Néna íntspini ambakiti konseju ma

1. ¿Neecha jatsiski para konseju íntspini, ka andi?

MÁRU kʼuiripuechaksï no úkua jukanchasïndi konseju íntspini, joperu máteruechaksï no agustu pʼikuarherasïndi ísï úni. Joperu iáminduechachi jatsiska para ísï úni jimboka ménisï uétarhisïnga konseju ma íntskuni nemani jimboka Jesúsi uandaspka eskaksï imeeri chúxapatiicha ísï mítekateepiringa eskaksï xénchperasïnga (Juanu 13:35). Ka parachi xarhatani eskachi xénchaasïnga erachiichani, ménisï uétarhiati eskachi konseju ma íntsauaka jimbokaksï uétarhinchaxaka. Ístu, Biblia uandasïndi eska enga nema ambakiti konseju ma íntskujka nemani, niárasïngaksï sési pájperani (Prov. 27:9).

2. ¿Ambeksï jatsiski para sési míteni orhejtsïkutiicha, ka andi? (Ístu exe je rekuadruni “Néna íntspini konseju ma tánguarhikuarhu enga semanarhu jarhajka”).

² Joperuksï orhejtsïkutiichasï jatsiti para sési míteni néna íntspini ambakiti konseju ma. Tata Diosï Jeoba ka Jesúsi indeechani arhiasti paraksï kuidariuani ka exeani jarhani kúnguarhikuarhu anapuechani (1 Ped. 5:2, 3). Ka sésiksï úsïndi indeni ánchikuarhitani jimbokaksï arhijtsïkperateecharhu íntspiasïnga ambakiti konsejuechani engaksï Bibliarhu pʼitakata jaka. Ístuksï íntsaasïndi konseju mándani erachiini ka pirenchini asta imeechani jamberi engaksï jurajkukia Tata Diosï Jeobani. Ísï jimbo, ju je exeni nénaksï uaa orhejtsïkutiicha ka asta jucha jamberi íntspini ambakiti konseju ma enga uétarhini jauaka.

3. a) ¿Nénachi uaa ambakiti konseju ma íntspini? (Isaías 9:6; ístu exe je rekuadruni “Ju je májkueni úni eska Jesúsi engachi konseju ma íntspiaka”). b) ¿Ambechi exea ini artikulu jimbo?

³ Bibliarhuchi uaaka jorhenguarhini néna íntspini ambakiti konseju ma jimboka uandaasïnga kʼuiripuechani engaksï sési íntspiapka konsejuechani. Sánderu k’eri ejemplu jindeesti Jesúsi, Biblia uandasïndi eska ima jindeeska “Arhistatspiti enga Jánhastiika” (arhinta je Isaías 9:6). Ka íni artikulu jimbo, exeakachi ambechi uaa úni jiáni engajtsïni nema konseju ma kurhacheaka ka ístu engachi jucha uékaaka íntspini nájkirukajtsïni no kurhacheaka. Ístuchi exeni jauaka andisï xáni jukaparhakue exeni néna íntspini konseju ma ka na jatini.

ENGAJTSÏNI NEMA KONSEJU MA KURHACHEJKA

4, 5. Engajtsïni nema konseju ma kurhacheaka, ¿ambechi jatsiski para kurhamarhikuarhini? Úraa je ejemplu ma.

⁴ Engajtsïni nema konseju ma kurhacheaka, ¿ambechi jatsiski para úni? Jamberichi sési pʼikuarheraaka ka uékani jirejiresï íntskuni konseju ma, joperu sánderu sési jauati eskachi kurhamarhikuarhiaka: “¿Ji sési mítetixaki indeeri ambe parani úni ambakiti konseju ma íntskuni?”. Ménisï sánderu sési jauati eskachi arhiaka né enga kʼóru uaaka ambakiti konseju ma íntskuni.

⁵ Pori ejemplu, ju je eranhaskani eska juchaari amigu ma kʼéri pʼamenchakua ma pʼiraska. Ka ma jurhiatikuajtsïni aiangusïndi náki tratamientuechani exeaskia ka kurhamarhisïndijtsïni náki sánderu sési japirindi úrani. Joperu, jimbokachi jucha no doktoriiska níjtuchi sési míti inde pʼamenchakueri ambe, sési jauati eskachi arhiaka né enga uaaka jarhuatani.

6. ¿Andisï no uétarhijki jirejiresï íntspini konseju ma?

⁶ Jamberichi eratsejka eskachi uaaka konseju ma íntskuni erachi o pirenchi jimbokachi sési míteska ambe enga nitamakuarhini jaka. Joperu ante de íntskuni, sánderu sési jauati eskachi erokuarhiaka jimboka Proverbios 15:28 uandasïnga eska “jurhimbitiiri mintsita orheta eratsentasïnga ante de mókuntani”. Ísï jimbo, ante dechi konseju ma íntspini, sési jauati eskachi arhutaaka tiempu para inbestigariini, kómarhini Tata Diosïni ka eratsentani. Engachi ísï uaaka, ísïchi íntspini jauaka konsejuni eska Tata Diosï Jeoba na uéjka. Ju je exeni ambe enga nitamakuarhipka profeta Natáni.

7. ¿Ambechi jorhenguarhisïni Natániiri ambe?

⁷ Jiáni enga rei Dabidi aiangupka profeta Natánini eska uékasïreenga templu ma úkuni Tata Diosï Jeobani, profeta jirejiresï arhispti eska kánikua sési jarhaspka. Joperu Natáni jatsipirindi para orheta Tata Diosï Jeobani kurhamarhini néna exesïreeni indeni ambe jimboka Tata Diosï Jeoba no uékasïreenga eska Dabidi úkupiringa templuni (1 Crón. 17:1-4). Ambe enga nitamakuarhipka Natáni, jorhendasïndijtsïni eskachi “no jatsiska para sóntku uandani” engajtsïni nema konseju ma kurhacheaka (Sant. 1:19).

8. ¿Ístuchi andisï jatsi para jingontku jámani engachi uékaaka konseju ma íntspini?

⁸ Ístuchi jatsiska para xéparini jámani ante dechi konseju ma íntspini. Pori ejemplu, engajtsïni nema konseju ma kurhachepiringa ka juchachi imani ambe arhini enga no káni sési jaka, jamberi ima kʼuiripu ísï uaati ka tátsekua no sési uérakuni, ka juchachi jamberi kulpa jatsinia. Ísï jimbo, kánikua sési jarhasti eskachi orheta sési eratsentaaka ante dechi konseju ma íntspini.

ENGACHI JUCHA UÉKAAKA KONSEJU MA ÍNTSPINI

9. Ante deksï orhejtsïkutiicha konseju ma íntskuni erachiini ma, ¿ambeeriksï jatsiski para seguru jarhani? (Galasia 6:1).

⁹ Ménisï orhejtsïkutiichaksï jatsisïndi para konseju ma íntskuni erachiini o pirenchini ma enga “no sési ambe úni jaka” ísï eska Galasia 6:1 na uandajka (arhinta je). Jo, ménichani kʼuiripu ma imani ambe úni jarhasïndi enga no káni sési jaka ka enga jimbo úpiringa k’eri pekadu ma úni. Ísï jimbo, orhejtsïkutiichaksï uékasïndi jarhuatani paraka sési ambe úni jauaka ka niárani jatsini tsípikua para méntkisï (Sant. 5:19, 20). Paraka konseju marhuakuaka erachiini o pirenchini, orhejtsïkutiichaksï orheta jatsisti para seguru jarhani eska meru no sési ambe úxaka. Jimboka ístu, erachi úpirindi imani ambe úni jarhani enga imeeri konsiensia jurajkujka ka no no sési pʼikuastani jarhani Tata Diosï Jeobani (Rom. 14:1-4). Joperu, engaksï orhejtsïkutiicha seguru jaka eska erachi no sési ambe úxaka, ¿nénaksï úpirini sánderu sési íntskuni konseju ma?

10-12. Engaksï orhejtsïkutiicha uékaaka konseju ma íntskuni erachiini ma o pirenchini ma enga no kurhajkuarhiaka, ¿ambeksï jatsi para úni? Úraa je ejemplu ma (ístu exea je imajeniichani).

¹⁰ Orhejtsïkutiichaksï úkua jukanchasïndi konseju íntskuni nemani enga no kurhakuarhijka. ¿Andi? Jimboka apostoli Pablu uandaspka eskaksï máru kʼuiripuecha úpiringa no sési niátani jarhani ka nóksï kuenta íntskukuarheni jarhani. Ísï jimbo ante deksï orhejtsïkutiicha konseju ma íntspini, jatsistiksï para úni máru ambe paraka erachi sóntku jiókuarhiaka konsejuni.

¹¹ Pori ejemplu, engachi uéjka semiia ikarani ka eska kʼéaka, orhetachi tarhesïnga, jatsikusïngachi semiiani ka tátsekuachi itsï jatsikusïnga. Májkueni, orhejtsïkuti ma indeni ambe úsïndi imani erachi jingoni enga no kurhakuka konseju ma. Orheta, orhejtsïkuti jatsisti para exeni eska uaaka uandontskuarhekuni erachini, tátsekua, arhiati eska xénchasïnga ka eska uandanhiasïnga imani jimbo ka eska jimbosï uéjka uandontskuarhekuni. Ka paraka erachi jiókuarhiaka konsejuni, orhejtsïkuti jatsisti para ísï mítekateeni eska xénchpesïnga ka eska sési kámpisïnga.

¹² Enga na uandontskuarhekuni jauakia, uaati arhini erachini eskachi iáminduecha no sési ambe niátasïnga ka eskachi ménisï uétarhinchasïnga konseju ma, ka ísï, erachi no xáni no sési pʼikuarheraati (Rom. 3:23). Tátsekua, iátsitakuarhu joperu janhanharhikua jingoni, úraati Bibliani para exerani ambe enga no sési úni jaka. Ka enga erachi na kuenta íntskukuarheakia indeeri ambe, orhejtsïkuti uaati arhini ambe enga jatsika para mójtakuni. Ka últimu, arhini ambe enga sési úni jaka ka kómarhijpikuni. Indeni ambe úparini, ísïiuati komu “itsï jatsikuni” semiiani (Sant. 5:15).

13. ¿Ambeksï uaa úni orhejtsïkutiicha paraksï seguru jarhani eska erachi ma sési kurhanguska konsejuni?

¹³ Joperu ménisï, orhejtsïkuti ma konseju ma íntskusïndi o arhisïndi ambe ma erachini ma ka inde máteru ambe kurhanguni. Paraka no ísï úkuarhiaka, orhejtsïkuti uaati iátsitakuarhu kurhamarhini máru ambe para exeni sini erachi sési kurhanguski konsejuni ka sini míteski ambe enga jatsika para úni (Ecl. 12:11).

SÉSI ÍNTSPINI KONSEJU MA KA JIÁNI ENGA UÉTARHIAKA

14. ¿Andichisï no jatsi para konseju ma íntspini jiáni engachi ikiani jauaka?

¹⁴ Jimbokachi no perfektueska ménisïchi uaaka ambe ma o uandani imani ambe enga no sési pʼikuastauaka máteruechani (Kol. 3:13). Ístu, Biblia uandasïndi eskachi ménisï niáraka ikiani máteruecha jingoni (Éfes. 4:26). Ísï jimbo, nóchi jatsiska para jiáni íntspini konseju ma engachi ikiani jauaka jimboka Biblia uandasïnga eska enga nema ikiani jarhajka no úsïnga imani ambe úni enga Tata Diosï uandajka eska sési jarhaska (Sant. 1:20). Engachi ikiatku íntspijka konseju ma o uandontskuarhekuni nemani, sánderuchi k’eri úsïnga problemani. Ísï jimbo, jiánchi jatsiska para uandontskuarhekuni engachi nóteru ikiani jauakia ka arhini na engajtsïni pʼikuastapka. Ju je exeni ambe engachi uaaka jorhenguarhini Eliúeri ambe, ima achamasï enga ambakiti konsejuechani íntsaapka Jobuni.

15. ¿Ambechi jorhenguarhisïni Eliúeri ambe? (Ístu exe je imajenini).

¹⁵ Eliú uánikua jurhiatikua erokuarhispti ka jingontku kurhaaspti na enga Jobu kuájpikuarhini japka imeeri tanimu amigu jémbeecheri. Ka nájkiruka pʼamojkuni japka Jobuni, ístu ikiaspti imani jingoni jimboka Jobu uékasïreenga kuájpikuarhini ka imani ambe uandaspti Tata Diosï Jeobaeri enga no ísïipka. Joperu Eliú tekaantskua jingoni erokuarhispti astaka úpka uandani ka iátsitakuarhu ka janhanharhikua jingoni íntsaaspti konsejuechani Jobuni (Jobu 32:2; 33:1-7). Ambe enga Eliú úpka ambakiti ambejtsïni jorhendasïndi, eskachi jatsiska para sési íntspiani konsejuechani, jiáni enga uétarhiaka, janhanharhikua ka uékperakua jingoni ísï úni (Ecl. 3:1, 7).

JU JE SEGUIRINI JARHANI INTSPIANI KA JIÓKUARHIANI AMBAKITI KONSEJUECHANI

16. ¿Chá ambe jorhenguarhisïni ambe enga uandajka Salmo 32:8?

¹⁶ Tekstu enga úrakuarhika para i artikulu uandasïndi eskajtsïni Tata Diosï Jeoba arhistachisïnga ka eskajtsïni exeni jarhasïnga (arhinta je Salmo 32:8). I ambe arhikuekasïndi eska Tata Diosï Jeoba pendienti jarhasïnga juchantsïni jimbo parajtsïni jarhuatani ísï úni eskajtsïni na íntskukia konsejuni. Ka Tata Diosï Jeoba uékasïndi eskachi májkueni uaaka. Ísï jimbo, engachi íntskuka konseju ma nemani, jatsiskachi para pendienti jarhani imani jimbo para jarhuatani ísï úni.

17. ¿Ambe jingonksï terukuntasïni ima orhejtsïkutiicha engaksï Bibliani úrajka para ambakiti konseju ma íntspini ka enga meru uétarhini jauaka? (Isaías 32:1, 2).

¹⁷ Ini jurhiatikuecha jimbo, uétarhisïndi eskachi jiókuarhiauaka ambakiti konsejuechani joperu ístu íntspiani (2 Tim. 3:1). Ima orhejtsïkutiicha engajtsïni Biblia jingoni arhijka ambe engachi uétarhinchani jaka úni ka uinhaperantantsïni parachi seguiriini jarhani Tata Diosïni marhuakuni, ísïistiksï komueska ima itsï enga jimeesïsï iorheni jarhajka enga kʼarhikʼarhindejka (arhinta je Isaías 32:1, 2). Ka juchachi kánikua sési pʼikuarherasïnga imani amiguechani jatsiani engajtsïni arhijka ambe engachi jatsika para úni ka no ambe engachi jucha uékapiringa kurhaani. Ambe engajtsïni ima arhijka xáni ambakiti ambeesïndi komueska “mansana orueri enga charolarhu ma jatarini jarhajka enga plateeriika” (Prov. 25:11). Ísï jimbo, ju je seguiriini jarhani jánguarhintani parachi sánderu jánhastiini ka parachi úni íntspiani ambakiti konsejuechani ka ístu jiókuarhiani.