SEMANA 36
PIREKUA 89 Jeoba újchakurasïndi imani enga kurhandirajka
“Ísï ú je eska Tata Diosïiri uandakua na uandajka”
“Ísï ú je eska Tata Diosïiri uandakua na uandajka ka no jinijku kurhandini” (SANT. 1:22).
AMBE ENGACHI JORHENGUARHIAKA
I jorhenguarhikuajtsïni jarhuataati no solu pauani pauani arhintani Tata Diosïiri Uandakuani, sino ístu eratsentani ka jánguarhintani imani ambe úni engachi jorhenguarhiaka.
1, 2. ¿Andichisï xáni tsípikua jingoni irekajki Tata Diosï Jeobaeri marhuariicha? (Santiagu 1:22-25).
TATA Diosï Jeoba ka imeeri Uájpa Jesúsi, uékasïndiksï eskachi tsípikua jingoni irekaaka. Ima enga Salmo 119:2 karapka, uandaspti: “Tsípisïndiksï imeecha engaksï újka ambe enga Tata Diosï miátaantajka, imeecha engaksï mintsita jingoni kurhakujka eska jarhuatauaka”. Ka tata Jesukristu ístu uandaspti: “¡Sánderuksï tsípisïndi imeecha engaksï kurhaajka Tata Diosïiri uandakuani ka ísïksï úni eska jima na arhijka!” (Luk. 11:28).
2 Tata Diosï Jeobaeri marhuariichachi kánikua tsípikua jingoni irekasïnga. ¿Andi? Jimbokachi uánikua rasoniichani jatsiaska parachi ísï p’ikuarherani, ma ambe enga kánikua jukaparhakueka jindeesti jimbokachi úsïnga pauani pauani arhintani Tata Diosïiri Karakatani ka jánguarhintasïngachi ísï úni eskachi na jorhenguarhijka (arhinta je Santiagu 1:22-25).
3. ¿Nénajtsïni marhuachesïni engachi újka ambe enga uandajka Tata Diosïiri uandakua?
3 ¿Nénajtsïni marhuachesïni engachi újka ambe enga uandajka “Tata Diosïiri uandakua”? Ma ambe jindeesti eskachi sési pʼikuastasïnga Tata Jeobani ka inde ambe úsïndi eskachi sési pʼikuarheraaka (Ecl. 12:13). Ístu, ísï úni eskaksï Biblieri konsejuecha na uandajka, jarhuatasïndijtsïni parachi sánderu sési pájperani juchaari familia jingoni ka ístu parachi sánderu ambakiti amigueni erachiicheeri, ka jamberichi exekia ini ambe. Ístuchi no xáni uánikua uandanhiateechani jatsiasïnga engachi kurhajchajka Tata Diosï Jeobaeri juramukuechani. Jimbosï rei Dabidi enga na uandapkia leicheeri, juramukuecheeri ka juisiuecheeri ambe, ísï uandapti pirekua ma jimbo: “Seguirini jarhani úni ambe engaksï uandajka, kʼéri kóntperata ma jarhasïndi” (Sal. 19:7-11).
4. ¿Andisï no méntkisï fásilii úni ambe enga Tata Diosïiri Karakata arhijka?
4 Ísïisti, no méntkisï fásiliisti úni ambe enga Tata Diosïiri Karakata arhijka. Ísï jimbo, nájkirukachi mámaru ambe úni jarhajka, jatsiskachi para tiempu arhutani para arhintani ka jorhenguarhini Bibliani, ka ísïchi uaaka úni ambe enga Tata Diosï uéjka. Ísï jimbo, ini artikuluni jimbochi miántani jauaka máru ambe engajtsïni uaaka jarhuatani parachi pauani pauani arhintani. Ístuchi exeaka ambejtsïni uaa jarhuatani eratsentani imani ambe engachi arhintakia ka exeni nénachi uaa ísï úni ambe engachi jorhenguarhiaka.
JU JE ARHUTANI TIEMPU PARACHI TATA DIOSÏIRI KARAKATANI ARHINTANI
5. ¿Andichisï xáni okupadu jarhajki?
5 Tata Diosï Jeobaeri marhuariichachi kánikua okupadu jarhasïnga. Kánikuachi tiempu úrasïnga imani ambe úni enga Biblia uandajka eska jukaparhakueska. Pori ejemplu, sáno iáminduechachi jatsisïnga para ánchikuarhini parachi mantenerikuarhini o parachi juchaari familiani kéndani (1 Tim. 5:8). Uánikua erachiichaksï kuidariuasïndi imeecheeri familiarichani engaksï pʼamenchani jaka o engaksï jatiriikia. Ka iáminduechachi jánguarhintasïnga úni ambe ma parachi no pʼamenchani. Ístuchi jatsisïnga para kúnguarhikuarhu anapu ambe úni. Ma ambe enga kánikua jukaparhakueka jindeesti kánikua jánguarhintani nirani aianhpini. Xáni uánikua ambe jingoni, jamberijtsï kurhamarhikuarhijka: “¿Néna uaa arhutani tiempu parani pauani pauani arhintani Bibliani, eratsentani ka ísï úni eskani na jorhenguarhiaka?”.
6. ¿Ambejtsïni jarhuataa parachi pauani pauani arhintani Bibliani? (Ístu exe je imajenini).
6 Para kristianu ma, Bibliani arhintani jindeesti ambe ma enga ‘sánderu uétarhijka úni’, jimbosï jukaparhakueti ísï úni (Filip. 1:10). Libru enga Salmos arhinhajka ueenani jámani uandasïndi eska ima kʼuiripu enga tsípikua jingoni jámajka “kánikua tsípikuarhisïnga Tata Diosï Jeobaeri leini jimbo, jurhiakua ka chúrikua arhintasïndi imeeri leini ka eratsentasïndi ambe enga arhintajka” (Sal. 1:1, 2). I ambe xarhatasïndi eska kánikua jukaparhakueska tiempu arhutani para arhintani. Joperu ¿na jandorachi úpirini arhintani Bibliani? Mándani arhini jatsiskachi para exeni na jandorachi uaa arhintani. Jiájkani, juchachi jatsiska para exeni na jatinchi uaa pauani pauani arhintani. Erachi ma enga Víctori arhinhajka, uandantasïndi: “Nájkirukani no xáni tsitijka xarhentkuni jauarani, exesïnga eska sánderu sésiiska xarhentkuni arhintani Bibliani, jimbokarini no ma ambe ójkutasïnga. Jo, jimbokani apenasi jauarasïnga úsïnga sánderuni sési eratsentani”. ¿Chájtu májkueni eratsesïni eska Víctor? Kurhamarhikuarhi je: “¿Para ji, na jandora sánderu sési jarhaski arhintani Bibliani?”.
¿Chá na jatini exesïni eskajtsï úpiringa arhintani Bibliani mándani jurhiatikua? (Exe je párrafu 6).
ERATSENTA JE AMBE ENGAJTSÏ ARHINTAJKA
7, 8. ¿Ambechi no jatsiski para úni engachi Bibliani arhintani jauaka? Uandanta je ejemplu ma.
7 Engachi na exeakia na jandorachi arhintaa Bibliani, ístuchi jatsiska para jánguarhintani jorhenguarhini ambe ma ka no ísku arhintani pori arhintani. Pauani pauani, uánikua ambechi arhintasïnga ka uánikua xanharichi no miásïnga ambe engachi arhintajka. ¿A no eskachi no uékapiringa májkueni úkuarhinchani Biblia jingoni? Jamberichi eratseni jakaia pauani pauani arhiantani máru Bibliarhu anapu kapituluecha. Ka kánikua sési jarhasti engachi indeni meta jatsikukuarhika ka jánguarhintani ísï úni (1 Kor. 9:26). Sési jarhasti engachi ueenani jakaia Bibliani arhintani, joperu parachi sési marhuatani jatsiskachi para sánderu ambe úni ka eska nomasi arhintani.
8 Ju je exeni ejemplu ma. Plantechaksï uétarhinchasïndi eska janiaka, joperu enga jukari janijka úndasïndi iurhentpeni, jiájkani no marhuasïndi enga jukari janijka. Sánderu sésiisti eska sánhani arhiaka janini, jimboka ísï, itsï sánhani arhisïndi inchatsïni echerirhu. Ka sáno májkueniisti, no marhuasïndi engachi jukari sóntku uékajka arhintani Bibliani, jimbokachi ísï no ma ambe úsïnga jorhenguarhini ka nóchi miásïnga ambe engachi arhintajka ka nijtu ísï úni eskachi na jorhenguarhiaka (Sant. 1:24).
Májkueni eskaksï plantecha na sánhani arhijka antsitani itsïni paraksï úni kʼérani, juchajtuchi uétarhinchasïnga tiempu parachi úni eratsentani ambe engachi arhintaaka Bibliarhu ka únchi imani ambe engachi jorhenguarhiaka. (Exe je párrafu 8).
9. ¿Ambechi jatsiski para úni engachi pʼindeka sóntku arhintani Bibliani?
9 Eranhaska je eskajtsï Bibliani arhintaxaka ka eskajtsï exesïnga eskajtsï jukari sóntku arhintaxaka. ¿Ambejtsï uaa úni? Jánguarhinta je sánderu iatsitakuarhu arhintani parakajtsï uaaka eratsentani ambe engajtsï arhintani jaka. Enga chá exejka eska úkua jukaska eratsentani, asï uandanhia je. Eratsentani jindeesti úrani juchaari éjpuni parachi jánhaskani ka kurhanguni ambe engachi arhintaaka. Jamberijtsï úpiringa ini ambe úni: 1) sánderu tiempu úrani parajtsï estudiarini ka eratsentani, 2) menusi bersikulu arhiantani parakajtsï uaaka sánderu sési eratsentani imani ambe engajtsï arhintaaka. Víctor engachi párrafu 6 jimbo uandaka, uandasïndi: “Jánguarhintasïnga no xáni uánikua kapituluechani arhiantani, jamberi ma kapitulujku. Jimbokani xarhentku arhintasïnga inde amberini jarhuatasïndi parakani chúskutaaka eratsentani ambe engani arhintaka”. Ambe enga sánderu jukaparhakueka, no jindeesti na engachi xáni arhintaaka, sino eskachi iatsitakuarhu arhintaaka parachi úni jorhenguarhini ambe ma (Sal. 119:97; exe je rekuadruni “Kurhamarhikuecha engaksïni jarhuataaka eratsentani”).
10. Uanda je ejemplu ma jingoni nénajtsï uaa ísï úni ambe engajtsï arhintaaka Bibliarhu (1 Tesalónika 5:17, 18).
10 No arhiparini na engajtsï jatini arhintaaka Bibliani o na engajtsï xáni tiempu úraaka parajtsï eratsentani, jánguarhinta je méntkisï ísï úni eskajtsï na arhintaaka. Engajtsï Bibliani arhintani jauaka kurhamarhikuarhi je: “¿Néna uaa ísï úni eskani na arhintaka iásï o sánderu orhepatini?”. Pori ejemplu, eranhaska je eskajtsï arhintaska 1 Tesalónika 5:17, 18 (arhinta je). Tátsekua erokuarhi je sáni ka eratsenta je nénajtsï kómarhisïni. ¿Mintsita jingontsï kómarhisïni Tata Diosïni? ¿Somentsï kómarhisïni? ¿Ambe jimbojtsï agradeserikusïni Tata Diosïni? Jamberijtsï eratsentakia tanimu ambe engajtsï jimbo uéjka diosmaiamukua arhini Tata Diosï Jeobani. Engajtsï arhutajka sáni tiempu nájkiruka ma ratkueuaka, nójtsï solu kurhajchani jauaka Tata Diosïiri Uandakuani sino ístujtsï úni jauaka ambe engajtsï arhintaaka. Ka engajtsï pauani pauani májkueni úska imani ambe jingoni engajtsï Bibliarhu arhintajka, tiempu jingontsï niáraaka ambakiti Jeobaeri marhuari máeni. Joperu engajtsï exeska eskajtsï uánikua ambe jatsiska para mójtakuni, ¿ambejtsï jatsiski para úni?
IMANI METEECHANI JATSIKUKUARHIA JE ENGAJTSÏ UAAKA ÍSÏ ÚNI
11. ¿Andijtsïsï ménisï úpirini no sési p’ikuarherani engajtsï Bibliani arhintaaka? Uanda je ejemplu ma.
11 Jamberijtsï niáraaka no sési p’ikuarherani engajtsï Bibliani arhintaaka. ¿Andi? Jimbokajtsï exesïnga eskajtsï jatsiska para uánikua ambe mójtakuni. Eranhaska je ini ambe, primeru jurhiatikuajtsï imani bersikuluechani arhiantasïnga engaksï uandajka eskachi no jatsiska para sánderu xénchaani máru kʼuiripuechani ka eska máteruechani (Sant. 2:1-8). Ka jimbokajtsï exesïnga eskajtsï uaaka mójtakuni indeni ambe, jánguarhintasïngajtsï parajtsï májkueni kaani iáminduechani. ¡Kánikuajtsï sési úxaka! Joperu ísï pauandikua arhiantasïngajtsï máru bersikuluechani engaksï uandajka eskachi jatsiska para pʼímukukuarhini (Sant. 3:1-12). Ka exesïngajtsï eskajtsï ménichani imani ambe uandasïnga enga no xáni marhuajka ojtsï ménichani no xáni xénchperakua jingoni uandani, ísï jimbo, eratsesïngajtsï imani ambe uandani enga marhuajka ka enga uinhaperantauaka máteruechani. Ka ménderu máteru pauandikua jimbo, arhintasïngajtsï eskachi no jatsiska para parhakpini anapuecheeri amigueni (Sant. 4:4-12). Ísï jimbo, niárasïngajtsï eratsentani eskajtsï jatsiska para jingontku erakuani pelikuleechani engajtsï exeajka o músikani engajtsï kurhaajka. Ka tʼámu jurhiatikua jimbo, jamberijtsï úpiringa niárani no sési p’ikuarherani jimbokajtsï exesïnga eskajtsï jatsiska para uánikua ambe mójtakuni.
12. Engachi arhintaaka Bibliani ka exeni eskachi jatsiska para uánikua ambe mójtakuni, ¿andichisï no jatsi para no sési p’ikuarherani? (Ístu exe je notani).
12 Engajtsï exeska eskajtsï jatsiska para mójtakuni máru ambe, asï no sési pʼikuarhera je jimboka inde ambe xarhatasïnga eskajtsï uékasïnga eskaksïni Biblia jarhuataaka ka ístujtsï xarhatasïnga kaxumbikua ka eskajtsï exekuarhixaka ambe engajtsï jatsika para mójtakuni.a Miá je eska para ma úni “jimbanhi kʼuiripu máeni” uétarhisïnga pauani pauani jánguarhintani (Kol. 3:10). ¿Ambeksïni jarhuataa parajtsï imani ambe úni ambe enga uandajka Tata Diosïiri Karakata?
13. ¿Ambejtsï úpirini úni? (Ístu exea je imajeniichani).
13 Asï uéka je méntku iámindu ambe úni engajtsï xáni jorhenguarhiaka, sánderu sési imani ambejku engajtsï uaaka úni (Prov. 11:2). Kara je imani ambe engajtsï uékapiringa sánderu sési úni ka exe je ma o tsimani engajtsï uékapiringa úni ka tátsekuajtsï uaakia máteru ambe. ¿Nénajtsï ueena ísï úni?
Enbesi dejtsï uékani iámu ambe úni ambe engajtsï xáni jorhenguarhiaka chaari Bibliarhu arhintskuarhu, exe je ambe engajkujtsï uaaka úni, uaakajtsï ma o tsimani meteechani uaani. (Exe je párrafuecha 13 ka 14).
14. ¿Náki meta jingontsï úpirini ueenani?
14 Orheta uaakajtsï imani meta jingoni ueenani engajtsï exeaka eska sánderu fásiliiska para chá. O imani jingoni engajtsï exeaka eskajtsï sánderu uétarhinchaxaka. Engajtsï na exeakia ambe engajtsï uéjka úni, jirinhanta je informasioni Índice de las publicaciones Watch Tower o ixú enga arhinhajka Jarhuajperata paraksï Jeobaeri testiguecha estudiarini. Kómarhi je Tata Diosï Jeobani ka kurhaku je eskaksïni íntskuaka jarhuajperata ‘parajtsï chá uékani úni ambe ma ka ístuksïni íntskuni uinhapikua parajtsï ísï úni’ (Filip. 2:13). Tátsekua ísï ú ju eskajtsï na jorhenguarhikia. Engajtsï exeska eskajtsï sánderu sési úxaka imani ambe, inde ambe uaati eskajtsï kánikua sési pʼikuarheraaka ka eskajtsï uékaaka seguiriini máteru meta jingoni. Ima ambe engajtsï mójtakukia jarhuataatiksïni parajtsï mójtakuni máteru ambe ojtsï sánderu sési úni.
JURAJKU JE ESKAKSÏNI TATA DIOSÏIRI UANDAKUA JARHUATAAKA
15. ¿Andichisï Tata Diosï Jeobaeri marhuariicha no májkuenii imani kʼuiripuecha jingoni engaksï uandajka eskaksï arhintasïnga Bibliani? (1 Tesalónika 2:13).
15 Uánikua k’uiripuechaksï uandasïndi eskaksï uánikua xanhari arhintaskia Bibliani. Joperu ¿sési jimboksï jakajkusïni ka úsïnksï imani ambe engaksï jorhenguarhijka paraksï sánderu ambakiti kʼuiripueni? Nómbe, uánikua kʼuiripu no úsïndi indeni ambe. Joperu Tata Diosï Jeobaeri marhuariichachi kánikua ménderueniiska. Májkueni eska primeru siglurhu anapu kristianuecha, ísïchi jiókuarhisïnga Bibliani komueska “Tata Diosïiri uandakua” ka jimbochisï jánguarhintajka pauani pauani xarhatani eskajtsïni jarhuataasïnga (arhinta je 1 Tesalónika 2:13).
16. ¿Ambejtsïni jarhuataa ísï úni eska na arhijka Tata Diosïiri Uandakua?
16 Ménisï úkua jukasïndi arhintani ka úni ambe enga Tata Diosïiri Uandakua arhijka. Jamberichi no xáni tiempu jatsiaka para arhintani ochi jamberi jukari sóntku arhintajka engachi no jamberi miájka ambechisï arhintajki. Ochi jamberi no xáni sési p’ikuarherajka engachi exejka ambe engachi xáni jatsika para mójtakuni. Ambe uéjki jimbojtsï úkua jukanchani arhintani, asï kuatanta je. Tata Diosï Jeobaksïni jarhuataati orhepani uérani, jiókuarhi je jarhuajperata ka asï nomasi kurhaa je Tata Diosïiri Uandakuani ka mirikurhini ambe engajtsï arhintaaka. Ú je imani ambe engajtsï jorhenguarhiaka. Engajtsï sánderu arhintaaka Bibliani ka ísïjtsï úni, sánderujtsï tsípikua jingoni irekaaka (Sant. 1:25).
PIREKUA 94 Jeoba, grasiasi chíti Karakata jimbo
a Exe je bideuni jw.org jimbo Ambe engaksï uandajka máteru tumbiicha: Bibliani arhintani.