SEMANA 20
PIREKUA 7 Jeoba ísïsti komu Karichi Eranguti ma
Tata Diosï Jeobajtsïni sési pʼikuastantasïndi
“K’éri ambe arhinhee [...] Taati enga xáni pʼamojpejka ka ima jindeesti Tata Diosï enga iámindu ambe jimbo sési pʼikuastpentajka” (2 KOR. 1:3).
AMBE ENGACHI JORHENGUARHIAKA
Exeakachi na enga Tata Diosï Jeoba sési pʼikuastaantapka imani judiuechani engaksï Babilonia pánhapka.
1. ¿Nénaksï irekaxapi judiuecha Babilonia?
JU JE eranhaaskani imani judiuechani engaksï Babilonia pánhapka. Exesptiksï na enga kʼamajkunhapka Jerusaléni, imeecheeri ireta. Ka imeecheeri pekaduecheeri kulpa jimbo ka ístu imeecheeri ióntki anapu parienticheri kulpa jimbo, Babiloniaksï pánhaspti jupikakata, imani echeri jimbo engaksï no miiupka. Ísï jimbo, ¿nénaksï p’ikuarherani japi? (2 Crón. 36:15, 16, 20, 21). Nájkirukaksï Babilonia úpiringa ísï irekuarhini eskaksï na pʼindepka, no xáni fásiliipirindi jimbokaksï no imeechasï erakupka jini irekani (Jer. 29:4-7). Ka israelita ma uandaspti na enga p’ikuarherani japka: “Babilonia anapu iurhekuecharhuchi uaxarhukuspka. Mintsita jingonchi ueraspka engachi miántapka Sionini” (Sal. 137:1). I ambe xarhatasïndi eskaksï israeliteecha uétarhinchaxapka eskaksï sési pʼikuastaantapiringa, joperu ¿né úpirini ísï úni?
2, 3. a) ¿Ambe úspi Tata Diosï Jeoba imani judiuechani jimbo engaksï Babilonia pánhapka? b) ¿Ambechi exeni jaua?
2 Jeoba jindeesti ima “Tata Diosï enga iámindu ambe jimbo sési pʼikuastpentajka” (2 Kor. 1:3). Ima xénchaasïndi imeeri marhuariichani ka uékasïndi sési pʼikuastaantani. Tata Diosï Jeoba mítespti eskaksï máru judiuecha engaksï Babilonia pánhapka, uékapiringa ménderu kurhajchani ka ísïksï marhuakuni eska ima na jaiapanhentajka (Is. 59:20). Ísï jimbo, jukari 100 uéxurhini ante deksï Babilonia pánhani, Tata Diosï Jeoba úspti eska Isaíasi libru ma karapiringa enga imeeri nombri pájka. Tata Diosï Jeoba indeni libruni úraspti para sési pʼikuastantani imani israeliteechani engaksï xáni uétarhinchani japka. Isaíasi karaspti: “‘Sési pʼikuastanta je, jo, sési pʼikuastanta je juchiiti iretani’, ísï uandasïndi chaari Tata Diosï” (Is. 40:1).
3 Ka juchajtuchi ménisï uétarhinchasïnga eskajtsïni nema sési pʼikuastantaaka. Ini artikulu jimbochi tanimu ambe exeaka na enga Tata Diosï Jeoba sési pʼikuastaantapka imani judiuechani engaksï Babilonia pánhapka: 1) arhiaspti eska puákuantapiringa engaksï móantapiringa, 2) aiakuaspti eskaksï no méntkisï májkueni nitamakuarhipiringa, ka 3) jarhuataaspti paraksï no chéni. Engachi jorhenguarhini jauaka ini ambe, exeakachi na enga Tata Diosï Jeoba májkueni úni jaka iásï parajtsïni sési pʼikuastantani.
TATA DIOSÏ JEOBAJTSÏNI PʼAMOJKUSÏNDI KA PUÁCHENTANI
4. ¿Néna xarhataspi Tata Diosï Jeoba eska pʼamojkuasïreenga judiuechani? (Isaías 55:7).
4 Tata Diosï Jeoba “jindeesti Taati enga xáni pʼamojpejka” (2 Kor. 1:3). Ka ísï úspti jimboka aiakuaspka judiuechani eska puákuantapiringa engaksï móantapiringa (arhinta je Isaías 55:7). Tata Diosï uandaspti: “Jíkeni pʼamojkuaka jimbokakeni mintsita jingoni xénchasïnga” (Is. 54:8). ¿Néna jarhuataapirini? Nájkirukaksï iámindu israeliteecha no sési nitamakuarhini japka jimboka ireta no kurhandiraspka, Tata Diosï arhiaspti eskaksï no méntkisï Babilonia pakarapiringa. Niárapirindi ima jurhiatikua engaksï uéakuntapiringa (Is. 40:2). Ambe enga arhiapka Tata Diosï kánikua sési pʼikuastaantapti imani judiuechani engaksï móantapka.
5. Judiuechaksï seguru jarhaspti eska Tata Diosï Jeoba pʼamojpesïnga, ¿joperu juchachi andisï sánderu seguru jaki?
5 ¿Ambechi jorhenguarhisïni? Eska Tata Diosï Jeoba méntkisï uékasïnga mintsita jingoni puátspentani. Ima judiuecha engaksï Babilonia pánhapka mítetixaptiksï eska inde ambe ísïiska ka juchachi iásï uaaka sánderu seguru jarhania. ¿Andi? Jimbokachi míteska ambe enga xáni úka Tata Diosï Jeoba parajtsïni puáchentani. Ísï ióni tátsekua enga Isaíasi na uandapkia eska Tata Diosï Jeoba puátspentasïnga, juchaari Taati auandarhu anapu axaspti imeeri Uájpani Echerirhu para euajpiantani imani kʼuiripuechani engaksï sési jimbo móantapiringa. Ka enga Jesúsi ísï uarhipka, ústi eska Tata Diosï Jeoba mátirku borrariuauaka juchaari pekaduechani (Úku. 3:19; Is. 1:18; Éfes. 1:7). ¡Juchaari Tata Diosï meru kánikua pʼamojpesïndi!
6. ¿Andichisï jatsi para eratsentani na enga pʼamojpejka Tata Diosï Jeoba? (Ístu exea je imajeniichani).
6 Ambe enga Tata Diosï Jeoba kararkuarhipka Isaías 55:7 jimbo, uaatijtsïni kánikua sési pʼikuastantani engachi seguiriini jaka no sési p’ikuarherani imani ambe jimbo engachi ióntki úpka. Jarhastiksï kʼuiripuecha engaksï seguiriini jarhajka no sési pʼikuarherani ka sánderia engaksï no sési nitamakuarhini jaka imani ambe jimbo engaksï úpka. Joperu engachi uandantakia ambe engachi no sési úka ka móantanchia, uaakachi seguru jarhani eskajtsïni Tata Diosï Jeoba puáchentaskia. Ka engajtsïni ima puáchentakia, nóteru miásïndia ambe engachi no sési úpka (terukutanta je Jeremías 31:34 jingoni). Tata Diosï Jeoba no méntku miáni jarhasïndi ambe engachi úpka, jiájkani juchajtuchi jatsiska para ísï úni. Tata Diosï imani ambesï exejti engachi iáiasï úni jaka ka no ambe engachi ióntki úpka (Ezeq. 33:14-16). Ka ístu ju je miáni eska no ióni jimbo, juchaari Taati enga xáni pʼamojpejka, uaati eskachi nóteru méni pʼamondakuarhiakia.
Tata Diosï Jeoba no exesïndi ambe engachi ióntki no sési úpka, sino ambe engachi iásï úni jaka. (Exe je párrafu 6).
7. ¿Ambejtsïni jarhuataa uandantani engachi pekadu ma niátaaka?
7 Engachi no sési p’ikuarherani jaka jimbokachi k’éri pekadu ma úska ka nóchi uandantani, ju je ísï úni eska Biblia na uandajka ka arhiani orhejtsïkutiichani parajtsïni jarhuatani (Sant. 5:14, 15). Jamberichi úkua jukanchaaka aianguani, joperu ju je miáni eska Tata Diosï Jeoba indeechani erakuaska parajtsïni jarhuatani. Engachi móantakia ka miáni eskajtsïni Tata Diosï Jeoba ka orhejtsïkutiicha xénchperakua jingoni kámaaka ka pʼamojkuntsïni, sánderu fásiliuati aianguani ambe engachi úka. Ju je exeni na enga pʼamojkupka Tata Diosï Jeoba ka sési pʼikuastantani erachini ma enga Arturu arhinhajka.a Ima kánikua no sési pʼikuarherasïreendi imani ambe jimbo enga úpka. Ima uandantasïndi: “Kasi ma uéxurhiniisptia engani pornografia exeenga. Joperu ma jurhiatikua, arhijtsïkperata ma kurhaaspka enga konsiensieri ambe uandeenga. Ísï tátsekua aianguspka juchiiti uarhiitini ka orhejtsïkutiichani. Nájkirukani ísï pʼikuarherapka enajkini kʼuetsapiti ambe kénditapi, útasïni seguirixapka no sési p’ikuarherani. Orhejtsïkutiichajtsïni iatsitakuarhu arhispti eskarini Tata Diosï Jeoba seguirixapka jaiapanhentani ka eskajtsïni jurhimberantasïnga jimbokajtsïni xénchasïnga, inde amberini mintsitarhu niárachespti ka jarhuatasptijtsïni nóteru pʼamondakuarhinia”. Iásï Arturu prekursori regulariistia ka sierbo ministeriali. Jo, kánikuajtsïni sési pʼikuastantasïndi míteni eskajtsïni Tata Diosï Jeoba puáchentasïnga engachi móantajka.
TATA DIOSÏ JEOBAJTSÏNI AMBAKITI AMBE AIACHESÏNDI
8. a) ¿Ambe aiakuaspi Tata Diosï Jeoba judiuechani engaksï Babilonia japka? b) Eska na arhijka Isaías 40:29-31, ¿néna jarhuataapirini judiuechani ambe enga Tata Diosï aiakuapka?
8 Babilonia kʼéri ireta máespti ka kánikua uinhapikua jatsini. Ka imani kʼuiripuechani engaksï jupiauenga, nóteruksï jurajkuasïreendia paraksï imeo kʼuanhatsentani. Jamberi jimboksïsï judiuecha ísï pʼikuarhereendi enajkiksï nóteru méni kʼuanhatsentapirinia Jerusaléni (Is. 14:17). Joperu Tata Diosï Jeoba aiakuaspti imeeri marhuariichani eska petaatantapiringa Babilonia ka eska no nema úpiringa ójkutani (Is. 44:26; 55:12). Jimboka Tata Diosï Jeoba ísï exesïreenga Babiloniani komueska tʼupuri, nomasi pʼunirhipirindi ka Babilonia nóteru ambe máenia (Is. 40:15). Ambe enga Tata Diosï aiakuani japka, kánikua sési pʼikuastaantapirindi judiuechani ka ístu íntskuani uinhapikua jimboka Isaíasi karaspka: “Ima engaksï mintsikajka Jeobani, uinhaperanhantaatiksï” (arhinta je Isaías 40:29-31). Inde ambakiti aiatsperakua xáni uinhaperaantapirindi engaksï ísï pʼikuarherapiringa komueska águileecha engaksï xáni iótakuarhu kárajka.
9. ¿Andiksïsï judiuecha jatsipi para mintsikani eska Tata Diosï Jeoba petaatantapiringa Babilonia uératini?
9 Ima judiuecha engaksï Babilonia pánhapka, úpirindiksï mintsikani Tata Diosïni ka ístu ambe enga aiakuapka. ¿Andi? Jimbokaksï exespkia eska ísï úkuarhispka ambe enga Tata Diosï xáni uandapka antesi. Pori ejemplu, mítesptiksï eska Asiria andaaspka 10 tribuechani o norti anapu juramukuani ka paaspti jima anapuechani (Is. 8:4). Exesptiksïa eskaksï Babilonia anapuecha kʼamajkuspka Jerusaléni ka paanksï jima anapuechani (Is. 39:5-7). Ístuksï mítespti eska Babilonia anapu rei siegu pakataska rei Sedekíasini ka Babilonia páni (Jer. 39:7; Ezeq. 12:12, 13). Jo, iámu ambe enga Tata Diosï Jeoba uandapka kumplirikuarhispti (Is. 42:9; 46:10). Iámindu i ambe jarhuataapti paraksï mintsikani eska Tata Diosï Jeoba petaatantapiringa Babilonia uératini.
10. ¿Ambejtsïni jarhuataa parachi no mirikurhini ambe engajtsïni Tata Diosï Jeoba aiachini jaka?
10 ¿Ambechi jorhenguarhisïni? Ju je eratsentani ambe engajtsïni xáni aiachini jaka Tata Diosï Jeoba, inde ambejtsïni uinhaperantaati. Ju je no chéni nájkirukachi últimu jurhiatikuecha jimbo irekani jaka ka uánikua kʼuiripuecha jarhani engajtsïni ikiachejka. Tata Diosï Jeobajtsïni aiachixati eskachi irekaaka para méntkisï pínandikua jingoni ka no chéparini. Jiájkani jatsiskachi para mintsita jingoni miáni jarhani ambe engajtsïni ima aiachikia. Jimbokachi úpiringa sánhani arhini mirikurhini ka ísïipirindi komueska sési jásï juátani ma exeni jarhani bentanarhisï enga sïuanharhitini jaka. Ísï jimbo, ju je arhutani tiempu para eranhaskani na engachi xáni sési irekaaka jimbanhi parhakpinirhu ka ísïchi no mirikurhiaka indeni ambe. Ju je arhiantani artikuluechani, exeani bideuechani, kurhaani pirekuechani engaksï uandajka ambe engajtsïni aiachini jaka Tata Diosï Jeoba ka ístu aianguni Tata Diosïni ambe engachi sánderu tsitijka ima ambeeri engajtsïni ima aiachini jaka.
11. ¿Ambe uinhaperantasïni pirenchini ma enga uinhamu pʼamenchani jaka?
11 Ju je exeni pirenchiiri ejemplu ma enga Jael arhinhajka. I pirenchi uinhamu pʼamenchaxati joperu kánikua sési pʼikuastantasïndi ka uinhaperantani ambe engajtsïni Tata Diosï aiachini jaka. Ima uandantasïndi: “Engani ísï p’ikuarherajka enajkini nóteruni uaaia, mintsita jingoni kómarhisïnga Tata Diosï Jeobani ka iámu ambe uénhekuarhisïnga imani jingoni. Ji seguru jarhaska eskarini ima sési kurhanguchesïnga jimbokarini mókuchintasïnga íntskuparini ‘indeni uinhapikua enga no ma kʼuiripu újka jatsini’” (2 Kor. 4:7). Ístu eranhaskasïndi jimbanhi parhakpinirhu irekani jarhani, jima enga no nema enga uandaaka: “Pʼamenchaxaka” (Is. 33:24). Engachi juchajtu iámu ambe aiangukuarhiaka Tata Diosï Jeobani ka méntku eratseni jarhani ambe engajtsïni aiachini jaka, uaakachi uinhapiti jarhani.
12. ¿Andichisï újki mintsikani Tata Diosï Jeobani ka ambe engajtsïni ima aiachini jaka? (Ístu exea je imajeniichani).
12 Májkueni eska judiuecha engaksï Babilonia pánhapka, juchajtuchi exexaka na engaksï kumplirikuarhini jaka profesiechani ka i ambe úsïndi eskachi sánderu mintsikaaka Tata Diosï Jeobani ka ambe engajtsïni aiachini jaka. Pori ejemplu, Estados Unidos ka Gran Bretaña jindeesti sánderu kʼéri juramukua interu parhakpinirhu enga ma parti uinhapitiika ka ma parti nómbe (Dan. 2:42, 43). Ístuchi kurhaasïnga eska uápurisï jenchesïnga ka iámu parhakpinirhuchi aianhpixaka ambakiti aianhperakua Tata Diosïiri Reinueri ambe (Mat. 24:7, 14). Exeni na engaksï i profesiecha kumplirikuarhini jaka ka ístu máteruecha, sésijtsïni pʼikuastantasïndi ka jarhuatasïndijtsïni mintsikani eska ísï úkuarhiaka ambe engajtsïni xáni aiachini jaka Tata Diosï Jeoba.
Profesiecha engaksï iásï kumplirikuarhini jaka, jarhuatasïndijtsïni sési jimbo mintsikani eska ísï úkuarhiaka ambe engajtsïni aiachini jaka Tata Diosï Jeoba. (Exe je párrafu 12).
TATA DIOSÏ JEOBAJTSÏNI JARHUATASÏNDI NO CHÉNI
13. a) ¿Ambeksï nitamakuarhipirini judiuecha enga niárani japiringia paraksï uéakuntani Babilonia? b) Eska na arhijka Isaías 41:10-13, ¿néna sési pʼikuastantaspi Tata Diosï Jeoba imani judiuechani engaksï Babilonia pánhapka?
13 Tata Diosï Jeoba sési pʼikuastantaspti imeechani engaksï Babilonia pánhapka jimboka ambakiti ambe aiakuaspka. Joperu ístu mítespti eskaksï judiuecha kánikua no sési nitamakuarhipiringa enga na niárani japiringia paraksï uéakuntani Babilonia. Tata Diosï Jeoba uandarixaptia eska, rei ma enga kánikua juramukua jatsipka, andaapiringa máru ireteechani engaksï Babiloniaisï japka ka eska tátsekua Babilonia jingoni uarhipepiringa (Is. 41:2-5). Joperu israeliteechaksï no jatsispti para chéni jimboka uánikua uéxurhini ante de i ambe úkuarhini, Tata Diosï Jeoba arhispti Isaíasini eska karapiringa: “Asï ché, jimbokani ji tʼungini jingoni jarhaska. Asï uandanhia, jimbokani ji chiiti Tata Diosïiska” (arhinta je Isaías 41:10-13). ¿Andisï arhiapi “Ji chiiti Tata Diosïiska”? Ísï arhiaspti paraksï no mirikurhini eska ima imeecha jingoni japiringa ka no para arhiani eskaksï imani kómarhipiringa (Sal. 118:6).
14. ¿Ambe máteru ambe úspi Tata Diosï Jeoba para jarhuataani judiuechani engaksï Babilonia pánhapka paraksï no chéni?
14 Tata Diosï Jeoba ístu úspti máteru ambe para jarhuataani imani judiuechani engaksï Babilonia pánhapka parakaksï no chépiringa. Miátaantaspti eska ima kánikua jánhastiiska ka uinhapitiini. Arhiaspti eskaksï auandarhu eranchepiringa ka arhiaspti eska no solu uaaspka jóskuechani sino eska ístu míteska na enga arhinhajka mándani jóskua (Is. 40:25-28). Jiájkani uaakachi seguru jarhani eska ima míteska na enga arhinhajka imeeri marhuari ma. Ka enga jatsika uinhapikua para uaani jóskuechani, ístu jatsisti uinhapikua para jarhuatani imeeri iretani. Ísï jimbo, judiuechaksï no jatsispti para chéni.
15. ¿Ambe arhiaspi Tata Diosï Jeoba judiuechani paraksï preparadu jarhani?
15 Joperu antesi Tata Diosï Jeoba t’uini arhiasptia judiuechani ambe engaksï úpiringa paraksï preparadu jarhani, arhiaspti: “Incha chiiti kuartuecharhu engaksï incharini jaka ka jirejiresï míkaa puertechani engari na inchaakia. Jirikuarhi ma ratu astaka nitamaakia k’éri ikiatapu” (Is. 26:20). Jamberi i bersikulu jiáni ueenapti kumplirikuarhini enga rei Siru andapka Babiloniani. Jenofonte, acheeti ma enga istorieri ambe míteka uandantasïndi eska Siru arhiaspka imeeri sondaduechani engaksï Babilonia inchaakupka eskaksï “uándikuapiringa imeechani engaksï no [kʼumanchikuarhu] incharini japiringa” (Ciropedia, traducción de Ana Vegas Sansalvador). ¡Kánikuaksï chéni japti Babilonia anapuecha! Joperu jamberiksï judiuecha tsípiti pakarapti jimbokaksï kurhajchaspka Tata Diosï Jeobaeri juramukuani.
16. ¿Andichisï no jatsi para chéni enga ueenaakia kánikua no sési nitamakuarhinhani? (Ístu exe je imajenini).
16 ¿Ambechi jorhenguarhisïni? No ióni jimbo kánikua no sési nitamakuarhinhaati. Enga na ueenaakia inde tiempu, k’uiripuechaksï kánikua chéati ka nóksï jánhaskaati ambe úni. Peru jucha nómbe, jimbokachi míteska eska Tata Diosï Jeoba juchaari Tata Diosïiska. Nóchi chéaka jimbokachi míteska eskachi “no ióni jimbo pʼímutanhantaakia” (Luk. 21:28). Ka seguiriini jauakachi mintsikani Tata Diosï Jeobani nájkirukaksï kúnguarhintaaka interu parhakpini anapu nasionicha parajtsïni no sési kámani. Tata Diosï Jeoba úrauati ánjeliichani parajtsïni kuájchakuni ka arhiatijtsïni nénachi uaa tsípiti pakarani. Nájkirukachi iáiasï no míteka nénajtsïni arhia, jamberi úrauati kúnguarhikuechani ka jamberi Biblia ini kúnguarhikuechani arhikuekaajti enga uandajka ‘kuartuecha engaksï incharini jaka’, nani engachi uaaka kuájchakukuarhini. Engachi uéjka sési preparadu jarhani, jatsiskachi para erachiicha jingoni jarhani, tsípikua jingoni úni ambe engajtsïni arhiaka Jeobaeri kúnguarhikua ka seguru jarhani eska Tata Diosïsï orhejtsïkuni jaka (Ebr. 10:24, 25; 13:17).
Miáni eska Tata Diosï Jeoba uinhapitiiska ka eskajtsïni uaaka pʼímutantani, jarhuatasïndijtsïni parachi no chéni jiáni enga ueenaakia kánikua no sési nitamakuarhinhani. (Exe je párrafu 16).b
17. ¿Ambejtsï jatsiski para úni paraksïni Tata Diosï Jeoba sési pʼikuastantani?
17 Nájkiruka no fásiliipka para judiuecha engaksï Babilonia pánhapka, Tata Diosï Jeoba sési pʼikuastaantaspti. Ka májkueni uaati juchantsïni jingoni. Ísï jimbo, ambe uéjki úkuarhini sánderu orhepani, jurajku je eskaksïni Tata Diosï uinhaperantaaka, miá je eska ima pʼamojpesïnga. Jánguarhinta je méntkisï miáni ambe enga ima aiatspeni jaka ka asï mirikurhi je eska Jeoba chaari Tata Diosïiska, ísï jimbo asï jáma je chéni.
PIREKUA 3 Jeoba, tʼuri jíndeni jingoni jarhaska
a Mójtakurhistiksï máru nombriicha.
b AMBE ENGA XARHATAJKA IMAJENI: Máru erachiichaksï tánguarhintatixati. Mintsikasïndiksï eska Tata Diosï Jeoba uinhapitiiska ka eska uaaka kuájchakuani imeeri marhuariichani nani uéjkisïksï jarhani.