Ju je kuájpiani Jeobaeri juramukuechani

Jeobasï uaxastajti na enga jatsika para jindeeni juchari jángua. Por ejemplu, uaxastasti eska temungurhikua ma jindeska entre nanaka ma ka tataka ma ka para méntkisï (Mt 19:4-6, 9). Ima no jeiapanhintasïndi ísku jándikua ambe (1Ko 6:9, 10). Ístujtsïni íntskuasïndi prinsipiuechani na engachi jatsika para xukuparhani ka arreglarikuarhini parachi xarharani eskachi no májkueniska eska máteruecha (Dt 22:5; 1Ti 2:9, 10).

Iásï, uánikua kʼuiripu no jiókuarhiasïndi Jeobaeri juramukuechani (Ro 1:18-32). Chúngumaasïndiksï modechani, ísï xukuparhaparini, arreglarikuarhiparini ka májkueni jámaparini eska máteruecha. Sésiksï pʼikuarherasïndi engaksï ísku jándikua ambe niátajka ka arhinchasïndiksï imechani engaksï no májkueni jásï ambe újka (1Pe 4:3, 4).

Jeobaeri testiguechachi jatsiska para balori jingoni kuájpiani Jeobaeri juramukuechani engaksï jánguaeri ambe uandajka (Ro 12:9). ¿Nénachi uá ísï úni? Iatsitakuarhu ka respetu jingoni arhipariani ambe enga Tata Diosï jeiapanhintajka ka ístu ísï irekaparini eska ima na juramujka. Por ejemplu, engachi erakuni jámaaka néna xukuparhani ka arreglarikuarhini, jatsiskachi para kurhamarhikuarhini: “¿Néri juramukuechani chúxapaaxaki: Jeobaeri o parhakpiniri? ¿Xarharasïni eskani Tata Diosïni marhuakusïnga?”. O engachi programa ma o pelikula ma erakuni jámaaka, uétarhisïndi eratsini amberini jorhendasïni, sini Jeoba jeiapanhintaa ka sini ima ambe engachi erakujka para tsípikuarhini, uá úni eskachi no uinhapiti jauaka para no sési ambe niátani (Sl 101:3). ¿Úpirini no sési úkuni juchari familiani o máteruechani? (1Ko 10:31-33).

¿Andisï xáni jukaparhakue eskachi kuájpiauaka Jeobaeri juramukuechani? Jimboka tata Jesukristu nóteru ióndani kʼamajkuauakia nasionichani ka iámindu no sési úkua ambe ka imajkuksïsï tsípiti pakaraati engaksï kurhajchaaka Jeobani (Eze 9:4-7; 1Jn 2:15-17). Ísï jimbo, ju je jánguarhintani kuájpiani Jeobaeri juramukuechani, paraka kʼuiripu enga exeaka juchari ambakiti jángua, kʼéri ambe arhiaka Jeobani (1Pe 2:11, 12).

ENGAJTSÏ EXEAKIA BIDEUNI HAZTE AMIGO DE JEHOVÁ: UN HOMBRE Y UNA MUJER, MÓKUANTA JE ARINI KURHAMARHIKUECHANI:

• ¿Andichisï jatsi para kurhajchani Jeobaeri juramukuechani?

• ¿Andiksïsï tátembecha jatsi para desde sapirhatku jorhendaani uájpechani Jeobaeri juramukuechani?

• ¿Nénaksï uá tumbiicha ka jatiricha, jarhuatani kʼuiripuni paraksï imajtu jatsini imani erokuarhikua engajtsïni Jeoba eiachijka?