Jorhenguarhikua 10
Úkuecha enga Tatá Diosï kurhunhiajka
¿Cha néna exea imani ambe enga Tatá Diosï no jaiapanhintajka? (1)
¿Ambe arhikuekasïni ísku jándikua ka andisï no sési jaki? (2)
¿Jesúkristueri chúxapatichaksï néna jatsiski para exeni chikuanderakuani? (3)
¿Chʼanakua tuminani jimbo? (3)
¿Sïpakuani? (3) ¿Uarhiperakuani? (4) ¿Sïkuajperakuani? (5) ¿Kauikuani? (6)
¿Néna uá nema jurajkuani no sési járhati úkuechani? (7)
1. Engaksï Tatá Diosïni marhoakujka sési jásï ambeksï tsitisïndi, joperu ístu jatsistiksï para jorhenguarhini kurhunhini no sési jásï ambeni (Roma 12:9). Inde arhikuekasïndi no úni imani ambe enga Tatá Diosï kurhunhijka. ¿Nákiskiksï máru?
2. Ísku jándikua: Ima ambesti engaksï újka imecha engaksï no tembuperatini jarhajka ka enga nema apondijka imani jingoni enga no imeri témbeuaka o uambeuaka, ka enga nema apondiaka imani jingoni enga márkueuaka o achaticha engaksï ísku ambe útsperajka, ka ístu enga nema apondiaka animalichani jingoni, iámindu inde ambe kʼérati kʼamanharhintskuechestiksï para Tatá Diosïni jingoni (Levítico 18:6; Roma 1:26, 27; 1 Korintu 6:9, 10). Enga ma achati ka ma uarhiti márkuksï irékani jauaka ka nóksï tembuperatini jarhani, jatsistiksï para jurajperani o tembuperani eska ná uaxastakata jaka juramutichani jimbo (Ebreu 13:4).
3. Chikuanderani, chʼanani tumina jimbo ka sïpani: Tatá Jeobá no úsïndi chikuanderani (Titu 1:2). Ísï jimbo ima kʼuiripuecha engaksï uéjka jatsini imeri jaiapanhintskuani, nóksï jatsisti para chikuanderani (Proverbios 6:16-19; Kolosasi 3:9, 10). Iámindu jásï chʼanakua enga tuminani jimboejka, pásïndi kʼuiripuechani sánderu tumina tsitini. Ísï jimbosïksï Jesúkristueri chúxapaticha, no chʼanajti loteria, ni uarhiperatani tʼarhechuechani, ni uiritarani kabaiuechani tumina jimbo (Efesu 5:3-5). Ístuksï no sïpasïndi, níjtuksï piántajki ambe ma engaksï mítiaka eska sïpakateska, níjtuksï pájki ambe ma engaksï no sésikua jatsiaka (Éxodo 20:15; Efesu 4:28).
4. Kururáxekua ka uarhiperakua: Enga nema kururáxeaka ka no pʼíngukuarhini uáti uarhiperakuarhu niárani (Génesis 4:5-8). Uarhipiticha, nóksï uáti jindéni Tatá Diosïri pʼíchpirini (Salmo 11:5; Proverbios 22:24, 25). No sési jarhasti májkueni úkuntani imani engajtsïni no sési úchiaka (Proverbios 24:29; Roma 12:17-21).
5. Sïkuajperakua: Máru kʼuiripuechaksï espírituechani uandajpasïndi parakaksï jarhoatauaka tsinani pʼamenchakuechani. Máteruechaksï, pʼamenchatarhasïndi o uándikuani imeri ikiatspitichani. Satanásiri uinhapikuani jimboestiksï iámindu inde úkuecha. Ísï jimbo Jesúkristueri chúxapaticha nóksï jatsisti para indeni jásï ambe úni (Deuteronomio 18:9-13). Sánderu ambakiti kuájchakukua para sïkuajperakuani jingoni jindesti andarhierani Tatá Jeobáni (Proverbios 18:10).
6. Kauikua: Arhani sanititu serbesa o kauikua, no, no sési jarhasti (Salmo 104:15; 1 Timoteo 5:23). Joperu Tatá Diosï no jaiapanhintasïndi para jukarimindu kauikua arhani, níjtu kauini jámani (1 Korintu 5:11-13; 1 Timoteo 3:8). Jukari kauikua arhani uátiksïni pʼamenchatani ka úni eska cha nóteru sési irékaka chári kʼumanchikuarhu anapuechani jingoni. Ístuksïni uáti úrani máteru no sési járhati úkuechani (Efesu 5:18).
7. Kʼuiripuecha engaksï újka, ambe enga Tatá Diosï no jaiapanhintajka nóksï ma erensia pʼiuati Tatá Diosïri juramukuarhu (Galasia 5:19-21). Enga cha sési jimbo uéjka Tatá Diosïni, ka uékantsï jaiapanherantani, uákajtsï jurajkuani indeni no sési járhati úkuechani (1 Juanu 5:3). Jorhenguarhi je kurhunhini ambe enga Tatá Diosï no jaiapanhintajka (Roma 12:9). Kúnguarhi je imani kʼuiripuechani jingoni engaksï sési jásï ambe újka (Ebreu 10:24). Jesúkristueri chúxapaticha engaksï sánderu mítekia, uátiksïni jarhoatani (Santiagu 5:14). Kómarhikuarhi je Tatá Diosïni ka mintsika eskaksïni ima jarhoataka (Filipusʌ 4:6, 7, 13).
[Ilustrasioni pájina 20 anapu]
Tatá Diosï kurhunhisïndi sïpakuani, uarhiperakuani, chʼanakua tumina jimbo ka para kauini jámani