Ambe engachi jorhenguarhijka librueri enga Jobueri ambe uandajka

1, 2. ¿Andisï uétarhijki arhintani libruni enga Jobueri ambe uandajka?

LIBRU enga Jobueri ambe uandajka ma 3,500 uéxurhiniistia enga karanhaka, Tata Jeoba kararkuarhispti ka Moisési karaspti (2 Tim. 3:16). Uánikua kʼuiripuechaksï uandasïndi eska i libru kánikua sési karakata jarhaska jimboka sóntku kurhangukuarhisïnga. Imani ambe uandasïndi enga meru ísïika ka kánikua uinhapikua jatsisti. ¿Na jatini últimueski engajtsï arhintaka ini libruni?

² I libru kánikua ambakiti ambe uandantasïndi jimboka xarhatasïnga eska para ánjeliicha ka para kʼuiripuecha kánikua jukaparhakueska pímbinhajkuntani Tata Jeobaeri nombrini. Ístu, i librujtsïni jarhuatasïndi exeni na enga Tata Diosï Jeoba xénchpejka, jánhastiini, uinhapitiini ka iámu ambe sési úni. Pori ejemplu, ini libru jimbojkusï 31 uelta uandajti eska Tata Diosï Jeoba jindeeska “ima enga iámindu ambe újka úni”. Ístu i libru uandantasïndi andisï Tata Diosï jurajkujki eskachi kómu nitamakuarhiaka ka ístujtsïni aiangusïndi imani ambe engachi kurhamarhikuarhijka.

3. ¿Nénajtsïni marhuachesïni engachi jorhenguarhijka libruni enga Jobueri ambe uandajka?

³ Engachi púntstarhu jarhajka kʼéri juáta ma jimbo, úsïngachi exeni méntku ma uirhipandani. Ka libru enga Jobueri ambe uandajka májkueniisti eska inde juáta. Indeni libru jimbo úsïngachi ísï exeani juchaari problemechani eska Tata Jeoba na exeajka. Jiájkani ini artikuluni jimbochi exeaka na engajtsïni inde libru jarhuatajka jiáni engachi kómu nitamakuarhini jarhajka. Ístuchi exeaka na enga jarhuataapka ióntki máru israeliteechani ka na engajtsïni jarhuatajka iásï ima ambe enga Jobu nitamakuarhipka. Ístuchi exeni jauaka nénachi uaa úrani Jobueri ambe para máteruechani jarhuataani.

TATA DIOSÏ JURAJKUSÏNDI ESKA JOBU NO SÉSI NIMATAMAKUARHIAKA

4. ¿Andisï Jobu ménderueniipi máru israeliteecha jingoni engaksï Ejiptu japka?

⁴ Imani tiempu jimbo engaksï israeliteecha Ejiptu jántspiripka, Jobu Usi irekaxapti, i lugari esteisï japti imani Echeri jimbo enga Tata Jeoba Aiakuapka israeliteechani ka Arabia norteisï. Nájkirukaksï máru israeliteecha ueenapkia diosï úkateechani kómarhiani Ejiptu, ixúani Jobu seguirixapti sési marhuakuni Tata Jeobani (Jos. 24:14; Ezeq. 20:8). Jimbosï Tata Diosï uandapti: “No nema jarhasti parhakpinirhu enga ísïika” eska Jobu (Job 1:8).a Jobu achamasï máespti enga kánikua jatsikuarheriipka, kʼuiripuechaksï janhanharhisïreendi ka kʼéri ambeksï exesïreendi imani lugari jimbo (Job 1:3). Jimbosï i ambe úpti eska Satanási kánikua ikiapiringa enga exepka eska kʼuiripu ma komu Jobu sési marhuakuni japiringa Tata Diosïni.

5. ¿Andisï Tata Jeoba jurajkupi eska Jobu no sési nitamakuarhipiringa? (Job 1:​20-22; 2:​9, 10).

⁵ Satanási uandaspti eska Jobu jurajkupiringa Tata Jeobani enga ueenapiringa no sési nitamakuarhini (Job 1:​7-11; 2:​2-5). Enga ísï uandapka, arhikuekaxapti sinksï ánjeliicha ka kʼuiripuecha sési jimbo marhuakusïreeni Tata Diosïni o nómbe. Ísï jimbo, nájkiruka Tata Jeoba kánikua xéncheenga Jobuni, jurajkuspti eska Satanási xarhatapiringa sini ísïispi ambe enga uandapka (Job 1:​12-19; 2:​6-8). Orheta, Satanási úspti eska nóteru ma animalini ma kánguarhipiringia, uándikuaspti 10 uájpeechani ka úspti eska pʼamenchapiringa. Joperu no sési uérakuspti Noambakitini jimboka Jobu no méni jurajkuspka Tata Jeobani (arhinta je Job 1:​20-22; 2:​9, 10). Tátsekua Tata Jeoba ambakerantaspti Jobuni, úspti eska ménderu uánikua ambe jatsikuarhepiringa ka eska kaapiringa máteru 10 uájpeechani ka eskaksï ménderu ísï exepiringa Jobuni komu ambakiti kʼuiripu ma ka eska máteru 140 uéxurhini irekapiringa, jimbosï úpti míteani imeeri nimakua jémbeecheeri nimakuechani (Job 42:​10-13, 16). Ambe enga Jobu nitamakuarhipka, ¿néna marhuakuapi ióntki Tata Diosïiri marhuariichani ka nénajtsïni uaa marhuacheni juchantsïni?

6. ¿Ambe enga Jobu nitamakuarhipka néna úpirini jarhuataani israeliteechani? (Ístu exe je imajenini).

⁶ Kánikua marhuakuapti israeliteechani. Israeliteechaksï kánikua kómu nitamakuarhispti Ejiptu. Pori ejemplu, Josué ka Kalebi jántspiriisptiksï jiáni engaksï tumbiipka ka tátsekuaksï 40 uéxurhini jámaspti desiertu imeecheeri kulpa jimbo engaksï no kurhandireenga. Engaksï israeliteecha ka imeecha engaksï tátsekua andajpenupka mítepka ambe enga nitamakuarhipka Jobu ka na enga Tata Jeoba xáni kóndentapka, jarhuataapti paraksï kurhanguni neeski ima enga újka eskachi komu nitamakuarhiaka. Ístuksï úpti kurhanguni andisï Tata Diosï jurajkujki eskachi komu nitamakuarhiaka ka andisï xáni jukaparhakue para Tata Diosï eskachi iámu mintsita jingoni kurhajchaaka ka nóchi méni jurajkuni.

7, 8. ¿Néna uaa jarhuataani libru enga Jobueri ambe uandajka imeechani engaksï no sési ambe nitamakuarhini jaka? Uandanta je eksperiensia ma.

⁷ Ístujtsïni uaati marhuacheni juchantsïni. Iásï uánikua kʼuiripuechaksï nóteru mintsikasïndia Tata Diosïni jimbokaksï no kurhangusïnga andiksïsï ambarhati kʼuiripuecha no sési ambe nitamakuarhijki. Ju je exeni ambe enga nitamakuarhipka Jeisel, Ruanda anapu uarhiiti ma.b Enga ima uátsïipka, jakajkusïreendi Tata Diosïni. Joperu tátsekua nóteria, jimboka imeeri taati jémbeechaksï diborsiarikuarhispka ka amamba uambuchantaspti ka inde acheeti kánikua no sési kámasïreendi Jeiselini. Ístu, jiáni enga Jeisel uátsïipka acheeti ma biolarispti. Ka enga Jeisel jánguarhintapka sési pʼikuarherantani imeeri relijionirhu, no úspti, jimbosï ma jurhiani karta ma úkupti Tata Diosïni enga arhienga: “Jíkeni kómarhisïnga, jánguarhintaxaka úni ambe enga sési jaka, joperu tʼuri solu úsïnga eskani no sési ambe nitamakuarhiaka. Ísï jimbo, jurajkuakakinia ka ji míteskia néna tsípikua jingoni irekani”. Engachi i jásï ambe mítejka, kánikuachi no sési pʼikuarherasïnga, jimboka ísï eska Jeisel, jarhastiksï uánikua kʼuiripuecha engaksï eratsejka eska Tata Diosïiri kulpeesïnga engachi no sési nitamakuarhijka.

⁸ Indeni libru jimbo enga Jobueri ambe uandajka, jorhenguarhiskachia eska Noambakitisï újka eskachi kómu nitamakuarhiaka ka no Tata Diosï. Ístu eska no sési jarhaska uandani eska nema pʼikuntaxaka ambe enga no sési niátapka jimboka Biblia uandasïnga eskachi iáminduecha ménisï ‘úkuarhinchasïnga o jatsisïnga ambe ma engachi no erokuarhini jarhajka’ (Ecl. 9:11; Job 4:​1, 8). Ka ístuchi exeskia eska engachi seguiriini jauaka sési marhuakuni Tata Jeobani na uéjkichi no sési nitamakuarhini jarhani, uaakachi pímbinhajkuntani imeeri nombri ka xarhatani eska Noambakiti chkuandera máeska (Job 2:3; Prov. 27:11). Kánikuachi sési pʼikuarherasïnga engachi jorhenguarhikia Bibliarhu andisï kʼuiripu kómu nitamakuarhijki. ¿Joperu ambe úkuarhispi tátsekua Jeisel jingoni? Ima ueenaspti Biblieri ambe jorhenguarhini Jeobaeri testiguecha jingoni ka exespti eska no Tata Diosïsï úni japka eska ima kómu nitamakuarhipiringa. Uandaspti: “Mintsita jingoni kómarhispka Tata Diosï Jeobani ka arhispka eska ima sési mítetixapka eskani ji no uékasïreenga jurajkuni. Ji no mítespka sési jimbo neespi ima. Joperu iásï kʼóruni míteskia eskarini Tata Jeoba xénchasïnga ka úsïngia sési jimbo tsípikua jingoni irekani”. Ísïisti, kánikuachi sési pʼikuarherasïnga míteni andisï Tata Diosï jurajkujki eskachi kómu nitamakuarhiaka. Iásï ju je exeni na engajtsïni jarhuatajka Jobueri ambe jiáni engachi kómu nitamakuarhini jarhajka.

JOBUERI AMBE JARHUATASÏNDIJTSÏNI TEKAANTANI

9. ¿Néna jarhaspi Jobu jiáni enga xáni no sési ambe nitamakuarhini japka? (Santiagu 5:11).

⁹ Ju je eranhaskani Jobuni jandiajku uaxakatini jarhani tʼupuri jápurhu, iámu pisïrekuarhitini ka ísterkusï jatiia xáni no sési pʼikuarherani. Iámu kʼarhisïstia ka ísterkusï uérhikuarhini jatiia sïkuiri, iámu turhipixatia pʼamenchakua jimbo. Nóteru ambe ma úsïndia úni, solu uérurikuarhixati porhechiiri kakakuarhikata ma jingoni ka ístu aiaiamexati. Engachi ísï eranhaskajka Jobuni, úpiringachi uandani eska ísterkusï jakaia. Joperu nómbe, sánderu sési, Jobu xarhataxati eska kánikua tekaantaxaka (arhinta je Santiagu 5:11). ¿Ambe jarhuatapi para xáni tekaantani?

10. ¿Nénachi míteski na enga pájpereenga Jobu Tata Jeoba jingoni?

¹⁰ Jobu exespti eska jatsispka para aianguni Tata Jeobani ambe enga pʼikuarhereenga ka ambe enga eratseenga (Job 10:​1, 2; 16:20). Pori ejemplu kapitulu 3 jimbo, Jobu kómu pʼikuarheraxapti ka ikiani jimboka no sési ambe nitamakuarhixapka. Jobu eratsespti eska Tata Jeobasï ísï úkuni japka. Tátsekua, engaksï amigu jémba arhikateecha arhini japka Jobuni eska pʼikuntaxapka ambe enga úpka antesi, ima someni arhiaspti eska sési marhuakuspka Tata Diosïni. Jamberi ísï kurhangutaraapti eska ma tiempu sánderu sési ambe úspka eska Tata Diosï (Job 10:​1-3; 32:​1, 2; 35:​1, 2). Joperu tátsekua Jobu kuenta íntskukuarhispti eska ísku ambe masï uandani japka solu jimboka uékasïreenga kuájpikuarhini (Job 6:​3, 26). Ka kapitulu 31 jimbo, exesïngachi eska Jobu uékasïreenga eska Tata Jeoba kurhajchapiringa ka eska uandapiringa eska Jobu no méni no sési ambe niátaspka (Job 31:35). Nájkiruka Jobu ini ambe úpka, no sési jarhaspti enga afuersa uékeenga eska Tata Jeoba aiangupiringa andisï kómu nitamakuarhini japi.

11. ¿Néna mókukuspi Tata Jeoba Jobuni?

¹¹ Iásï kʼóruchi kurhangusïngia eska Jobu ísï arhispka Tata Jeobani jimbokaksï kánikua sési pájperasïreenga, ístu Jobu mintsikaxapti eska Tata Jeoba sési jusgaripiringa. Ka jiáni enga Tata Jeoba kurhakupkia Jobuni, kʼéri ma tarhiaspti. No aianguspti Jobuni andisï kómu nitamakuarhini japi, nijtu no sési arhipi enga uandauandamini japka níjtu arhipi andisï uékeeni eskaksï iáminduecha mítepiringa eska Jobu no ma ambe úspka. Sánderu sési, ísï eska taati ma na xukajka uájpani, Tata Jeoba ísï kámaspti Jobuni ka mintsitarhu niárakuspti, jimbosï Jobu kaxumbikua jingoni jiókuarhipti eska no ma ambe mítespka ka kánikua pʼamondakuarhispti enga no eratseparini uandapka (Job 31:6; 40:​4, 5; 42:​1-6). Jiájkani ambe enga Jobu nitamakuarhipka, ¿néna marhuakuapi ióntki anapuechani ka nénajtsïni uaa jarhuatani juchantsïni iásï?

12. Ambe enga Jobu nitamakuarhipka, ¿néna marhuakuapi israeliteechani?

¹² Kánikua marhuakuapti israeliteechani. Pori ejemplu Moisésini. Jiáni enga ima ueenapka orhejtsïkuni ireta Israelini, uánikua ambe tekaantaspti jimbokaksï máru israeliteecha no uékasïreenga kurhajchani Tata Jeobani ka no sésiksï pʼikuastasïreendi imani. Ka nájkirukaksï máru israeliteecha uánikua xanhari uandapka eska Tata Jeoba no jarhuataaxapka, Moisési kómarhisïreendi Tata Diosïni ka aiangukuarhisïreendi ambe enga uandanhiatani jarheenga (Éx. 16:​6-8; Núm. 11:​10-14; 14:​1-4, 11; 16:​41, 49; 17:5). Ístu ma xanhari kánikua tekaantaspti enga Tata Jeoba xukapka. Jiáni enga israeliteecha jingoni jámapkia, ma 40 uéxurhinisï desiertu Kadésisï, Moisési no sáni eratseparini uandaspti ka no kʼéri ambe arhispti Tata Jeobani (Sal. 106:​32, 33). Jimbosï Tata Jeoba no jurajkupti eska Moisési niárapiringa imani Echeri jimbo enga Aiakuapka (Deut. 32:​50-52). Ambe enga Moisési nitamakuarhipka jamberi kánikua no sési pʼikuastapti, joperu ima kaxumbikua xarhataspti ka jurajkuspti eska Tata Jeoba xukapiringa. Ísï jimbo, Jobueri ambe ístu jarhuataapti tekaantani imani israeliteechani engaksï ísï tátsekua andajpenupka. Engaksï imeecha eratsentapiringa ambe enga Jobu nitamakuarhipka úpirindiksï xarhatani kaxumbikua enga Tata Diosï xukaapiringa, nóksï eratsepirindi eskaksï sánderu sési ambe úsïnga eska Tata Diosï ka ístuksï exepirindi eska kánikua sésiiska aiangukuarhini Tata Jeobani iámu ambe.

13. ¿Nénajtsïni uaa jarhuatani tekaantani ambe enga nitamakuarhipka Jobu? (Ebreu 10:36).

¹³ Ístujtsïni uaati marhuacheni juchantsïni. Komu kristianuecha jatsiskachi para kánikua tekaantani (arhinta je Ebreu 10:36). Uétarhisïndi tekaantani jimbokachi ménisï pʼamenchani jarhasïnga, no sési pʼikuarherani jarhani o kʼéri problema ma jatsini familiarhu, ochi uarhiranchani nemani ka ménisïjtsïni nema arhini o úchini ambe ma engajtsïni sánderu no sési pʼikuastajka (Prov. 12:18). Joperu eskachi na exekia Jobu jingoni, juchajtuchi jatsiska para mintsikani eskajtsïni Tata Jeoba kurhajchaaka engachi mintsita jingoni aiangukuarhiska na engaminduchi pʼikuarherani jaka (1 Juanu 5:14). Tata Jeoba no ikiauati engachi juchajtu no eratseparini arhiska ambe ma ísï eska Jobu. Sánderu sési imajtsïni íntskuati uinhapikua ka jánhaskakua parachi úni tekaantani (2 Crón. 16:9; Sant. 1:5). Enga Tata Jeoba exeska eskajtsïni jatsiska para konseju ma íntskuni, ísï eska na úpka Jobu jingoni, ima ísï uaati úraparini imeeri Karakatani, kúnguarhikuani, orhejtsïkutini ma o ambakiti amiguni ma. Jobueri ejemplujtsïni jorhendasïndi eskachi jatsiska para tekaantani jiáni engajtsïni Tata Jeoba xukaaka (Ebr. 12:​5-7). Ka ísï eska Jobuni na kánikua marhuakupka kurhajchani Tata Jeobani, juchantsïntu kánikua marhuacheati kaxumbikua xarhatani ka jiókuarhiani konsejuechani (2 Kor. 13:11). ¿A no eskachi kánikua ambakiti ambe jorhenguarhisïnga Jobueri ambe? Ísï jimbo, ju je exeni nénachi uaa úrani Jobueri ejempluni para máteruechani jarhuataani.

ÚRA JE LIBRUNI ENGA JOBUERI AMBE UANDAJKA PARA MÁTERUECHANI JARHUATAANI

14. ¿Nénachi aianguasïni kʼuiripuechani andichisï kómu nitamakuarhijki?

¹⁴ Engachi aianhpini nirajka juchachi kánikua tsitisïnga Biblia jingoni aianguani imani kʼuiripuechani engajtsïni kurhamarhijka andichisï kómu nitamakuarhijki; ka aianguasïngachi eska jardini de Edénirhu ueenakuarhispka, eska jima Noambakiti, enga ánjeli no sési úri máeka, chkuanderakuspka Adáni ka Ebani ka eskaksï jimbosï nóteru kurhajchapkia Tata Diosïni (Gén. 3:​1-6). Tátsekuachi arhiasïnga eska Adáni ka Ebaeri kulpa jimbo iáminduechachi kómu nitamakuarhisïnga ka uarhini (Rom. 5:12). Ka ístuchi arhiasïnga eska Tata Diosï jurajkuxaka eska tiempu nitamaaka para xarhatani eska Noambakiti chkuandera máeska ka eskaksï kʼuiripuecha míteaka eskachi uaaka perfektueni (Apok. 21:​3, 4). Engachi ini ambe aianguajka, kánikua sési jarhasti, jimboka uánikua kʼuiripuechaksï úsïnga míteni andichisï kómu nitamakuarhijki.

15. Jiáni engajtsïni kʼuiripu ma kurhamarhiaka andichisï kómu nitamakuarhijki, ¿nénachi úpiringa úrani libruni enga Jobueri ambe uandajka? (Ístu exea je imajeniichani).

¹⁵ Ístuchi uaaka Jobueri ambe aianguni imani engajtsïni kurhamarhiaka andichisï kómu nitamakuarhijki, úpiringachi arhini eska kánikua sésiska enga indeni ambe kurhamarhikuarhijka. Ka tátsekua arhini eska ióntki jarhaspka achamasï ma enga Jobu arhinheenga ka eska imajtu májkueni ambe kurhamarhikuarhispka enga no sési ambe nitamakuarhipka. Asta eratsespti eska Tata Diosïiri kulpeespka (Job 7:​17-21). Engachi ísï uaaka, jamberi kʼuiripu uékaati sánderu ambe míteni jimboka exeaka eska desde iónisï jarhaspkaksï kʼuiripuecha engaksï májkueni ambe kurhamarhikuarhienga. Tátsekua, úpiringachi arhini eska Jobu no sési nitamakuarhixapka Noambakitiiri kulpa jimbo, jimboka ima uékasïreenga xarhatani eskaksï kʼuiripuecha interesi jimbojkusï marhuakujka Tata Diosïni ka eskaksï jurajkuaka engaksï no sési ambe nitamakuarhini jauaka. Tátsekua úpiringachi arhini eska nájkiruka no Tata Diosïiri kulpeepka, jurajkuspti eska kómu nitamakuarhipiringa, jimboka Tata Diosï mítetixapka eskaksï kʼuiripuecha méntkisï kurhajchaaka ka eskaksï xarhataaka eska Satanási chkuandera máeska. Ka últimu, úpiringachi arhini eska Tata Diosï újchakuraspka Jobuni jimboka no méni jurajkuspka. Ísï jimbo, uaakachi sési pʼikuastaantani kʼuiripuechani engachi aianguauaka eska no Tata Jeobaeri kulpeesïnga enga ma kómu nitamakuarhijka.

16. ¿Néna jarhuataspi libru enga Jobueri ambe uandajka imani kʼuiripuni enga no sési ambe nitamakuarhini japka?

¹⁶ Uéxurhini 2021 jimbo, pirenchi ma telefonu jimbo aianhpixapti, ka Mariuni ueenaspti uandajpani. Tekstu ma arhikuntaspti ka aianguspti eskajtsïni Tata Diosï ambakiti ambe aiachixaka, ka ístu arhispti eska ima kurhaasïnga engachi jucha kómarhijka. Tátsekua kurhamarhispti Mariuni na exespi indeni tekstuni ka ima aianguspti eska ante de pirenchi uandajpani karaxapka para uandanukuarhini imeeri familiani jimboka uándikukuarhipiringa. Arhispti: “Ji jakajkusïnga Tata Diosïni, joperu iásï ísï pʼikuarheraska enajkirini Tata Diosï jurajkia”. Tátsekua, pirenchi ménderu uandajpaspti ka Jobueri ambeksï uandontskuarhespti, ka Mariu arhispti eska arhintapiringa indeni libruni Bibliarhu. Ísï jimbo, pirenchi arhispti eska úpiringa interneti jimbo arhintani Bibliani ka axakuspti pájinani. Tátsekua, Mariu uékaspti jorhenguarhini Biblieri ambe ka iásï kánikua tsípixatiia, jimboka jorhenguarhixaka ima Tata Diosïiri ambe enga sési jimbo kánikua uandanhiajka imani jimbo. ¿A no eska libru enga Jobueri ambe uandajka kánikua jarhuataspka Mariuni?

17. ¿Chá andisï sési pʼikuarherajki enga Tata Jeoba karakata jurajkuka Jobueri ambe? (Job 34:12).

¹⁷ Eskachi na exekia, Biblia úsïndi eska kʼuiripu ma mójtakurhiaka ka uinhaperantasïndi imani enga no sési nitamakuarhini jarhajka (Ebr. 4:12). Juchachi kánikua sési pʼikuarherasïnga enga Tata Jeoba Bibliarhu karakata jurajkuka ambe enga Jobu nitamakuarhipka (Job 19:​23, 24). I libru enga Jobueri ambe uandajka, exerasïndijtsïni eska ‘Tata Diosï no úsïnga no sési jásï ambe’ (arhinta je Job 34:12). Ístujtsïni jorhendasïndi eska Tata Diosï jurajkusïnga eska kʼuiripu ma no sési nitamakuarhiaka ka exerasïndijtsïni eskachi uaaka tekaantani. Joperu ístujtsïni jarhuatasïndi parachi sési pʼikuastantani imeechani engaksï no sési ambe nitamakuarhini jarhajka. Ísï jimbo, máteru artikulu jimbo sánderu ambechi jorhenguarhini jauaka inde librueri enga Jobueri ambe uandajka ka jorhenguarhini jauakachi néna íntspiani ambarhati konsejuechani.