¿Sési jaki santuechani uandatsekuarhikuani?

Ambe enga Biblia uandajka

Biblia no nani uandasïndi eskachi jatsiska para santuechani uandatsekuarhikuani, Tata Diosïntkuchisï jatsika para kómarhini ka Jesúsiri nombri jimbo. Jesúsi i ambe arhiaspti imeeri disipuluechani: “Ísï kómarhi je: ‘Juchaari Taati engari auandarhu jaka, kómarhisïngaksïni eska mítinhaaka chiiti nombri eska pímbinhasïtiska’” (Mateu 6:9). Jesúsi uandasti eska Tata Diosïntkuchisï jatsika para kómarhini ka no santuni ma, ánjelini ma o máteru nemani.

Tata Jesukristu ístu uandasti: “Ji jindeeska xanharu, ka ji jindeeska engani sési jimboeka, ka ístu ji jindeeska tsípikua. Ka no nema jurhasïndi andarhierani Diosï Taatini enga no jíndeni jimbo[euaka]” (Juanu 14:6). Ísï jimbo, Jesúsijkujtsïnisï uaati andarhiterani Tata Diosïni ka no máteru nema (Ebreu 7:25).

¿Uaachi Tata Diosïni kómarhini ka ístu santuechani?

Tata Diosï i ambe uandaspti enga íntspiapka Diesi Mandamientuechani: “Ji, chiiti Tata Diosï, jindeeska Diosï ma enga selosueka” (Éxodo 20:5, Biblia de América [BA]). ¿Ambe arhikuekasïni eska Tata Diosï selosueska? Biblia de América nota ma jukasti ini tekstu jimbo enga uandajka: “Imajkusï Tata Diosïuati, no ma santu jukanchaati [...] eska kómarhinhaaka”. Tata Diosï juramusïndi eskachi jatsiska para imantku k’éri ambe arhini, ka kómarhini, ístu jindeesti k’éri ambe arhini imani (Isaías 48:11).

Tata Diosï kánikua no sési p’ikuarheraati engachi máteru nemani kómarhiska enga no imaeuaka, no arhiati enga ánjeli máeuaka o santu ma. Libro de Apocalipsis (Revelación) uandasïndi eska enga apostuli Juanu tinguixurhikupka ánjelini ma para k’éri ambe arhini, ánjeli i ambe arhispti: “Asï indeni ambe ú, ji jindeeska jántspiri ma enga marhuajka Tata Diosïni t’ungini jingoni ka chiiti erachichani jingoni, imeecha engaksï jánguarhintajka marhuani komueska Jesúsiri testiguecha. Tata Diosïntkusïri jatsiska para k’éri ambe arhini” (Revelación 19:10, BA).