Kánikua jukaparhara je indeni kóntperatani enga jindeeka Tata Diosï Jeobani kómarhini imeeri templurhu

1. ¿Ambe uandaxaki ánjeli ma ka ambechi jatsipirini para úni indeni ambe jingoni enga aianhpini jaka?

ENGAKSÏNI ánjeli ma uandajpapiringa, ¿jánguarhintapirintsï kurhajchani? Jarhasti ánjeli ma enga uandajpaani jaka “iámindu kʼérati iretarhu, kʼumanchikueri anapuechani, imeechani engaksï táchani jásï idioma uandajka ka iretarhu anapuechani”. ¿Ambe arhiaxaki? “Chénharhi je Tata Diosïni ka kʼéri ambe arhi je […] kómarhi je imani enga úka auandani, echerini, marini ka enga iámindu itsïni úka” (Apok. 14:​6,7). Iáminduechachi jatsiska para kómarhini Tata Diosï Jeobani, ima jindeesti Tata Diosï jurhimbiti, kánikuachi agradesidu jarhaska engachi újka imeeri templu jimbo marhuakuni, jimboka inde ambe ¡kʼéri kóntperata máesti!

2. ¿Ambeeski Tata Diosï Jeobaeri templu? (Ístu exe je rekuadruni “Ambe enga no arhikuekajka”).

² ¿Joperu ambeeski Tata Diosïiri templu, ka nani uandasïni Biblia indeeri ambe? Tata Diosïiri templu, no meru edifisiuni masï arhikuekani jati. Sánderu sési, jindeesti na enga Tata Diosï Jeoba uaxastakia parachi kómarhini ísï eska ima na uéjka, ka úsïngachi ísï úni Jesúsiiri euajpintskua jimbo. Primeru siglurhu, apostoli Pablu karakuaspti imani kristianuechani engaksï ebreu uandeenga ka engaksï Judea irekapkab ka aianguaspti na engaksï jatsipka para kómarhini Tata Diosï Jeobani.

3, 4. ¿Andisï uandanhiani jápi apostoli Pablu imani kristianuecha jimbo engaksï ebreu uandeenga, ka néna jarhuataaspi?

³ ¿Apostoli Pablu Andisï karakuapi kristianuechani engaksï ebreu uandeenga ka engaksï judea irekani japka? Jamberi tsimani ambe jimbo. Primeru, para uinhaperantaani. Sáno iáminduechaksï judiuecheri relijioni jimbo tʼarhexespti, ka jamberi relijioniiri orhejtsïkutiichaksï teresmarhuauendi jimbokaksï kristianu úkuarhispka. ¿Andi? Jimbokaksï kristianuecha no jatsispka kʼéri templu ma paraksï jima kómarhini Tata Diosïni, ni altari ma paraksï kéjtsïtakua ambe úkuni, ístu, nóksï jatsiaspti saserdotiichani ísï eskaksï judiuecha. Jamberi inde ambe no sési pʼikuastaapti Kristueri chúxapatiichani ka úni eskaksï nóteru xáni mintsikapiringia Tata Diosïni (Ebr. 2:1; 3:​12, 14). Ka jamberiksï máru niárapti eratseni ménderu kʼuanhatsentani judiuecheri relijioni jimbo.

⁴ Segundu, Pablu exeraaspti kristianuechani engaksï ebreu uandeenga eskaksï no jánguarhintaxapka para sési kurhanguni imani jimbanhi ambe engaksï jorhenguarhini japka o imani ambe enga no xáni fásiliika para kurhanguni, enga jindeeka “tʼirekua enga xaxanhajka” ka enga Tata Diosïiri Uandakuarhu jaka (Ebr. 5:​11-14). Máruksï útasï seguirixapti úni ambe enga Moisésiiri Lei uandeenga. Joperu Pablu arhiaspti eskaksï ima kéjtsïtakuecha enga Lei uandeenga, no úsïreenga kénditaani sési jimbo pekaduechani. Ísï jimbo, Moisésiiri Lei nóteru marhuasïreendia. Jimbosï apostoli Pablu jorhendaapti máru ambe engaksï jatsipka para sánderu sési jorhenguarhini. Miátantaaspti eska Jesúsiiri uarhikua jimbo, iásïksï úsïrengia ʻerokuarhini jarhaniʼ ambe ma enga sési jimbo jarhuataapiringa paraksï andarhierani Tata Diosïni (Ebr. 7:​18, 19).

5. ¿Ambechi jatsiski para kurhanguni, ka andi?

⁵ Pablu arhiaspti erachiichani engaksï ebreu uandeenga eska sánderu sési jarhaspkia na engaksï kómarhini japkia Tata Diosï Jeobani iásï engaksï kristianuepka ka eska na engaksï kómarhienga ióntki. Arhiaspti eska judiuecheri relijioni solu xarhataxapka “ambe enga sánderu orhepani jupiringa”. Ka ístu uandaspti: “Joperu iámindu inde ambe Kristunisï arhikuekajti” (Kol. 2:17). Ménisï, parachi úni kurhanguni ambe ma enga kánikua jukaparhakueka, jatsisïngachi para máteru ambe jingoni terukutantani. Sáno májkueni, na engaksï judiuecha kómarhienga Tata Diosïni ióntki, xarhataxapti ambe ma enga sánderu orhepatini jupiringa. ¿Andisï uétarhijki eskachi kurhanguaka ambeeski Tata Diosïiri templu o na enga ima uaxastakia parachi kómarhini? Jimbokachi ísï úsïnga puáminhantani juchaari pekaduechani ka ístujtsïni jarhuatasïndi parachi kómarhini Tata Diosïni ísï eska ima na uéjka. Ini jorhenguarhikua jimbo, terukutantanchi jauaka inde ambe enga xarhatajka (o enga jindeeka na engaksï judiuecha kómarhienga Tata Diosïni) imani ambe jingoni enga arhikuekajka (o na engaksï kómarhijka Tata Diosïni kristianuecha). Para indeni ambe úni, exeakachi ambe enga uandajka Karakata para Ebreu uandariicha. Ísïchi uaaka sánderu sési kurhanguni ambe arhikuekasïni Tata Diosïiri templu ka nénajtsïni marhuachesïni juchantsïni.

TABERNAKULU

6. ¿Para ambe úranhasïreeni tabernakulu?

⁶ Ambe enga xarhatajka. Para Tata Diosïiri templueri ambe uandani, Pablu úraspti tabernakuluni enga Moisési úpka uéxurhini 1512 ante de Jesúsi (exe je dibujuni “Ambe enga xarhatajka ka ambe enga arhikuekajka”). Tabernakulu ístu mítekateespti komu “kʼumanchikua para tánguarhinhani”, jindeespti jima engaksï israeliteecha tánguarhienga para Tata Diosïni kómarhini ka para kéjtsïtakua ambe úkuni (Éx. 29:​43-46). Engaksï israeliteecha desierturhisï jámeenga iápurisïksï pásïreendi engaksï mótsienga (Éx. 25:​8, 9; Núm. 9:22). Israeliteechaksï jiáni jamberi úraspti tabernakuluni enga Jerusaléni anapu templu únhapka, sáno 500 uéxurhinisï. Joperu tabernakulu ístu xarhataxapti ambe ma enga sánderu orhepani jupiringa ka enga sánderu ambakiti ambeepiringa para kristianuecha.

7. ¿Káni ueenaspi jarhani Tata Diosïiri templu?

⁷ Ambe enga arhikuekajka. Inde tabernakulu “auandarhu anapu ambe” xarhatasïreendi ka Tata Diosï Jeobaeri templuni arhikuekaxapti. Pablu uandaspti: “I tabernakulu xarhatasïndi ambe enga úkuarhini jaka iásï” (Ebr. 8:5; 9:9). Ísï jimbo jiáni enga Pablu ini ambe karakuapka ebreuechani Tata Diosïiri templu jarhasptia ka ueenaspti jarhani uéxurhini 29 jimbo. Ima uéxurhini jimbo Jesúsi itsï atakuarhispti, espiritu santu jingoni erakunhaspti ka ueenaspti “sánderu kʼéri saserdotiini” Tata Diosï Jeobaeri templu jimbo (Ebr. 4:14; Úku. 10:​37, 38).c

SÁNDERU KʼÉRI SASERDOTI

8, 9. Ísï eska na uandajka Ebreu 7:​23-27, ¿andiksïsï no májkueni Israeli anapu sánderu kʼéri saserdotiicha Jesukristuni jingoni enga sánderu Kʼéri Saserdotiika?

⁸ Ambe enga xarhatajka. Sánderu kʼéri saserdoti uandapikusïreendi iretani Tata Diosïni japarini. Jiáni enga ueenapka úranhani tabernakulu, Tata Diosï Jeoba erakuspti imani sánderu kʼéri saserdotini enga ueenapka jarhani Israeli, Aaróni. Joperu Pablu uandaspti: “Ístu saserdotiichaksï no úsïreendi ióni marhuani komueska saserdotiicha jimbokaksï uarhisïreenga, jimboksïsï máteruecha niáreendia paraksï saserdotiini” (arhinta je Ebreu 7:​23-27).d Ístu, jimbokaksï inde sánderu kʼéri saserdotiicha no perfektueska, imajtuksï jatsipti para kéjtsïtakua ambe úni imeecheri pekaduechani jimbo. Indeni ambe jimboksïsï méntku ménderueniiti Israeli anapu sánderu kʼéri saserdotiicha, tata Jesukristuni jingoni enga jindeeka sánderu Kʼéri Saserdoti.

⁹ Ambe enga arhikuekajka. Juchaari sánderu Kʼéri Saserdoti tata Jesukristu “jántspisïndi […] imani tabernakulurhu enga sési jimboeka ka enga Tata Diosï Jeoba úka ka no kʼuiripuecha” (Ebr. 8:​1, 2). Pablu uandaspti eska “jimboka Jesúsi méntkisï irekaaka, nóteru uétarhisïndia eska máteru nema saserdotiuaka”. Ístu uandaspti eska Jesúsi ʻpímbinhasïiskaʼ ka eska ʻno májkueni jámasïnga eska imeecha engaksï pekadoriikaʼ ka eska no májkueniiska eska israeli anapu sánderu kʼéri saserdotiicha, “jimboka no jatsiska para pauani pauani kéjtsïtakuni Tata Diosïni” imeeri pekaduechani jimbo. Iásï ju je exeni ambeksï xarhataski ka ambeksï arhikuekasïni altariicha ka kéjtsïtakuecha.

ALTARIICHA KA KÉJTSÏTAKUECHA

10. ¿Ambeksï arhikuekasïreeni kéjtsïtakuecha engaksï kobriiri altari jimbo únheenga?

¹⁰ Ambe enga xarhatajka. Tabernakulurhu uérakua altari ma jarhaspti kobriiri, jimaksï kéjtsïtaasïreendi animaliichani para Tata Diosï Jeoba (Éx. 27:​1, 2; 40:29). Joperu inde kéjtsïtakuechaksï no úsïreendi eskaksï méntku kʼamajkunhapiringa iretarhu anapu pekaduecha (Ebr. 10:​1-4). Animaliicheeri kéjtsïtakuecha engaksï someni úkuarhienga altarirhu, imani kéjtsïtakuanisï arhikuekani japti enga méntku kʼamajkupiringa kʼuiripuecheeri pekaduni.

11. ¿Náki altari jimbo niáraspi Jesúsi ísïini komueska kéjtsïtakua ma? (Ebreu 10:​5-7, 10).

¹¹ Ambe enga arhikuekajka. Jesúsi mítespti eska Tata Diosï Jeoba axaspka Echerirhu para imeeri tsípikuani íntspini para úni kʼuiripuechani euajpiantani (Mat. 20:28). Ísï jimbo, enga Jesúsi itsï atakuarhipka, Tata Diosï Jeobaeri orhepatini jimbo niáraspti para úni ambe enga ima uékeenga (Juanu 6:38; Gal. 1:4). Ísïispti enajki ima kéjtsïtakua máepirini enga altarirhu japka. Inde altari arhikuekaxapti ambe enga Tata Diosï “uéjka”, ka ambe enga Tata Diosï Jeoba uékeenga jindeespti, eska imeeri Uájpa íntspipiringa imeeri tsípikuani enga perfektuepka. Jesúsi íntspispti imeeri tsípikua “ma ueltajku ka para méntkisï” para puákuantaani pekaduechani iámindu imeechani engaksï xarhatajka eskaksï mintsikasïnga (arhinta je Ebreu 10:​5-7, 10). Iásï ju je exeni ambe enga tabernakulurhu incharini japka ka ambe enga arhikuekajka máru ambe enga jima japka.

PÍMBINHASÏ KUARTU KA SÁNDERU PÍMBINHASÏ KUARTU

12. ¿Neechaksï úsïreeni inchani Pímbinhasï Kuarturhu ka Sánderu Pímbinhasï Kuarturhu?

¹² Ambe enga xarhatajka. Tabernakulu ka ima templuecha engaksï ísï tátsekua únhapka Jerusaléni, sánoksï májkueni úkata jarhaspti incharinisï. Tsimani kuartuechaksï jarhaspti engaksï arhukukata japka kortina ma jingoni; ma arhinhasïreendi “Pímbinhasï Kuartu” ka máteru arhinhasïreendi “Sánderu Pímbinhasï Kuartu” (Ebr. 9:​2-5; Éx. 26:​31-33). Pímbinhasï Kuarturhu jarhaspti kandela jatakua ma enga orueripka, altari ma para kʼuájtsïtakua kurhirani ka mesa ma nani engaksï japka kurhindeecha para kéjtsïtani. Ka imani Pímbinhasï Kuarturhu, ima saserdotiichajkuksïsï ueendi inchani engaksï erakunheenga paraksï pímbinhasï ánchikuarhitani úni (Núm. 3:​3, 7, 10). Sánderu Pímbinhasï Kuarturhu arka pakatperakueri jarhaspti enga orueriipka ka enga xarhateenga eska Tata Diosï Jeoba jima jarhaspka (Éx. 25:​21, 22). Sánderu kʼéri saserdotijkusï ueendi parhikuni kortinani para Sánderu Pímbinhasï Kuarturhu inchani. Mándani uéxurhini, imani Jurhiatikua jimbo enga Tata Diosï Jeoba Puátspinteenga, inchasïreendi animalicheeri iurhirini jingoni para kurhajkuarhini eska puáminhantapiringa imeeri pekaduechani ka ístu iámindu ireteeri pekaduechani (Lev. 16:​2, 17). Tátsekua, Tata Diosï Jeoba úraspti imeeri espiritu santuni para uandantani ambe enga arhikuekeenga ima ambe enga tabernakulurhu japka (Ebr. 9:​6-8).e

13. ¿Ambe arhikuekasïni Pímbinhasï Kuartu ka Sánderu Pímbinhasï Kuartu?

¹³ Ambe enga arhikuekajka. Jarhasti grupu ma 144,000 kristianuecheeri engaksï espiritu santu jimbo erakunhaka ka engaksï ambakiti pájperakua ma jatsika Tata Diosï Jeobani jingoni. Iichaksï saserdotiuati Jesúsini jingoni jini auandarhu (Apok. 1:6; 14:1). Engaksï útasï Echerirhu jarhajka, Tata Diosï imeeri espiritu jingoni erakuasïndi ka ísï pʼíkuantasïndi komueska imeeri uájpeecha. Tabernakulurhu anapu Pímbinhasï Kuartu, arhikuekasïndi na engaksï xáni sési pájperajka Tata Diosïni jingoni (Rom. 8:​15-17). Sánderu Pímbinhasï Kuartu, auandani arhikuekasïndi nani enga Tata Diosï Jeoba irekaka. Ka “kortina” enga arhukueenga Pímbinhasï Kuartuni Sánderu Pímbinhasï Kuartuni jingoni, Jesúsiiri kuerpuni arhikuekasïndi. Inde kuerpu ójkutasïreendi Jesúsini para auandarhu inchani ka para Sánderu kʼéri Saserdotiini Tata Diosïiri templurhu. Ka enga Jesúsi ísï íntspika imeeri kuerpuni kʼuiripuechani jimbo, úspti eskaksï kristianu erakukateecha úpiringa auandarhu irekani. Ka parakaksï erakukateecha uaaka auandarhu irekani ístuksï jatsisti para jurajkuani imeecheri kuerpuechani engaksï kʼuiripeteerika (Ebr. 10:​19, 20; 1 Kor. 15:50). Enga Jesúsi na tsíntapkia, inchaspti Sánderu Pímbinhasï Kuarturhu enga Tata Diosïiri templurhu jaka, nani engaksï iámindu kristianu erakukateecha tánguarhintaaka imani jingoni.

14. Eska na arhijka Ebreu 9:​12, 24-26, ¿andisï Tata Diosï Jeobaeri templu sánderu ambakiti ambee?

¹⁴ Eskachi na exeni jaka, iauani sánderu ambakitiisti ambe enga Tata Diosï Jeoba uaxastaka parachi kómarhini jimboka euajpintskuani úraska ka ístu jimboka tata Jesukristu Sánderu Kʼéri Saserdotiiska. Israeli anapu sánderu kʼéri saserdoti imani Sánderu Pímbinhasï Kuarturhu inchasïreendi engaksï kʼuiripuecha úpka ka animalicheeri iurhiri jingoni inchasïreendi, joperu Jesúsi inchaspti imani lugari jimbo enga iauani sánderu pímbinhasïika: “ima auandarhusï inchati” Tata Diosï Jeobani japarini. Ka juchantsïni jimbo, Tata Diosïni japarini peeraspti imeeri tsípikuani enga perfektuepka “para kʼamajkuni pekaduni ka ísï ústi enga kéjtsïtaka imeeri tsípikuani” (arhinta je Ebreu 9:​12, 24-26). Kánikua ambakiti ambeesti enga Jesúsi ísï íntspika imeeri tsípikuani, jimboka indeni ambe jimbo, úsïnga kʼamajkuani pekaduechani. Iásïchi exeaka eskachi iáminduecha uaaka kómarhini Tata Diosï Jeobani imeeri templurhu, no arhiparini sinchi irekaa auandarhu o Echerirhu.

EKUARUECHA

15. ¿Neechaksï ánchikuarhisïreeni imani ekuaru jimbo enga tabernakulurhu japka?

¹⁵ Ambe enga xarhatajka. Tabernakulurhu, ekuaru ma jarhaspti: lugari ma enga ótakata japka ka saserdotiichaksï jima marhuakusïreendi Tata Diosïni. Imani ekuaru jimbo, kʼéri altari ma jarhaspti kobriiri nani engaksï kéjtsïtakuecha kurhiranheenga. Ístu jarhaspti kʼéri itsï jatakua ma enga kobriiripka, nani engaksï saserdotiicha jupajkuenga ka jupanduni ante deksï imeecheri ánchikuarhitani úni (Éx. 30:​17-20; 40:​6-8). Imani templuecha jimbo engaksï tátsekua únhapka, ístu jarhaspti ekuaru ma enga uérakua japka nani engaksï kómarhienga Tata Diosïni imeecha engaksï no saserdotiipka.

16. ¿Neechaksï marhuasïni mándani ekuaru jimbo engaksï Tata Diosïiri templurhu jaka?

¹⁶ Ambe enga arhikuekajka. Kristianu erakukateecha engaksï útasï Echerirhu irekani jaka, sésiksï marhuakuxati Tata Diosï Jeobani imani ekuaru jimbo enga incharini jaka Tata Diosïiri templurhu, ante deksï niárani saserdotiini Jesúsini jingoni jini auandarhu. Ima kʼéri itsï jatakua enga tabernakulurhu japka ka ístu templurhu, miátantaasïndi erakukateechani, ka iámindu kristianuechani, na enga xáni jukaparhakueka pímbinhasï jarhani imeecheeri jánguarhu ka eskaksï jatsiska para sési marhuakuni Tata Diosïni. ¿Ka naniksï kómarhisïni Tata Diosïni ima “uánikua kʼuiripuecha”, engaksï jarhuataajka Kristueri ermanuechani engaksï erakukateeka? Apostoli Juanu exespti eskaksï imeecha ‘kʼéri uaxantskuarhu orhepani anhandetixapka’ ka eskaksï “chúrikua ka jurhiakuaksï” marhuakuxapka Tata Diosïni. Inde uánikua kʼuiripuechaksï kómarhisïndi Tata Diosïni ixú Echerirhu, enga jindeeka ekuaru enga uérakua jaka Tata Diosïiri templurhu (Apok. 7:​9, 13-15). ¡Xáni sési engachi iáminduecha jatsika nani engachi uaaka kómarhini Tata Diosï Jeobani imeeri templurhu!

KʼÉRI KÓNTPERATA MÁESTI TATA DIOSÏ JEOBANI KÓMARHINI

17. ¿Ambechi uaa kéjtsïtakuni Tata Diosï Jeobani?

¹⁷ Iámindu kristianuechachi kʼéri kóntperata ma jatsiska enga jindeeka kéjtsïtakuni ambe ma Tata Diosï Jeobani. ¿Joperu nénachi uaa ísï úni? Uaakachi íntskuni juchaari tiempu, uinhapikua ka ambe engachi xáni jatsika parachi úni jarhuajpeni Reinueri ánchikuarhitarhu. Ka ísï eska apostoli Pablu na arhiapka kristianuechani engaksï ebreu uandeenga, uaakachi “méntkisï kéjtsïtakuni jarhani Tata Diosïni parachi kʼéri ambe arhini, ka juchaari penchumikua” jingoni uandantani na enga arhinhajka ima (Ebr. 13:15). Engachi sánderu ambakiti ambe íntskuaka juchaari Tata Diosï Jeobani, xarhatani jauakachi eska kʼéri kóntperata máeska imani kómarhini.

18. Eska na uandajka Ebreu 10:​22-25, ¿ambechi no jatsiski para mirikurhini? ¿Ka ambechi jatsiski para méntkisï miáni jarhani?

¹⁸ (Arhinta je Ebreu 10:​22-25). Imani karakatani jimbo enga Pablu Ebreu uandariichani karakuapka, uandasïndi máru ambe engachi no jatsika para mirikurhini engachi kómarhini jauaka Tata Diosïni. Pori ejemplu, Pablu uandaspti na enga xáni jukaparhakueka kómarhini Tata Diosï Jeobani, eskachi jatsiska para máteruechani aianguani ambe engachi erokuarhini jaka, eskachi jatsiska para tánguarhintani juchaari erachiicha jingoni ka uinhaperperantani, “ka sánderia iásï engachi exeni jaka eska [Tata Diosï Jeobaeri] jurhiatikua axuterku jarhaskia”. Ka Apokalipsisi, últimu kapituluecha jimbo, Tata Diosï Jeobaeri ánjeli uandasïndi: “¡Tata Diosïni kómarhi!”. Tsimani xanhari ísï uandasïndi para xarhatani eska kánikua jukaparhakueska inde ambe (Apok. 19:10; 22:9). Ju je méntkisï miáni jarhani ambe engachi jorhenguarhikia Tata Diosï Jeobaeri templueri ambe ka na enga xáni kʼéri kóntperata máeka kómarhini juchaari Tata Diosïni.