Tumbi, engari itsï atakuarhikia seguiri jánguarhintani ambakiti kristianu máeni

1. ¿Ambeksï úskia uánikua tumbiicha asta iásï jamberi?

MÁNDANI uéxurhini, uánikua tumbiichaksï niárasïndi itsï atakuarhini. ¿Tʼujturi ísï úskia? Enga ísïika, kúnguarhikuarhu anapuecha ka ístu Tata Diosï Jeoba kánikuaksï sési pʼikuarherasïndi (Prov. 27:11). Eratsi na engari xáni jánguarhintakia iásï jamberi. Pori ejemplu, kánikuari jorhenguarhikia Biblieri ambe, jamberi uánikua uéxurhinia ka jimborisï seguru jakaia eska Biblia Tata Diosïiri Karakateska. Joperu sánderu jukaparhakua ambe, niáraskari míteni ka xénchani imani enga kararkuarhika Bibliani. Jimbokari niáraska xáni xénchani Tata Diosï Jeobani, aiakukuarheskari ka itsï atakuarhini. ¡Kánikuari sési úska!

2. ¿Ambechi exea ini jorhenguarhikua jimbo?

² Engari uandapkia eskari itsï atakuarhipiringa, seguru eskari uánikua tsʼéjkukuechani jatsiapka. Ka sánderu orhepatini jauatiksï máteru tsʼéjkukuecha jimboka Satanasi jánguarhintaaka parakari nóteru xénchaakia Tata Diosï Jeobani ka eskari jarhariaka imani (Efes. 4:14). ¡Asï jurajku eska ima andaaka! ¿Ambekini jarhuataa parari no jurajkuni Tata Diosï Jeobani ka úndi ambe engari aiakukia? Jatsiskari para seguirini jánguarhintani parari “jánhaskatiini” (Ebr. 6:1). Ini jorhenguarhikua jimbo, exeakachi nénari uaa ísï úni.

AMBE ENGARI UAAKA ÚNI PARARI SÁNDERU AMBAKITI KRISTIANU MÁENI

3. ¿Ambeksï jatsiski para úni iámindu kristianuecha engaksï itsï atakuarhikia?

³ Enga nema itsï atakuarhijka jatsisti para imani ambe úni enga apostoli Pablu arhiapka Éfesu anapu kristianuechani. Arhiaspti eska para Tata Diosïiri ambe jingoni, jatsispkaksï para ísïini ‘komueska ma acheeti enga uiuinhasïikaʼ (Efes. 4:13). Enga ísï arhiapka, ísïispti komu arhiani jarhani “Seguiri je jánguarhintani”. Na engachi jánguarhintajka para Tata Diosïiri ambe jingoni, Pablu ísï terukutantaspti komu na enga kʼépani jarhajka sapi ma. Taaticha engaksï charhakuni ma kánguarhijka, kánikuaksï xénchasïndi ka sésiksï pʼikuarherasïndi imani jingoni, peru imeecheri sapi no uaati méntkisï charhakueni. Enga nitamaakia tiempu jatsiati para jurajkuni “sapirhaticheeri ambe” (1 Kor. 13:11). Ka sáno májkuenisti juchantsïni jingoni: engachi na itsï atakuarhijkia, jatsiskachi para seguirini jánguarhintani. Ju je exeni máru ambe engakeni jarhuataaka ísï úni.

4. ¿Ambekini jarhuataa parari sánderu sési marhuakuni Tata Diosï Jeobani, ka andi? (Filipusʌ 1:9).

⁴ Jánguarhinta parari sánderu xénchani Tata Diosï Jeobani. Xarhataskaria eskari kánikua xénchasïnga Tata Diosï Jeobani, joperuri uaaka sánderu xénchani. ¿Nénari uaa ísï úni? Apostoli Pablu uandaspti na engari uaaka ísï úni, ixú Filipusʌ 1:9 (arhinta). Pablu kurhakuspti Tata Diosï Jeobani eska jarhuataapiringa Filipusï anapuechani parakaksï ‘sánderu ka sánderu uékperapiringa’. I ambe arhikuekasïndi eskachi uaaka sánderu xénchani Tata Diosïni. Peruchi jatsiska para seguirini jorhenguarhini imani ambe enga ísïika ka enga sési jaka para úni. Ísï jimbo, engachi sánderu mítejka Tata Diosï Jeobani sánderuchi xénchasïnga ka sánderuchi tsitisïnga na enga jásïika ima ka na enga újka ambe ma. Jimbochisï tsitijka sánderu sési pʼikuastani Tata Diosï Jeobani ka nóchi úni imani ambe enga no sési pʼikuastaaka. Jánguarhintasïngachi míteni ambe enga uéjka eskachi uaaka ka exeni nénachi uaa ísï úni.

5, 6. ¿Ambe máteru ambejtsïni jarhuataa parachi sánderu xénchani Tata Diosï Jeobani?

⁵ Máteru ambe engachi uaaka úni parachi sánderu xénchani Tata Diosï Jeobani, jindeesti sánderu sési míteni imeeri Uájpani, enga sési xarhatajka na enga jásïika imeeri Taati (Ebr. 1:3). Ka ambe engajtsïni uaaka jarhuatani parachi sánderu sési míteni Jesúsini, jindeesti arhiantani tʼámu Ebanjeliuechani. ¿Pʼindeskiria pauani pauani arhintani Bibliani? Engari nótki ísï úni jaka, uaakari iásï uénani ísï úni. Engari arhintani jauaka ambe enga Jesúsi úpka ka uandani, jánguarhi exeni na enga jásïika. Kʼuiripuechaksï sési pʼikuarherasïreendi imani jingoni jarhani ka ístu imani jingoni uandontskuarheni, asta niáraspti sapiichani jamberi kamanharhiani (Mar. 10:13-16). Jánguarhintasïreendi parakaksï imeeri chúxapatiicha sési pʼikuarherapiringa; jimboksïsï imeecha no cheendi iámu ambe aianguni (Mat. 16:22). Jesúsi ísï kámpisïreendi jimboka Tata Diosï Jeoba ísï kámpisïnga. Tata Diosï iáminduechani sési pʼikuastaasïndi. Ísï jimbo, engachi kómarhini jauaka, uaakachi imani jingoni uénhekuarhini iámu ambe. Ka engachi ísï uaaka, uaakachi seguru jarhani eska ima no no sési eratseaka juchaari ambe. Imajtsïni xénchasïndi ka pendienti jarhasïndi juchantsïni jimbo (1 Ped. 5:7).

⁶ Jesúsi pʼamojkuasïreendi kʼuiripuechani. Apostoli Mateu uandaspti: “Enga exeapka xáni uánikua kʼuiripuechani, lástima uaaspti jimbokaksï jandiajku jámaxapka ka etsakuarhitini komueska karichicha engaksï nómbe erangutini jatsijka” (Mat. 9:36). ¿Ka néna exeasïni Tata Diosï Jeoba kʼuiripuechani? Jesúsi ísï uandaspti imeeri Taatiri ambe: Ima “nómindu uékasïndi eska ma iini jásï sapichu tsïncheaka” (Mat. 18:14). ¡Kánikuachi sési pʼikuarherasïnga míteni na engajtsïni xáni xénchajka Tata Diosï Jeoba! Engachi sánderu sési míteaka Jesúsini, sánderuchi xénchaaka Tata Diosï Jeobani.

7. ¿Andisï sési jaki imeecheri amigu úkuarhini engaksï sési marhuakuni jaka Tata Diosï Jeobani?

⁷ Máteru ambe engakeni jarhuataaka parari sánderu xénchani Tata Diosï Jeobani ka parari sánderu sési marhuakuni, jindeesti imeecheri amigu úkuarhini engaksï sési marhuakuni jaka imani chiiti kúnguarhikuarhu. Exe na engaksï i erachicha méntkisï tsípikua jingoni jámajka. Nóksï pʼamondakuarhisïndi engaksï erakuka Tata Diosïni marhuakuni. Uaakari arhiani eskaksïni aianguaka máru ambe engaksï nitamakuarhika imani tiempu jimbo engaksï marhuakukia Tata Diosï Jeobani. Ka engari uékani jauaka jukaparhakua ambe úni arhia imeechani paraksïni jarhuatani. Jimbosï Biblia uandajti: “Engaksï uánikua arhistatspitiicha jarhajka sési uérasïndi ambe ma” (Prov. 11:14).

8. ¿Amberi uaa úni engari no seguru jauaka ambe máeri enga Biblia jorhentpijka?

⁸ Jánguarhinta seguru jarhani ambe engari jakajkujka. Eskachi na exeka párrafu 2 jimbo, Satanasi jánguarhintaati parakari no uaaka sánderu andarhierani Tata Diosï Jeobani nijtu mintsikani. Ima jánguarhintaati parakari nóteru seguru jauakia eska jurhimbikueska ambe engari jorhenguarhikia Bibliarhu. Pori ejemplu, niáraati jurhiatikua engakeni nema arhiaka eskajtsïni no Tata Diosï kueraaska, sino eskachi ebolusioni jimbosï jaka. Engari sapiipka jamberiri no eratseenga ini ambe, peru iásï engari uátsï o tumbiikia, jamberiri ueenakia kurhaani i ambe eskuelarhu. Ka jamberi uaati ísï xarharani enajki ísïi ambe engaksï maestruecha uandajka. Peruksï jamberi imeecha no méni arhutati tiempu paraksï exeani pruebechani engaksï xarhatajka eska jarhaska Kueraajpiri ma. Miá ambe enga uandajka Proverbios 18:17: “Enga orheta uandantajka ísï xarhatasïndi enajki ísïi ambe enga ima uandajka, astaka niárajka máteru ka sési kurhamarhini”. ¿Ambejtsïni jorhendasïni i tekstu? Eskari no jatsiska parari iámindu ambe jakajkuni ambe engaksïni eskuelarhu arhiaka. Sánderu sési, sési exe ambe enga uandajka Tata Diosïiri Karakata. Jirinhanta sánderu informasioni juchaari publikasionicharhu. Uaakari uandontskuarheni erachicha jingoni engaksï antesi ebolusioniri ambe jakajkuenga ka kurhamarhia nénaksï niáraski seguru jarhani eska jarhaska Kueraajpiri ma engajtsïni kánikua xénchajka.b Iiri ambe uandontskuarheni jarhuataatikeni parari exeani pruebechani engaksï xarhatajka eska jarhaska Kueraajpiri ma.

9. ¿Amberi jorhenguarhisïni ima ambeeri enga Melissa nitamakuarhipka?

⁹ Pirenchini ma enga Melissa arhinhajka, kánikua jarhuatasti enga ima sánderu jorhenguarhipka kueraakateri ambe.c Ima uandantasïndi: “Engaksï maestruecha ebolusioniri ambe jorhentpini jarhajka ísïksï uandasïndi enajki meru ísïi inde ambe. Uénani jámani, no uékasïreenga inbestigarini jimbokani chésïreenga eska inde ambe úpiringa eskani nóteruni jakajkupiringia Tata Diosïni. Arhintaspka libruni ¿Existe un Creador que se interese por nosotros? ka foietuechani ¿Es la vida obra de un Creador? ka El origen de la vida. Cinco cuestiones dignas de análisis. Meru ini ambesïni kueratanchani japka jorhenguarhini. Tsitipiringa antesi úni ini ambe”.

10, 11. ¿Ambekini jarhuataa parari no no sési jásï ambe úni? (1 Tesalonika 4:3, 4).

¹⁰ Jánguarhinta no no sési ambe úni. Enga ma tumbi sapichuejka o iurhitskiri máeni, ménisï niárasïndi pʼikuarherani relasioni seksuali uékani jatsini ka jamberiksïni máteruecha arhini eskari ísku jándikua ambe niátaaka. Ka Satanasi uékasïndi eskari imani ambe uaaka enga no sési jaka. ¿Ambekini jarhuataa parari p’íngukuarhini? (Arhinta 1 Tesalonika 4:3, 4). Engari kómarhiaka Tata Diosï Jeobani, aiangukuarhi na engari pʼikuarherajka ka arhi eskakeni íntskuaka uinhapikua (Mat. 6:13). Miá eska ima tʼungini jingoni jarhaska parakeni jarhuatani ka no parakeni xukani (Sal. 103:13, 14). Ka Bibliajtukini uaati jarhuatani. Melissa, ima engachi máteru párrafu jimbo uandaka, kánikua jánguarhintaspti para nóteru ikichakueni jásï ambe eratsenia. Ima uandasïndi: “Orhepani uéraska jimbokani pauani pauani arhintasïreenga Bibliani. Inde ambeerini miátantasïreendi eska juchiiti tsípikua Tata Diosï Jeobaeriska ka uékasïnga eska ima méntkisï jíndeni jingoni jauaka” (Sal. 119:9).

¹¹ Asï jáma jandiajku orhepani uérakuani uandanhiatechani. Aiangu papani o mamani ambe engari nitamakuarhini jaka. Ísïisti, no fásiliisti parari chiiti ambe uandantani, joperu uétarhisïndi eskari ísï uaaka. Melissa miásïndi: “Kurhakuspka Tata Diosï Jeobani eskarini jarhuatapiringa balori jukani ka tátsekua uandontskuarhekuspka papani ambe engani nitamakuarhini japka. Tátsekua kánikua sési pʼikuarherantaspka. Míteska eska Tata Diosï Jeoba kánikua sési pʼikuarherasïnga jíndeni jimbo”.

12. ¿Ambekini jarhuataa parari sési erakuni úni ambe ma?

¹² Ísï ú eskaksï Bibliarhu anapu prinsipiuecha na uandajka. Engari na kʼépani jauaka, sánhani arhiakari jandiajku erakuni ambe úni. Joperu asï mirikurhi eskari útasï uánikua ambe nótki mítexaka. ¿Ambekini jarhuataa parari no no sési ambe úni ka seguirindi jarhani sési pájperani Tata Diosï Jeoba jingoni? (Prov. 22:3). Pirenchi ma enga Kari arhinhajka, miásïndi ambe enga jarhuatapka para sési erakuni úni ambe ma. Exespti eska kristianu ma enga jánhaskatiika no uétarhinchasïnga eska Biblia méntku iámindu ambe uandaaka ambe enga ma jatsika para úni. Kari uandasïndi: “Jatsispka parani kurhanguni na enga exejka Tata Diosï Jeoba ambe ma ka no solu juramukua ma kumplirini jarhani”. Engari arhintaaka Bibliani, kurhamarhikuarhi: “¿Amberini jorhendasïni i uandantskua na enga eratsejka Tata Diosï Jeoba? ¿Jarhaski prinsipiu ma engareni jarhuataaka úni ambe enga sési jaka? Engani ísï úska eska inde prinsipiu na uandajka, ¿ambe andaa?” (Sal. 19:7; Is. 48:17, 18). Engari arhintaska Bibliani ka eratseantani prinsipiuechani, sánderu fásiliuati para t’u imani ambe úni enga sési pʼikuastaaka Tata Diosïni. Ka jimbokari sánderu sési kurhangupani jauaka na enga eratsejka ima, exeakari eskari no uétarhinchasïnga juramukua ma méni engari uékaaka uaani ambe ma. Ka ísïri xarhataaka eskari kristianu máeska enga sési kurhangujka na enga eratsejka Tata Diosï.

13. ¿Nénaksïni uaa jarhuatani ambakiti amiguecha? (Proverbios 13:20).

¹³ Imani amiguechani erakua engaksï xénchajka Tata Diosï Jeobani. Eskachi na exeka párrafu 7 jimbo, chiiti amiguechaksïni uaati kánikua jarhuatani parari sánderu sési marhuakuni Tata Diosïni (arhinta Proverbios 13:20). Exe ambe enga nitamakuarhipka pirenchi ma enga Sara arhinhajka. Ima nóteru xáni tsitisïreendia Tata Diosï Jeobani marhuakuni, joperu jarhaspti ambe ma enga jarhuatapka. Ima uandantasïndi: “Ambakiti amiguechani exeantaspka meru jiáni engani sánderu uétarhinchaani japka. Mándani semana, juchiiti amiga ma jingonchi márku jorhenguarhisïreenga rebistani Aianhpiri ka máteru amigarini jarhuataspti parani tánguarhikuecharhu komentarini. Juchiiti amiguechajtsïni jarhuataspti parani sánderuni jorhenguarhini Biblieri ambe ka kómarhini. Sánhani arhiska sánderuni sési pájperani Tata Diosïni jingoni ka iásï ménderuni kánikua sési pʼikuarherasïngia”.

14. ¿Ambe úspi Julien para ambakiti amiguechani jatsiani?

¹⁴ ¿Amberi uaa úni parari ambakiti amiguechani jatsiani? Erachi ma enga Julien arhinhajka ka enga iásï orhejtsïkutiikia, miásïndi: “Engani sánderu sapichuepka, niáraspka sési pájperani imeecha jingoni engani jingoni uéreenga aianhpini. Imeechaksï tsípikua jingoni aianhpisïreendi ka jarhuatasptijtsïni exeni eska ma úsïnga tsípikua jingoni aianhpini. Uénaspka eratseni eskani jíjtuni úpiringa tiempu kompletueri marhuani. Ka kuenta íntskukuarhespka eskani ambakiti ambe tsïtakuarhixapka, sési pájperani máteruechani jingoni ka solu imeecha jingoni engaksï májkueni jatiripka eskani ji. Tátsekua, engani ueenapka Beteli marhuani, ístuni niáraspka ambakiti amiguechani jatsiani. Imeechajtsïni jarhuataspti exeni ambe jingoni úpirini tsípikuarhini ka inde ambe úspti eskani sánderuni sési pájperapiringa Tata Diosï Jeoba jingoni”.

15. ¿Ambe arhispi Pablu Timoteuni? (2 Timoteo 2:20-22).

¹⁵ Ka engari exeska eska kúnguarhikuarhu jarhaska nema engakeni úpiringa támisï páni, ¿amberi uaa úni? Apostoli Pablu mítespti eska primeru siglurhu anapu kúnguarhikuarhu jarhaspkaksï kʼuiripuecha engaksï no xáni sési pájpereenga Tata Diosï Jeoba jingoni. Jimbosï arhipti Timoteuni eska no jámapiringa imeechani kúrhiani (arhinta 2 Timoteo 2:20-22). Kánikua jukaparhakuesti sési pájperani juchaari Taati auandarhu anapu jingoni, ka jimbokachi kánikua jánguarhintasïnga ísï úni, nóchi uékasïnga eska nema uaaka eskachi nóteru sési pájperaakia imani jingoni (Sal. 26:4).

METEECHAKSÏNI JARHUATAATI PARARI SÁNDERU SÉSI MARHUAKUNI TATA DIOSÏNI

16. ¿Náki meteechandi úpirini jatsiani?

¹⁶ Ambakiti meteechani jatsikukuarhia. ¿Nákiskiksï inde meteecha? Imeecha engaksïni jarhuataaka sánderu mintsikani Tata Diosï Jeobani ka engaksïni jarhuataaka sánderu ambakiti kristianu máeni (Efes. 3:16). Pori ejemplu, úpiringari sánderu jánguarhintani jandiajku jorhenguarhini Biblieri ambe ka ístu arhintani (Sal. 1:2, 3). Ori jamberi uaaka sánderu someni kómarhini Tata Diosï Jeobani ka mintsita jingoni. Jamberiri jatsiaka parari sánderu sési exeni ambe engari jingoni tsípikuarhiaka ka sánderuri sési úrani tiempuni (Efes. 5:15, 16). Tata Diosï kánikua sési pʼikuarherasïndi engari t’u jánguarhintajka na engari xáni uaaka sánderu sési marhuakuni.

17. ¿Andikinisï marhuachea engari jarhuataaska máteruechani?

¹⁷ Engari jarhuataajka máteruechani, sánderuri ambakiti kristianu máesïnga. Jesúsi uandaspti: “Sánderu sésiisti intsïmpini ka eska intsïmbinhani” (Uku. 20:35). Engari úraska chiiti tiempuni ka chiiti uinhapikuani parari jarhuataani máteruechani, kánikuakeni marhuacheati. ¿Nénari úpirini jarhuataani máteruechani? Pori ejemplu, kúnguarhikuarhu, úpiringari jarhuataani imeechani engaksï jatirikia o ánchperata ambe úkuani imeechani engaksï pʼamenchani jaka o imeecheri aparatu elektronikuecha jingoni jarhuataani. Ka engari tumbiika ka itsï atakuarhindia, úpiringari orhejtsïkutiri jarhuajpirini parari erachichani marhuakuani (Filip. 2:4). Ísturi uaaka xarhatakuani uékperakua imeechani engaksï no míteka Tata Diosïni ka uaakari ísï úni engari niuaka aianguani ambakiti aianhperakuani Tata Diosïiri Reinueri ambe (Mat. 9:36, 37). Ka engari uaaka, marhua tiempu kompletueri.

18. ¿Nénakini jarhuataa tiempu kompletueri marhuani parari sánderu ambakiti kristianu máeni?

¹⁸ Engari tiempu kompletueri marhuaska, jarhuataatikeni parari sánderu ambakiti kristianu máeni. Engari niáraska prekursoriini, uaakari nirani Jorhentperakuarhu para Aianhpiricha Reinueri o Beteli, o konstruksionirhu jarhuajpeni. Exe ambe enga uandajka pirenchi ma enga prekursoreeka ka enga Kaitlyn arhinhajka: “Ambakiti aianhpiricha jingoni uérani aianhpini, inde amberinisï jarhuatapti sánderuni marhuakuni Tata Diosïni engani na itsï atakuarhipkia. Imeecheri ejemplurini kánikua jarhuatasti parani jíjtuni sési jorhenguarhini Biblieri ambe ka parani sánderuni sési jorhentpini”.

19. ¿Náki kóntperatechandi jatsiaua engari sánderu ambakiti kristianu máeuaka?

¹⁹ Engari jánguarhintaska sánderu ambakiti kristianu máeni, Tata Diosï Jeobakini uánikua kóntperatechani íntsauati. Nóri ísku úrani jauaka chiiti uinhapikuani para imani ambe úni enga no marhuajka (1 Juanu 2:17). Nóri ísku jatini jirinhakurhiauaka uandanhiatechani. Sánderu sési, tsípikua jingondi irekaaka ka sésikeni nicheati (Prov. 16:3). Chiiti ejemplujtu jarhuatauati kúnguarhikuarhu anapu tumbiichani ka imeechani engaksï jatirikia (1 Tim. 4:12). Ka sánderu jukaparhakua ambe, jindeesti eskari pínandikua jatsiaka ka eskari sési pʼikuarheraaka jimbokari míteska eskakeni Tata Diosï Jeoba jaiapanhentasïnga ka eska chiiti amigueska (Prov. 23:15, 16).