Biblia jingontsïni mókuchiantasti iámindu juchiiti kurhamarhikuechani

NA ENGANI IREKAPKA IÓNTKI:

Engani andajpenupka, juchiiti taatichaksï granja ma jatsispti ireta sapichu ma jimbo jini Galicia, enga España noroestisï jaka. Ochu uájpeeskachi ka ji terujkanikuarisï anapueska, familia máespka engachi tsípikua jingoni irekapka. Jimajkani imani tiempu ísï pʼindenhaspti eska máisï uájpa inchapiringa seminariurhu o konbenturhu. Juchiniu uératini tanimuchi niraspka.

Engani 13 uéxurhini jatiripka, niraspka konbenturhu ma jini Madrid. Nani enga ma juchiiti ermana japka. Jimachi no úsïreenga amiguechani jatsiani, soluchi kómarhini jarhasïrenga ka arisku irekani. Tsípechanchi tánguarhintasïrenga kapiiarhu para eratsentani, nájkiruka sáno méntkisï no úsïreenga eratsentani. Tátsekuachi piresïrenga jima anapu pirekuechani ka nirasïrengachi misa, iámindu ambe latini jimboespti. Jimbosïni no ma ambe kurhanguenga ka ísï pʼikuarherasïrenga enajkirini Tata Diosï iauani jarharitini japka. Jatsisïreengachi para pínasku jarhani. Enga juchiiti ermana jingoni exejperenga soluchi úsïreenga arhini: “Abe María purisima”. Engachi na kʼamarengia tʼireni, soluchi media ora úsïreenga uandontskuarheni. ¡Méntku ménderuenisti eska jiáni enga xáni tsípikua jingoni irekapka juchiniu! Jandiajku pʼikuarherasïrenga ka méntku uerani jarhasïrenga.

Nájkirukani ísï pʼikuarherenga eska iauani jarharitixapka Tata Diosïni, monja úkuarhispka engani 17 uéxurhini jatiripka. Inde ambe úspka jimboka juchiiti familia inde ambe erokuarhisïrenga eskani úpiringa, peruni no ióndaspka kurhamarhikuarhini sini Tata Diosïni erakuspi para indeni ambe úni. Monjechajtsïni méntku arhini jarhasïrendi eska ima enga dudaripiringa infiernurhu nipiringa. Peruni seguirixapka dudarini. Ji mítespka eska Tata Jesukristu no jandiajku jámasïreenga, sánderu sési úrasïreendi imeeri tiempu para jorhendaani ka jarhuatani kʼuiripuechani (Mateu 4:​23-​25). Engani 20 uéxurhini jatiripka exespka eska nóteru ma ambe jarhaspkia enga jimbo úpiringa útasï monjaeni. Ískuni pakaraspka engareni madre superiora arhipka eska engani no mítepka ambe úni, eskani mejori níntapiringa. Ísï jimbo uéntaspka konbenturhu.

Ji ísï exesïnga eska chésïreenga eskani pájtamapiringa máteruechani. Engani nintapka juchiniu, juchiiti taatichajtsïni kurhanguchispti, peru jimboka no jarhaspka ánchikuarhita iretarhu, niraspka Alemania occidental nani enga irekapka máteru juchiiti ermanuecha. Ima grupu komunistarhu ma jarhaspti enga jima anapu juramuti sésikua íntskuenga para ánchikuarhini. Kánikua sési pʼikuarherasïrenga ima kʼuiripuecha jingoni jarhani, jimbokaksï kuájpisïreenga ánchikuarhirichani ka ístu uarhiitichani. Jíjtuni komunista úkuarhispka ka tátsekua uambuchaspka ma imani jingoni enga ístu komunistepka. Foietuechani etsakuasïreenga enga komunistecherika ka ístu marchechani uáni jámasïreenga. Ísï pʼikuarherasïrenga eskani iásï kʼóru úxapkia ambe ma.

Peruni tátsekua niáraspka no agustu pʼikuarherani, jimboka exesïrenga eskaksï komunistecha no úsïreenga ambe engaksï uandaenga. Ka niáraspka sánderu no sési pʼikuarherani 1971 jimbo, jiáni engaksï máru grupurhu anapu tumbiicha kurhirapka konsulado Fráncfort anapu. Paraksï xarhatani eskaksï no de akuerdu jarhaspka imani no sési jásï ambe jimbo enga úpka juramukua España anapu.

Ji ísï exespka eska no sési jarhaspka indeni ambe engaksï úpka para xarhatani eskaksï kómu pʼikuarheraxapka. Jiáni enga juchaari primeru sapi andajpenupka, arhispka juchiiti acheetini eskani nóteru nipiringia grupurhu anapu tánguarhikuecharhu. Kánikua jandiajku pʼikuarherasïrenga jimboka no ma juchaari amiguechajtsïni niraspti exeni jíndeni ni juchiiti sapini. Kurhamarhikuarhisïrenga,para ambechi úni kueraanhaski. ¿Meru uétarhijki eskachi jánguarhintaaka úni eskaksï kʼuiripuecha ménderueniuaka?

NA ENGARINI BIBLIA MÓJTAKUCHEKA IREKUA:

Uéxurhini 1976 jimbo, pʼorhembisptijtsïni España anapu ma temungurhiri engaksï Jeobaeri testiguepka ka jurajkuchesptijtsïni máru publikasionichani engaksï Biblieri pʼitakateka, engaksï ménderu kʼuanhatsentapka uánikua kurhamarhikuechani úkuaspka, kómu nitamakueri ka no sési kámberakueri ambe. Ískuni pakaraspka engani exepka eskajtsïni mókuchintaspka iámindu juchiiti kurhamarhikuechani Biblia jingoni ka sóntku jiókuarhispka eskajtsïni jorhendapiringa Biblieri ambe.

Uénakuarhu tsitispka nomasi para míteni ambe, peru tátsekua iámu ambe mójtakurhispti enga juchiiti acheeti ka ji uénapkachi nirani tánguarhikuecharhu nani engaksï tánguarhijka Jeobaeri testiguecha Kʼumanchikua Reinueri jimbo. Jiánisï tsimani sapiichanchi kánguarhisïreengia, Jeobaeri testiguechajtsïni pájtasïreendi Kʼumanchikua Reinuerirhu ka jarhuatasïrendijtsïni kuidarini juchaari sapiichani enga jamberi tánguarhikua jarhenga, niáraspka kánikua xénchani.

Peruni ji seguirixapka dudechani jatsiani relijioniri ambe. Engani nípka pʼorhembini juchiiti familiani jini España, juchiiti tiu enga saserdotipka uékasïreendi eskani nóteru jorhenguarhipiringia Jeobaeri testiguecha jingoni. Peru jima anapu Testiguechajtsïni kánikua jarhuataspti, ísï eskaksï na úpka Alemania anapu Testiguecha. Ístu íchajtujtsïni mókuchintasti Biblia jingoni juchiiti kurhamarhikuechani. Engani na kʼuanhatsentapka Alemania, erakuspka ménderu jorhenguarhini Biblieri ambe. Nájkiruka juchiiti acheeti nóteru uékapkia jorhenguarhini, ji seguirispka jorhenguarhini. Uéxurhini 1978 jimbo, itsï atakuarhispka ka niáraspka Jeobaeri Testigu úkuarhini.

NÁKI KÓNTPERATECHANI INTSÏNHAASKIA:

Kurhanguni ambe enga Biblia jorhentpijka ústi eskani sánderu sési irekakia. Pori ejemplu, 1 Pedru 3:​1-4 arhiasïndi uarhiitichani eskaksï janhanharhiauaka uámbeechani ka eskaksï kaxumbikua xarhataka, jimboka inde ambe “jindeeska enga sánderu sési jásïika [Tata] Diosïni japarini”. Inde ka ístu máteru konsejuechajtsïni jarhuatasti parani sánderu ambakiti nándi máeni ka témba.

Nitamastia 35 uéxurhini desde engani Jeobaeri testigu úkuarhika. Tsípini pʼikuarherasïnga marhuakuni Tata Diosïni ka kuenta úkuarhini kʼéri familia ma jingoni enga interu parhakpinirhu marhuakuni jaka Tata Diosïni ka enga juchiiti sinko sapiicha engani kaajka, tʼámu marhuakuni jaka Tata Diosïni májkueni eska ji.