Jorhenguarhikua 14
Nénaksï ánchikuarhisïni Jeobéri eianhpiricha
¿Káni uénaskiksï eianhpini Jeobéri eianhpiricha? (1)
¿Nénaskiksï imecheri tánguarhikuecha? (2)
¿Naniksï pʼirasïni tuminani engaksï úrajka? (3)
¿Né úrhejtsikusïni mándani kúnguarhikuecharhu? (4)
¿Nákiksï máteru kʼérati tánguarhikuechani uásïni mándani uéxurhini? (5)
¿Ambe únhasïni sánderu kʼéri kʼumanchikuarhu ka máteru kʼumanchikuechani jimbo engaksï no xáni kʼératika? (6)
1. Íni jurhiatikuechani jimbo Jeobéri eianhpiricha, uénasptiksï eianhpini jiájkani ísï 1870 jimbo. Uénakuarhuksï arhinhasïremti Bibliaueri Jorhenguarhiticha, joperu 1931 jimbo, pʼirasptiksï Bibliari anapu arhinhakuani enga jindeka, Jeobéri eianhpiricha (Isaías 43:10). Enga uénakuaripka, ima kúnguarhikua sapichuespti ka iásï milloni jimboestiksïa ka eianhpesïndiksï jukari 230 kʼérati irétechani jimbo, iámindu parhakpinirhu.
2. Sano iámindu Jeobéri eianhpiricha, tánguarhintasïndiksï tanimu xanharhi mándani semana. Pʼímarhisïndiksïni parajtsï nirani imani tánguarhikuechani jimbo (Ebreu 10:24, 25). Ambe engaksï jima jorhentpijka Bibliarhu pʼitakatesïndi. Ima tánguarhikuecha uénakuarhesïndiksï ka kʼamarasïndiksï kómarhikua ma jingoni ka sano iáminduechani jimbo, mintsita jingoni pirekusïndiksï Tatá Jeobáni para kʼéri ambe arhini (Efesu 5:18, 19). Nóksïni ma tumina kurhachiati inchani jámani ka ni engajtsï incharini jauakia (Mateu 10:8).
3. Sano iámindu kúnguarhikuecha, tánguarhintasïndiksï jima enga arhinhajka Kʼumanchikua tánguarhikueri. Ima Kʼumanchikuecha ariskuksï járhatisti ka úkataksï jarhasti Jeobéri eianhpirichani jimbo ka nóksï ma tumina andasïndi. Jimaksï no jarhasïndi diosï úkatecha, krúsicha ni indeni jasï ambe. Iámindu ambe enga jima uétarhijka maiampekuarhesïndi imani tuminani jimbo enga tsípikua jingoni íntspinhajka. Né engaksï tsípikua jatsiaka íntspeni ma tumina, uátiksï jatsirani tumina jatsiratarhakuechani jimbo engaksï jima jarhajka (2 Korintu 9:7).
4. Mándani kúnguarhikuechani jimboksï jarhasïndi urhejtsikuticha, engaksï urhejtsikujka Tatá Diosïri ambe jorhentpini (1 Timoteo 3:1-7; 5:17). Ka urhejtsikuticheri jarhoajpiricha jarhoatasïndiksï urhejtsikutichani (1 Timoteo 3:8-10, 12, 13). Xáni urhejtsikuticha ka imeri jarhoajpiricha nóksï kʼéri ambe exekuarhisïndi kúnguarhikuarhu (2 Korintu 1:24). Nóksï intsïnhasïndi ménderueni jasï ma arhinhakua (Mateu 23:8-10). Nóksï ménderueni xukuparhasïndi, níjtuksï meiamunhajki imecheri ánchikuarhitani jimbo. Urhejtsikutichaksï tsípikua jingoni jarhoatasïndiksï kúnguarhikuarhu anapuechani parakaksï sési marhoakuaka Tatá Jeobáni. Jarhoatasïndiksï ka uinhaperantasïndiksï engaksï uandanhiata ambe jatsiaka (Santiagu 5:14-16; 1 Pedru 5:2, 3).
5. Ístu Jeobéri eianhpiricha uásïndiksï mándani uéxurhini kʼérati tánguarhikuechani. Jima uánikua kúnguarhikuecha tánguarhintasïndiksï para jorhenguarhini Bibliari ambe. Méntkisï imani kʼérati tánguarhikuechani jimbo, itsï atakuarhisïndiksï jimbanhi Jesúkristueri chúxapaticha (Mateu 3:13-17; 28:19, 20).
6. Sánderu kʼéri kʼumanchikua Jeobéri eianhpiricheri, Nueva York jarhasti. Jima jarhasti Kúnguarhikua enga Urhejtsikujka, engaksï kánikua mítikuka ka engaksï exeni jaka ná engaksï ánchikuarhijka kúnguarhikuecha iámindu parhakpinirhu. Ístu iámindu parhakpinirhu jarhasti jukari 100 kʼumanchikuecha engaksï no xáni kʼératika. Ka imecha engaksï jima jarhoajpijka uásïndiksï ka axasïndiksï takukatechani enga Bibliaueri ambe jorhentpijka ka nóksï ma tumina andasïndi. Ístu imani kʼumanchikuechani jimbo uandanhasïndi ná enga eianhpinhaka. ¿Cha andisï no nirajki miiúni indeni jasï kʼumanchikua ma jimbo, enga no xáni iauani pakarajka para cha?