¿Nénachi jatsiski para kómarhini Tata Diosïni parajtsïni kurhaani?

JU JE KÓMARHINI TATA DIOSÏ JEOBANI, JESUSIRI NOMBRI JIMBO

“Iámindu ambe engajtsï kurhakuaka Tátini juchiti nombri jimbo, imaksïni íntskua[ti]” (Juanu 16:23).

Jesusiri uandakuechaksï sési xarhatasïndi eska Jeoba uékasïnga eskachi imantku kómarhiaka ka no diosï úkatechani úrapariani, ni santuechani, ni ánjelichani o parientichani engaksï uarhikia, ka uékasïndi eskachi tata Jesukristueri nombri jimbo kómarhiaka. Engachi ísï úska, xarhatakuakachi Tata Diosïni eskachi míteska eskajtsïni kurhajchasïnga imani ambe jimbo enga Jesusi úka juchantsïni jimbo. Jesusi uandaspti: “No nema jurhasïndi andarhierani Diosï Tátini enga no jíndeni jimbo[euaka]” (Juanu 14:6).

JU JE MINTSITARHU UÉRATINI UANDONTSKUARHEKUNI

“Aiangukuarhi je iámindu ambe enga chári mintsita pʼikuarhinhejka” (Salmo 62:8).

Engachi kómarhijka Jeobani, jatsiskachi para ísï uandontskuarhekuni eskachi na úpiringa táti ma jingoni engajtsïni xénchajka. Jatsiskachi para janhanharhikua jingoni uandontskuarhekuni ka juchari mintsitarhu uératini ka no librurhu ma arhiantani kómarhikuechani o uandatsekuarhini.

JU JE IMANI AMBE KURHAKUNI TATA DIOSÏNI AMBE ENGA IMA JAIAPANHENTAJKA

“Engachi kurhajkuarhiaka ma ambe eska ima na uékajka, imajtsïni kurhajchaa[ti]” (1 Juanu 5:14).

Bibliarhujtsïni Tata Diosï arhisïndi ambe enga uáka juchantsïni jimbo ka ambe enga ima uéjka eskachi uáka imani jimbo. Paraka ima jaiapanheantauaka juchari kómarhikuechani, jatsiskachi para ísï kómarhini eska “ima na uékajka”. Para ísï úni, uétarhisïndi eskachi jorhenguarhiaka Bibliaeri ambe ka ísïchi uáka sánderu sési míteni. Engachi ísï úska, imajtsïni tsípikua jingoni kurhajchaati.

¿AMBE KA AMBERICHI UÁ KÓMARHINI?

Ju je imeri ambe kómarhini engachi uétarhinchajka. Uákachi kurhakuni Tata Diosïni imani ambe engachi pauani pauani uétarhinchajka, komu tʼirekua, xukuparhakua o nani engachi uáka irekani. Ístuchi uáka kurhakuni eskajtsïni jarhuataaka imani ambe erakuni úni enga sési jaka ka eskajtsïni íntskuaka uinhapikua parachi úni orhepani uérakuani tsʼéjkukuechani. Ka ístuchi uáka kómarhini eskajtsïni puáchentaaka, eskajtsïni jarhuataaka parachi sánderu mintsikani ka eskajtsïni kuájchakuaka (Lukasʌ 11:3, 4, 13; Santiagu 1:5, 17).

Ju je kómarhijpikuani máteruechani. Ambakiti tátichaksï sési pʼikuarherasïndi engaksï uájpecha xénchperajka. Jeoba juchari Táti, ístu uékasïndi eskachi iáminduecha jarhuajperaaka. Sési jarhasti engachi kómarhijpikujka juchari uarhiitini o acheetini, juchari sapiichani, parientichani ka amiguechani. Disipulu Santiagu uandaspti eskachi kómarhijpikuapiriga máteruechani (Santiagu 5:16).

Ju je diosmaiamukua íntspintani. Biblia uandasïndi eska juchari Kuerajpiri ambakiti ambe úska juchantsïni jimbo: “Janirani paraka jucha ambakiti pʼikuntskua jatsiaka. Ka kánerachisïndijtsïni juchari tʼirekuani ka tsípini pʼikuastantantsïni juchari mintsitecharhu” (Ukuecha 14:17). Engachi eratsentajka iámindu ambe enga Tata Diosï úka juchantsïni jimbo, uékaakachi diosmaiamukua arhini. Ístu, xarhatakuakachi eskachi agradesidu jarhaska engachi kurhajchaska imani (Kolosasi 3:15).

JU JE TEKAANTSTINI KA SEGUIRINI KÓMARHIJPIKUARHINI

Ménisï úpiringachi kómu pʼikuarherani jimbokachi no sóntku mókuminhataasïnga kómarhikuechani engachi mintsita jingoni uájka. ¿Arhikuekasïni i ambe eska Tata Diosï no uandanhiasïnga juchantsïni jimbo? ¡Nómbe! Ju je exeani máru eksperiensiechani engaksï xarhatajka eskachi ménisï solu jatsisïnga para seguirini kómarhijpikuarhini.

Steveni engachi primeru jorhenguarhikuarhu uandaka. Imajtsïni seguirisïndi aianguni: “Enga no kómarhikua jimboepiringa, nóteruni méni úpiringuia tsípikua jingoni irekani”. ¿Ambe jarhuataspi? Ima uénaspti Bibliaeri ambe jorhenguarhini ka exespti eska jatsispka para méntku kómarhini jarhani Tata Diosïni. Steveni uandasïndi: “Diosmaiamukua arhisïnga Tata Diosïni imani jarhuajperata ka uékperakua jimbo engajtsïni juchiti amiguecha íntskujka. Iásï sánderuni tsípikua jingoni irekaskia eska ióntki”.

¿Ka ambe úkuarhispi Jenny jingoni, enga ióntki ísï pʼikuarherenga eska no jukanchaspka para Tata Diosï kurhajchani? Ima uandasïndi: “Engani xáni no sési pʼikuarherani japka, kómarhispka Tata Diosïni eskarini jarhuatapiringa kurhanguni andisïni xáni no sési pʼikuarhereni”. ¿Néna jarhuataspi enga ísï uénhikuarhipka? Ima seguirisïndi uandani: “Tata Diosï jingoni uandontskuarheni, jarhuatastirini parani ísï exekuarhini eskarini ima na exejka. Kuenta íntskukuarhispka eska engani ísï pʼikuarherajka enajkini no ma ambe jukaparha, Tata Diosïrini no ísï exesïnga. Ístu inde amberini jarhuatasti parani seguirini jánguarhintani”. ¿Néna marhuakuspi i ambe? “Kómarhikuarini jarhuatasti parani ísï exeni Jeobani komueska ambakiti amigu ma, Táti uékpiti ma ka Tata Diosï ma enga meru jaka. Ima méntkisï jíndeni jingoni jauati ka jarhuataatirini engani jánguarhintaska imani ambe úni enga ima uéjka”.

Iásï ju je exeni ambe enga nitamakuarhipka Isabeli. Enga embarasada japka, doktorichaksï arhispti eska imeri sapi no sési andajpenupiringa. Ima kánikua no sési pʼikuarheraspti. Máruksï jamberi arhispti eska no kánguarhipirenga. Ima uandasïndi: “Ísï pʼikuarherasïrenga eskani uarhipiringa xáni no sési pʼikuarherani juchiti mintsitarhu”. ¿Ambe úspi? “No kuatantaspka kómarhini Tata Diosïni parareni jarhuatani”. Tátsekua kánguarhispti Gerardini, ka ísï andajpenuspti eskaksï doktoricha na uandapka. ¿Ísï pʼikuarherasïni Isabeli eska Tata Diosï mókukuantaspka kómarhikuechani? ¡Jo! ¿Ka néna mókukuaspi? “Iásï enga juchiti sapi 14 jatirikia, úsïnga uandani eska kʼéri kóntperata máeska. Exeni juchiti sapini eska tsípikua jingoni irekaxaka, nájkiruka no sési andajpenuka, jindeesti sánderu ambakiti mókuntskua juchiti kómarhikuecheri”.

I xáni sési járhati uandakuechajtsïni miátantasïndi ambe enga salmista uandapka: “Tʼuri kurhauaka ambe engaksïni kaxumbitiicha kurhachiaka, oh, Jeoba. Uákari eska imecheri mintsita uinhapiti jauaka ka meruri jingontku jauaka imecha jimbo” (Salmo 10:17). ¿A no eska uánikua ambe jarhaska engachi jimbo jatsika para kómarhikua úni?

Bibliarhuksï uánikua kómarhikuecha jarhasti enga Jesusi uápka. Enga sánderu mítekateka, jindeesti ima enga imeri chúxapatiichani jorhendaapka. ¿Ambechi jorhenguarhisïni inde kómarhikueri?