¿Néna uaa tumbi ma ambakiti kristianu máeni ka jánhaskatiini?

1. Para méntkisï sési nikuani erachi kristianuechani, ¿ambeksï jatsiski para úni?

REI Dabidi ísï arhispti Salomónini: “Uinhapikuarhinta ka xarhata eskari tsʼiueratiiska” (1 Rey. 2:​1-3). Iámindu tatakeecha engaksï kristianueka kánikuaksï sési úsïndi engaksï ísï újka eska i konseju na arhijka. Paraka tumbiichani méntkisï sési nikuauaka, uétarhisïndi eskaksï kurhajchaaka Tata Diosï Jeobani ka pauani pauanksï jánguarhintani ísï úni eskaksï Biblieri prinsipiuecha na arhijka (Luk. 2:52). ¿Andisï xáni jukaparhakue eskaksï jánhaskatiuaka?

2, 3. ¿Andisï xáni jukaparhakue eska tumbi ma niáraaka kristianu jánhaskati máeni?

² Erachi kristianuechaksï uánikua responsabilidadichani jatsiasïndi imeeri familiarhu ka ístu kúnguarhikuarhu. Engari tumbi máeka, seguru eskari eratsentakia náki responsabilidadiri uékapirini jatsini sánderu orhepatini. Jamberiri uékani jakaia prekursori úkuarhini o sierbo ministerialiini ka sánderu orhepatini niárani orhejtsïkutiini. O jamberiri uékani jaka tembuchani ka sapiichani kaani (Éfes. 6:4; 1 Tim. 3:1). Parari ísï úni ka parakeni sési nicheni, jatsiskari para kristianu jánhaskati máeni.b

³ ¿Ambekini jarhuataa parari niárani ambakiti kristianu máeni ka jánhaskatiini? ¿Ambe ka amberi úpirini sánderu sési jorhenguarhini ka sési úni? Ka ¿ambekini jarhuataa iásï parari tátsekua sánderu sési kumpliriini chiiti responsabilidadiichani jingoni? Ju exeni.

AMBEKINI JARHUATAA PARARI NIÁRANI KRISTIANU JÁNHASKATI MÁENI

4. ¿Naniri uaa exeantani ambakiti ejempluechani? (Ístu exea je imajeniichani).

⁴ Ambakiti ejempluechani erakua. Bibliarhu, uaakari exeantani ejempluechani acheetiicheeri engaksï kánikua xéncheenga Tata Diosïni ka ístu engaksï mámaru ambe úpka paraksï kuájchakuni Tata Diosïiri iretani. Ka chiiti familiarhu ka kúnguarhikuarhuksï jati erachiicha engaksï kánikua jánhaskatiika ka tʼuri uaaka májkueni úni eska imeecha (Ebr. 13:7). Ka ísturi jatsiska sánderu ambakiti ejemplu ma, jo, Jesúsiiri (1 Ped. 2:21). Engari jorhenguarhini jauaka indeecheeri ambe, eratsenta ambeeri sánderu tsitiski (Ebr. 12:​1, 2). Tátsekua eratsenta amberi úpirini májkueni úni.

5. ¿Amberi jatsiski para úni parari niárani jánhaskatiini, ka andisï jukaparhakue i ambe? (Salmo 119:9).

⁵ Jánguarhinta sési eratsentani ka kuájchaku indeni ambe (Prov. 3:21). Kʼuiripuechaksï jiántkusï újti sési úni ambe ma engaksï tiempu arhutajka para sési eratsentani. Jiájkani jánguarhinta pʼindeni ísï úni ka asï kuatantsï. ¿Andi? Jimboka ini parhakpinirhu, tumbiichaksï pʼindesti imani ambe úni engaksï imeecha exejka eska sési jarhaska ka ambe engaksï pʼikuarhinhejka (Prov. 7:7; 29:11). Ka ístu, jimboka telebisioni, pelikulecha, interneti ka redesi sosialichaksï úpirindi úni eskari méntku indeni ambe eratseni jauaka. Jiájkani, ¿amberi jatsipirini para úni parari sési jásï ambe erakuni úni? Orheta, jatsiskari para jorhenguarhiani Biblieri prinsipiuechani ka eratsentani andisï Tata Diosï Jeoba uandajki eska inde ambe sánderu sésiiska para iáminduecha. Tátsekua, engari uékani jauaka úni ambe ma, úra ambe engari jorhenguarhikia ka ísïri uaaka sési pʼikuastani Tata Diosï Jeobani (arhinta Salmo 119:9). Engari jorhenguarhiska sési eratsentani, niárakari kristianu jánhaskati máeni (Prov. 2:​11, 12; Ebr. 5:14). Engari sési eratsentaska uaatikeni jarhuatani arini tsimani ambe jimbo, parari 1) sési kaani pirenchichani ka 2) sési mórhekuarhini o arreglarikuarhini. Ju exeni ini ambe.

6. Tumbi ma enga sési eratsentajka ambe ma, ¿néna xarhatasïni eska janhanharhiasïnga pirenchiichani?

⁶ Engari sési eratsentaaka, jarhuataatikeni janhanharhiani nanakechani. Pori ejemplu no no sési jarhasti enga tumbi ma uékaaka sánderu sési míteni pirenchini ma enga tsitijka. Joperu ima tumbi enga sési eratsentajka ambe ma, no uandaati, ni karaa nijtu uaa imani ambe enga úpiringa eratsetarani pirenchini eska uékaxaka sánderu sési míteni, solu jiántku enga meru eratsetini jakaia tembuchani imani pirenchi jingoni (1 Tim. 5:​1, 2). O enga míteni jakaia pirenchini ma, no méni jandiajku jauati imani jingontku, sino méntkisï nemani jingoni enga eratsekua jukarikia, ka inde ambe jarhuataati paraka no no sési ambe uandanhaaka pirenchiri ambe (1 Kor. 6:18).

7. ¿Ambe uaa úni tumbi ma enga exeni jámaaka néna arreglarikuarhini para xarhatani eska sési eratsesïnga?

⁷ Na enga xukuparhajka ka kuinakuarhini tumbi ma enga kristianueka, xarhatasïndi eska májkueni eratsesïnga eska Tata Diosï Jeoba. Imeecha engaksï xukuparhakua ambe újka ka atarantani, nóksï sáni janhanharhiasïndi Tata Diosï Jeobani ka ísku jándikua ambeksï niátasïndi. Ísï jimbosï inde xukuparhakua para tatakeecha jukari katsikatsijaxesïndi ka tatakeechaksï ísï xarharasïndi komueska nanakeecha. Tumbi ma enga jánguarhintani jaka para kristianu jánhaskati máeni, jatsisti para no mirikurhiani Biblieri prinsipiuechani ka exeani kúnguarhikuarhu anapu ambakiti ejempluechani enga erakuni jámaaka néna xukuparhani o arreglerikuarhini. Uaati kurhamarhikuarhini: “Ambe engani erakujka úni, ¿xarhatani jarhasïni eskani sési eratsesïnga ka eskani no uékasïnga no sési pʼikuastaani máteruechani? ¿Xarhatasïni juchiiti xukuparhakua jingoni eskani Tata Diosïni marhuakuxaka?” (1 Kor. 10:​31-33; Titu 2:6). Juchaari Tata Diosï auandarhu anapu ka ístu juchaari erachiichaksï niárasïndi kánikua janhanharhiani tumbiichani engaksï sési eratsejka ante de úni ambe ma.

8. ¿Néna uaa erachi ma enga tumbiika xarhatani eska mintsinharhikueska?

⁸ Mintsinharhikueni. Inde ambe arhikuekasïndi eskari sési uaaka chiiti ánchikuarhitani (Luk. 16:10). Eratsenta na enga xáni sési ueenga ambe ma Jesúsi. Ima no méni ísku jurajkuspti ambe ma, o nójtu uékani úni. Sánderu sési, meru sési úspti ambe enga Tata Diosï Jeoba juramukupka, asta jiáni jamberi enga kánikua úkua jukanchapka. Xénchasïreendi kʼuiripuni ka sánderia imeeri chúxapatiichani jimboka niáraspka asta imeeri tsípikuani íntspini imeechani jimbo (Juanu 13:1). Májkueni eska Jesúsi, kánikua jánguarhinta sési kumpliriini ambe engari arhinhaaka para úni. Engari no míteaka néna úni, kaxumbikua jingoni kurhaku erachini ma eskakeni jarhuataaka. Asï jáma arisku sáni úni ambe ma (Rom. 12:11). Sánderu sési, kʼamara ambe engari kurhaminhaaka, ísï ú enajkiri ‘Tata Diosï Jeobani jimbo úni jaki ka no kʼuiripuechani jimbo’ (Kol. 3:23). Ísïisti, nóri perfektueska, ísï jimbo asï mirikurhi eskari niáraaka no sési úni ambe ma (Prov. 11:2).

JORHENGUARHI IMANI AMBE ÚNI ENGAKENI MARHUACHIAKA

9. ¿Andisï jatsi para erachi ma enga tumbiika jorhenguarhini úni imani ambe enga marhuakuaka?

⁹ Parari niárani kristianu máeni enga jánhaskatiika, jatsiskari para jorhenguarhini imani ambe úni engakeni marhuacheaka. I ambekini jarhuataati parari sési kumpliriini responsabilidadi ma kúnguarhikuarhu, parari úni exentani ka jatsini ánchikuarhita ma ka parari úni maiampikuarhini chiiti ambe ka chiiti familieri ambe ka ístu parakari uaaka sési pájperani máteruecha jingoni. Ju je exeni máru ambe.

10, 11. ¿Andisï uétarhijki eska tumbi ma sési jorhenguarhiaka arhintani ka karani, ka néna jarhuataa i ambe kúnguarhikuani? (Salmo 1:​1-3; ístu exe je imajenini).

¹⁰ Jorhenguarhi sési arhintani ka karani. Biblia uandasïndi eska kʼuiripu ma niárasïnga tsípikua jingoni irekani ka eska sési uérakusïnga ambe ma enga arhintajka Tata Diosïiri Uandakuani ka eratsentani (arhinta Salmo 1:​1-3). Ísï niárasïndi míteni na enga exejka Tata Diosï Jeoba ambe ma ka inde ambe jarhuatasïndi sési eratsentani ka kurhanguni ambesï jatsi para úni (Prov. 1:​3, 4). Ka i járhati erachiichaksïsï uétarhijti kúnguarhikuarhu. ¿Andi?

¹¹ Erachiicha ka pirenchiichaksï uétarhinchaasïndi erachiichani engaksï jorhendauaka ka ambakiti konseju íntsaani Biblia jingoni (Titu 1:9). Engari sési jorhenaaka arhintani ka ístu karani, uaakari preparariuani chiiti diskursuechani ka ambakiti komentariuechani íntspiani ka ísïri jarhuatauaka máteruechani paraksï sánderu mintsikani Tata Diosïni. Ístu engari estudiariska Bibliani ka kurhauandi diskursuechani tánguarhikuecharhu ka kʼéri tánguarhikuecharhu, uaakari imani ambe karani engakeni jarhuataaka para tʼu mismu sánderu mintsikani Tata Diosïni ka uinhaperantani máteruechani.

12. ¿Ambekini jarhuata parari úni sési uandontskuarheni máteruecha jingoni?

¹² Jorhenguarhi sési uandontskuarheni máteruecha jingoni. I ambe kánikua jukaparhakuesti para tatakeecha engaksï kristianueka. Jimbokaksï jatsisïnga para jorhenguarhini kurhajchani máteru nemani ka kurhanguni na enga eratsejka ka pʼikuarherani (Prov. 20:5). Engari kʼuiripuni ma jingoni jauaka, uaakari jorhenguarhini na enga eratsejka o ambe enga pʼikuarherajka jimbokari exeni jauaka na uandajka, na enga jánharhintajka o na enga níjkurhani jarhajka. Joperu engari méntkisï selulari ambe jimbojku uandontskuarhejka o korreu elektroniku jimbo ka mensajicha jimbo, sánderuri úkua jukanchaaka uandontskuarheni jiáni engari máteruecha jingoni jauaka. Ísï jimbo, jánguarhi exeni nénari úni sánderu kʼuiripuecha jingoni jarhani parari kurhajchaani (2 Juanu 12).

13. Erachi ma enga tumbiika, ¿ambe máteru ambe uaa jorhenguarhini? (1 Timoteu 5:8; ístu exe je imajenini).

¹³ Jorhenguarhi nénari uaa mantenerikuarhini. Kristianu ma enga sési eratsejka jatsisti para jorhenani mantenerikuarhini jandiajku ka ístu imeeri familiani (arhinta 1 Timoteu 5:8). Máru paisiicha jimbo, tumbiichaksï úsïndi jorhenguarhini ambe enga imeeri taati o imeeri familiariicha jorhenaka úni. Ka máteru lugaricha jimbo, tumbiichaksï jorhenguarhisïndi kursu ambe eskuelecharhu o máteru jásï ánchikuarhita ambe enga jarhuatauaka. Kánikua sésiisti eskari jorhenguarhiaka máru ambe úni parari mantenerikuarhini (Úku. 18:​2, 3; 20:34; Éfes. 4:28). Jánguarhinta sési ánchikuarhini ka asï ambe ma ísku jatini ueena úni ka nóri kʼamarani. Engari jorhenguarhiska sési úni ambe ma ka ísïri úni, máteruechaksï sési ambe uandaati chiiti ambe, ka sánderu fásiliuati eskari exentaaka ánchikuarhita ma ka nóri sóntku tsïtaaka. Na engari jásï kʼuiripueuaka o ambe engari jorhenaaka úni, ístukeni jarhuataati parari sési uaani imani responsabilidadichani engari sánderu orhepatini jatsiauaka. Ju exeni máru ambe engakeni jarhuataaka.

PREPARARIKUARHI IMANI AMBE JINGONI ENGARI SÁNDERU ORHEPATINI UAAKA

14. ¿Ambe uaa jarhuatani tumbini ma prepararikuarhini para tiempu kompletueri marhuakuni Tata Diosï Jeobani?

¹⁴ Úpiringari Tata Diosï Jeobani marhuakuni tiempu kompletueri. Uánikua erachiicha engaksï iásï ambakiti kristianu máeka ka jánhaskatiini, jiánksï prekursori úkuarhispti engaksï tumbiipka. Engari prekursori úkuarhiska, jorhenguarhiakari sési pájperani mámaru járhati kʼuiripuecha jingoni ka jorhenguarhiakari sési úrani sentabuni (Filip. 4:​11-13). Sési jauati engari prekursori auksiliari úkuarhiaka, inde ambekini jarhuataati parari tátsekua regulari úkuarhini. Ka i ambekini jarhuataati parari sánderu orhepatini tiempu kompletuerini marhuani, komu konstruksionirhu o Beteli.

15, 16. Erachi ma enga tumbiika, ¿ambe jatsiski para úni enga uéjka sierbo ministerialiini o orhejtsïkutiini?

¹⁵ Úpiringari orhejtsïkutiini o sierbo ministeriali. Iámindu erachiichaksï jatsipirindi para jánguarhintani paraksï úni orhejtsïkutiini. Ka Biblia uandasïndi eska iámindu ima enga uékani jaka indeni ánchikuarhitani úni “ambakiti ambesï uékani jati úni” (1 Tim. 3:1). Para orhejtsïkuti máeni, orheta uétarhisïndi sierbo ministerialiini. I erachiichaksï mámaru jarhuataasïndi orhejtsïkutiichani. Orhejtsïkutiicha ka sierbo ministerialiichaksï kaxumbikua jingoni marhuakuasïndi erachiichani ka tsípikua jingonksï aianhpisïndi. Nájkiruka útasï sapichku jauaka erachi, uaati jánguarhintani para sierbo ministerialiini. Ka enga ma 20 uéxurhinisï jatiriuakia ka sánderu sési preparadu jarhania, uaati orhejtsïkutiini.

¹⁶ Bibliarhu arhisïndi ambe engaksï jatsika para úni sierbo ministerialiicha ka orhejtsïkutiicha, ka inde ambe xarhatasïndi na enga ma xáni xénchajka Tata Diosï Jeobani, familiani ka kúnguarhikuani (1 Tim. 3:​1-13; Titu 1:​6-9; 1 Ped. 5:​2, 3). Ambe ma engakeni jarhuataaka, jindeesti sési kurhanguni ambesï meru arhikuekajki inde ambe enga Biblia uandajka eskari jatsiska para úni ka kurhakuni Tata Diosï Jeobani eskakeni jarhuataaka kumplirini.c

17. ¿Néna uaa prepararikuarhini tumbi ma para ambakiti uámba máeni ka sési orhejtsïkuni familiani? (Ístu exe je imajenini).

¹⁷ Úpiringari tembuchani ka familieri orhejtsïkutiini. Ísï eska na uandapka Jesúsi, jarhastiksï erachiicha engaksï eratsejka no tembuchani (Mat. 19:12). Joperu engari eratsejka tembuchani, jatsiskari para kumplirini chiiti responsabilidadi familia jingoni (1 Kor. 11:3). Tata Diosï Jeoba uékasïndi eska acheeti xénchaaka témbani, eska exeaka ambe uétarhinchasïni, néna pʼikuarherasïni ka eska sési jauaka Tata Diosï Jeoba jingoni (Éfes. 5:​28, 29). Eskachi na exeka ini jorhenguarhikua jimbo, komu sési eratsentani, janhanharhiani nanakeechani ka mintsinharhikueni, i ambekini jarhuataati parari ambakiti uámba máeni ka sési orhejtsïkuni familiani.

18. ¿Néna uaa tumbi ma prepararikuarhini para ambakiti taati máeni?

¹⁸ Úpiringari uájpeechani kánguarhiani. Engari tembuchaska jamberiri niáraaka uájpeechani kánguarhiani. Tata Diosï Jeoba ambakiti ejemplu máesti komu taati ka tʼuri uaaka májkueni úni (Éfes. 6:4). Tata Diosï Jeoba uánikua kʼuiripuechani japarini uandaspti eska xénchasïreenga imeeri Uájpa Jesúsini, ka eska jaiapanhentasïreenga (Mar. 1:11). Engari niáraska taatiini, sési japirindi eskari pʼindeaka arhiani chiiti uájpeechani eskari xénchaasïnga ka felisitariuani engaksï sési ambe uaaka. Taatiicha engaksï Tata Diosï Jeobaeri ejempluni seguiriijka, jarhuataasïndiksï imeeri uájpeechani paraksï jindeeni ambakiti kristianuecha. Engari sési kaaska chiiti familiarhu anapuechani ka kúnguarhikuarhu anapuechani ka pʼindeni arhiani eskari xénchaasïnga ka jukaparharaani, jorhenguarhini jauakari parari tátsekua ambakiti taati máeni (Juanu 15:9). I ambekini no solu jarhuataati para jiáni engari tembuchaaka ka kaani uájpeechani, sino ístu desde iásï uératini, Tata Diosï Jeoba kánikuakeni jukaparharaati ka ístu chiiti familia ka kúnguarhikua.

¿KA IÁSÏRI AMBE UAAIA?

19, 20. ¿Ambe jatsiski para úni tumbi sapichu ma para úni kristianu máeni enga jánhaskatiika? (Exea je imajeniichani engaksï ueenakuarhu jaka i rebistarhu).

¹⁹ Engari tumbi sapichu máeka, miá eskari jatsiska para kánikua jánguarhintani parari úni kristianu máeni enga jánhaskatiika. Jatsiskari para ambakiti ejempluechani exeani, jorhenguarhini sési eratseni, mintsinharhikueni, jorhenguarhini máru ambe úni ka prepararikuarhini para sánderu orhepatini.

²⁰ Engari eratsejka ambe engari jatsika para úni, jamberiri ísï pʼikuarherajka enajkiri no uaa úni indeni ambe. Joperu asï no sési pʼikuarhera, ¡uaakari ísï úni! Asï mirikurhi eskakeni Tata Diosï Jeoba uékasïnga jarhuatani (Is. 41:​10, 13). Ístu erachiicha ka pirenchiicha engaksï chiiti kúnguarhikuarhu jaka, méntkisïksïni uaati jarhuatani. Engari niáraaka imani ambe úni enga Tata Diosï Jeoba uéjka, sésiri irekuarhiaka ka kánikuari tsitiaka. Juchaksïni kánikua xénchasïnga ka uékasïngachi eskakeni Tata Diosï Jeoba seguiriuaka jarhuatani parari úni jindeeni kristianu ma enga jánhaskatiika (Prov. 22:4).