Tata Diosï pakatperakua ma úsïndi Abranini jingoni

TRESIENTUSI sinkuenta uéxurhini nitamastia desde Kʼéri Janikuarhu uératini. Jimesïsï enga iásï jindeka Iraki, ireta ma jarhasti enga kánikua jatsikuarherika, Uri ka jima irekasti Abrani. Achati ma enga kánikua jakajkukua jatsika, joperu inderi jakajkukua tsʼéjkunhati. Ju exeni ambe úkuarhiski.

Jeoba arhispti eska jurajkupiringa imeri iretani ka eska nipiringa irekani máteru paisi jimbo: Kanaani. Abrani jirejiresï kurhajchaspti. Niraspti imeri témba Sara, sobrinuemba Loti ka iámindu imeri familia. Engaksï jini japkia, no pakaraspti irekani májku nani isï sino jini ka jini jámasïrendi ka irekasïrendi kʼumanchikuechani jimbo engaksï sïkuiriri úkatepka. Jeoba pakatperakua ma úspti Abranini jingoni: aiakuspti eska iámu parhakpini anapu kʼuiripuecha Abraninksï jimbo újchakuranhapiringa, ka eska imeri familia kʼéri ma nasionipiringa ka eska iámindu Kanaani imecheripiringa.

Abrani ka Loti niárasptiksï uánikua karichichani ka ueechani kánguarhiani. Abrani sési kámpisïrendi ka jurajkuspti eska Loti erakupiringa náki echeri jimbo uékasïreni imeri animalichani eranguani. Loti indeni echerini erakuspti enga Jordaniri anapu itsï nitamaenga, jimboka sánderu uitsakua jukasïrenga, ka jimesïsï pakaraspti irekani enga Sodoma japka. Joperu jima anapuecha, kánikuaksï no sési úrispti, jimbokaksï achaticha ísku ambe ma útsperasïrengaksï, xáni no sési jarhati úkuechani jimbo ikiatasïrendiksï Jeobani.

Engaksï Abrani ka Loti nípkia táchani isï irekani, Jeoba aiakuspti Abranini eska xáni uájpechani káapiringa na engaksï xáni jóskuecha jaka auandarhu. Abrani jakajkuspti, joperu Sara imeri témba no úsïrendi kánguarhiani uájpechani. Enga Abrani 99 uéxurhini jatiripkia ka Sara sáno 90, Tata Diosï arhiaspti eskaksï kánguarhipiringa uájpani ma. Ka isï úkuarhispti: Sara niáraspti kánguarhini charhakuni ma ka arhirasptiksï Isaki. Nájkiruka Abrani kánguarhiapka máteru uájpechani, Pʼimutantspiti enga Jeoba Edenirhu eiatspipka Isakini jimbo jupirindi.

Enga i ambe úkuarhini japka, Loti útasï irekaxapti Sodoma imeri familiani jingoni. Joperu Loti ambakiti kʼuiripu máespti ka no ísïspti eska máteru achaticha engaksï ísku ambe útsperaenga. Isï jimbo, enga Jeoba eratsipka Sodoma anapuechani kʼamajkuani, ánjilichani máru axaspti parakaksï aiangupiringa Lotini. Íksï arhispti Lotini ka imeri familiani eskaksï sóntku uéakupiringa ka eskaksï no tátsepani isï eraapiringa. Jiájkani, Tata Diosï úspti eska auandarhu uératini chʼipiri ka asufri uékorhepiringa, ka iámindu engaksï Sodoma ka Gomorra irekapka uarhisptiksï. Loti ka imeri tsimani uátsïcha tsípitiksï pakaraspti, joperu Lotiri uarhiti pʼamojkuspti ambe enga jurajkuni japka iretarhu, tátsepani isï eraspti ka tsïtaspti imeri tsípikuani.

(Pʼitakata jarhasti Génesis 11:10–19:38.)