Tata Diosï Jeobajtsïni méntkisï xénchaati

1, 2. Engaksï erachiicha uánikua problemeechani jatsiajka, ¿nénaksï niárasïni pʼikuarherani?

ERANHASKA barkuni ma marirhu terumikisï ka uinhamu tarhiaxati. Ka oleechaksï no sési kántaxati ka támisïksï pástia. Ka para barku nóteru xáni no sési manakuarhinia, nema ankla ma kʼuanimasïndi marirhu.

² Engari tʼu kʼéri uandanhiata ma jatsika ka ísïri pʼikuarherani jarhani eska inde barku enga marirhu jaka, indeni ambe uaati eskari no nani máru pʼikuarheraaka. Jamberiri ménisï eratsejka eskakeni Tata Jeoba xénchasïnga ka eskakeni jarhuataxaka, joperuri ísï ma ratu jimbo eratsejka eska ima no exexaka ambe engari nitamakuarhini jaka (Sal. 10:1; 13:1). Jamberi chiiti amigu makeni sési pʼikuastantajti, ka ma tiempuri sési pʼikuarherasïnga (Prov. 17:17; 25:11). Joperuri tátsekua ménderu ueenasïnga no sési pʼikuarherani. Jamberiri ísï exejka eska Tata Jeoba no uandanhiasïnga tʼungini jimbo. Engari tʼu ini ambe nitamakuarhini jaka, ¿nénari uaa seguru jarhani ka méntkisï eratseni eskakeni Tata Jeoba xénchasïnga ka jarhuatani?

3. a) ¿Ambeeski meru xénchpeni? (Salmo 31:7: 36:1). b) ¿Andichisï uandajki eska no nema jarhaska enga sánderu xénchpejka eska Tata Jeoba? (Ístu exe imajenini).

³ Engachi kʼéri uandanhiata ma jatsiaka, miáni eskajtsïni Tata Jeoba xénchasïnga, jarhuataatijtsïni uiuinhasï jarhani (arhinta Salmo 31:7; 136:1). Inde uandakua ʻambakiti xénchperakuaʼ arhikuekasïndi na enga kʼuiripu ma uinhamu pʼinderhijka máteru kʼuiripuni ka no méni uékani jurajkuni. Ka Tata Jeobajkusï sánderu sési xarhatajti indeni kualidadini. Jimbosï Bibliarhu arhijti eska Tata Jeoba “puru uékperakueska” ka eska xénchperakua enga ima pʼikuarherajka imeeri marhuariicha jimbo “meru kánikueska” (Éx. 34:​6, 7; Sal. 86:5). I ambe arhikuekasïndi eska Tata Jeoba no méni jurajkuauaka imeeri marhuariichani. Miáni ini ambe, jarhuataatikeni no xáni no sési pʼikuarherani engari kʼéri uandanhiata ma jatsiaka (Sal. 23:4).

TATA JEOBAERI XÉNCHPERAKUA AMBE MÁESTI ENGACHI ORHETKU UEENAJKA JORHENGUARHINI

4. ¿Ambechi orheta jorhenguarhisïni Bibliarhu? ¿Andichisï tátsekua nóteru jurajkujkia eskachi máteru ambe inchajtsitanhaaka?

⁴ Máteru ambe engajtsïni jarhuatajka orhepani uérani, jindeesti ísï exeni Tata Jeobaeri xénchperakuani komu ma ambe engachi orheta ueenajka jorhenguarhini Bibliarhu. Inde ambe engachi jucha orheta ueenajka jorhenguarhini jindeesti eska Tata Diosï arhinhasïnga Jeoba, eska imeeri máechakua Uájpa jindeeska Jesúsi, eska uarhiriicha no ma ambe mítesïnga, eska Echeri paraisu máeuaka ka eskaksï kʼuiripuecha uaaka irekani para méntkisï (Sal. 83:18; Ecl. 9:5; Juanu 3:16; Apok. 21:​3, 4). Enga tʼu na seguru jarhajkia eska ambe engari jorhenguarhika ísïiska jimbokari tʼu mismu exekuarhiskia, nóteruri jurajkusïngia eskaksïni máteru ambe inchajtsitaaka, ka májkueniisti Tata Jeobaeri xénchperakua jingoni. Enga tʼu ísï exeaka komu ambe ma engachi orheta ueenajka jorhenguarhini, nóri eratseni jauaka eskakeni ima no exexaka o eska no uandanhiasïnga tʼungini jimbo. Ju exeni sánderu ambe.

5. ¿Ambe jarhuatasïni kʼuiripuni ma para nóteru jakajkunia chkuanderakua ambe?

⁵ Engari ueenapka jorhenguarhini Biblieri ambe, jamberiri antesi imani ambe jakajkuenga enga chkuanderakuepka. ¿Ambekini jarhuataspi jurajkuni imani ambe? Jamberiri exepka ambe enga Biblia uandajka ka ambe enga chiiti relijioni jorhentpienga. Pori ejemplu, jamberiri ióntki jakajkuenga eska Jesúsi Tata Diosïispka. Joperu tátsekuari eratsespka: “¿Ísïi inde ambe?”. Ka ueenaspkari exeni ambe enga uandajka Biblia ka kuenta íntskukuarhespkari eska Jesúsi no Tata Diosïiska. Ísï jimbo, jiókuarhispkari ka jakajkuspkari eska Jesúsi jindeeska “Tata Diosïiri máechakua Uájpa” ka eska ima orheta kueraanhaska jiáni enga nótki ambe ma kueraanhani japka (Juanu 3:18; Kol. 1:15). Joperu ménisï úkua jukasïndi jurajkuni máru ambe jimbokachi desde iónisï ísï jakajkuspkia (2 Kor. 10:​4, 5). Joperu engari na seguru jarhajkia eska ísïiska ambe enga Biblia uandajka, nóteruri jakajkusïngia chkuanderakua ambe (Filip. 3:13).

6. ¿Andisï uaaka seguru jarhani eskajtsïni Tata Jeoba méntkisï xénchaaka?

⁶ Ísï eskari na úpka parari míteni sini Jesúsi jindeespi Tata Diosï o nómbe, uaakari májkueni úni engari ueenaaka eratseni eskakeni Tata Jeoba no xénchasïnga ka eskari jimbosï problema ambe jatsika. Kurhamarhikuarhi: “¿Ísïi eskarini ima no xénchasïnga?”. Arhinta Salmo 136:1 enga uandajka Tata Jeobaeri xénchperakueri ambe ka exe ambe engari tʼu pʼikuarherajka. Tátsekua eratsenta andisï inde bersikulu 26 uelta arhijki eskajtsïni Tata Jeoba méntkisï xénchaaka. Jo, Tata Jeoba kánikua xénchasïndi imeeri iretani, ka í, ambe máesti engachi orheta ueenajka jorhenguarhini ka engachi jatsika para mintsita jingoni jakajkuni. Jiájkani xarharasïndi eska Tata Jeoba uandanhiasïnga tʼungini jimbo. Ísï jimbo, uaakari seguru jarhani eskakeni ima meru xénchasïnga.

7. ¿Nákiiskiksï máru karakateecha engaksïni aiangujka eskajtsïni Tata Jeoba xénchasïnga?

⁷ Bibliarhuksï útasï uánikua karakateecha jarhasti engajtsïni exerajka eskajtsïni Tata Jeoba xénchasïnga. Ju je exeani tsimani. Jesúsi arhiaspti imeeri chúxapatiichani: “Chájtsï sánderu jukaparhaska eska uánikua pájaruecha” (Mat. 10:31). Ka Tata Jeoba mismu arhispti imeeri iretani: “Jíkeni uinhaperantaaka. Jo, jíkeni jarhuataaka. Jíkeni meru jupikatini jatsiaka juchiti jájki jurhijkandani jimbo, enga jurhimbikuerika” (Is. 41:10). Jesúsi no uandaspti: “Chájtsï jamberi sánderu jukaparhaka eska uánikua pájaruecha”. Ima uandaspti: “Chájtsï sánderu jukaparhaska” ka Tata Jeobajtu no uandaspti: “Aberi engakeni uaaka jarhuatani”, ima uandaspti: “Jíkeni jarhuataaka”. Ísï jimbo, engari ueenaaka eratseni eskakeni Tata Jeoba no xénchasïnga, i karakateechaksïni jarhuataati seguru jarhani eskakeni ima meru xénchasïnga. Eratseanta indeni tekstuechani ka aiangu Tata Jeobani na engari pʼikuarherajka. Ka ísïri tʼujtu májkueni uandaaka eskaksï primeru siglurhu anapu kristianuecha: “Juchachi míteskia na engajtsïni xáni xénchajka Tata Diosï ka jakajkusïngachi eskajtsïni xénchasïnga” (1 Juanu 4:16).a

8. Engachi útasï no seguru jauaka eskajtsïni Tata Diosï Jeoba xénchasïnga, ¿ambechi uaa úni?

⁸ Ka engari útasï no seguru jauaka eskakeni Tata Jeoba xénchasïnga, uaakari ini ambe úni: eratsenta ambe engari pʼikuarherajka ka miánta amberi mítekia. Nájkirukari ísï pʼikuarheraaka eskakeni Tata Diosï no xénchasïnga, iásïri míteskia eska inde ambe no ísïiska, jimboka Biblia arhisïnga eskajtsïni Tata Jeoba xénchasïnga. Ka miá eska Biblia méntkisï jurhimbitku uandantasïnga; joperu imani ambe engari pʼikuarherajka no méntkisï ísïisïndi. Engachi niárapiringa eratseni eskajtsïni Tata Diosï no xénchasïnga, mirikurhini japiringachi eska Tata Diosïiri sánderu kʼéri kualidadi jindeeska xénchperakua (1 Juanu 4:8).

JU JE MIÁNI ESKAJTSÏNI TAATI XÉNCHASÏNGA

9, 10. ¿Jesúsi ambeerisï uandani japi enga uandapka “Jimbokaksïni Taati xénchasïnga”? (Juanu 16:​26, 27: ístu exe imajenini).

⁹ Máteru ambe engajtsïni jarhuataaka seguru jarhani eskajtsïni Tata Jeoba xénchasïnga, jindeesti exeni imani ambe enga Jesúsi arhiapka imeeri chúxapatiichani: “Jimbokaksïni Taati xénchasïnga” (arhinta Juanu 16:​26, 27). ¿Andisï ísï arhiapi? ¿Solu jindeespi para ima sési pʼikuastaantani? Nómbe. Ambe enga arhiapka antesi, xarhatasïndi eska Jesúsi kómarhikueri ambesï uandani japka.

¹⁰ Jesúsi apenasi arhiaspti imeeri chúxapatiichani eskaksï jatsispka para imeeri nombri jimbo kómarhini, joperu no imani kómarhini (Juanu 16:​23, 24). Ka uétarhisïreendi eskaksï ima sési kurhangupiringa ini ambe. ¿Andi? Jimbokaksï Jesúsiiri amiguespka jamberiksï uékapirini imani kómarhini ísï tátsekua enga na tsíntapiringia. Jamberiksï eratsepirindi “Imajtsïni kánikua xénchasïndi, kurhauati juchaari kómarhikuani ka tátsekua aianguati Taati jémbani”. Joperu Jesúsi xarhatakuaspti eska inde ambe no sési japiringa, jimbosï arhiapti: “Jimbokaksïni Taati xénchasïnga”. Jo, Tata Jeobajtsïni xáni xénchasïndi enga ima mismu kurhauajka juchaari kómarhikuechani, ka inde ambe máesti engachi orheta jorhenguarhijka engachi kómarhikueri ambe exeni jarhajka. ¿Ambekini jorhendasïni i ambe? Eskari niáraska míteni Jesúsini ka xénchandi jimbokari jorhenguarhiska Bibliani (Juanu 14:21). Joperu ísï eska primeru siglurhu anapu chúxapatiicha, tʼujturi uaaka kómarhini Tata Diosïni mintsikaparini eskakeni ima kurhajchaaka ka eskakeni xénchasïnga. Méntkisï engari kómarhijka Tata Jeobani xarhatani jarhasïngari eskari jakajkusïnga eskakeni Taati xénchasïnga tʼungini (1 Juanu 5:14).

ANDICHISÏ MÉNI NO SEGURU JARHAJKI

11. ¿Né sési pʼikuarherasïni engachi jucha no seguru jarhajka eskajtsïni Tata Jeoba xénchasïnga?

¹¹ ¿Andichisï no seguru jarhajki eskajtsïni Tata Jeoba xénchasïnga? Jamberichi uandajka eskajtsïni Satanási ísï eratsetarasïnga, ka ísïisti, jimboka ima jini ka jini jámaxaka parajtsïni ántani ka uékasïndi eskachi eratseaka eskajtsïni Tata Jeoba no xénchasïnga (1 Ped. 5:8). Joperu Tata Jeoba xénchperakua jimbosï íntspiti imeeri Uájpani para uarhini juchantsïni jimbo, joperu Satanási uékasïndi eskachi eratseaka eskachi no jukanchaska indeni kóntperatani (Ebr. 2:9). ¿Né sési pʼikuarheraa engachi no seguru jauaka eskajtsïni Tata Jeoba xénchasïnga? Noambakiti. Ka engachi uandanhiateecha jimbo niáraska kuatantani, ¿né tsípini jaua? Noambakiti. Joperu Tata Jeoba, Satanasinisï nóteru xénchajtia ka iásï inde uékasïndi eskachi eratseaka eskajtsïni Tata Jeoba juchantsïnisï no xénchajka, joperu no ísïisti (Éfes. 6:11). Míteni ambe enga uéjka úni Noambakiti, jarhuataatijtsïni sánderu uinhamu anhaxurhikuni parajtsïni no támisï jánhastani (Sant. 4:7).

12, 13. ¿Andisï pekadu újki eskachi no seguru jauaka eskajtsïni Tata Jeoba xénchasïnga?

¹² Joperu no solu Satanásiisti enga újka eskachi no seguru pʼikuarheraaka eskajtsïni Tata Jeoba xénchasïnga, ístu pekadu jimboesti enga újka eskachi mámaru ambe eratseaka ka úni (Sal. 51:5; Rom. 5:12). Pekadujtsïni jarharitasti juchaari Tata Kuerajpiriiri, ka ístu kánikua no sési úkusti juchaari eratsekuani, mintsitani ka kuerpuni.

¹³ Pekadu úsïndi eskachi no nani máru pʼikuarheraaka, eskachi kulpabli pʼikuarheraaka, uandanhiani, chéni ka kʼuratseni. Ka na uéjki jatinchi ísï pʼikuarherasïnga jimbokachi míteska eskachi no perfektueska nájkiruka ueenani jámani Tata Jeobajtsïni sési kueraapka. Joperu sánderuchi no sési pʼikuarherasïnga jiáni engachi no sési ambe niátajka (Rom. 8:​20, 21). Indeni pekadu jimbochi ísï jarhaska eska karrueri iianta ma enga ponchadu jaka, nóchi úsïnga iámindu ambe sési úni ísï eskachi na kueraakata jaka. Jimbochisï ménisï ísï pʼikuarherajka eskajtsïni Tata Jeoba no xénchasïnga, joperu ju je miáni eska Jeoba jindeeska ima “Tata Diosï enga kʼériika ka enga sánderu uinhapitiika enga ísï újka eska na aiatspejka ka enga xarhatakuajka ambakiti uékperakua imeechani engaksï xénchajka ka kurhajchaani imeeri juramukuechani” (Neh. 1:5).

14. ¿Nénajtsïni jarhuatasïni euajpintskua nóteru ísï pʼikuarherania eskajtsïni Tata Jeoba no xénchaasïnga? (Roma 5:8; ístu exe rekuadruni “Xéparini je paraksïni pekadu no támisï páni”).

¹⁴ Ísïisti, no ma ambe jarhasti engachi jimbo uaaka andakuarheni parajtsïni Tata Jeoba xénchaani, joperu jimbochisï xáni sési pʼikuarherajka engajtsïni ima útasï ísï kánikua xénchajka ka enga íntspika Uájpani parajtsïni úni puácheantani pekaduechani (1 Juanu 4:10). Ístu ju je miáni eska Jesúsi no jurhaspka para pʼímutantani kʼuiripu perfektuni sino pekadoriichani (arhinta je Roma 5:8). Ísï jimbo, Tata Jeoba no erokuarhisïndi eskachi iámindu ambe sési uaaka jimboka míteska eskachi pekadoriiska. Sési kurhanguni eskachi pekadu jimbo ísï pʼikuarherasïnga eskajtsïni Tata Jeoba nóteru xénchasïngia, jarhuataatijtsïni parachi jánguarhintani no ísï eratseni (Rom. 7:​24, 25).

JU JE NO MÉNI JURAJKUNI TATA DIOSÏNI

15, 16. Engachi no méni jurajkuska Tata Diosï Jeobani ¿ambeeri uaa seguru jarhani ka andi? (2 Samuel 22:26).

¹⁵ Jiáni engachi no sési nitamakuarhini jauaka, Tata Jeoba uékasïndi eskachi ambakiti ambe erakuaka úni ka eskachi no méni jurajkuaka (Deut. 30:​19, 20). Engachi no méni jurajkuska Tata Jeobani uaakachi seguru jarhani eskajtsïni imajtu no méni jurajkuaka ambe uéjkichi nitamakuarhini jarhani (arhinta 2 Samuel 22:26).

¹⁶ Ísï jimbo, jiáni engachi kánikua no sési nitamakuarhini jarhajka, ¿a no eska sánderu sésiiska miáni eskajtsïni Tata Jeoba kánikua xénchasïnga? Engachi ísï újka, ísïchi jarhasïnga komueska ima barku enga anklani marirhu inchamitini jatsika para no manakuarhini. Ka engachi ménisï no seguru jauaka eskajtsïni Tata Jeoba xénchasïnga, ju je miáni eska ambe engachi pʼikuarherajka no májkueniiska imani ambe jingoni engachi míteka. Ka nóchi méni mirikurhiaka ini ambakiti ambe engachi orheta jorhenguarhika Bibliarhu: eskajtsïni Tata Jeoba méntkisï xénchaaka.