SEMANA 20
Libru Jaŋaskuecha uandasïndi ambe engaksï úkuarhinchaaka Tata Diosïri ikiatspiticha
“Jima taantaspti [reichani] enga ebreu jimbo arhinhajka, Armajedoni” (JAŊ. 16:16).
PIREKUA 150 ¡Jeobakini úati kuájchakuni!
AMBE ENGACHI EXEAKAa
1. Eska na uandajka libru Jaŋaskuecha, ¿néna kaaxaki Satanasi Tata Diosïri marhuarichani?
LIBRU Jaŋaskuecha uandasïndi eska Tata Diosïri Reinu juramuxakaia auandarhu ka eska Satanasi kʼuanijpanhaska Echerirhu (Jaŋ. 12:1-9). I ambe kánikua sési pʼikuastaasti imeechani engaksï auandarhu irekaka, peru juchantsïni uánikua uandanhiatechani juáchiasti. ¿Andi? Jimboka Satanasi kánikua no sési kaaxaka Tata Diosï Jeobaeri marhuarichani engaksï Echerirhu irekani jaka (Jaŋ. 12:12, 15, 17).
2. ¿Ambejtsïni jarhuataa parachi no méni jurajkuni Tata Diosïni?
2 ¿Ambechi uaa úni parachi no méni jurajkuni Tata Diosïni nájkirukajtsïni Satanasi no sési kámani jauaka? (Jaŋ. 13:10). Ma ambe engajtsïni jarhuataaka, jindeesti míteni ambe enga úkuarhiaka sánderu orhepani. Libru Jaŋaskuecha jimbo apostoli Juanu uandasïndi máru kóntperatechani engachi jatsiuaka sánderu orhepatini. Ma jindeuati eskaksï kʼamajkunhaaka Tata Diosïri ikiatspiticha. Ju je exeni ambe enga uandajka libru Jaŋaskuecha imeecheri ambe ka ambe engaksï úkuarhinchaaka.
SÍMBOLUECHA JIMBOKSÏ XARHATANHASÏNDI NÉKSÏ JINDEESKI TATA DIOSÏRI IKIATSPITICHA
3. ¿Nákiksï jindeeski máru símboluecha engaksï úrakuarhejka libru Jaŋaskuecha jimbo?
3 Primeru bersikurhu libru Jaŋaskuecha jimbo, sési xarhatasïndi eska iámu ambe enga karakata jaka ini libru jimbo, jánhaskuecha o símboluecha jimbo jarhaska (Jaŋ. 1:1). I libru ísï xarhataasïndi Tata Diosïri ikiatspitichani komueska máru animalicha. Uandasïndi anamaliri ma “enga kʼéri japondarhu ma uémini japka enga siete éjpuechani jukaapka ka diesi sïuanguechani” (Jaŋ. 13:1). Tátsekua uandasïndi máteru animaliri enga echerirhu “uétseni japka” enga ísï uandeenga “eska ma dragoni” ka enga ueenga eska ‘auandarhu uératini kétsepiringa parhakpinirhu chpiri’ (Jaŋ. 13:11-13). Ístu uandasïndi máteru “animali charhapitini” nani enga uarhiiti ísku jándi ma jatarini nirajka. Íksï tanimu animalicha arhikuekaasïndi Tata Diosïri ikiatspitichani engaksï desde iónisï no jiókuarhijka Tata Diosï Jeobani nijtu imeeri Reinuni. Jimbosï xáni jukaparhakueti eskachi míteaka neeskiksï (Jaŋ. 17:1, 3).
TʼÁMU ANIMALI KʼÉRATICHA
“Marirhuksï” uémisïndi (Dan. 7:1-8, 15-17). Gobiernuechani arhikuekaasïndi engaksï imani tiempu jimbo ueenapka juramuni enga Danieli irekapka ka engaksï no sési kámapka Tata Diosïri iretani. (Párrafuecha 4 ka 7).
4, 5. ¿Nénajtsïni jarhuatasïni Daniel 7:15-17 parachi kurhanguni neechani arhikuekaasïni símboluecha enga libru Jaŋaskuecha uandajka?
4 Antedechi míteni néksï jindeeski i Tata Diosïri ikiatspiticha, uétarhisïndi eskachi kurhanguaka ambe engaksï i símboluecha arhikuekajka. Ka parachi kurhanguni, sánderu sésiisti eskajtsïni Biblia aianguaka ambe engaksï arhikuekajka. Uánikua símboluecha engaksï libru Jaŋaskuecha jimbo úrakuarhejka, ístuksï úrakuarhesptia máteru libruecha jimbo Bibliarhu. Profeta Danieli tsánharhiaspti ‘tʼámu kʼérati animalichani engaksï marirhu uémipka’ (Dan. 7:1-3). Ka Danieli mismujtsïni aiangusïndi eskaksï i kʼérati animalicha arhikuekaasïnga tʼámu “reichani” o juramukuechani (arhinta je Daniel 7:15-17). I ambe enga Danieli uandajka, jarhuatasïndijtsïni parachi kurhanguni eskaksï inde animalicha engaksï libru Jaŋaskuecha jimbo uandajka, ístuksï xarhatasïndi eskaksï jindeeska juramukuecha.
5 Ju je sési exeni ambeksï arhikuekasïni símboluecha engaksï libru Jaŋaskuecha jimbo jaka. Ini jorhenguarhikua jimbo, Bibliajtsïni jarhuataati kurhanguni ambe engaksï arhikuekajka. Orhetachi jorhenguarhiaka ambe engaksï arhikuekajka i animalicha, tátsekuachi exeaka ambe engaksï úkuarhinchaaka ka últimuchi exeaka ambejtsïni jorhendasïni i ambe.
MÍTENHASÏNDI NÉKSÏ JINDEESKI TATA DIOSÏRI IKIATSPITICHA
ANIMALI ENGA SIETE ÉJPUECHANI JUKAAKA
“Marirhuksï” uémisïndi ka siete éjpuechani jukaasti ka diesi sïuanguechani ka diesi koronechani (Jaŋ. 13:1-4). Iámindu gobiernuechani arhikuekaasïndi engaksï desde iónisï juramukia. Siete éjpuechaksï siete gobiernuechani arhikuekaasïndi engaksï no sési kámapka Tata Diosïri iretani. (Párrafuecha 6 a 8).
6. ¿Néni arhikuekasïni animali enga siete éjpuechani jukaaka enga Jaŋaskuecha 13:1-4 jimbo uandajka?
6 ¿Ambe arhikuekasïni animali enga siete éjpuechani jukaaka? (Arhinta je Jaŋaskuecha 13:1-4). Bibliajtsïni arhisïndi eska i animali ísï xarharasïnga eska leopardu ma ka eskaksï imeeri jantsiricha ísï jáxeska komueska osueri ma ka eska leoniri penchumikua jukaska ka diesi sïuanguechani. Tʼámu animalicha enga Daniel kapitulu 7 uandaajka, sánoksï májkueni járhasti, joperu libru Jaŋaskuecha uandasïndi eska máechakuajku animali uánikua ambe jukaska máteru animalicheri. Ísï jimbo, i animali no arhikuekasïndi májku juramutini o kʼéri juramukuani ma. Libru Jaŋaskuecha uandasïndi eska juramukua jatsiska “iámindu tribuecharhu ka nasionicharhu ka iámindu kʼuiripuechani jingoni engaksï táchani jásï idioma uandajka, ka iámindu ambe jásï kʼuiripuni jingoni”. Ísï jimbo, imeeri juramukua iauani sánderu kʼéristi eska na uéjki paisirhu anapu juramukua ma (Jaŋ. 13:7). Ísï jimbo, i animali iámindu juramukuechani arhikuekaasïndi desde engaksï ueenaka jarhani juramukuecha asta iásï jamberi (Ecl. 8:9).b
7. ¿Ambeksï arhikuekasïni siete éjpuecha animaliri?
7 ¿Ambeksï arhikuekasïni siete éjpuecha? Jaŋaskuecha kapitulu 17 jarhuataatijtsïni míteni, jimboka jimini uandasïnga na enga jásïika animali enga kapitulu 13 jimbo arhijka. Jaŋaskuecha 17:10 uandasïndi: “Jindeestiksï siete reicha. Iúmu kʼamarastiksïa ka máechakua iásï jindeesti ka máteru nótki jindeesïndi, peru enga jindeuakia, uétarhisïndi eska no ióni pakaraaka”. Iámindu inde juramukuecheri enga Satanasi úraakia, jarhastiksï siete engaksï úpiringa ísïini eska “éjpuecha” jimbokaksï kʼéri ambe úska. Jindeestiksï kʼérati juramukuecha engaksï úkuka ambe ma Tata Diosïri iretani. Apostoli Juanueri jurhiatikuecha jimbo, sinkoksï juramusptia ka nóteruksï jarhasptia. Íksï jindeespti Ejiptu, Asiria, Babilonia, Medopersia ka Gresia. Sekstu enga jindeepka Roma, jiáni juramuxapti enga apostoli Juanu libru Jaŋaskuecha karani japka. ¿Náki jindeepirini septimu ka últimu juramukua o éjpu?
8. ¿Néni arhikuekasïni septimu éjpu animaliri?
8 Eskachi na exeaka, profesiecha engaksï Danieliri libru jimbo jaka jarhuatasïndijtsïni míteni né jindeeski septimu ka últimu éjpu animaliri. ¿Náki gobiernu enga sánderu juramukua jatsika juramuxaki ini últimu jurhiatikuecha jimbo, juchaari “Tateeri jurhiatikua jimbo”? (Jaŋ. 1:10). Paisicha engaksï sánderu juramukua jatsika jindeestiksï Reino Unido ka Estados Unidos. Ísï jimbo, uaakachi uandani eskaksï i jindeeska septimu éjpu animaliri enga Jaŋaskuecha 13:1-4 jimbo uandajka.
ANIMALI MA ENGA TSIMANI SÏUANGUECHANI JUKAAKA ÍSÏ KOMUESKA KARICHIRI MA
ʻEcherirhuʼ uétsesïndi ka ísï uandasïndi komueska “dragoni” ma. Ka úsïndi eska “auandarhu uératini kétseaka parhakpinirhu chpiri” ka jimboka jindeeska ʻuandajtsïkpiti kʼarhapitiʼ, mámaru járhati senialichani uaasïndi (Jaŋ. 13:11-15; 16:13; 19:20). Reino Unido ka Estados Unidos engaksï sánderu juramukua jatsika, ísï xarhatanhasïndi komueska animali ma enga tsimani sïuanguechani jukaaka ka komueska uandajtsïkpiti kʼarhapiti ma, jimboka chkuanderakua ambe arhiasïnga “kʼuiripuechani engaksï parhakpinirhu irekani jaka” ka arhiasïndi “eskaksï uaaka ma xásï imajenini komueska ima animali” enga siete éjpuechani jukaaka ka diesi sïuanguechani. (Párrafu 9).
9. ¿Néni arhikuekasïni animali enga “tsimani sïuanguechani” jukaaka engaksï xárhatika “eska ma karichiri”?
9 Tátsekua, kapitulu 13 libru Jaŋaskuecha, aiangusïndijtsïni na enga jámajka septimu éjpu enga kánikua juramukua jatsika enga jindeeka Reino Unido ka Estados Unidos. Máteru animalini arhisïndi ka i ambe uandasïndi: “Tsimani sïuangua jukaaspti xárhati eska ma karichiri, peru ísï uandasïreendi eska ma dragoni”. I animali “kʼérati míndechani uaasïndi, asta úni jamberi eska auandarhu uératini kétseaka parhakpinirhu chpiri kʼuiripuechani japarini” (Jaŋ. 13:11-15). Ka Jaŋaskuecha kapitulu 16 ka 19 jimbo, arhisïndi eska jindeeska “uandajtsïkpiti kʼarapiti” o enga chkuanderatspijka (Jaŋ. 16:13; 19:20). Ka sáno májkueni ambe uandaspti Danieli enga uandapka ambe enga újka kʼéri juramukua enga jindeeka Reino Unido ka Estados Unidos, Danieli uandaspti eska ‘kánikua no sési ambe úpiringa’ (Dan. 8:19, 23, 24, nota). Ka inde ambesï úkuarhipti Segunda Guerrarhu enga interu parhakpinirhu úkuarhipka. Tsimani bomba atomikecha jimbo, únhaspti eska kʼamakurhipiringa guerra ka ini bombechani Gran Bretaña ka Estados Unidos anapu sientifikuechaksï uaaspti. Engaksï ísï úpka, Reino Unido ka Estados Unidos engaksï kánikua juramukua jatsika, ústiksï eska “auandarhu uératini kétse[piringa] parhakpinirhu chpiri”.
ANIMALI CHARHAPITI
Ini animalini jimbo, uarhiiti ísku jándi ma uaxakatixati enga jindeeka Kʼéri Babilonia. Uandanhasïndi eska i animali jindeeska rei ochu úni jámani (Jaŋ. 17:3-6, 8, 11). Ueenani, uarhiiti ísku jándi juramukusïndi animalini, joperu tátsekua animali uándikusïndi ini uarhiitini. Uarhiiti ísku jándi, arhikuekaasïndi relijionichani engaksï no jurhimbitika ka engaksï iámu parhakpinirhu jaka. Animali charhapiti, arhikuekasïndi iásï anapu Organización de las Naciones Unidas enga politikeri ambe exejka interu parhakpinirhu. (Párrafuecha 10 ka 14 a 17).
10. ¿Néni arhikuekasïni ‘animaliri imajeni’? (Jaŋaskuecha 13:14, 15; 17:3, 8, 11).
10 Iásïchi uandani jauaka máteru animaliri. I sáno májkueni jáxesti eska animali enga siete éjpuechani jukaaka, peru i charhapitisti. Libru Jaŋaskuecha uandasïndi eska i jindeeska animaliri imajeni ka eska i jindeeska ‘rei ochu úni jámani’ (arhinta je Jaŋaskuecha 13:14, 15; 17:3, 8, 11).c I reiri ambe uandanhasïndi eska xarharaspka ka eska tátsekua nóteru jarhaspkia ka eska tátsekua ménderu ueenaspka xarharani. I ambe sési terukuntasïndi ambe enga úkuarhipka Organización de las Naciones Unidas jingoni enga politikeri ambe exejka interu parhakpinirhu. Ueenakuarhu arhinhasïreendi Sociedad de Naciones. Tátsekua Segunda Guerra Mundiali jimbo, nóteru jarhasptia. Ka tátsekua ménderu ueenaspti jarhani imani nombri jingoni eskachi na mítekia iásï.
11. ¿Ambeksï uaa juramuticha, ka andichisï no jatsi para chéni?
11 Imani ambe jingoni engaksï uandaaka, juramutichaksï uaati eskaksï kʼuiripuecha no jiókuarhiaka Tata Diosï Jeobani ni imeeri iretani. Pori ísï arhini, tánantauatiksï “reichani iápuru parhakpinirhu” anapuechani para Armajedoniri uarhiperakua, enga jindeeka uarhiperakua “kʼéri jurhiatikua jimbo [Tata] Diosïni jingoni enga Iámindu ambe újka Úni” (Jaŋ. 16:13, 14, 16). Peruchi no jatsiska para chéni. Juchaari Tata Diosï Jeoba sóntku uaati ambe ma para kuájpiani imeechani engaksï apoiarijka imeeri juramukuani (Ezeq. 38:21-23).
12. ¿Ambeksï úkuarhinchaa iámindu i animalicha?
12 ¿Ambeksï úkuarhinchaa iámindu i animalicha? Jaŋaskuecha 19:20 uandasïndi: “Ima animali jupinhasti ka ístu uandajtsïkpiti kʼarapiti enga imani animalini japarini milagruechani uaapka enga jimbo kʼareenga imeechani engaksï animaliri mínda jukapka, ka engaksï kómarhienga imeeri imajenini. Ka imeecha tsimarhani tsípitku kʼuanijpanhaspti japonda chpiririrhu enga méntku kurhini jaka asufri jingoni”. Ísï jimbo, engaksï útasï juramuni jauaka, politikuecha engaksï Tata Diosïri ikiatspitika kʼamajkunhaatiksï para méntkisï.
13. ¿Ambeksï uékasïni juramuticha eskachi uaaka kristianuecha?
13 Ambe engachi jorhenguarhijka. Kristianuechachi jatsiska para no jurajkuni Tata Diosïni ka ni imeeri Reinuni (Juanu 18:36). Parachi ísï úni, jatsiskachi para no inchamukuni ini parhakpini anapu politikarhu. Joperu i ambe úpirindi úkua jukani, jimbokaksï juramuticha uékasïnga eskachi apoiariuauaka úparini ambe ma ka juchaari uandakuecha jingoni. Imeecha engaksï inchamukuaka politikarhisï, i animaliri markaksï jukaati (Jaŋ. 13:16, 17). Ka imeecha engaksï marka jukaaka i animaliri, Tata Diosï Jeoba nóteru jaiapanheantauatia ka nóksï uaati irekani para méntkisï (Jaŋ. 14:9, 10; 20:4). Kánikua jukaparhakuesti eskachi no jámaaka inchamukuni politikarhisï, nájkirukaksï juramuticha mámaru ambe uaaka parachi apoiariuani.
KʼURATSEKUA JINGONI KʼAMAJKUNHAATI UARHIITI ÍSKU JÁNDI
14. ¿Ambe exespi apostoli Juanu enga ísku pakatapka? (Jaŋaskuecha 17:3-5).
14 Apostoli Juanu uandaspti eska exespka ambe ma enga ʻísku pakatapkaʼ. ¿Ambeespi? Uarhiiti ma enga uaxakatini nirani japka ma ini animali jimbo (Jaŋ. 17:1, 2, 6). Biblia arhisïndi eska ísïiska komueska “kʼéri ísku jándi” ma ka imeeri nombri jindeesti “Kʼéri Babilonia”. Imani uarhiiti “jingonksïsï ísku jándi úkuarhiti parhakpinirhu anapu reicha” (arhinta je Jaŋaskuecha 17:3-5).
15, 16. ¿Ambeeski “Kʼéri Babilonia”, ka nénachi míteski indeni ambe?
15 ¿Ambeeski “Kʼéri Babilonia”? I uarhiiti no jindeesti politikarhu anapu organisasioni ma, jimboka libru Jaŋaskuecha uandasïnga eska ísku jándi úkuarhisïnga parhakpinirhu anapu politikuecha jingoni (Jaŋ. 18:9). Ka enga uandajka eska uaxakatini nirasïnga ma ini animalini jimbo, arhikuekasïndi eska uékasïnga juramukuani. Ka ístu no úpirindi arhikuekani kʼérati negosiuechani engaksï Satanasiri parhakpini jimbo jaka, jimboka Jaŋaskuecha ísï tátsekua uandasïnga ícheri ambe ka arhiasïndi “parhakpinirhu anapu komersianticha” (Jaŋ. 18:11, 15, 16).
16 Bibliarhu, uandakua ísku jándi uaati arhikuekani nemani enga uandajka eska marhuakusïnga Tata Diosïni, peru diosï úkateechani kómarhiani (1 Crón. 5:25; Sant. 4:4). Joperu para arhikuekani nemani enga no jurajkujka Tata Diosïni, arhiasïndi eskaksï pímbinhasïsïnga o eskaksï no méni ísku jándikua ambe niátasïnga (2 Kor. 11:2; Jaŋ. 14:4). Ióntki anapu Babilonia, kʼéri ireta máespti nani engaksï uánikua relijioni no jurhimbiticha japka. Ísï jimbo, Kʼéri Babilonia jindeesti iámindu relijioni no jurhimbiticha engaksï no ísï kʼéri ambe arhijka Tata Diosïni eska ima na uéjka (Jaŋ. 17:5, 18; exe je jorhenguarhikuani “¿Qué es Babilonia la Grande?” enga jw.org jimbo jaka).
17. ¿Ambe úkuarhinchaa Kʼéri Babilonia?
17 ¿Ambe úkuarhinchaa Kʼéri Babilonia? Jaŋaskuecha 17:16, 17 uandasïndi: “Ima diesi sïuanguecha engari imani animalini exekuaka, ikiauatiksï exeni imani uarhiiti ísku jándini, ka nóteruksï presia uaati, ka patsïkʼasïksï jurajkuati, ka asta atanksï jamberi imeeri kuerpuni, ka chpiri jimbo kurhirantanksï, jimboka [Tata] Diosï eratsetaraaska para eskaksï úpiringa indeni ambe enga ima uékeenga”. Ísïisti, Tata Diosï uaati eskaksï juramutiicha úraaka animali charhapitini enga jindeeka Naciones Unidas para no sési kaani relijioni no jurhimbitichani ka kʼamajkuani para méntkisï (Jaŋ. 18:21-24).
18. ¿Ambechi jatsiski para úni parachi no úni imani ambe enga Kʼéri Babilonia újka?
18 Ambe engachi jorhenguarhijka. Jukaparhakuesti eskachi seguiriuaka ísï kómarhini Tata Diosïni eska ima na uéjka ka no ma “kʼamanharhintskua jingoni” (Sant. 1:27). Ju je no jurajkuni eska Kʼéri Babilonia uaaka eskachi imani ambe jakajkuaka enga ima jorhentpijka, eskachi uántauaka kʼuínchikuechani engaksï no sési jaka, eskachi imani ambe eratseaka ka úni ambe enga ima uéjka o eskachi imani ambe uaaka enga demoniuecheri ambeka. Ka ju je seguirini arhiani kʼuiripuechani: “Uéakunta je indeni iretarhu”. Engaksï kʼuiripuecha ísï úska, Tata Diosï no arhiauati eskaksï imeechajtu imani pekaduechani uaaxaka enga Kʼéri Babilonia uaani jaka (Jaŋ. 18:4).
AMBE ENGA ÚKUARHINCHAAKA TATA DIOSÏRI SÁNDERU KʼÉRI IKIATSPITI
DRAGONI CHARHAPITI
Satanasi juramukua íntskusïndi ini animalini (Jaŋ. 12:3, 9, 13; 13:4; 20:2, 10). Satanasi enga sánderu kʼéri ikiatspitiika Tata Diosï Jeobaeri, 1,000 uéxurhini ónhakata jauati posurhu ma. Tátsekua, kʼuanijpanhaati “imani japondarhu enga méntku kurhini jaka chpiri asufri jingoni”. (Párrafuecha 19 ka 20).
19. ¿Né jindeeski kʼéri dragoni charhapiti?
19 Libru Jaŋaskuecha ístu uandasïndi “ma kʼéri dragoni” charhapitiri (Jaŋ. 12:3). I dragoni uarhiperasïndi Jesúsi jingoni ka imeeri ánjelicha jingoni (Jaŋ. 12:7-9). Ístu, no sési kámasïndi Tata Diosïri iretani ka uinhapikua íntskuasïndi animalichani engaksï jindeeka politikarhu anapu (Jaŋ. 12:17; 13:4). ¿Né jindeeski i dragoni? Jindeesti “ióntki anapu akuitsi” enga jindeeka “Noambakiti ka Satanasi” (Jaŋ. 12:9; 20:2). Ima jindeesti enga juramukuajka iámindu Tata Diosïri ikiatspitichani.
20. ¿Ambe úkuarhinchaa dragoni?
20 ¿Ambe úkuarhinchaa dragoni? Jaŋaskuecha 20:1-3 uandasïndi eska ánjeli ma posurhu ma kʼuaninhaaka Noambakitini ka jima ónhaati. Noambakiti ónhakata jauati 1,000 uéxurhini ka nóteru uaati ʻkʼarhaani kʼuiripuechaniʼ astaka na kʼamakurhiaka i 1,000 uéxurhini. Ka últimu, Satanasi ka imeeri demoniuechaksï kʼuanijpanhaati imani “japondarhu enga méntku kurhini jaka chpiri asufri jingoni”. I ambe arhikuekasïndi eskaksï kʼamajkunhaaka para méntkisï (Jaŋ. 20:10). ¿Eranhaskasïntsï na engachi irekaaka enga nóteru jauakia Satanasi ka imeeri demoniuecha? ¡Xáni ambakiti ambe!
21. ¿Andijtsïnisï sési pʼikuastajki ambe enga uandajka libru Jaŋaskuecha?
21 ¿A no eskajtsïni kánikua uinhaperantasïnga ambe enga arhikuekajka ima ambe enga libru Jaŋaskuecha uandajka? Jorhenguarhiskachi né engaksï jindeeka Tata Diosï Jeobaeri ikiatspiticha, ístuchi exeska ambe engaksï úkuarhinchaaka. Ísïisti, “na xáni sési uéraa ima enga arhintajka ka ístu imeecha engaksï kurhandiani jarhajka uandakuechani engaksï [...] ixú karakata jaka” (Jaŋ. 1:3). Joperu, ¿náki kóntperatechanksï jatsiaua imeecha engaksï no méni jurajkuaka Tata Diosïni jiáni engaksï kʼamajkunhaakia imeeri ikiatspiticha? Ini ambechi exeaka últimu jorhenguarhikuarhu i serieri.
PIREKUA 23 Jeoba uénastia juramuni
a Libru Jaŋaskuecha úraasïndi símboluechani para xarhatani néksï jindeeski Tata Diosïri ikiatspiticha ka Danieliri libru jarhuatasïndijtsïni kurhanguni ambeksï arhikuekasïni inde símboluecha. I jorhenguarhikua terukutantaasïndi máru profesiechani engaksï Danieliri libru jimbo jaka imeecha jingoni engaksï libru Jaŋaskuecha jimbo jaka. I profesiechajtsïni jarhuataati míteni néksï jindeeski Tata Diosïri ikiatspiticha. Ka tátsekuachi exeaka néna engaksï kʼamajkunhaaka.
b ‘Diesi sïuanguecha’ jindeestiksï máteru ambe enga xarhatajka eska i animali enga siete éjpuechani jukaaka arhikuekasïnga iámindu juramutichani. Bibliarhu, mémindu úrakuarhesïndi númeru diesi para arhikuekani ambe ma enga kompletu jarhajkia.
c I animaliri imajeni no májkuenisti primeru animali jingoni, jimboka animaliri imajeni no jukaaska koronechani o diademechani imeeri sïuanguecharhu (Jaŋ. 13:1). Ka i jindeesti, jimboka i, máteru siete reicha jimbo uérasïnga ka imaksïsï juramukua íntskujti (exe je jorhenguarhikuani “¿Qué es la bestia de color escarlata del capítulo 17 de Apocalipsis?” enga jw.org jimbo jaka).