SEMANA 34
Ju je seguirini jurhimbikuarhu jámani
“No ma ambe jimbo sánderuni tsípisïnga ji ka eskani para míteni jarhani eska juchiiti uátsïicha [o uájpeecha] jámaxaka eska na terukuntajka indeni uandakuani jingoni enga ísïika” (3 JUANU 4).
PIREKUA 111 Ambe engachi jimbo tsípini pʼikuarherajka
AMBE ENGACHI EXEAKAa
1. ¿Andisï sési jaki eskachi uandontskuarheaka máteruecha jingoni na engachi míteka jurhimbikuani?
“¿NÉNARI niáraski míteni jurhimbikuani?”. Seguru eskachi uánikua xanhari kurhamarhinhaskia i ambe. Ini ambejtsïni kurhamarhisïndi erachicha engachi primeru xanhari ueenajka uandontskuarheni imeecha jingoni. Kánikuachi tsitisïnga kurhaani na engaksï juchaari erachicha niáraka míteni jurhimbikuani ka xénchani Tata Diosï Jeobani. Ka ístuchi kánikua tsitisïnga aianguani na engachi xáni jukaparhajka Biblieri jurhimbikua ambe (Rom. 1:11). Engachi iiri ambe uandontskuarhejka, miátantasïndijtsïni na enga xáni kʼéri kóntperata máeka Jeobaeri testigueni. Ka ístujtsïni jarhuatasïndi parachi seguirini jámani indeni uandakua jingoni “enga ísïika”, i ambe arhikuekasïndi eskachi mintsita jingoni uékasïnga ísï irekani eska Tata Diosï na uéjka ka eskachi uékasïnga eskajtsïni ima jaiapanhentaaka (3 Juanu 4).
2. ¿Ambechi exea ini jorhenguarhikua jimbo?
2 Ini jorhenguarhikua jimbo, exeakachi máru ambe engachi jimbo kánikua jukaparharajka jurhimbikuarhu jarhani. Ístuchi exeaka na engachi uaaka xarhatani eskachi meru jukaparharasïnga ini xáni ambakiti regaluni. Seguru eska i jorhenguarhikua uaaka eskachi sánderu agradesidu jauaka Tata Diosï Jeoba jingoni engajtsïni ísï andaparhateraka jurhimbikuarhu (Juanu 6:44). Ka ístuchi sánderu uékaaka aianguani máteruechani jurhimbikueri ambe.
ANDICHISÏ XÁNI TSITIJKI JURHIMBIKUARHU JARHANI
3. ¿Ambe jimbochi sánderu tsitisïni jurhimbikuarhu jarhani?
3 Uánikua ambe jarhasti engachi jimbo kánikua tsitijka jurhimbikuarhu jarhani. Ka enga sánderu jukaparhakueka, jindeesti eskachi xénchasïnga Tata Diosï Jeobani, jimboka imasï jorhentpijka jurhimbikua ambe. Imeeri Karatakani jimbo, enga jindeeka Biblia, jorhenguarhiskachi eska ima úska auandani ka Echerini jimboka kánikua uinhapiska. Ka sánderu ambakiti ambe, eska ima jindeeska juchaari Taati auandarhu anapu engajtsïni xénchajka ka enga uandanhiajka juchantsïni jimbo (1 Ped. 5:7). Míteskachi eska ima pʼamojpisïnga ka sési kámpini, eska no sóntku ikiasïnga o eska tekaantstiiska ka enga kánikua uékpijka ka jurhimbitiini (Éx. 34:6). Ima kánikua jukaparharasïndi jurhimbikuani (Is. 61:8). Tata Diosï Jeoba kánikua no sési pʼikuarherasïndi engachi jucha no sési nitamakuarhini jarhajka ka uékaxatiia eska niáraakia ima jurhiatikua enga uandakia para kʼamajkuni kómu nitamakuani (Jer. 29:11). ¡Mintsita jingonchi uékaxakaia eska niáraaka inde jurhiatikua! Inde jindeesti ambe ma engachi jimbo kánikua xénchajka Tata Diosïni.
Biblieri jurhimbikua ísïisti komueska... ankla ma
Ísï eska ankla ma na újka eska barku ma no manakuarhiaka itsïrhu, ambe engajtsïni Biblia aiachijka para sánderu orhepatini, úsïndi eskachi no jukari uandanhiauaka engachi no sési nitamakuarhini jauaka. Ístu, Biblieri jurhimbikua úsïndi eskachi uandontskuarhekuauaka máteruechani ima ambeeri engachi erokuarhini jaka. (Exea je párrafuechani 4 a 7).
4, 5. ¿Andisï apostoli Pablu uandapi eska ambe engachi erokani jaka ísïiska komueska ankla ma?
4 Máteru ambe engachi jimbo kánikua tsitijka jurhimbikuarhu jarhani, jindeesti jimbokajtsïni kánikua jarhuatasïnga juchaari tsípikuarhu. Ju je exeni ejemplu ma. Bibliarhuchi jorhenguarhiska ambe enga Tata Diosï Jeoba uaaka sánderu orhepatini. Para xarhatani na enga xáni jukaparhakueka i ambe apostoli Pablu karaspti: “I ambe enga jucha erokani jaka ísïisti para juchaari almecha komueska ma ankla” (Ebr. 6:19). Ísï eska ankla ma na újka eska barku ma no manakuarhiaka itsïrhu, ambe engajtsïni Biblia aiachijka para sánderu orhepatini, úsïndi eskachi no jukari uandanhiauaka engachi no sési nitamakuarhini jauaka.
5 Enga Pablu ini ambe uandapka, kristianu erakukatechani eratseaxapti engaksï auandarhu niuaka irekani. Peru ístu inde ambe jindeesti para imeecha engaksï erokuarhini jaka irekani para méntkisï Echerirhu enga paraisu máeuakia (Juanu 3:16). Ísïisti, míteni eskachi uaaka irekani para méntkisï úsïndi eskachi tsípikua jingoni irekaaka.
6, 7. ¿Néna jarhuataspi Yvonnini ambe enga Biblia uandajka eska úkuarhiaka sánderu orhepatini?
6 Ju je exeni pirenchi Yvonniri ejempluni. Ima no Jeobaeri testiguespti enga sapichuepka. Ka jiánisï kánikua chérhisïreendi uarhikuani. Pirenchi miántasïndi eska ma xanhari arini ambe arhintaspka librurhu ma enga kánikua ísku pakatapka: “Ma jurhiani iáminduechachi niáraaka uarhini”. Ima uandantasïndi: “Indeni ambe jimbo no úsïreenga kʼuíni chúrikuechani, eratseni jarhasïreenga ambe úkuarhipirini sánderu orhepani. Eratsesïreenga: ʻ¿Andichisï xáni sántku irekajki? ¿Andisïni irekani jaki?ʼ. ¡Ji no uékasïreenga uarhini!”.
7 Enga Yvonne iurhitskiripkia, míteaspti Jeobaeri testiguechani. Ima uandantasïndi: “Niáraspka jakajkuni eskani úpiringa irekani para méntkisï Paraisurhu ma ixú Echerirhu”. Míteni jurhimbikuani kánikua jarhuatasti, ima uandantasïndi: “Iásï kʼóruni úsïngia kʼuíni ka nóteruni uandanhiasïngia imani ambe jimbo enga úkuarhiaka sánderu orhepatini, o uarhikuani jimbo”. Xarharasïndi eska Yvonne kánikua jukaparharasïnga jurhimbikua ambe enga Biblia jorhentpijka ka ístu kánikua tsitisïndi aianguani kʼuiripuechani ambe enga úkuarhiaka sánderu orhepatini (1 Tim. 4:16).
Biblieri jurhimbikua ísïisti komueska... tesoru ma
Marhuakuni iásï Tata Diosï Jeobani ka engachi uaaka marhuakuni para méntkisï enga imeeri Reinu juramuni jauakia, ísïisti eska tesoru ma. Sánderu ambakiti ambeesti eska ambe uéjki engachi jurajkuaka. (Exea je párrafuechani 8 a 11).
8, 9. a) Ejemplurhu enga Jesúsi uandapka, ¿néna xarhataspi acheeti eska jukaparharasïreenga tesoruni enga exentapka? b) ¿Nájtsï pʼikuarherasïni chá engajtsï jurhimbikuarhu jaka?
8 Ambakiti ambe Tata Diosïiri Reinueri, ístu jindeesti jurhimbikua ambe enga Biblia jorhentpijka. Jesúsi terukutantaspti jurhimbikua Reinueri ambe, tesoru ma jingoni enga jískakata jarhajka. Uandaspti: “Auandarhu anapu Juramukua ísïisti eska jukaparhakua ambe enga jískakata japka ma solari jimbo, ka enga ma acheeti exentapka, túskuntaspti, ka xáni enga tsípini japka níntaspti ka íntspikuarhini iámindu ambe enga jatsipka para piáni imani solarini” (Mat. 13:44). Eskachi na exeka, i acheeti no jámaxapti tesoru ma jirinhantani. Joperu enga exentapka, uánikua ambe jurajkuspti para úni jatsini: íntspikuarhispti iámindu ambe enga jatsikuarhepka. ¿Andisï ísï úpi? Jimboka mítespka eska ima tesoru kánikua jukaparhakuespka eska ambe uéjki máteru ambe.
9 ¿Májkuentsï pʼikuarherasïni chá engajtsï jurhimbikuarhu jaka? ¡Seguru eska jo! Míteskachi eska no ma ambe engajtsïni parhakpini aiachijka terukuntasïnga na engachi xáni tsípikua jingoni marhuakujka Tata Diosï Jeobani iásï ka engachi uaaka irekani para méntkisï engajtsïni Tata Diosïiri Reinu juramuchini jauakia. Sési pájperani Tata Diosïni jingoni sánderu jukaparhakua ambeesti eska ambe uéjki engachi jurajkuaka. Kʼéri kóntperata máesti imeeri amigueni. Ka kánikuajtsïni sési pʼikuastasïndi jaiapanherantani iámindu ambe jimbo engachi újka (Kol. 1:10).
10, 11. ¿Ambe jarhuataspi Michaelini paraka mójtakupiringa imeeri irekuani?
10 Uánikua kristianuechaksï uánikua ambe jurajkustia paraksï sési pʼikuastani Tata Diosïni. Máruksï jurajkustia ambakiti ánchikuarhita ma. Máteruechaksï nóteru jámasïndia jatsikuarhekua ambe jirinhani. Ka máteruechaksï mójtakustia imeecheri irekuani. Inde ambesï úpti Michael, enga kʼériitini jorhenguarhipka Biblieri ambe. Enga ima tumbiipka karati jorhenguarhispti. Ima uandantasïndi: “Para ji kánikua jukaparhakuespti uiuinhasï jarhani. [...] Ménichani, ísï pʼikuarherasïreenga enajkirini no nema úpirini andani”. Peru Michael, Bibliarhu jorhenguarhispti ambe enga eratsejka Tata Diosï Jeoba atajperakueri ambe (Sal. 11:5). Michael i ambe uandasïndi ima temungurhiriri engaksï jorhendapka Biblieri ambe: “Nójtsïni méni arhispti eskani nóteru jorhenguarhipiringia karati, solujtsïni jorhendasïreendi Biblieri jurhimbikua ambe”.
11 Enga Michael sánderu ambe jorhenguarhini japka Tata Diosï Jeobaeri ambe, sánderu xénchasïreendi. Mintsitarhu niárakuspti enga mítepka eska ima pʼamojkuasïnga imeeri marhuarichani. Tiempu jingoni, Michael niáraspti kurhanguni eska jatsispka para mójtakuni imeeri irekuani para méntkisï. Ima uandasïndi: “Mítespka eskani kánikua úkua jukanchapiringa jurajkuni karatini. Joperuni ístu mítespka eska engani jurajkupiringa, jaiapanherantapiringa Tata Diosï Jeobani ka seguru jarhaspka eska imani marhuakuni sánderu jukaparhakua ambeespka eska ambe uéjkini”. Michael kánikua jukaparharaspti jurhimbikua ambe enga jorhenguarhipka Bibliarhu ka inde ambe jarhuataspti paraka ima mójtakupiringa imeeri irekuani (Sant. 1:25).
Biblieri jurhimbikua ísïisti komueska... lámpara ma
Lámpara ma enga kánikua uinhanharhijka jarhuatasïndijtsïni parachi no tsïncheni jimeesïsï enga pápkʼandejka. Sáno májkueni, nájkirukachi irekani jaka Satanasiri parhakpinirhu enga kánikua no sési jánhaskuarhini jaka, Tata Diosïiri Karakatajtsïni jarhuatasïndi parachi úni orhepani uérani. (Exea je párrafuechani 12 ka 13).
12, 13. ¿Néna jarhuataspi Maylini Biblieri jurhimbikua ambe?
12 Para xarhatani na enga xáni jukaparhakueka, Biblia terukutantasïndi jurhimbikuani lámpara ma jingoni enga pápkʼandekuarhu meremerexejka (Sal. 119:105; Efes. 5:8). Mayli, enga Azerbaiyán anapueka kánikua agradesidu jarhasti jimboka Tata Diosïri Karakata kánikua jarhuataska imeeri irekuarhu. Imeeri familia tsimani relijionichanksï jatsiaspti: imeeri taati musulmanispti ka amamba judía. Mayli uandantasïndi: “Ji jakajkusïreenga eska Tata Diosï jarhaska, peru jarhaspti máru ambe engani no kurhanguenga. Ka eratsesïreenga. ʻ¿Andijtsïnisï kueraa Tata Diosï? ¿Para ambe marhuasïni eska nema kómu nitamakuarhiaka enga tsípiti jauaka ka ménderu kómu nitamakuarhini infiernurhu?ʼ. Kʼuiripu uandasïndi eska iámindu ambe enga úkuarhijka jindeeska jimboka Tata Diosï ísï uékaska ka inde ambe úsïreendi eskani eratsepiringa: ʻ¿Tata Diosï úsïni juchantsïni jingoni ambe enga ima uéjka? ¿Tsípisïni engachi jucha kómu nitamakuarhini jarhajka?ʼ”.
13 Mayli seguirispti jirinhantani mókuntskuechani ima ambeeri enga kurhamarhikuarhienga. Ka ísï tátsekua ueenaspti jorhenguarhini Biblieri ambe ka Jeobaeri testigu úkuarhispti. Ima uandasïndi: “Engani exepka eska ambe enga Biblia uandajka meru ísïiska, jarhuatastirini parani iásï sánderu sési ka pínandikua jingoni irekani”. Májkueni eska Mayli, iáminduecha engachi Tata Diosï Jeobani marhuakujka kʼéri ambechi arhisïnga jimbokajtsïni petantaska “kápindikuarhu” ka jimbokajtsïni peeraska “imeeri eramarhandikuarhu” (1 Ped. 2:9).
14. ¿Ambechi uaa úni parachi sánderu tsitini jurhimbikuarhu jarhani? (Ístu exe je rekuadruni “Máteru ambe enga jingoni terukuntajka jurhimbikua”).
14 Na enga Biblia terukutantajka jurhimbikuani xarhatasïndi na enga xáni jukaparhakueka míteni jurhimbikuani. Seguru eskajtsï chá eratsentani jaka máteru ambe enga jingoni terukukuarhintajka jurhimbikua. ¿Andichisï no jánguarhintajki exeni ambe máteru ambe jimbochi tsitisïni jurhimbikuarhu jarhani? Engachi sánderu tsitiaka jurhimbikuarhu jarhani, sánderuchi ambe uaaka para xarhatani eskachi jukaparharasïnga.
NÉNACHI XARHATASÏNI ESKACHI TSITISÏNGA JURHIMBIKUARHU JARHANI
15. ¿Ambechi uaa úni parachi xarhatani eskachi tsitisïnga jurhimbikuani?
15 Ma ambe engachi uaaka úni parachi xarhatani eskachi tsitisïnga Biblieri jurhimbikua ambe, jindeesti jánguarhintani jorhenguarhini Bibliani ka juchaari publikasionichani. Jimboka no arhiparini na engachi xáni ióni páni jakaia jurhimbikuarhu, méntkisï jarhasïndi ambe ma engachi jorhenguarhijka. Primeru xanhari enga uérapka i rebista inglesi jimbo, uandaspti: “Jurhimbikua, ísïisti eska tsïtsïki ma enga desierturhu jaka ka enga uitsakua enga kánikua kʼéka, enga chkuanderakuechani arhikuekajka, ójchakuratini jaka. Engajtsï uéjka exentani, jatsiskajtsï para jingontku jámani; [...] engajtsï uéjka pʼikuni, jatsiskajtsï para kʼutitseni. Asï konformarikuarhi je májku tsïtsïki jurhimbikueri jingoni. [...] Seguiri je pʼikuani; seguiri je jirinhantaani”. Parachi Biblieri ambe jorhenguarhini jatsiskachi para jánguarhintani, peru kʼórujtsïni i ambe kánikua marhuacheati.
16. ¿Nénajtsï jorhenguarhisïni chá Biblieri ambe paraksïni marhuacheni? (Proverbios 2:4-6).
16 Nóchi iáminduecha tsitisïnga arhintani ka jorhenguarhini Biblieri ambe, peru Tata Diosï Jeobajtsïni arhisïndi eskachi seguiriuaka jorhenguarhini parakachi sési kurhanguaka Biblieri jurhimbikua ambe (arhinta je Proverbios 2:4-6). Engachi jánguarhintaska ísï úni, kánikuajtsïni marhuacheati. Erachi ma enga Corey arhinhajka, uandasïndi eska jingontku arhintasïnga mándani bersikulu Biblieri. Ima uandantasïndi: “Arhiantasïnga notechani engaksï pájinarhu kétsekua jaka, jirinhantaasïnga referensia marjinalichani ka sánderuni inbestigarisïnga. [...] Engani ísï újka kánikuarini marhuachesïndi”. Ia sea engachi ísï jorhenguarhijka o ménderueni, engachi arhutajka tiempu ka jánguarhintani Biblieri ambe jorhenguarhini, xarhatani jarhasïngachi eskachi kánikua jukaparharasïnga jurhimbikuani (Sal. 1:1-3).
17. ¿Ambe arhikuekasïni jurhimbikuarhu jámani jarhani? (Santiagu 1:25).
17 Joperu no solu uétarhisïndi jorhenguarhini jurhimbikueri ambe. Parakajtsï ni i ambe marhuacheaka, jatsiskachi para jurhimbikuarhu jámani jarhani, i ambe arhikuekasïndi ísï irekani eskachi na jorhenguarhini jaka. Engachi ísï úska, Biblieri jurhimbikua ambejtsïni jarhuataati parachi tsípikua jingoni irekani (arhinta je Santiagu 1:25). ¿Ka nénachi uaa seguru jarhani eskachi jurhimbikuarhu jámaxaka? Erachi ma uandasïndi eskachi jatsiska para exekuarhini ambe engachi sési úni jaka ka ambe engachi uaaka sánderu sési úni. Ka apostoli Pablu uandaspti: “Joperu na uéjkichi xáni eratsekua jukarinia, ju je seguirini jarhani sési jámani indeni xanharu jimbo” (Filip. 3:16, TNM).
18. ¿Andichisï xáni jánguarhintajka jurhimbikuarhu jámani jarhani?
18 Ju je eratsentani na engajtsïni xáni marhuachejka jurhimbikuarhu jarhani. No solujtsïni marhuachesïndi parachi úni sési irekani, sino ístuchi sési pʼikuastasïnga Tata Diosï Jeobani ka juchaari erachichani (Prov. 27:11; 3 Juanu 4). ¡Ini ambe jimbochisï kánikua tsitijka jurhimbikuarhu jarhani ka ísïchi irekani eskachi na jorhenguarhini jarhajka!
PIREKUA 144 Mintsinharhi Jeobani
a Sáno méntkisï, engachi uandontskuarhekuajka máteruechani ambe engachi jakajkujka ka na engachi irekajka, úrasïngachi uandakua jurhimbikua. No arhiparini engachi apenasi ueenaka marhuakuni Tata Diosïni o engachi ióni páni jakaia, kánikuajtsïni jarhuataati miántani andichisï tsitijki jurhimbikuarhu jarhani. I ambe uaati eskachi mintsita jingoni uékaaka sési pʼikuastani Tata Diosï Jeobani.