Tumbi, ¿nári jásï tsípikua ma uékasïni jatsini?

1. ¿Náki kʼéri ánchikuarhitaksï jatsispi Jeoási, Usíasi ka Josíasi?

¿NÁRI pʼikuarherapirini engari Tata Diosïiri ireteeri rei únhapiringa jiáni engari tumbi sapichu máepiringa? ¿Amberi úpirini engari juramuni japiringuia? Biblia uandasïndi máru Judá anapu reiicheeri engaksï sapichku ueenapka juramuni. Pori ejemplu, Jeoási 7 uéxurhini jatiriispti, Usíasi 16 ka Josíasi 8. ¡Xáni kʼéri ánchikuarhita ma engaksï jatsipka! Peru nájkiruka no fásiliipka, Tata Diosï Jeoba ka máteruechaksï jarhuataaspti parakaksï ambakiti ambe úpiringa.

2. ¿Andisï xáni sési jaki eskachi jorhenguarhiaka ambe enga Biblia uandajka Jeoási, Usíasi ka Josíasiri ambe?

² Ísïisti eskachi jucha no reiiska ni reineecha, peru i tanimu kʼuiripuecha enga Biblia uandaajka uánikua ambakiti ambejtsïni jorhendasïndi. Uaakachi uánikua ambe jorhenguarhini ima amberi engaksï sési erakupka úni ka ístu ima amberi engaksï no sési erakupka. Ambe enga Biblia uandajka imeecheri ambe xarhatasïndi, eska kánikua jukaparhakueska eskachi sési erakuauaka juchaari amiguechani, eskachi kaxumbitiuaka ka eskachi méntkisï andarhieraaka Tata Diosï Jeobani.

SÉSI ERAKUA CHIITI AMIGUECHANI

3. ¿Néna jarhuataspi Jeoiadá rei Jeoásini paraka ambakiti ambe erakupiringa úni?

³ Ambakiti ambe eraku úni ísï eska Jeoási. Enga Jeoási sapichuepka imeeri taati jémba uarhispti ka kʼéri saserdoti Jeoiadá ísï kʼuiriperaspti komueska imeeri uájpani ma ka uánikua ambe jorhendaspti Tata Diosï Jeobaeri ambe. Jeoási jánhastiispti jimboka kurhajchaspka Jeoiadáeri konsejuechani, ka inde ambe jarhuataspti paraka erakupiringa marhuakuni Tata Diosï Jeobani ka ístu jarhuataspti Tata Diosïiri iretani paraksï májkueni úni. Ístu úspti eska sési jájkunhantapiringa templu (2 Crón. 24:​1, 2, 4, 13, 14).

4. ¿Nénajtsïni marhuachesïni engachi kurhajchaani Tata Diosï Jeobaeri juramukuechani? (Proverbios 2:​1, 10-12).

⁴ Engaksïni chiiti taatiicha o máteru kʼuiripuecha jorhendani jaka xénchani Tata Diosï Jeobani ka kurhajchaani imeeri juramukuechani, ambakiti regaluksïni ma íntskuxati (arhinta Proverbios 2:​1, 10-12). Taatiichaksï uaati mámaru ambe úni para jarhuataani imeeri uájpeechani. Exe ambe enga úpka Katiaeri taati jémba para jarhuatani ambakiti ambe erakuni úni. Pauani pauani enga Katiaeri taati jémba nireenga páni eskuela, úrasïreendi indeni tiempuni para uandontskuarhekuni karakateri enga jindeeka para mándani pauani arhintani. Katia uandantasïndi: “Ambe engareni arhienga jarhuatasïreendirini parani úni orhepani uérakuni ambe engani nitamakuarhienga ima jurhiatikua”. Ístuksïni jamberi chiiti taatiicha jatsikuchiajti reglechani engaksï Bibliarhu jupindaskuarhijka, peru jamberiri tʼu ísï pʼikuarherajka enajkiksïni inde regleecha no jurajkujki úni ambe engari tʼu tsitijka. ¿Ambekini jarhuataa kurhajchaani chiiti taatiichani? Pirenchi ma enga Anastasia arhinhajka uandantasïndi eskaksï taati jémbeecha aiangusïreenga andiksïsï jatsikukuaueni regleechani. Ima uandantasïndi: “Inde amberini jarhuatasti kurhanguni eskajtsïni jatsikuchiasïreenga regleechani no parani ji no úni imani ambe engani tsitienga, sino jimbokajtsïni xénchasïreenga ka uékasïreendijtsïni kuájchakuni”.

5. ¿Nénaksï pʼikuarheraa chiiti taatiicha ka Tata Diosï Jeoba imani ambe jingoni engari erakuaka úni? (Proverbios 22:6; 23:​15, 24, 25).

⁵ Engari kurhajchaaska Biblieri konsejuechani engaksïni chiiti taatiicha íntsaajka, imeechaksï kánikua sési pʼikuarheraati. Ka sánderu ambakiti ambe, sésiri pʼikuastaaka Tata Diosï Jeobani, ka i ambekini jarhuataati parari méntkisï sési pájperani imani jingoni (arhinta Proverbios 22:6; 23:​15, 24, 25). ¿A no eskaksï i ambe jindeeska ambakiti rasoniicha parari májkueni úni eska Jeoási?

6. ¿Neechani kurhajchaspi Jeoási ka ambe úkuarhispi enga ísï úpka? (2 Crónicas 24:​17, 18).

⁶ Jorhenguarhi ima amberi enga Jeoási no sési erakupka úni. Enga Jeoiadá na uarhipkia, Jeoási erakuspti kúnguarhini no ambarhati amiguecha jingoni (arhinta 2 Crónicas 24:​17, 18). Judá anapu prinsipiicheeri konsejuechani kurhajchaaspti engaksïni no xéncheenga Tata Diosï Jeobani. ¿A no eska no jatsispka para ísï úni? (Prov. 1:10). Peru ima no sési úspti ka kurhajchaspti imeeri no ambarhati amiguechani. Ka enga imeeri primu jémba Sakaríasi uékeenga jurhimberantani, Jeoási juramuspti parakaksï uándikupiringa (2 Crón. 24:​20, 21; Mat. 23:35). ¡Xáni no sési jásï ambe! Jeoási tontu máespti. Orheta sési ueenaspti, peru tátsekua niáraspti apostata úkuarhini ka uándikpiti ma. Ka sánderu tátsekua imeeri mismu jántspiriichaksï uándikuspti (2 Crón. 24:​22-25). ¡Kánikua ménderuenipirindi imeeri irekua enga seguiripiringa kurhajchani Tata Diosï Jeobani ka imeechani engaksï xénchajka Tata Diosïni! ¿Ambekini jorhendasïni Jeoásiiri ejemplu?

7. ¿Nári járhati amiguechani jatsipirini parani erakuani? (Ístu exe imajenini).

⁷ Ima amberi enga Jeoási erakupka úni, jorhenguarhisïngachi eskachi jatsiska para ima járhati amiguechani jatsiani engaksï xénchajka Tata Diosï Jeobani ka engaksï uéjka tsíperani imeeri mintsitani. Inde járhati amiguechajtsïni jarhuataati parachi ambakiti ambe úni. Ísïisti, juchaari amiguechaksï uaati mámaru jatiriini. Miá eska Jeoási iauani sánderu sapichuespka Jeoiadá jingoni. Iásï eratseanta chiiti amiguechani ka kurhamarhikuarhi: “¿Jarhuatasïntsïni parani sánderu mintsikani Tata Diosï Jeobani? ¿Animarisïntsïni parani kurhajchani imeeri juramukuechani? ¿Tsitisïnksï uandontskuarheni Tata Diosï Jeobaeri ambe ka ambe engaksï Bibliarhu jorhenguarhijka? ¿Janhanharhiasïnksï Tata Diosïiri juramukuechani? ¿Jurhimberantasïntsïni jiáni engani no sési újka ambe ma, o imani ambejtsïni arhisïni engani ji uékani jarhajka kurhaani?” (Prov. 27:​5, 6, 17). Paraksïni mátirku arhini, engaksï chiiti amiguecha no xénchajka Tata Diosï Jeobani, nóri uétarhinchaasïnga. Peru engaksï chiiti amiguecha xénchajka Tata Diosï Jeobani, asï jáma jurajkuani. ¡Índeechaksï kʼóru ambakiti amiguesti para tʼu! (Prov. 13:20).

8. ¿Amberi jatsipirini para kurhamarhikuarhini engari úraska redesi sosialiichani?

⁸ Redesi sosialiichaksï kánikua marhuasïndi para familia ka amiguecha jingoni uandontskuarheni. Peru uánikuechaksï karhataasïndi fotuechani ka bideuechani ima amberi engaksï piájka o engaksï újka nomasi paraksï ísku pakataani máteruechani. Engari tʼu úrajka redesi sosialiichani, úpiringari kurhamarhikuarhini: “¿Uékasïni ísku pakataani máteruechani? ¿Ambe uékasïni ji: uinhaperantaani máteruechani o eskaksï máteruecha ambakiti ambe uandaaka juchiiti ambe? ¿Jurajkusïni eska ima ambe engani exeaka máteruecheeri, uaaka eskani jíjtu májkueni jámaaka, eratseni ka uandani?”. Ma xanhari erachi Nathan Knorr enga Grupurhu japka enga Orhejtsïkuajka iámindu kúnguarhikuechani, ini konsejuni íntspispti: “Asï jáma je sési pakarani kʼuiripuechani jingoni, jimbokajtsï no uaaka ísï úni. Sánderu sési, sési pʼikuasta je Tata Diosï Jeobani ka sésiri pʼikuastauaka iámindu imeechani engaksï xénchajka Tata Diosï Jeobani”.

KÁNIKUA JUKAPARHAKUESTI KAXUMBITIINI

9. ¿Ambe úspi úni Usíasi Tata Diosï Jeobaeri jarhuajperata jimbo? (2 Crónicas 26:​1-5).

⁹ Ambakiti ambe eraku úni ísï eska Usíasi. Enga rei Usíasi tumbi máepka, kánikua kaxumbitiispti ka jorhenguarhispti “chénharhini Tata Diosï jurhimbitini”. Ima 68 uéxurhini irekaspti, ka sáno iámindu indeni tiempu jimbo, Tata Diosï Jeoba újchakuraspti (arhinta 2 Crónicas 26:​1-5). Usíasi andaaspti uánikua nasioniichani engaksï ikiakuenga ka ístu úspti eska Jerusaléni sési kuájchakukata japiringa (2 Crón. 26:​6-15). Seguru eska Usíasi kánikua sési pʼikuarherapka enga úni japka úni iámindu ini ambe Tata Diosï Jeobaeri jarhuajperata jimbo (Ecl. 3:​12, 13).

10. ¿Néna kʼamarhukuspi Usíasi?

¹⁰ Jorhenguarhi ima amberi enga Usíasi no sési erakupka úni. Rei Usíasi pʼindespti juramukuani máteruechani. Ka jamberi inde ambe úpti eska eratsepiringa eska úpiringa úni ambe enga ima uékapiringa. Ma jurhiatikua inchaspti Tata Diosï Jeobaeri templurhu ka insiensu kurhiraspti, ambe ma engaksï reiicha no ueenga úni (2 Crón. 26:​16-18). Kʼéri saserdoti Asaríasi jurhimberantaspti ka rei Usiasi kánikua ikiaspti. Xáni no sési enga rei Usiasi nóteru kurhajchapkia Tata Diosï Jeobani, ísï jimbo ima kastigarispti lepra jingoni (2 Crón. 26:​19-21). ¡Kánikua ménderuenipirindi imeeri tsípikua enga seguiriipiringa kaxumbitiini!

11. ¿Na jámasïni kʼuiripu ma enga kaxumbitiika? (Ístu exe imajeniichani).

¹¹ Enga Usíasi na niárapkia kánikua juramukua jatsini, mirikurhispti eska iámindu ima ambe enga xáni úpka Tata Diosï Jeobani jimboespka. ¿Ambechi jorhenguarhisïni? Eskachi no jatsiska para mirikurhini eska Tata Diosïni jimboeska iámindu ambakiti ambe engachi jatsika ka eska ístu imani jimboeska ambe engaksï újka úni para marhuakuni. Enbesi de kʼéramakuarhini imani ambe jimbo engachi úkia, jatsiskachi para iámindu ambe jimbo Tata Diosï Jeobani diosmaiamukua íntskuntani (1 Kor. 4:7).b Jatsiskachi para kaxumbitiini ka jiókuarhini eskachi no perfektueska ka uétarhinchasïngachi eskajtsïni máteruecha jurhimberantaaka. Erachi ma enga jukari 60 uéxurhini jatiriikia karaspti: “Jorhenguarhiska no sóntku no sési exeni engareni nema jurhimberantajka imani ambe jimbo engani no sési úka, sánderu sési, jánguarhintasïnga sési úni ambe ma”. Engachi kaxumbitiiska ka chénharhinchi Tata Diosï Jeobani, sésijtsïni nicheati juchaari irekuarhu (Prov. 22:4).

MÉNTKISÏ ANDARHIERA TATA DIOSÏ JEOBANI

12. ¿Ambe úspi Josíasi enga tumbi sapichuepka para andarhierani Tata Diosï Jeobani? (2 Crónicas 34:​1-3).

¹² Ambakiti ambe eraku úni ísï eska Josíasi. Josíasi ueenaspti andarhierani Tata Diosï Jeobani jiáni enga tumbi sapichu máepka. Ima uékasïreendi sánderu sési míteni ka úni ambe enga Tata Diosï uékeenga. Joperu para Josíasi, no fásiliispti reini; jimboka imani tiempu jimbo sáno iámindu kʼuiripuechaksï diosï úkatechani kómarhiasïreenga. Ísï jimbo, Josíasi jatsipti para kánikua balori jukani para kuájpini jurhimbitini relijionini. ¡Ka kánikua sési úspti! Nótki jamberi 20 uéxurhini jatirispti enga ueenapka kénditani iámu paisirhu imani ambe enga no jurhimbiti relijioniiripka (arhinta 2 Crónicas 34:​1-3).

13. ¿Nénakini marhuachea aiakukuarheni Tata Diosï Jeobani?

¹³ Nájkirukari tumbi sapichu máeuaka, uaakari ísïini eska Josíasi. ¿Néna? Engari andarhieraska Tata Diosï Jeobani ka jorhenguarhiani imeeri sési járhati kualidadiichani. I ambekini jarhuataati aiakukuarheni Tata Diosï Jeobani. ¿Ka nénakini marhuachea engari aiakukuarheska Tata Diosï Jeobani? Luke enga itsï atakuarhika enga 14 jatiripka, uandaspti: “Iásï uératini, Tata Diosï Jeobani marhuakuni jindeuati ambe engani orheta peeraaka juchiiti tsípikuarhu ka jánguarhintaaka parani kánikua sési pʼikuastani” (Mar. 12:30). Engari májkueni úska, uánikua kóntperatechandi intsïnhauaka.

14. ¿Nénaksï májkueni úsïni eska rei Josíasi máru tumbi sapirhatiicha?

¹⁴ ¿Ambeksï úpirini nitamakuarhini tumbiicha engaksï Tata Diosïni marhuakujka? Johan enga itsï atakuarhika enga 12 jatiriipka, uandasïndi eska eskuelarhu imeeri kompanieruecha méntku arhini jarhasïreendi para sigarru elektroniku itsutani. ¿Ambe úsïni para no úni ambe engaksï imeeri kompanieruecha arhijka? Eratsentasïndi na enga uaaka no sési úkuni itsutani ka ístu na enga inde ambe uaaka jarharitani Tata Diosï Jeoba jingoni. Rachel, uátsï ma enga itsï atakuarhika enga 14 jatiripka, uandantasïndi ambe enga újka para orhepani uérakuani tsʼéjkukuechani enga eskuelarhu jatsiajka: “Méntkisï jánguarhintasïnga jirinhantani ambe ma engareni miátantaaka Tata Diosï Jeobani ka ambe enga Biblia uandajka. Ménichani, ambe engani jorhenguarhijka eskuelarhu istorieri ambe, miátantasïndireni relatu ma o profesia ma enga Biblia uandajka. Ka jiáni engani uandontskuarheni jarhajka nemani jingoni eskuelarhu, eratsentasïnga Biblieri tekstu ma engani uaaka aianguni”. Jamberiksï chiiti problemecha no májkueniiti eska imeecha enga rei Josíasi jatsiapka, peruri uaaka xáni jánhastiini ka ísï no méni jurajkuni Tata Diosï Jeobani eska ima na úpka. Engari iásï ueenaska jorhenguarhini orhepani uérakuani tsʼéjkukuechani, sánderuri preparadu jauaka parari úni orhepani uérakuani imani engari sánderu orhepani jatsiauaka.

15. ¿Ambe jarhuataspi rei Josíasini paraka sési marhuakupiringa Tata Diosï Jeobani? (2 Crónicas 34:​14, 18-21).

¹⁵ Jiáni enga rei Josíasi 26 jatiriipka, ueenaspti sési jájkuntani templuni. Jiáni enga templurhu ánchikuarhinhani japka, exenhantaspti libru “enga Tata Diosïiri Leini uandeenga ka enga Tata Diosï Moisésini íntskupka”. Jiáni enga rei Josíasi kurhaapka ambe enga libru uandeenga, jirejiresï úspti ambe ma para kurhajchani ambe enga Tata Diosïiri Lei uandeenga (arhinta 2 Crónicas 34:​14, 18-21). ¿Tsitipirindi pʼindeni arhintani Bibliani? Engari ísï úni jakaia, ¿tsitixakiri? ¿Úsïniri ambe ma para no mirikurhiani bersikuluechani engaksï jukaparhakueka para tʼu? Luke engachi párrafurhu 13 uandaka, jatsisti kuadernu ma nani enga karajka imani ambe enga sánderu tsitijka. ¿Eratsesïndi eska engari májkueni úska eska Luke jarhuatakakini parari miántani tekstuechani o ima ambe engari tsitika? Engari sánderu míteska Biblieri ambe ka sánderuri tsitini, sánderuri uékaaka Tata Diosï Jeobani marhuakuni. Ka ísï eska Tata Diosïiri Uandakua na jarhuatapka rei Josíasini imani ambe úni enga sési japka, ístukeni tʼungini jarhuataati parari imani ambe úni enga sési jaka.

16. ¿Andisï niárapi no sési ambe úni rei Josíasi ka ambechi jorhenguarhisïni?

¹⁶ Jorhenguarhi ima amberi enga Josíasi no sési erakupka úni. Jiáni enga Josíasi 39 jatiripka, imani ambe úspti enga no sési japka ka inde ambe jimbo niáraspti uarhini. Enbesi de kurhakuni Tata Diosï Jeobani eska jarhuatapiringa, ima mismu mintsinharhikuarhispti (2 Crón. 35:​20-25). ¿Ambechi jorhenguarhisïni iiri ambe? Eska no arhiparini na engachi xáni jatiriika o na engachi xáni páni jakaia Biblieri ambe jorhenguarhini, méntkisïchi jatsiska para andarhierani Tata Diosï Jeobani. Ka para ísï úni, jatsiskachi para méntkisï kurhakuni jarhuajperata, Bibliani estudiarini ka kurhajchaani konsejuechani ima erachiicheeri engaksï ióni páni jakaia marhuakuni Tata Diosïni. Engachi ísï úska, no xáni fásiliuati imani ambe úni enga no sési jaka ka uaakachi tsípikua jingoni irekani (Sant. 1:25).

TUMBI, UAATIKENI SÉSI NICHENI CHIITI TSÍPIKUARHU

17. ¿Ambejtsïni jorhendasïni ambe engaksï úkuarhinchapka tanimu Judá anapuecha reiicha?

¹⁷ Tumbiichaksï uánikua ambe uaati úni enga sési pʼikuastauaka. Jeoásiiri, Usíasiiri ka Josíasiiri ejemplu, xarhatasïndi eskaksï tumbi sapirhatiicha uaaka ambakiti ambe erakuni úni ka imani ambeksï úni enga sési pʼikuastaaka Tata Diosï Jeobani. Ísïisti, inde reiichaksï niáraspti no sési ambe úni ka no sésiksï nitamakuarhispti indeni ambe jimbo. Peru engari tʼu jánguarhintaska úni ambe engaksï imeecha sési ambe úpka ka no imani ambe engaksï no sési úpka, sésikeni nicheati chiiti tsípikuarhu.

18. ¿Náki Bibliarhu anapu ejempluecha xarhatasïni eskajtsïni uaaka sési nicheni juchaari irekuarhu? (Ístu exe imajenini).

¹⁸ Biblia uandasïndi máteru tumbiicheeri engaksï jánguarhintapka andarhierani Tata Diosï Jeobani, ka ima jaiapanheantaspti ka ísï jimbo kánikua sési nikuaspti imeecheri irekuarhu, pori ejemplu Dabidi. Jiáni enga tumbi máepka, ima erakuspti marhuakuni Tata Diosï Jeobani ka tiempu jingoni, niáraspti reini ka no méni jurajkuspti Tata Diosïni. Ísïisti, Dabidi niáraspka no sési ambe úni, peru Tata Diosï Jeoba uandaspti eska ima kánikua sési marhuakuspka (1 Rey. 3:6; 9:​4, 5; 14:8). Engari jorhenguarhiska Dabidiiri ambe, imeeri ejemplukini jarhuataani parari no méni jurajkuni Tata Diosï Jeobani. Máteru ambe engari uaaka úni, jindeesti jorhenguarhini sánderu ambe Markusïiri o Timoteueri. Tsimarhanksï erakuspti marhuakuni Tata Diosï Jeobani ka nóksï méni jurajkuspti. Engaksï ísï úpka, tsíperasptiksï Tata Diosï Jeobani ka sési nikuaspti imeecheeri irekuarhu.

19. Tumbi, ¿nénari uékasïni eska jindeuaka chiiti tsípikua?

¹⁹ Tumbi, ¿nénari uékasïni eska jindeuaka chiiti tsípikua sánderu orhepatini? Ambe engari erakuska úni iásï, uaatikeni jarhuatani sánderu orhepatini. Engari mintsinharhiska Tata Diosï Jeobani ka no tʼujku mintsinharhikuarhini, imakeni jarhuataani ambakiti ambe úni (Prov. 20:24). Tʼúri uaaka sési ka tsípikua jingoni irekani. Asï mirikurhi eska Tata Diosï Jeoba kánikua jukaparharasïnga iámindu ambe engari újka imani jimbo. No jarhasti sánderu sési jásï tsípikua ma eska juchaari Taati auandarhu anapuni marhuakuni engajtsïni xáni xénchajka. ¡No jarhasti sánderu ambakiti ambe!