¿Néna uaa uátsï ma ambakiti kristiana máeni ka jánhaskatiini?

1. ¿Ambechi jatsiski para úni parachi niárani kristianu jánhastiini?

¿NO ÍSÏISKI eska kánikua sóntku kʼuiripesïnga sapi ma? No úkua jukasïndi ka no jánguarhintasïndi paraka sóntku kʼéaka. Joperu parachi jucha ambakiti pájperakua ma jatsini Tata Diosï Jeoba jingoni, jatsiskachi para jánguarhintani (1 Kor. 13:11; Ebr. 6:1).b Parachi niárani ambakiti kristianueni, jatsiskachi parachi ambakiti pájperakua ma niárani jatsini Tata Diosï Jeoba jingoni. Ístuchi uétarhinchasïnga eskajtsïni imeeri espiritu santu jarhuataaka parachi ambakiti kualidadichani jatsiani, uánikua ambe jorhenguarhini úni ka tʼuini mítetini jarhania ambe úni engachi responsabilidadichani jatsiauaka sánderu orhepatini (Prov. 1:5).

2. ¿Ambejtsïni jorhendasïni Génesis 1:27? ¿Ka ambechi exea ini jorhenguarhikua jimbo?

² Tata Diosï Jeoba kuerauasti kʼuiripuechani, ima kueraasti acheetini ka uarhiitini (arhinta Génesis 1:27). Tatakeechaksï no májkueni jarhasti eska nanakeecha, joperu ístuksï no májkueniisti máteru ambe jimbo. Pori ejemplu Tata Diosï Jeoba ústi eskaksï tatakeecha ka nanakecha nóksï májkueni jásï ambe uaaka, jimboksïsï máteru járhati kualidadichani jatsiati ka máteru jásï ambeksï jorhenani úni (Gén. 2:18). Ini jorhenguarhikua jimbo, exeakachi ambe engaksï uaaka úni pirenchicha engaksï uátsïika paraksï niárani ambakiti kristianecheni. Ka máteru jorhenguarhikua jimbo exeakachi ambe engaksï uaaka úni erachiicha engaksï tumbiika.

JATSIA JE KUALIDADICHANI ENGA TATA DIOSÏ JEOBA JAIAPANHINTAJKA

3, 4. ¿Naniksï uaa exeantani pirenchicha sési járhati ejempluechani enga uaa marhuakuani? (Ístu exea je imajeniichani).

³ Biblia uandasïndi ambakiti ejempluechani uánikua nanakecheri engaksï marhuakupka Tata Diosï Jeobani ka engaksï xéncheenga (arhinta artikuluni “¿Qué aprendemos de las mujeres de la Biblia?” enga jw.org jimbo jaka). Eska na uandajka karakata enga ini jorhenguarhikua jimbo pʼitakata jaka, nanakeecha “jatsistiksï para pʼíngukuarhini iámindu ambe jimbo ka ístuksï jatsisti para mintsinharhikueni iámindu ambe jimbo”. Ka jamberiri uaaka exeantani uánikua pirenchichani kúnguarhikuarhu engaksï sési marhuakuni jaka Tata Diosï Jeobani ka engari uaaka uánikua ambe jorhenguarhini imeecheri ambe.

⁴ Engari pirenchi máeka engari uátsïika, eratseanta máru pirenchichani engaksï ambakiti ejemplu máeuaka para tʼu ka jánguarhinta májkueni úni eska imeecha. Exea imeeri ambakiti kualidadichani ka tátsekua eratsi na engari uaaka tʼu májkueni járhati kualidadichani jatsiani. Máteru párrafuecha jimbo exeanchi jauaka tanimu kualidadichani engaksï ambarhati kristianecha jatsika para úni.

5. ¿Andiksïsï jatsi para kaxumbitiini pirenchicha engaksï jánhastiika?

⁵ Kaxumbikua. Pirenchi ma enga kaxumbitiika kánikua sési pájperasïndi Tata Diosï Jeobani jingoni ka ístu máteruecha jingoni (Sant. 4:6). Pori ejemplu jimboka kaxumbitiiska, ka xénchani imeeri Taati auandarhu anapuni, jánguarhintasïndi úni ambe enga Tata Diosï Jeoba uaxastakia, né enga jatsika para orhejtsïkuni kúnguarhikuani ka ístu familiani (1 Kor. 11:3).c

6. ¿Nénaksï uaa uátsïicha májkueni kaxumbikua xarhatani eska Rebeka?

⁶ Rebekeri ambechi uandani jauaka. Ima kánikua jánhaskatispti ka sési mítespti na jatini ka néna úni ambe ma (Gén. 24:58; 27:​5-17). Peru ístu janhanharhikua jingoni jámasïreendi ka kurhandirasïreendi (Gén. 24:​17, 18, 65). Engari tʼu májkueni jámaaka eska Rebeka, kaxumbitiini ka janhanharhiani imeechani engaksï orhejtsïkujka ambakiti ejemplueri máeuaka chiiti familiarhu ka ístu kúnguarhikuarhu.

7. ¿Nénaksï uaa nanakecha májkueni jámani eska Esteri, no kʼéramakuarhini?

⁷ No kʼéramakuarhini. Biblia uandasïndi “joperu imeecha engaksï exejka eskaksï no iámindu ambe úsïnga úni jánhaskatiistiksï” (Prov. 11:2). Esteri ambakiti Tata Diosïiri marhuari máespti enga xarhatapka ini kualidadini. Pori ejemplu, enga ima na reineepkia ima no méni niáraspti kʼéramakuarhini. Ístu, ima kurhajchasïreendi imeeri primu jémbani Mardokeuni (Est. 2:​10, 20, 22). Tʼuri uaaka májkueni úni eska Esteri engari kurhakuska nemani eskakeni ambakiti konsejuechani íntsauaka ka ísïri úni (Titu 2:​3-5).

8. Engaksï erakuni jauaka ambe xukuparhani ka ístu arreglarikuarhini, ¿néna uaa jarhuataani nanakechani i konseju enga 1 Timoteu 2:​9, 10 jimbo jaka?

⁸ Ju je exeni na enga Esteri xarhatapka eska no kʼéramakuarhisïreenga. Ima “kánikua sési jánharhispti ka sési jáxespti”, peru no méni kʼéri ambe exekuarhispti (Est. 2:​7, 15). ¿Nénari uaa tʼu májkueni úni? Ma ambe jindeesti ambe enga uandajka 1 Timoteu 2:​9, 10 (arhinta). Ixú apostoli Pablu arhiaxapti nanakechani eskaksï jatsispka para sési xukuparhani ka janhanharhikua jingoni. Ambe enga apostoli Pablu arhikuekani japka jindeespti eskaksï pirenchicha jatsispka para sési mórhekuarhini ka eratsentanksï nénaksï pʼikuastaua máteruechani. Kánikuachi sési pʼikuarherasïnga engachi exeajka pirenchichani engaksï jánhaskatiika ka sési xukuparhani.

9. ¿Ambechi jorhenguarhisïni Abigaíliri ambe?

⁹ Jánhaskakua. I kualidadi májkueniisti eska sési eratseni, i ambe arhikuekasïndi exeni ambe enga sési jaka ka ambe enga no sési jaka ka jiájkani kʼóru imani ambe erakuni úni enga sési jauaka. Ju je exeni Abigaíliiri ejempluni. Imeeri acheeti no sáni eratsekua jingoni úspti ambe ma ka ima exespti eskaksï kánikua no sési kʼamarhukupiringa iámindu imeecha engaksï imeeri kʼumanchikuarhu irekapka. Abigaíli jirejiresï úspti ambe ma ka jimboka sési eratsespka, nóksï ambe ma úkuarhinchaspti (1 Sam. 25:​14-23, 32-35). Jánhaskakua jarhuatasïndijtsïni míteni na jatini uandani ka na jatini pínasku jarhani, jiáni engachi uandontskuarheni jauaka máteruecha jingoni parachi no no sési pʼikuastaani (1 Tes. 4:11).

JORHENGUARHI IMANI AMBE ENGAKENI JARHUATAAKA

10, 11. ¿Nénaksïni marhuachea engaksï jorhenguarhiska sési arhintani ka karani? (Ístu exe je imajenini).

¹⁰ Kánikua sési jarhasti engaksï pirenchicha jorhenajka imani ambe úni enga marhuakuajka. Máru ambe engari jiáni jorhenguarhijka úni engari sapichuejka kánikuakeni marhuachesïndi chiiti irekuarhu. Ju je exeani máru ejempluechani.

¹¹ Jorhenguarhi karani ka sési arhintani. Máru lugaricha jimbo no xáni jukaparhakuesti eskaksï nanakecha jorhenguarhiaka karani ka arhintani. Joperu kánikua jukaparhakuesti para kristianuecha jorhenguarhini arhintani ka karani (1 Tim. 4:13).d Ísï jimbo, asï jurajku eskakeni ambe ma ójkutaaka parari jorhenguarhini arhintani ka sési karani. ¿Nénaksïni marhuachea i ambe? Jarhuataatiksï parajtsï jatsini ánchikuarhita ma ka nójtsï tsïtani, ístu parajtsï úni nitamakuarhini ka parajtsï jorhenguarhini ka jorhentpini Tata Diosïiri uandakuani. Joperu ambe enga sánderu jukaparhakueka jindeesti eskajtsï uaaka arhintani Bibliani ka eratsentani ka inde ambe uaati eskajtsï sánderu sési pájperaaka Tata Diosï Jeobani jingoni (Jos. 1:8; 1 Tim. 4:15).

12. ¿Ambekini jorhendasïni Proverbios 31:26?

¹² Jánguarhi sési uandontskuarheni máteruecha jingoni. I ambe jindeesti enga kánikua jukaparhakueka para iámindu kristianuecha. Santiagu arhini konsejuni íntspispti enga kánikua marhuajka, uandaspti: “Eskajtsï iáminduecha jatsiska para jánguarhintani sóntku kurhandini, joperujtsï no jatsiska para sóntku uandani” (Sant. 1:19). Jingontku kurhajchani jarhani nemani engakeni uandontskuarhicheni jauaka, xarhatakuni jarhasïngari eskari kurhangukuni jarhasïnga (1 Ped. 3:8). Engari no seguru jaka eskari kurhanguxaka ambe engakeni uandontskuarhechini jaka ka na enga pʼikuarhinheni jaka, janhanharhikua jingoni kurhamarhi ka tátsekua eratsenta antederi mókukuni (Prov. 15:​28, nota). Kurhamarhikuarhi: “¿Ísïiski ambe engani arhiaka? ¿Uinhaperantaa? ¿Xarhatakua eskani janhanharhisïnga? ¿Xarhatakua eskani xénchasïnga?”. Eratseanta imeechani engaksï sési marhuakuni jaka Tata Diosïni ka engaksï ini ambe újka ka jánguarhi ísï úni (arhinta Proverbios 31:26). Exe ambe engaksï uandajka ka néna engaksï uandajka. Jánguarhinta ísï úni ka exeakari eskari sánderu sési pájperaaka máteruecha jingoni.

13. ¿Nénari uaa jorhenguarhini úni ambe ma kʼumanchikuarhu? (Ístu exe imajenini).

¹³ Jorhenguarhi úni ambe ma kʼumanchikuarhu. Uánikua lugaricharhu nanakechaksïsï újti ambe ma kʼumanchikuarhu. Jamberi naandi o máteru pirenchi ma enga sési marhuakujka Tata Diosïni uaatikeni jorhendani ambe ma úni. Pirenchi enga Cindy arhinhajka, uandasïndi: “Para ji regalu máesti engareni juchiiti naandi jorhendaka úni ambe ma ka kurhanguni, eska engari kánikua ánchikuarhijka niárasïngari sési pʼikuarherani. Ísï jimbo jorhenguarhiska úmantani, ambantskantani, sïrikuni ka piántani ambe ma, inde ambe jarhuatasti parakani úpiringa sánderu sési marhuakuni Tata Diosï Jeobani. Juchiiti naandirini ísturini jorhendasti parani sési eroani máteruechani ka inde ambe jimbo úska míteani uánikua erachi ka pirenchichani engaksï kánikua ambakitiika ka uánikua ambe jorhenguarhiska imeecheri ambe” (Prov. 31:​15, 21, 22). Nanakecha engaksï ánchikuarhiriika ka engaksï sési eroajka máteruechani ka ístu engaksï jorhenaka úni ambe ma kʼumanchikuarhu, kʼéri kóntperataksï máesti imeeri familiarhu ka kúnguarhikuarhu (Prov. 31:​13, 17, 27; Úku. 16:15).

14. ¿Amberi jorhenguarhisïni imeeri ambe enga Crystal uandajka, ka amberi jatsiski parari jánguarhintani ísï úni?

¹⁴ Jorhenguarhi néna nitamakuarhini. Iámindu kristianuecha engaksï sési marhuakujka Tata Diosïni, jatsistiksï paraksï jorhenguarhini néna nitamakuarhini ka konformi jarhani imani ambe jingoni engaksï jatsika (Filip. 4:11). Pirenchi ma enga Crystal arhinhajka uandasïndi: “Engani uátsïipka ka engani eskuela nirani japka, jarhasptiksï máru klasiicha engani ji úpiringa erakuani, joperu juchiiti taatijtsïni arhispti eskani imani erakuapiringa engajtsïni jarhuatapiringa ánchikuarhita ambe úni. Pori ejemplu, juchiiti taatireni arhispti eskani jorhenguarhipiringa kontabilidadiri ambe, ka inde amberini kánikua marhuachespti”. Nóri solu jatsiska parari jorhenani ánchikuarhini ka exentani ánchikuarhita ma, ístu jatsiska parari jorhenguarhini xántkuni atarani eskari xáni andaaka (Prov. 31:​16, 18). Engari arisku sáni irekaska nóri kántspeaka ka uaakari andanguani meteechani parari Tata Diosïni marhuakuni (1 Tim. 6:8).

PREPARHARIKUARI PARA SÁNDERU ORHEPATINI

15, 16. ¿Andiksïsï xáni jukaparhakue pirenchicha engaksï no uambuchajka? (Markusï 10:​29, 30).

¹⁵ Engari jánguarhintaska imani kualidadichani jatsiani enga Tata Diosï Jeoba jaiapanhintajka, ka engari jorhenguarhiska imani ambe engakeni uaaka marhuacheni, sánderuri sési preparadu jauaka para sánderu orhepatini. Ju exeni máru ambe engari uaaka úni.

¹⁶ Úpiringari erakuni no uambuchani asta sánderu orhepatini. Ísï eska na uandaka tata Jesukristu, jarhastiksï imeecha engaksï erakujka no uambuchani o tembuchani, nájkirukaksï jimeesïsï anapu kʼuiripuecha arhiauaka eskaksï ísï uaaka (Mat. 19:​10-12). Máteruechaksï erakusïndi no tembuchani ni uambuchani máteru ambe jimbo. Engari no uambuchatini jaka uaakari seguru jarhani eska Tata Diosï Jeoba ka tata Jesukristu kánikuakeni jukaparharasïnga. Iámu parhakpinirhu ima pirenchicha engaksï erakujka no uambuchani, kʼéri kóntperataksï máesïndi kúnguarhikuarhu, jimboka imeecheri uékperakua ka engaksï mintsita jingoni pendienti pájka máteruechani, úsïndi eskaksï máteruecha ísï exeauaka komueska pirenchicha ka komueska amámbeecha enga Tata Diosï íntspiaka (arhinta Markusï 10:​29, 30; 1 Tim. 5:2).

17. ¿Ambe jarhuataua pirenchichani engaksï sapichku jaka paraksï tiempu kompletueri marhuani?

¹⁷ Úpiringari marhuakuni Tata Diosï Jeobani tiempu kompletueri. Pirenchichaksïsï sánderu aianhpijti iámu parhakpinirhu (Sal. 68:11). ¿Uaakari planiichani uaani iásï para marhuani tiempu kompletueri? Jamberi komu prekursora, konstruksionirhu o beteli. ¿Ambekini jarhuataa parari andanguni indeni metani? Kómarhi Tata Diosï Jeobani, uandontskuarhi imeecha jingoni engaksï tiempu kompletueri marhuani jaka ka kurhamarhia ambe uétarhisïni para úni ísï marhuani. Parari úni andanguani indeni meteechani, kara ambe ka amberi jatsiski para úni. Engari marhuaska tiempu kompletueri uánikua ambe jauati engari uaaka úni parari marhuakuni Tata Diosï Jeobani.

18. ¿Andisï xáni jukaparhakue eska pirenchi ma sési erakuaka né jingoni uambuchani? (Ístu exe je imajenini).

¹⁸ Úpiringari erakuni uambuchani. Inde kualidadicha engachi exeakia ka ima ambe enga uétarhijka eska ma jorhenaaka úni jarhuatatiksïni parari ambakiti témba máeni. Joperu engari uéjka uambuchani, jatsiskari parari jánguarhintani sési erakuni né jingondi uambuchaa. I jindeesti sánderu kʼéri ambe engari erakuaka úni chiiti tsípikuarhu. Miá eska ima tata engari tʼu erakuaka, chiiti orhejtsïkutiuati (Rom. 7:2; Éfes. 5:​23, 33). Ísï jimbo: “¿Sési marhuakuxaki Tata Diosïni? ¿Xarhatasïni eska Tata Diosïiri ambesï sánderu jukaparhakueka para ima? ¿Sési erakusïni úni ambe ma? ¿Jiókuarhisïni enga no sési újka ambe ma? ¿Janhanharhiasïni nanakechani? ¿Uaarini kuidarini parani sési jarhani Tata Diosïni jingoni, parani no ma ambe kueratanchani ka engani no sési pʼikuarhenhini jauaka? ¿Sési uaasïni imeeri ánchikuarhitechani? Pori ejemplu, ¿ambe ka ambe ánchikuarhisïni kúnguarhikuarhu ka néna úsïni ambe ma?” (Luk. 16:10; 1 Tim. 5:8). Joperu ístu engari uéjka exentani ambakiti uámbani ma, tʼujturi jatsiska parari jánguarhintani ambakiti témba máeni.

19. ¿Andichisï úpirini uandani eska jarhuajpirini kʼéri kóntperata máeska?

¹⁹ Biblia uandasïndi eska ambakiti témba ma “jarhuajpiri máeska” enga jarhuatajka uámbani imani ambe jingoni enga uámba kueratanchaaka (Gén. 2:18). ¿Menusi úsïni inde ambe nanakani? Nómbe, sánderu sési kánikua ambakiti ambeesti jimboka Biblia ménichani uandasïndi eska Tata Diosï Jeoba “jarhuajpiri máeska” (Éx. 18:4; Ebr. 13:6). Témba ma niárasïndi sési jimbo jarhuajpirini máeni enga apoiarijka uámbani ka enga ánchikuarhijka imani jingoni ambe enga ima erakuaka úni familia jimbo paraka sési uéraaka. Ístu jimboka xénchasïnga Tata Diosï Jeobani, jánguarhintani paraka uámba sési exenhaaka (Prov. 31:​11, 12; 1 Tim. 3:11). Engari eratseni jaka uambuchani uaakari prepararikuarhini sánderu xénchaparini Tata Diosï Jeobani ka jánguarhintaparini desde iásï uératini ambakiti jarhuajpiri máeni kʼumanchikuarhu ka ístu kúnguarhikuarhu.

20. ¿Néna jarhuajpesïni naandi imeeri familiarhu?

²⁰ Úpiringari niárani kánguarhiani uájpeechani. Engari tembuchaska o uambuchani, jamberi sánderu segurueuati eska tʼu ka chiiti acheeti niáraka uájpeechani kánguarhiani (Sal. 127:3). Ísï jimbo sési jauati eskari eratsentaaka ambe enga arhikuekajka ambakiti naandi máeni. Ísï eskachi na jorhenguarhikia ini artikulu jimbo ambarhati kualidadiicha ka ambe engari jorhenaka úni kánikuakeni jarhuataati. Ka jimbokari uékpitiiska, pʼamojpitiini ka tekaantstiini uaakari seguru jarhani eska chiiti familia tsípikua jingoni irekuarhiaka ka eskaksï chiiti uájpeecha sési pʼikuarheraaka ka xénchperakua jingoni (Prov. 24:3).

21. ¿Chájtsï na xáni jukaparharasïni pirenchichani ka andi? (Exe je imajeniichani engaksï ueenakuarhu jaka).

²¹ Kánikuachi xénchaasïnga pirenchichani ambe engaksï újka Tata Diosï Jeobani jimbo ka imeeri ireta jimbo (Ebr. 6:10). Ka jimbokaksï kánikua jánguarhintasïnga imani ambe úni enga Tata Diosï Jeoba jaiapanhintajka, uánikua ambeksï jorhenguarhisti enga marhuakuaka ka ístuksï úsïndi jarhuataani máteruechani, ka sésiksï mítestia ambe engaksï uaaka sánderu orhepatini. Ísï jimbo, kánikuaksï jukaparhakuesti Tata Diosï Jeobaeri kúnguarhikuarhu.