; Titu 2:4, 5). Témba jatsisti para kánikua janhanharhini imeri uambani (Efesu 5:22, 23, 33).
5. Tatá Diosï uékasïndi eskaksï uájpecha kurhajchauaka imeri táti jémbechani (Efesu 6:1-3). Ima erokuarhisïndi eskaksï táti jémbecha jorhendauaka ka jurhimberantauaka imeri uájpechani. Táti jémbecha jatsistiksï para jarhani uájpechani jingoni, jorhendani Bibliari ambe, ka kurhamarhiani ná engaksï pʼikuarherajka (Deuteronomio 11:18, 19; Proverbios 22:6, 15). Tati jémbecha no méni jatsistiksï para ikiatku ka uinhamarhikua jingoni, jurhimberantani uájpechani (Kolosasi 3:21).
6. Enga ma temungurhiri no újka sési irékani, sánderu sésisïndi eskaksï jánguarhintaka úni ambe enga Biblia uandajka. Bibliajtsïni pʼímarisïndi uékperani ka puatsperantani (Kolosasi 3:12-14). Biblia uandasïndi eskaksï no jatsiska para jurajperani uandanhiatechani jimbo engaksï no kánikua jukaparakueuaka. Joperu témba úpirindi jurajkuni imeri uambani enga 1) uamba sési jimbo nóteru uékapiringa kéndani imeri kʼumanchikuarhu anapuechani, 2) enga jukari no sési kámapiringa enga jamberi úpiringa uarhikuarhu pérani o 3) enga nómindu jiáratapiringa para Tatá Jeobáni kómarhini (1 Korintu 7:12, 13).
7. Ma temungurhiri jatsistiksï para tsimarantku uékperani. Ísku jándikua, kʼamanharhintskua máesti para Tatá Diosïni jingoni ka para uambani o témbani jingoni (Ebreu 13:4). Biblia uandasïndi eska ísku jándikua, jindeska ma ambeni, paraka ma temungurhiri uáka sïranda úntani para méntku jurajperani, ka úni ménderu tembuchantani o uambuchantani (Mateu 19:6-9; Roma 7:2, 3). Tatá Jeobá no jaiapanhintasïndi enga nema sïranda úntaka para méntku jurajperani ka tembuchantani máteruni jingoni enga no ísku jándikua ambe jimboeuaka (Malaquías 2:14-16).
[Ilustrasioni pájina 17 anapu]
Tatá Diosï erokuarhisïndi eskaksï táti jémbecha jorhendauaka ka jurhimberantauaka imeri uájpechani
[Ilustrasioni pájina 17 anapu]
Táti jémba enga uékpijka kéndasïndi imeri kʼumanchikuarhu anapuechani ka jorhendasïndi Tatá Diosïri ambe