Ambe enga kurhanguarhijka ima enga arhintajka
No ióni jimbo, ¿ambe eratsetaraua Tata Jeoba kʼérati paisiichani?
Apokalipsisi 17:16, 17 uandasïndi néna enga ueenakuarhu ima tiempu enga kʼuiripu kánikua no sési nitamakuarhiaka: “Inde 10 sïuanguecha engari exeaka ka no sési jásï animali, kurhunhiatiksï uarhiiti ísku jándini, xáskuksï jurajkuati ka patsïki jásï. Ántaatiksï ka uarhiitinksï iámu kurhiraati chpiri jingoni. Jimboka Tata Diosï eratsetaraaska paraksï indeecha úni ambe enga Tata Diosï eratsetini jaka úni, o indeni ambe engaksï imeecha májku jásï uéjka úni, jimboksïsï juramukua íntskujti no sési jásï animalini”. Ióntki, publikasioniichaksï uandasïreendi eska Tata Jeoba eratsetaraapinga paisiichani paraksï kʼamajkuani iámu relijioni no jurhimbitiichani.
Joperuchi iásï sánderu sési kurhanguskia ini ambe. Inde eratsekua enga Tata Jeoba eratsetarauaka nasioniichani, jindeesti íntskuni “juramukua no sési jásï animalini”. Parachi exeni néna úkuarhia ini ambe, ju je exeni máru ambe.
¿Neechaksï jarhaski ini profesiecha jimbo? “Uarhiiti ísku jándi” enga ístu arhinhajka “Kʼéri Babilonia” ka enga interu parhakpini anapu relijioniichani arhikuekaajka. Ka “no sési jásï animali charhapiti” enga jindeeka ima organisasioni enga 1919 jimbo uaxastanhaka para úni eska pínandikua japiringa parhakpinirhu. I organisasioni antesi jindeespti Sociedad de Naciones ka iásï jindeestia Organización de las Naciones Unidas (Apok. 17:3-5). Ka inde “10 sïuanguecha”, arhikuekasïndi iámindu gobiernuechani engaksï apoiarijka no sési jásï animalini.
¿Néna sési pájperasïni ísku jándi no sési jásï animali charhapiti jingoni? Biblia uandasïndi eska uarhiiti ísku jándi no sési jásï animalini “jatarhixaka”, i ambe arhikuekasïndi eska no sési jásï animali apoiarisïnga uarhiiti ískuni jándini para mámaru ambe úni.
¿Ambe úkuarhinchaa uarhiiti ísku jándi? No sési jásï animali ka 10 sïuanguecha, “kurhunhiatiksï uarhiiti ísku jándini” ka euantaatiksï ambe enga xáni jatsikuarheka ka uandakuntaatiksï ambe enga xáni no sési niátaka. Tátsekuaksï uaati ambe enga Tata Jeoba uandarini jakaia, kʼamajkuatiksï para méntkisï uarhiiti ísku jándini (Apok. 17:1; 18:8). Ka ísïksï niárati kʼamajkunhani iámindu relijioniicha engaksï no jurhimbitiika. Joperu ante de i ambe úkuarhini, Tata Jeoba uaati eskaksï kʼérati paisiicha imani ambe uaaka engaksï no méni úni japka.
¿Ambe uaa Tata Jeoba eskaksï uaaka gobiernuecha? Tata Diosï eratsetarauati indeni 10 sïuanguechani paraksï úni ambe enga Tata Diosï eratsetini jaka úni: eskaksï íntskuaka “juramukua ka uinhapikua no sési jásï animalini” enga jindeeka Naciones Unidas (Apok. 17:13). Eskachi na exekia, i profesia xarhataxati eska Tata Jeobasï eratsetarauaka indeni sïuanguechani paraksï juramua íntsku no sési jásï animalini (Prov. 21:1; terukutanta je Isaías 44:28). Joperuksï no sánhani arhiati íntskuni uinhapikua sino méntku ma repentku. Ka ísï eska Tata Jeoba na uandarini jakaia, enga na inde no sési animali intsïnhaakia uinhapikua, ueenaati kʼamajkuani iámindu relijionichani engaksï chkuanderakua ambe jorhentpijka.
¿Jiájkani ambechi erokuarhixaki eska úkuarhiaka? Nóchi erokuarhixaka kurhaani eskaksï gobiernuecha sánhani arhiaka apoiarini indeni organisasionini enga jindeeka Naciones Unidas. Sánderu sési, erokuarhixakachi eska Tata Jeoba mátirku eratsetarauaka kʼérati paisiichani paraksï íntskuni uinhapikua no sési jásï animalini. Ka enga na ísï úkuarhiakia, míteakachia eska ueenakuarhiakia ima tiempu enga kʼuiripu kánikua no sési nitamakuarhiaka. Joperu enga jamberi niáraka inde jurhiatikua, “ju je méntkisï tsínharhitini jarhani ka ju je seguiriini jarhani sési eratseni”, jimboka no ióni jimbo mátirku mójtakuarhiati iámu ambe (1 Tes. 5:6).