Libru enga Jobueri ambe uandajka jorhendasïndijtsïni ambakiti konsejuechani íntspiani

1, 2. ¿Andisï no fásiliipi para Eliú ka máteru tanimu achamasïicha uinhaperantani Jobuni?

SÓNTKU mítekuarhispti eska Jobu iámu ambe tsïtakuarhispka. Ka Elifasi, Bildadi ka Sofari engaksï mítepka Jobuni, nirasptiksï Usi paraksï sési pʼikuastantani. Joperu ískuksï pakaraspti engaksï exepka na enga japka Jobu.

² Jobu iámu ambe tsïtaspti, máru kameiuechani, karichiichani, uakasïichani ka burruechanksï sïpakuaspti ka máruksï uarhispti. Ístuksï sáno iámindu Jobueri jántspiriichani uándikuaspti ka iámindu imeeri uájpeechaksï uarhispti enga kʼumanchikua jatajchakuapka. Ka no inde ambejkuespti, ístu Jobu uinhamu pʼamenchaspti, iámu kuerpurhu pisïrikuarhispti ka pʼamerhikuarhini. Joperu engaksï na andarhierani japkia imeeri amigu jémba arhikateecha, Jobueri maékanda jimboksï uaxakaspti. Ka siete jurhiatikuaksï no ma ambe arhispti (Job 2:​12, 13). Tátsekua niáraspti Eliú achamasï ma enga sánderu sapichuepka ka jimeesïsï no iauani pakaraspti. Tátsekua Jobu uandaspti eska sánderu sésipiringa uarhini ka eska andajpenuni (Job 3:​1-3, 11). I ambe xarhatasïndi eska uétarhinchaxapka eskaksï uinhaperantapiringa. Ísï jimbo, ambe engaksï úpiringa ka uandani xarhatapirindiksï sinksï sési jimbo ambakiti amiguespi ka sinksï uandanhiasïreeni Jobuni jimbo. Ju je exeni ambeksï úspi.

3. ¿Ambechi exea ini artikulu jimbo?

³ Tata Diosï Jeoba arhispti Moisésini eska karapiringa ambe engaksï úpka ka uandani Elifasi, Bildadi, Sofari ka Eliú. Máru ambe enga Elifasi uandapka demoniu ma jimboespti, joperu ambe enga Eliú uandapka Tata Diosï Jeobaeri espirituni jimboespti (Job 4:​12-16; 33:​24, 25). Jimbochisï ini libru jimbo ambakiti konsejuechani exeantajka joperu ístu máru engaksï no ambarhaka. I artikulujtsïni jarhuataati exeni na engajtsï Jobueri ambe jarhuataaka ambakiti konseju ma íntskuni nemani. Ju je orheta exeni eskachi no jatsiska para ísï íntspini eska Elifasi, Bildadi ka Sofari, ka tátsekuachi exeaka nénachi uaa ísï úni eska Eliú. Ístuchi exeaka néna jarhuataapi israeliteechani ka ístu nénajtsïni uaa marhuacheni iásï juchantsïni.

ELIFASI, BILDADI KA SOFARIRI KONSEJUECHA

4. ¿Andiksïsï Elifasi, Bildadi ka Sofari no úpi uinhaperantani Jobuni? (Ístu exe je imajenini).

⁴ Biblia uandasïndi eska Elifasi, Bildadi ka Sofari niraspkaksï Jobuni exeni paraksï uinhaperantani (Job 2:11). Joperuksï no úspti jimbokaksï sóntku ueenaspka imani ambe eratseni enga no ísïipka. Pori ejemplu, uandasptiksï eska Tata Diosï kastigarixapka Jobuni jimboka kʼéri pekadu ma úspka (Job 4:7; 11:14).a Ístuksï uánikua konsejuechani íntskuaspti, joperuksï no jarhuataspti, masi úsptiksï sánderu no sési pʼikuastani (Job 13:12). Bildadi no sáni pʼímukukuarhispti ka arhispti Jobuni eska ima uandasïreenga nomasi pori uandani (Job 8:2). Ka Sofari uandaspti eska Jobu tontu máespka (Job 11:12). Ka nájkirukaksï no uinhamarhikupka, kánikuaksï no sési pʼikuastaspti jimbokaksï kʼéramakuarhispka, arhinchasptiksï ka no sésiksï kámani (Job 15:​7-11). Íksï tanimu achamasïicha uékasïreendi xarhatani eska Jobu kʼéri pekadu ma úspka ka nóksï uinhaperantaspti niksï jarhuatani para sánderu mintsikani Tata Diosïni.

5. Elifasiri, Bildadiri ka Sofariri konsejuecha, ¿nénaksï pʼikuastaspi Jobuni?

⁵ Exeskachia andiksïsï i tanimu achamasïicha no úpi uinhaperantani Jobuni ka masi únksï sánderu no sési pʼikuastani (Job 19:2). Ístuchi kurhanguskia andisï Jobu no sáni eratseparini uandapi. Ima uandaspti eska no ma ambe no sési úspka (Job 6:​3, 26). Ka eskachi na exekia, Elifasi, Bildadi ka Sofari nóksï sáni xarhataspti eskaksï májkueni eratsesïreenga eska Tata Diosï ka kánikuaksï no sési kámaspti Jobuni. Nóksï jamberi kuenta íntskukuarhespti eska Noambakiti úraaxapka paraksï no sési pʼikuastani Jobuni (Job 2:​4, 6). Ambe enga Jobu nitamakuarhipka, ¿néna marhuakuapi israeliteechani ka nénajtsïni uaa marhuacheni juchantsïni?

6. Ambe enga úpka Elifasi, Bildadi ka Sofari, ¿ambeksï úpirini jorhenguarhini Israeli anapu orhejtsïkutiicha?

⁶ Kánikua marhuakuapti israeliteechani. Enga Tata Jeoba na íntsaapkia lei israeliteechani, erakuaspti máru orhejtsïkutiichani paraksï jusgarini imeeri iretani ka paraksï jarhuataani ísï úni eska lei na uandeenga (Deut. 1:​15-18; 27:1). Íksï juesiicha o orhejtsïkutiichaksï jatsispti para jingontku kurhajchaani israeliteechani ante deksï konseju íntsaani o jusgariuani (2 Crón. 19:6). Ístu, orhetaksï jatsisïreendi para sési míteni ambe enga úkuarhipiringa ka nóksï orhetku uandani eskaksï tʼuini mítesïreengia (Deut. 19:18). Ísï jimbo enga israelita ma nipiringa kurhakuani jarhuajperata, imeechaksï jatsispti para sési kámani ka uékperakua jingoni paraka israelita no ísï pʼikuarherapiringa eska ójkutaxapka ka úni iámu ambe aiangukuarhiani (Éx. 22:​22-24). ¿A no eskaksï Israeli anapu orhejtsïkutiicha ambakiti ambe jorhenguarhipka inde librueri enga Jobueri ambe uandajka?

7. ¿Máteru neechaksï úpirini íntspini konseju, ka ambeksï úpirini jorhenguarhini Jobueri ambe? (Proverbios 27:9).

⁷ Eskachi na exekia, no solu Israeli anapu orhejtsïkutiichaksï úpirindi ambakiti konseju ma íntspini, sino ístu imeecha engaksï sapichku japiringa o engaksï kʼéripiringia, acheetiicha o uarhiitiicha paraksï jarhuatani nemani sánderu andarhierani Tata Diosï Jeobani o para nóteru únia ambe enga no sési jaka (Sal. 141:5). Ka inde ambesï uétarhijti eska uaaka ambakiti amigu ma, íntspini ambakiti konseju ma (arhinta je Proverbios 27:9). Engaksï israeliteecha eratsenteenga na enga Elifasi, Bildadi, ka Sofari íntskupka konseju Jobuni, jorhenguarhiptiksï eskaksï no jatsispka para májkueni jámani ni májkueni ambe uandani jiáni engaksï íntskupiringa konseju ma nemani.

8. ¿Ambe ka ambechi no jatsiski para úni engachi konseju ma uékaaka íntskuni nemani? (Ístu exea je imajeniichani).

⁸ Juchajtuchi uaaka uánikua ambe jorhenguarhini. Engaksï erachiicha no sési nitamakuarhini jarhajka, uékasïngachi jarhuataani. Joperuchi no jatsiska para ísï úni eska Elifasi, Bildadi ka Sofari. Ante dechi arhini ambe ma erachini o pirenchini, orhetachi jatsiska para míteni ambe enga úkuarhika ka no orhetku ueenani mámaru ambe eratseni. Tátsekua, nóchi jatsiska para ísï úni eska Elifasi, sánderu sési jatsiskachi para Bibliani úrani ka no ambe engachi jucha eratsejka o ambe engachi jucha nitamakuarhikia (Job 4:8; 5:​3, 27). Ka últimu, nóchi jatsiska para sánderu no sési pʼikuastani o arhiani eska meru no sési ambe úska. Ju je miáni eska Elifasi ka máteru achamasïichaksï uandaspka máru ambe enga ísïipka, jimboka tátsekua asta apostoli Pablu jamberi úraaspti indeni uandakuechani (terukutanta je Job 5:13 1 Korintu 3:19 jingoni). Joperu sáno iámindu ambe engaksï uandapka chkuanderakua ambeespti, jimbosï Tata Diosï Jeoba arhiapti eskaksï no jurhimbitku uandaspka ka no sésiksï pʼikuastani Jobuni (Job 42:​7, 8). Ísï jimbo, engachi konseju ma íntskuni jauaka erachini o pirenchini ma, nóchi méni jatsiska para ísï kurhangutarani eska Tata Jeoba no kurhangukuaka o eska no méni niáraaka xénchani. Joperu iásï ju je exeni ambe enga úpka Eliú.

ELIÚRI KONSEJUECHA

9. ¿Andisï Jobu útasï uétarhinchani japi eska nema jarhuatapiringa, ka néna jarhuataspi Tata Jeoba?

⁹ Jobu, Elifasi, Bildadi ka Sofari, iónksï arhirperaspti jimbosï 28 kapituluecha jimbo karakata pakarati Bibliarhu. Méntku no sáni agustu pʼikuarherakuarhipti jimbokaksï someni ikiatku uandaspka. Jimbosï Jobu seguiriini japti no sési pʼikuarherani ka uétarhinchani jarhani eska nema konseju ma íntskupiringa ka uinhaperantani. Joperu Tata Jeoba Eliúni úraspti para uinhaperantani Jobuni. ¿Joperu andisï Eliú no jirejiresï ueenapi uandani? Eliú mismu uandaspti: “Ji sapichkuni jarhaska ka chájtsï sánderu sáni kʼériiskia. Ka jimbosïni pínasku pakarapka jimbokaksïni janhanharhisïnga” (Job 32:​6, 7). Eliú mítespti eska imeecha engaksï kʼériijkia sánderuksï uánikua ambe mítesïnga ka eratsekua jukarini. Joperu enga Eliú exepka eskaksï ióni uandontskuarhespkia Jobu ka tanimu achamasïicha, nóteru úsptia pínasku pakarani. Jimbosï uandapti: “Enga kʼuiripu ma jatiriijkia no arhikuekasïndi eska jánhastiiska ni eska solu jatiriicha úsïnga kurhanguni ambe enga sési jaka” (Job 32:9). Joperu ju je exeni ambe uandaspi tátsekua ka náki uandakuechani úraaspi.

10. ¿Ambe úspi Eliú ante de konseju íntskuni Jobuni? (Job 33:​6, 7).

¹⁰ Ante de Eliú konseju íntskuni Jobuni, erokuarhispti eska Jobu jirejtantapiringa ka uékani kurhajchani. Orheta Eliú ueenaspti tsʼirapintani, jimboka Biblia uandasïnga eska kánikua ikiaxapka (Job 32:​2-5). Ka tátsekua sési uandontskuarhekuspti ka uékperakua jingoni ka no méni no sési arhispti ka ni uinhachakuni. Pori ejemplu, arhispti: “Exe, tʼu ka ji májkueniiskachi para ima Tata Diosï enga sési jimboeka” (arhinta je Job 33:​6, 7). Eliú xarhataspti eska jingontku kurhajchaspka Jobuni, jimboka ménderu uandaspka jukaparhakua ambe enga Jobu uandapka (Job 32:11; 33:​8-11). Ka ménderu májkueni úspti ísï tátsekua enga íntskuapka máteru konsejuechani (Job 34:​5, 6, 9; 35:​1-4).

11. ¿Eliú néna íntskuspi konseju Jobuni? (Job 33:1).

¹¹ Enga Eliú ueenapkia konseju íntskuni Jobuni, kánikua janhanharhikua jingoni ísï úspti ka no kʼuratsekua jingoni pakataspti. Pori ejemplu, nombri jimbo uandajpaspti, ambe ma engaksï tanimu achamasïicha no úpka (arhinta je Job 33:1). Jamberi Eliú miántapti eska Jobu uékani jarhasïreenga uandani enga tanimu achamasïicha jingoni arhirperani japka, ísï jimbo, Eliú arhispti Jobuni eska úpiringa uandani nájkiruka Eliú konseju íntskuni japiringa (Job 32:4; 33:32). Ístu arhispti eska xéparini jámapiringa imani ambe jingoni enga uandapka ka ístu miátantaspti eska Tata Jeoba no nemani jurajkusïnga, eska sési kámpisïnga, eska uinhapitiiska ka kánikua xénchpeni (Job 36:​18, 21-26; 37:​23, 24). Na enga kámapka Eliú Jobuni, úspti eska Jobu uékapiringa kurhaani Tata Jeobaeri konsejuni (Job 38:​1-3). ¿Jiájkani néna úpirini marhuakuni israeliteechani Eliúri ejemplu ka nénajtsïni uaa marhuacheni juchantsïni?

12. ¿Andisï Tata Jeoba úraapi profeteechani para jarhuataani israeliteechani, ka ambeksï úpirini jorhenguarhini Eliúeri ambe?

¹² Kánikua marhuakuapti israeliteechani. Desde enga ueenapka jarhani ireta Israeli Tata Jeoba uánikua uelta erakuaspti profeteechani parakaksï jorhendapiringa israeliteechani ambe enga Tata Diosï uéjka úni ka paraksï xukaani, ka para konseju íntsaani. Pori ejemplu, jiáni engaksï Juesiicha japka, úraspti profetisa Déborani, ka Samuelini enga kánikua sapichuepka; iichani úraaspti paraksï arhini iretani ambe engaksï jatsipka para úni (Juec. 4:​4-7; 5:7; 1 Sam. 3:​19, 20). Ka imani tiempu jimbo engaksï reiicha japka, mémindu axaaspti profeteechani paraksï jarhuatani iretani sánderu mintsikani Tata Diosïni ka paraksï xukaani imeechani engaksï no uékapiringa ísï kómarhini Tata Jeobani eska na jindeeka (2 Sam. 12:​1-4; Úku. 3:24). Engaksï israeliteecha, ia sea acheetiicha o uarhiitiicha, eratsentapka Eliúeri ambe, úptiksï uánikua ambe jorhenguarhini komu néna konseju íntsaani ka xukaani máteruechani.

13. ¿Nénachi uaa májkueni úni eska Eliú parachi uinhaperaantani erachiichani?

¹³ Ístujtsïni marhuachesïni juchantsïni. Ísï eska Eliú ka Israeli anapu profeteecha, juchajtuchi aianguasïnga máteruechani ambe enga Tata Diosï Jeoba uéjka úni ka imani ambechi jorhentpisïnga enga Bibliarhu jaka. Ka ístu engachi konseju ma íntspijka, imani uandakuechanchi úraasïnga engaksï sési pʼikuastpentajka ka uinhaperantaani erachiichani (1 Kor. 14:3). Joperu orhejtsïkutiichaksï sánderumindu jatsisti para exeni eska uétarhisïnga xénchperakua jingoni uandajpaani máteruechani ka uinhaperaantani, sánderia jiáni enga erachi o pirenchi ma ikiani jauaka o enga imani ambe uandaaka enga no sési jaka jimboka no sési nitamakuarhixaka (Job 6:3; 1 Tes. 5:14).

14, 15. ¿Néna uaa orhejtsïkuti ma májkueni úni eska Eliú?

¹⁴ Ju je eranhaskani eska kúnguarhikuarhu orhejtsïkuti ma mítesïnga eska pirenchi ma kánikua kómu pʼikuarheraxaka, ísï jimbo arhisïndi máteru erachini eska pámbetaaka para nirani uinhaperantani. Engaksï na nirajkia, pirenchi aiangukuarhiasïndi eska no úsïnga tsípikua jingoni jámani nájkiruka nirajka tánguarhikuecharhu ka aianhpini. Enga orhejtsïkuti ini ambe kurhaajka, ¿ambe arhia pirenchini o néna uaa jarhuatani?

¹⁵ Orheta, orhejtsïkuti jánguarhintaati kurhanguni andisï pirenchi kómu pʼikuarherajki. Ka para ísï úni uaati mámaru ambe kurhamarhini ka jingontku kurhajchani, ka jamberi erachi kuenta íntskukuarheati eska pirenchi eratsesïnga eska no jukanchaska paraka Tata Diosï xénchaaka o eska uánikua problemecha jatsiaska o máteru ambe jimbo ka eska jimbosï kómu pʼikuarherajka (Luk. 21:34). Tátsekua, orhejtsïkuti jánguarhintaati ambakiti ambe arhini para uinhaperantani. Pori ejemplu, arhini eska sési úxaka jimboka nájkiruka kómu pʼikuarherajka nirasïnga tánguarhikuecharhu ka aianhpini. Ka enga orhejtsïkuti na sési míteakia andisï pirenchi ísï pʼikuarherajki ka ambe enga nitamakuarhini jaka, iásï kʼóru uaatia Bibliani úrani para exerani pirenchini eska Tata Jeoba xénchasïnga (Gal. 2:20).

SEGUIRII JE JORHENGUARHINI LIBRUERI ENGA JOBUERI AMBE UANDAJKA

16. ¿Ambechi jatsiski para úni parachi seguiriini jarhani jorhenguarhini librueri enga Jobueri ambe uandajka?

¹⁶ Máteru artikulu jimbo exeskachi andisï Tata Diosï jurajkujki eskachi kómu nitamakuarhiaka ka ístu nénachi uaa tekaantani. Ka ini artikulu jimbochi exeska eskachi uaaka ambarhati konsejuechani íntspiani engachi ísï uaaka eska Eliú ka no eskaksï ima tanimu achamasïicha enga Jobu míteapka. Uánikua ambakiti ambechi jorhenguarhiska librurhu enga Jobueri ambe uandajka. Jiájkani engachi jatsiaka para konseju ma íntspini, ju je ménderu exeni ambe engajtsïni jorhendajka libru enga Jobueri ambe uandajka. Joperu enga ióniikia engachi nóteru arhintaka ini libruni, ju je ménderu arhintani ka exeakachi eska i xáni ambakiti libru seguirixaka marhuani asta iásï jamberi.