Úni ambe enga sési jaka: Ambe ma enga chá jatsika para erakukuarhini
Seguni na engachi erakuaka irekani, uaati eskachi tsípikua jingoni irekaaka o nómbe. Ka Tata Diosï Jeoba sési mítesti indeni ambe, jimbosï uéjti eskachi kurhajchaaka ka únchi ambe engajtsïni ima juramuchijka.
Tata Diosï Jeoba uékasïndi eskachi tsípikua jingoni irekaaka ka agustu.
“Ji, Jeoba, chíti Tata Diosïska, Ima engakini jorhendajka parari sési jarhani, Ima engakini arhini jaka nani engari ísï xanharaaka”. ¡Engari meru kurhajchaapiringa juchiti mandamientuechani! Jimajkani chíti pínandikua niárapirindi ísïini eska riu ma ka chíti jurhimbikua komueska marirhu anapu olecha” (Isaías 48:17, 18).
Nájkirukachi jucha uaaka mámaru irekuarhini, Tata Diosï Jeobasï sánderu sési míteti nénachisï jatsi para irekani jimbokajtsïni imasï kueraaka. Ima mítesti ambejtsïni sánderu marhuachea jimbosï uéjti eskachi ísï uaaka eskajtsïni ima na arhistachijka. Ka engachi kurhajchaska, uaakachi seguru jarhani eskajtsïni méntkisï sési nicheaka ka ístu méntkisïchi imani ambe erakuaka úni enga sési jaka ka inde ambe uaati eskachi tsípikua jingoni irekaaka ka agustu.
Tata Diosï Jeobajtsïni kurhanguchisïndi.
“Jimboka i juramukua engakini íntskuni jaka iásï, no kánikua úkua jukaska para tʼu, ka níjtu iauani jaki” (Deuteronomio 30:11).
Jamberichi jatsiaka para mójtakurhini ka ístu ménderueni eratseni para úni kurhajchani Tata Diosïni. Joperu Tata Diosï Jeobajtsïni kurhanguchisïndi, imajtsïni no jukari ambe kurhachesïndi. Ima sési mítetixati nani jamberkuchisï uaa úni ambe ma jimbokajtsïni ima kueraaska. Ka engachi jucha niárajka sési míteni imani, exesïngachi eska ‘no jukari úkua jukaska ambe engajtsïni ima juramuchijka’ (1 Juanu 5:3).
Tata Diosï Jeoba jarhuatauati imeechani engaksï uékajka kurhajchaani imeeri juramukuechani.
“Ji, chiiti Tata Diosï Jeoba, jupikatixaka chiiti jájkini jurhijkandani anapuni; jíkenisï arhini jaka: ‘Asï ché. Jíkeni jarhuataaka’” (Isaías 41:13).
Úsïngachi ísï irekani eska Tata Diosï Jeoba na uékajka jimbokajtsïni ima jarhuatasïnga. Ima úrasïndi Bibliani enga jindeeka imeeri uandakua parajtsïni jarhuatani, uinhaperantani ka parachi erokuarhini ambe enga ima uaaka.
Interu parhakpinirhu, uánikua kʼuiripuechaksï sánderu sési irekaxatiia jimbokaksï úxaka ambe enga Biblia uandajka. ¿Chájtu uékapirini jorhenguarhini Biblieri ambe? ¿Tsitipirintsï sánderu sési míteani Biblieri konsejuechani? Úpiringajtsï ueenani jorhenguarhini foietu jingoni ¡Tsípikua jingoni ireka je! Ka nójtsï ma maiampiaka, ka jarhasti pájinarhu jw.org jimbo. Jukanharhiasti arini tanimu jorhenguarhikuechani:
“¿Nénaksïni uaa jarhuatani Biblia?”.
“Biblia úsïndi eskachi mintsikaaka ambe ma”.
“¿Uaajtsï jakajkuni ambe enga Biblia uandajka?”.
Engajtsï na sánderu jorhenguarhiaka Tata Diosïiri Uandakuani, exeakajtsï eskaksï imeeri konsejuecha méntkisï marhuasïnga ka eskaksï ‘mintsinharhikueska iásï ka para méntkisï’ (Salmo 111:8). Kánikuachi sési irekasïnga engachi újka ambe enga Biblia uandajka. Joperujtsïni Tata Diosï no arhisïndi eskachi afuersa ísï uaaka (Deuteronomio 30:19, 20; Josué 24:15). Mándani jucha, jatsiskachi para erakukuarhini ambe úni.